سەردێر

حكومەتی هەرێم تا ئێستا نرخی بەنزینی هەرزان نەكردووە

خەڵك-
سەرەڕای بەڵێنی حكومەتی هەرێم بۆ هەرزان كردنی نرخی بەنزین و پێدانی بەنزین بە كارت بە تاكسی و پاسەكان، بەڵام تا ئێستا نرخەكەی هەرزان نەكردووە و پەڕلەمانیش چاوەڕێی دواین هەناوی وەزارەتی سامانە سروشتییەكانە و پەڕلەمانتارێكیش دەڵێت: “هەفتەی داهاتوو بەدواداچوون بۆ پێشنیارەكانیان دەكەنەوە و قسە لەگەڵ وەزیری سامانە سروشتییەكان دەكەنەوە”.

گوڵیزار ڕەشید سندی، جێگری سەرۆكی لیژنەی وزە و سامانە سروشتیەكانی پەڕلەمانی كوردستان بۆ (خەڵك) ڕایگەیاند، چاوەڕێی بڕیاری وەزارەتی سامانە سروشتییەكان دەكات سەبارەت بە نرخی بەنزین و ئەو پێشنیارانەی پێماندوان بۆ چارەسەری كێشەی بەنزین، بۆیە هەفتەی داهاتوو بەدواداچوون بۆ ئەو پرسە دەستپێدەكەینەوە.

ڕاشیگەیاند، داوامان لە وەزارەت كردووە كێشەی بەنزین بەزووترین كات چارەسەر بكەن و ئەوانیش بەڵێنیان داوە، بەڵام داوایان كردووە كاتیان پێ‌ بدەن تاوەكو كێشەكە چارەسەر بكەن و نرخی بەنزین هەرزان بكەن.

وتیشی، “بەپێی پێشنیارەكانی ئێمە، ئەو بەنزینەی لەناو هەرێم بەرهەم دەهێنرێت بڕەكەی زیاد بكرێت و بە یەك نرخی یەكگرتوو بدرێتە سەرجەم شارەكان و بەنزینخانەكان و جیاوازی نرخ نەهێڵدرێت”.

سەبارەت بە هەرزانی نرخی بەنزین لە عێراق لەكاتێكدا بەشێكی ئەو بەنزینە لە پاڵێوگەكانی هەرێمەوە دەچێتەوە بۆ عێراق، ئەو پەڕلەمانتارە ئاماژەی بەوەكرد، ئەو پاڵێوگانەی لە هەرێم هەن نەوتی خاوی عێراقیان پێ‌ دەدرێت و دواتر دەیپاڵێون و بەرهەمەكانی وەكو بەنزین دەدەنەوە بە عێراق خۆی، بەڵام لە هەرێم ئەو بڕە نەوتی خاوەی دەدرێت بە پاڵێوگەكان كەمە و بەشی پێداویستی ناوخۆ ناكات.

ئاشكراشی كرد، پێنشیارێكی دیكەمان ئەوە بووە بڕی پێدانی نەوتی خاو بە پاڵێوگەكان زیاد بكرێت و هەروەها دەروازەكان ئازاد بكرێن بۆ هێنانی بەنزین بە كوالێتی باش و مۆڵەتی زیاتر بدرێت بە بازرگانان و هەروەها ڕێگە بدرێت ڕۆژانە بەنزین لە عێراقەوە بهێنرێتە هەرێم.

دەشڵێت: “جەختمان لەوەكردۆتەوە تەكسی و پاس ڕۆژانە بەنزینیان بدرێتێ‌ بەنرخی هەرزان و بەپێی بەدواداچوونیش ئەنجوومەنی وەزیران ڕەزامەندی بۆ ئەوە داوە”.

جێگری سەرۆكی لیژنەی وزە و سامانە سروشتیەكانی پەڕلەمانی كوردستان جەختیشی كردەوە، كە هاووڵاتیانی هەرێمیش وەك هاووڵاتی عێراقی مافی ئەوەیان هەیە لەلایەن حكومەتی عێراقییەوە نەوت و بەنزین بەنرخی هەرزان بۆیان ڕەوانە بكرێت.

لە ئێستادا لە بەنزینخانەكانی هەرێم جگە لە بڕێكی كەمی بەنزینی عێراقی، كە بە 690 دینار دەدرێت بە شۆفێران ئەویش قەرەباڵغی زۆری لەسەرە، نرخی بەنزین گرانە و لیترێك بەنزینی نۆرماڵ بە 850 دینارە و موحەسەن بە 975 دینار و سوپەر بە 1050 دینارە.