سەردێر

لیرە و تمەن بەهایەكی زۆریان لەدەستدا

خەڵك-
ڕۆژ بەڕۆژ نرخی لیرەی توركی و تمەنی ئێرانی بەرامبەر بە دۆلاری ئەمریكی ڕوو لە دابەزین دەكات و ئەمڕۆ لیرە 8%ی بەهاكەی لەدەستداوە.

لەچەند ڕۆژی ڕابردوودا نرخی 100 دۆلاری ئەمریكایی گەیشتە هەزار لیرە و بەیانی ئەمڕۆ بەهای لیرە كەمێك بەرزبووەوە بۆ 940، بەڵام بەپێی هەواڵی ئاژانسە جیهانییەكان، ئێوارەی ئەمڕۆ بەهاكەی بە رێژەی (٨٪) دابەزی و هەزار و ١٤ لیرە بەرامبەر بە (١٠٠) دۆلاری ئەمریكی مامەڵەی پێوە كرا.

ڕەوەند میرزا، لە بازاڕی دۆلارەكەی سلێمانی بۆ (خەڵك) ڕایگەیاند، بەپێی نرخی ئاڵوگۆڕی دراوە بیانییەكان لە بازاڕەكانی هەرێم، ئەمڕۆ 100 دۆلار بە 2 ملیۆن و 738 هەزار تمەن مامەڵەی پێوەكراوە.

ئاماژەی بەوەشكرد، بەیانی ئەمڕۆ بەهای 100 دۆلار بەرامبەر بە 940 لیرەی توركی بووە.

شكانی بەهای لیرەی توركی بەو ڕێژەیە بۆ زیادبوونی قەبارەی هەڵئاوسان لەو وڵاتە دەگەڕێتەوە، كە لەماوەی 2 مانگی ڕابردوودا، كە 600 لیرە بە 100 دۆلار بوو بەهاكەی شكاوە بۆ زیاتر لە هەزار لیرە.

لە مانگی ڕابردوودا ڕەجەب تەیب ئەردۆغان، سەرۆكی توركیا وەك ڕێكارێك سەبارەت بە شكانی بەهای لیرە بڕیاریدا بە دوورخستنەوەی بەڕێوەبەری 3 بانك و ئەوەش ناڕەزایی حزبە ئۆپۆزسیۆنەكانی لێكەوتەوە و بە “دەستوەردان” لە كاروباری بانك تۆمەتباریان كردبوو.