سەردێر

دابەشكردنی نەوت گەیشتە ناو سلێمانی و نرخەكەی هەرزان دەبێت

خەڵك-
ماوەی هەفتەیەكە دابەشكردنی نەوتی سپی بەسەر هاووڵاتیاندا لە دەرەوەی شارەكان دەستی پێكردووە و سبەینێ‌ دەگاتە ناو شاری سلێمانی و نرخی نەوتی بازرگانی لە بازاڕدا دادەبەزێت.

حاجی دلێر، بەرپرسی بەشی فرۆشتن لە بەڕێوەبەرایەتی نەوت و كانزاكانی سلێمانی بۆ (خەڵك) وتی، بەپێی ئەو بڕە نەوتەی حكومەتی هەرێم دابینی كردووە لە هەفتەی ڕابردووەوە لە دەرەوەی شارەكان و ناوچە شاخاوی و ساردەكان دەستمان بە دابەشكردنی نەوت كردووە و ناوچەكانی پێنجوێن و شارباژێڕ و پشدەر و دەورووبەری دابەشكراوە.

ڕاشیگەیاند، سبەینێ‌ دوو شەممە ڕێكەوتی ۱ـ۱۱ـ۲٠۲۱ لەناو سەنتەری شاری سلێمانی لە مەڵبەندی (5 و 6)ەوە دەست دەكرێتەوە بەدابەشكردنی نەوت و هەر ماڵێك بڕی ۲٠٠ لیتری بەنرخی ٥٥ هەزار دینار پێ‌ دەدرێت.

لای خۆشیەوە، ڕزگار عەبدوڵڵا، كە كاری فرۆشتنی نەوت دەكات بۆ (خەڵك) ئاماژەی بەوەكرد، لە ماوەی ڕابردوودا نرخی بەرمیلێك نەوت گەیشتە نزیكەی 180 هەزار دینار، بەڵام لەگەڵ دەستكردن بە دابەشكردنی نەوت نرخەكەی هاتەخوار بۆ 155 هەزار دینار.

وتیشی، “ئەگەر لە سبەینێوە لەناو شار دەست بكرێت بە دابەشكردنی نەوت، ئەوە ئەگەری زۆرە نرخی نەوت لە بازاڕدا زیاتر هەرزان ببێت و كاریگەری دەبێت”.