سەردێر

نەوت مۆتەكەی ژیانی هاووڵاتییانی هەرێمە

"هاووڵاتی لە نێوان بەرداشی حكومەت و بازرگاناندایە"

خەڵك

پسپۆڕێكی دارایی و ژمێریاری دەڵێت، نەوت مۆتەكەی ژیانی هاووڵاتییانی هەرێمە، چونكە حكومەتی هەرێم كە خاوەنی نەوتێكی زۆرە نەك نەیتوانیوە سودی لێوەربگرێت، بەڵكو بەهۆی نەوتەوە زیاتر لە 16 ملیار دۆلار قەرزی هاتووەتەسەر و بارگرانی بۆ هاووڵاتییان دروستكردووە.

نەبەرد كەریم، مامۆستای زانكۆ و پسپۆڕی دارایی و ژمێریاری بە (خەڵك)ی ڕاگەیاند، نەوت مۆتەكەی ژیانی هاووڵاتییانی هەرێمی كوردستانە، چونكە حكومەتی هەرێم كە خاوەنی نەوتێكی زۆرە نەك نەیتوانیوە سودی لێوەربگرێت، بەڵكو بەهۆی نەوتەوە زیاتر لە 16 ملیار دۆلار قەرزی هاتووەتەسەر و نەوت هۆكار بووە بۆ ئەوەی حكومەتی هەرێم بودجەی ببڕدرێت و زیاتر لە حەوت ساڵ هاووڵاتییانی هەرێم لە قەیرانی دارایدا بژین.

ئاماژەی بە ئەوەشكرد، لە هەموو دونیا و بە تایبەتی لە ئەو وڵاتانەی لە ڕێكخراوی ئۆپێَكدا تۆماركراون و بە وڵاتی نەوتی ئەژماركراون تا ڕادەیەكی زۆر باش توانیویانە سود لە ئەو سەرچاوەیە ببینن و وڵاتی پێ ببوژێننەوە و خزمەتگوزاری تەواوەتی پێشكەش بە هاووڵاتییانی خۆیان بكەن بۆ نموونە وڵاتەكانی ئیمارات، قەتەر، سعودیە و كۆمەڵێك وڵاتی دیكەی نەوتی.

“تەنها حزب و بەرپرسان سودمەندی نەوتن”

وتیشی، لە هەرێمی كوردستاندا ئەو سەرچاوەیە هەیە كە دەكرێت سودی باش بگەیەنێت بە حكومەت و هاووڵاتییان، بەڵام ئەمە نەكراوە و ئەوەی تاكو ئێستا لە سێكتەری نەوتدا كراوە تەنها بۆ خزمەتی حزب و خێزان و قەبیلەكان بووە.

” پێویستە ئیدارەدانی نەوت بەشێوەیەكی دروست بێت”

دەشڵێت، بۆ ئەوەی چارەسەری ئەم دۆخە بكرێت پێویستە سێكتەری نەوت و ئیدارەدانی بە شێوازێكی تەندروست بێت، لە ئێستا بەدواوە ئەگەر حكومەت مەبەستی بێت دەتوانێت سود لەو سێكتەرە وەربگرێت بۆ ئەوەی خزمەتی هاووڵاتییان بكات.

” حكومەت پێداچوونەوە بە گرێبەستە نەوتییەكاندا بكات”

باس لە ئەوەشدەكات، دەكرێت حكومەتی هەرێم پێداچونەوە بە سەرجەم گرێبەستەكانی كۆمپانیا نەوتییەكاندا بكات بۆ ئەوەی ئەو خەرجییە زۆرە لەسەر هاووڵاتییان و حكومەت كەم بكاتەوە كە كەڵەكە بووە.

“نەوت بدرێتە كۆمپانیا ناوخۆییەكان”

نەبەرد كەریم وتیشی: فرۆشتنی نەوت تەندروست بكرێت و بدرێتە كۆمپانیا ناوخۆییەكان و ئەو داهاتە زۆرە بۆ كۆمپانیا بیانییەكان نەڕوات، بەو داهاتە سێكتەرەكانی دیكەش ببوژێندرێنەوە و گەشەیەكی باش بە ئابووری هەرێم بدرێت.