سەردێر

لەسەر گرانی بەنزین داوای لێپرسینەوە لە وەزیرێكی هەرێم دەكرێت

خەڵك-

لەسەر گرانبوونی نرخی بەنزین ژمارەیەك پەڕلەمانتاری پەڕلەمانی كوردستان داوای بانگهێشتكردنی وەزیری سامانە سروشتییەكان دەكەن بۆ بەردەم پەڕلەمان.

سەرەڕای چەند جارێك بەڵێندان بۆ هەرزان كردنی نرخی بەنزین و هاتنی بەنزین لە عێراقەوە، بەڵام نەك نرخی بەنزین و سووتەمەنی هەرزان نەبوو، بەڵكو چەند ڕۆژێكە نرخەكەی هێندە بەرزبۆتەوە، كە لەتوانای كڕینی هاووڵاتیان نەماوە لەكاتێكدا لە هەرێمی كوردستان چەند پاڵێوگەیەك هەن و هاوكات عێراق بەنزین لەو پاڵێوگانە دەپاڵێوێت و لیتری بە 450 دینار بە شۆفێران دەفرۆشێت.

بەپێی یاداشتێك، كە ئاڕاستەی سەرۆكایەتی پەڕلەمانی كوردستان كراوە و وێنەی دراوە بە (خەڵك) ژمارەیەك ئەندامی پەرلەمانی كوردستان لەسەر گرانبوونی نرخی بەنزین داوای بانگهێشتكردنی كەمال ئەتروشی، وەزیری سامانە سروشتییەكانی حكومەتی هەرێم بۆ بەردەم پەڕلەمان دەكەن.

وەك لە یاداشتی ئەو پەڕلەمانتارانەدا هاتووە، داواكارین پاڵپشت بە ماددەی (٦٦) بڕگەی یەكەم لە پەیڕەوی ناوخۆی پەڕلەمانی كوردستان دانیشتنێكی پەڕلەمانی كوردستان بە ئامادەبوونی كەمال ئەتروشی، وەزیری سامانە سروشتییەكان ئەنجام بدرێت، لە دانیشتنەكەدا پرسی گرانبوونی نرخی بەنزین و غاز و نەوتی سپی و دابەشنەكردنی نەوتی سپی بەسەر هاووڵاتییاندا باس بكرێت.

ئەمە لەكاتێكدایە، كە حیزبی شیوعی كوردستان بە فەڕمی بانگەشە و بانگەوازی بۆ دەستپێكردنی خۆپیشاندان دژی گرانی بازاڕ ڕاگەیاند و دەڵێت: “داوا لە هاووڵاتیان دەكەین رۆژی پێنج شەممە لە پێش پەرلەمانی كوردستان لە شاری هەولێر لە پێشنیوەڕۆ بەشداری خۆپیشاندان بكەن دژی بەرزبوونەوەی نرخی سووتەمەنی و شتومەك لە بازاڕدا”.

دەقی نووسراوەكان:

No photo description available.