سەردێر

لیرەی توركی و تمەنی ئێرانی زۆرترین بەهای لەدەستدا

خەڵك-
جارێكی دیكە نرخی لیرەی توركی و تمەنی ئێرانی دابەزینيان تۆماركرد و ئەوەش بە گەورەترین و زۆرترین شكان لەو دراوانە دادەنرێت.

لەگەڵ كرانەوەی بۆرسەكانی توركیا، نرخی 100 دۆلار بە 926 لیرەی توركی مامەڵەی پێوەدەكرێت، كە ئەمە بە زۆرترین دابەزین دادەنرێت لە بەهای ئەو دراوە توركیە.

لای خۆشیەوە، ڕەوەند میرزا لە بازاڕی دۆلارەكەی سلێمانی بۆ (خەڵك) ئاماژەی بەوەكرد، ڕۆژی پێنج شەممە بەهای 100 دۆلار بە 800 لیرە بوو، بەڵام ئەمڕۆ جارێكی دیكە شكاوە.

وتیشی، “نرخی تمەنی ئێرانی دابەزیوە و 100 دۆلار بە 2 ملیۆن و 703 هەزار تمەن مامەڵەی پێوەدەكرێت”.

لە چەند ڕۆژی ڕابردوودا، ڕەجەب تەیب ئەردۆغان، سەرۆكی توركیا وەك ڕێكارێك سەبارەت بە شكانی بەهای لیرە بڕیاریدا بە دوورخستنەوەی بەڕێوەبەری 3 بانك و لای خۆشیەوە، كەمال كڵیچدارئۆغڵو، سەرۆكی پارتی گەلی كۆماری (جەهەپە) ناڕەزایی توندی ئاڕاستەی ئەردۆغان كرد و وتی، “پێویستە دەست لەكاروباری بانكەكان وەرنەدەیت و كاری سیاسی تێكەڵی كاروباری بانك نەكەیت و سەربەخۆی بۆ بگەڕێنێتەوە”.