سەردێر

وەرگرانی پێشینەی خانوبەرە و هاوسەرگیری هۆشداری دەدەن

خەڵك
دانیشتوانی گوندی گردەنازێ‌ داوا دەكەن بڕیاری لێخۆشبوون بۆ قەرزەكانیان بدرێت كە بۆ خانووبەرە و هاوسەرگیری كردوویانە و دەڵێن ئەگەر ئەو بڕیارە نەدرێت هەڵوێستمان دەبێت.

هیوا عوسمان، نوێنەری گوندی گردەنازێی سەربە قەزای سەیدسادق بە (خەڵك)ی ڕاگەیاند، زیاتر لە 120 ماڵین لە گوندەكەدا كە پێشینەی هاوسەرگیری و خانووبەرەمان وەك قەرز لە حكومەت وەرگرتووە، بەڵام ئێستا سویەكی زۆری خراوەتەسەر و بۆ هەر یەك ملیۆنێك زیاتر لە 25 هەزار سوو خراوەتەسەری، بۆیە داوا دەكەین چاوێك بە بڕیاری لێسەندنەوەی ( قیستی پێشینەی خانوبەرە و هاوسەرگیری)دا بگێڕدرێتەوە.

وتیشی، %80 ی دانیشتوانی گوندەكە سەرقاڵی كشتوكاڵ و ئاژەڵدارین و هیچ مووچەیەكیان نییە توانای دانەوەی قەرزەكانیان نییە، بۆچی حكومەت خۆی قەرزی فەرمانبەران ناداتەوە، بەڵام داوا لە هاووڵاتییان دەكات قەرزەكانیان بەنەوە.
ئاماژەی بە ئەوەشكرد، مووچەی ئەو كەسسانە دەبڕدرێت كە بوون كەفیلی ئێمە بۆ وەرگرتنی پێشینەكان.

نوێنەرانی وەرگری پێشینەی خانووبەرەو هاوسەرگیری لە بانگەوازێكدا كە ئاراستەی چەند لایەنێكیان كردووە دەڵێن،” داوا دەكەین كە چاوێك بە بڕیاری لێسەندنەوەی ( قیستی پێشینەی خانوبەرە و هاوسەرگیری)دا بگێڕنەوە ، هەزاران هاووڵاتی ئەم وڵاتە خێر لەخۆ نەدیوە بەهۆی قەیرانی دارایی و نەبونی كارو كاسپیەوە ناتوانن قیستی ساڵانەیان بدەنەوە و توشی سوو بوین ، بەتایبەت ئەوانەی هیچ موچەیەكیان لەحوكومەت هیچ شوێنێكەوە نییە”.

هەروەها دەشڵێن، پێویستە بە زووترین كات بڕیاری لێخۆشبوون لەو پێشینانە بدرێت ئەگەرنا خۆپیشاندان و ناڕەزاییی دەردەبڕین.

دەقی بانگەوازەكە..

بەناوی خوای بەخشندەو میهرەبان

بانگەواز
بۆ بەڕێزان
سەرۆكایەتی پەرلەمانی كوردستان
سەرۆكی هەرێمی كوردستان
سەرۆكی حوكومەتی هەرێمی كوردستان
زانایانی ئاینی
دادوەر و پارێزو یاساناسان

بەڕێزان ئێمە وەك نوێنەری هەزاران هاوڵاتی بەش مەینەتی كوردستان داوا لەبەڕێزتان دەكەین كە چاوێك بە بڕیاری لێسەندنەوەی ( قیستی سولفەی خانوبەرە و سولفەی زەواج)دا بگێڕنەوە ، هەزاران هاووڵاتی ئەم وڵاتە خێر لەخۆ نەدیوە بەهۆی قەیرانی دارایی و نەبونی كارو كاسپیەوە ناتوانن قیستی ساڵانەیان بدەنەوە و توشی سوو بوین ، بەتایبەت ئەوانەی هیچ موچەیەكیان لەحوكومەت هیچ شوێنێكەوە نیە ….
بەڕێز سەرۆكی حوكومەت ئێوە بۆخۆتان ناتوانن قەرزی فەرمانبەرانتان بدەنەوە لەبەر قەیرانی دارایی لەكاتێكدا بەهەزاران سەرچاوەی داهاتان لەبەردەستە ئاخر كەی ڕەوایە ئێمە قیستەكانمان لەم كاتەدا بەزیادەشەوە لێوەربگرنەوە ؟
حوكومەتی بەعەس كە دوژمنی سەرسەختی گەل بوو چەندین جار لە بڕیاری لێخۆشبونی قیستەكانی سولفەی دەركردوە!
ئێمەش لە بەڕێزتان خوازیارین بۆ ئاشتكردنەوەی هاوڵاتیانی بەشمەینەتی كوردستان بڕیارێكی دروست بدەن بۆ لێخۆشبونی قەرزی ( سولفەی خانو بەرە و سولفەی زەواج )
ئەگەر ئەو بڕیارە بەزوترین كات دەرنەكەن ئێمەش بڕیاری گرتنەبەری ڕێكاری خۆپیشاندان و ناڕەزایی دەدەین …
تكایە ئێوەش پشتیوانمانبن بەڕێزان نوێنەرانی گەل پەرلەمانتاران و زانایانی سەنگەری میحراب مینبەر و دادوەرو یاساناسان ….

نوێنەرانی وەرگری قەرزی خانوبەرەوسولفەی زەواج