سەردێر

بازاڕی كڕینی خانووبەرە لە هەولێر گەرمە

لەماوەی دوو هەفتەدا 30 هەزار شوقە فرۆشراون

خەڵک-ئارام سەردار

ڕاوێژکارێکی کڕین و فرۆشتنی موڵک لەهەولێر ڕایدەگەیەنێت، لەماوەی کەمتر لەدوو هەفتە نزیکەی 30 هەزار شووقە لەهەولێر فرۆشران، دەشڵێت لە 98٪ی کورد ئەو شووقانەی کڕیوە.

سەردار ئازاد، ڕاوێژکاری کڕین و فرۆشتنی موڵک و بەڕێوەبەری کۆمپانیای ئەملاک بۆ عەقارات بە(خەڵک)ی ڕاگەیاند، گروپی لالاڤ لەهەولێر، کە گروپێکی گەورەی شووقەی نیشتەجێبوونن لەهەولێر دوو پڕۆژەی نوێی شووقەی نیشتەجێبوونیان هێنایە بازاڕ کەنزیکەی 30 هەزار شووقە دەبێت، دەکەوێتە سەر شەقامی 150 مەتری و 120 مەتری، لەماوەی کەمتر لەدوو هەفتە هەمووی فرۆشرا.

دەشڵێت، هۆکاری خێرا فرۆشتنی شووقەکان دەگەڕێتەوە بۆ بوونی ناوبانگی باشی کۆمپانیا، هەروەها قستی درێژخایەنی 10ساڵی وایکرد بەخێرایی بفرۆشرێت، ڕەتیشی کردەوە خەڵکی عەرەب شووقەکانی کڕیبێت، بەڵکو 98٪ی کورد ئەو شووقانەی کڕیوە، بەهۆێ نەبوونی بانکی باوەڕپێکراو کە هاوڵاتی پارەی تێدا دابنێت، هاوڵاتی پارە دەخاتە ناو عەقارات داهاتیشی دەبێت.

ئەوەشی خستەڕوو، لەهەولێر جمووجۆڵێکی باشی عەقارات هەیە و لەهیچ شوێنێک بەم شێوەیە نیە، چونکە متمانە و ئاسایش هەیە.