سەردێر

داوا دەكرێت نرخی عەلەف داببەزێندرێت

یەكێكە لە هۆكارەكانی گرانبوونی مریشك

خەڵك
بەرێوەبەری كێڵگە پەلەوەرییەكان دەڵێت، سەرەڕای هەڵگرتنی گومرگ لەسەر كەرەستە عەلەفییەكان، بەڵام نرخی عەلەف هەر بەرزە و بەجۆرێك لەماوەی مانگ و نیوێكدا یەك تۆن عەلەف 100 بۆ 120 دۆلاری چووەتەسەر.

نازم عەبدوڵا، بەڕێوەبەری كێڵگە پەلەوەرییەكان بە (خەڵك)ی ڕاگەیاند، پێداویستی كێڵگەكانی پەلەوەریی نرخیان گران بووە كە هۆكاری بەرز بوونەوەی نرخی مریشكن بە تایبەت عەلەف كە لەماوەی مانگ و نیوێكدا یەك تۆن عەلەف 100 بۆ 120 دۆلار گران بووە، بۆیە داوای دابەزاندنی ئەو نرخە دەكەین.

ئاماژەی بە ئەوەشكرد، دەستخۆشی لە وەزیری كشتوكاڵ دەكەین كە لەسەر داوای ئێمە گومركی لەسەر ئەو كەرەستە عەلەفیانە هەڵگرتووە كە بۆ كارگە عەلەفییەكان دێت، بەڵام 28 بۆ 30 كارگە لە دهۆكەوە هەتا كەلار بە یەك تەلەفۆن نرخ گران دەكەن و هەرزانی ناكەن لە كاتێكدا گومرگیشیان لەسەر هەڵگیراوە.

وتیشی، گلەیمان لە لایەنە پەیوەندیدارەكان هەیە كە بۆچی كار بۆ دابەزاندنی نرخی عەلەف ناكەن؟ هەروەها ئەو گلەییەمان لە كەناڵەكانی ڕاگەیاندنیش هەیە كە بۆچی ئەو بابەتە ناوروژێنن؟

پێشتر نازم عەبدوڵا، بە خەڵكی ڕاگەیاندبوو كە بەرزبوونەوەی نرخی مریشك كاتییە و لەماوەی نزیكەی 10 ڕۆژی دیكە دادەبەزێت.