سەردێر

نرخی دۆلار لە ساڵی داهاتوودا گۆڕانكاریی بەسەردا دێت؟

لیژنەی دارایی وەڵام دەداتەوە

خەڵك-
لیژنەی دارایی لە پەرلەمانی عیراق، لەبارەی لێدوانەكانی وتەبێژی ئەنجومەنی وەزیران سەبارەت بە پاشەكشەنەكردنی حكومەت لە يڕياری نرخی خەرجی دۆلارەوە لە بودجەی ساڵی داهاتوو، قسە دەكات.


جەمال كۆچەر ئەندامی لیژنەی دارایی پەرلەمانی عیراق لە لێدوانێكی ڕۆژنامەوانیدا ڕایگەیاند”پرۆژە یاسای بودجەی 2022 نەگەیشتۆتە پەرلەمان، بۆیە لیژنەی دارایی هیچ زانیارییەكەی نییە لەبارەی چارەنوسی نرخی دۆلار لە بودجەی ساڵی داهاتوو”.

كۆچەر پێشبینی كرد، “نرخی خەرجی دۆلار وەك خۆی بمێنێتەوە بەهۆی باشنەبوونی ڕەوشی ئابوری كە لێوەی حكومەت بتوانێت نرخی خەرجی دۆلار بگێڕێتەوە نرخەكەی پێشووی و بەبێ‌ كێشە مووچەی فەرمانبەران دابەش بكات”.

دوێنێ‌ دوو شەممە، حەسەن نازم وتەبێژی ئەنجومەنی وەزیرانی عیراق ڕایگەیاند، نرخی خەرجی دۆلار لە بودجەی ساڵی داهاتوو وەك خۆی دەمێنێتەوە و لەئێستاشدا داراییەكی وەها لەبەردەست نییە بەهۆی كەڵەكەبوونی كورتهێنان.