سەردێر

خولی مەشقی كارمەندانی سەر سندوقی دەنگدان دەستپێدەكات

خەڵك-
لقی هەولێر كۆمسیۆنی باڵای سەربەخۆی هەڵبژاردنەكانی عێراق ئاشكرای دەكات، كە ئەوانەی ناویان بۆ سەر سندوقی دەنگدان دەرچووە دەستبەكاردەبن و تیروپشكی دیكە ناكرێت و سەرچاوەیەكیش دەڵێت: “ئەم هەفتەیە مەشق كردن بەو كارمەندانە دەستپێدەكات”.

سەرچاوەیەك لە ئۆفیسی هەڵبژاردنەكانی سلێمانی بۆ (خەڵك) ڕایگەیاند، كە خولی مەشقی كارمەندانی ناو كۆمسین تەواو بووە و لەم هەفتەیەوە خولی مەشقی ئەو كارمەندانە دەستپێدەكات، كە ناویان بۆ سەر سندوقی دەنگدان دەرچووە.

ڕاشیگەیاند، خولەكە لە ڕۆژی دوو شەممەوە دەستپێدەكات و بۆ ماوەی 5 ڕۆژ بەردەوام دەبێت و هەر مەڵبەندێكی دەنگدان لەسنووری خۆی دەست بە مەشق دەكات.

ئاشكراشی كرد، بڕی پارەی تەرخان كراو بۆ هەر كارمەندێك، كە فەرمانبەر بێت 150 هەزار دینار و سوپاس و پێزانینێكی سەرۆك وەزیرانە و ئەوانەشی فەرمانبەر نین بڕێك زیاتریان پێ‌ دەدرێت.

لای خۆشیەوە، ئۆفیسی هەڵبژاردنەكانی هەولێری سەر بە كۆمسیۆنی باڵای سەربەخۆی هەڵبژاردنەكانی عێراق لە ڕاگەیەنراوێكدا ئاماژەی بەوەكردووە، ئەو تیروپشكە ئەلیكترۆنییەی لە ئۆفیسی نیشتمانی لە بەغدا ئەنجامدرا بۆ هەڵبژاردنی فەرمانبەرانی ڕۆژی دەنگدان (بۆ ماوەی یەك ڕۆژ) و ئەنجامەكەشی لەسەر وێبسایتی فەرمی كۆمسیۆن بڵاوكرایەوە، تیروپشكی كۆتاییە و هیچ تیروپشكێكی تر ئەنجامنادرێت.

ڕاشیگەیاندووە، ئەوانەی ناویان دەرچووە لە تیروپشكی ئەلیكترۆنی وەك فەرمانبەرانی ڕۆژی دەنگدان خۆمان پەیوەندییان پێوەدەكەین بۆ پێدانی وردەكاریی تەواو لەبارەی خولی ڕاهێنان و دەستبەكاربوونیان.