سەردێر

ماددەی دیكەش بۆ بەشەخۆراكی هاووڵاتیان زیاد دەكرێت

خەڵك-
وەزارەتی بازرگانی عێراق گەیشتنی بڕێكی دیكەی لە بەشەخۆراكی مانگانەی هاووڵاتیان ڕاگەیاند و ئاشكرای دەكات، كە ماددەی نیسك-ی هاڕاو بۆ بەشەخۆراك زیادكراوە و لەگەڵ لەتكەنۆك و دۆشاوی تەماتە و فاسۆلیا دابەش دەكرێت.

بەپێی بڕیاری وەزارەتی بازرگانی عێراق لە مانگی 7ی ئەمساڵەوە بەشەخۆراكی مانگانە بەشێوەی (سەبەتەی خۆراك) دابەش دەكرێت، كە پێكهاتووە لە (برنج و شەكر و زەیت لەگەڵ لەتكەنۆك و فاسۆلیا و دۆشاوی تەماتە) هاوكات نیسكی هاڕاویشی بۆ زیاد كراوە.

وەزارەتی بارزگانی عێراق لە ڕاگەیەنراوێكدا ئاماژەی بەوەكردووە، دوو ماددەی بەشەخۆراك گەیشتۆتە كۆگاكانی خۆراك، كە پێكهاتووە لە نیسكی هاڕاوی فەردەی 50 كیلۆگرامی (كەنەدی) و لەتكەنۆكی فەردەی 50 كیلۆگرامی (ڕوسی) و بۆ ئەم مانگە دەدرێتە بریكارەكانی خۆراك.

محەمەد حەنون، بەڕێوەبەری گشتی كۆمپانیای گشتی بازرگانی خۆراك ئاماژەی بەوەشكردووە، سەرجەم كارمەندانی هونەری لە بەشی كۆنتڕۆڵی جۆری ئاگاداركراونەتەوە بۆ وەرگرتنی نمونە لەو دوو ماددە خۆراكییە و ئەنجامدانی پشكنین لە تاقیگەكان تاوەكو لە جۆر و تەندروستی خۆراكەكان دڵنیا ببینەوە پێش دابەشكردنی.

جەختیشی كردۆتەوە، ڕاستەوخۆ دوای دەرچوونی ئەنجامی پشكنینەكان دەست دەكەین بە دابەشكردنی بەسەر بریكارەكانی خۆراكدا لەسەرجەم پارێزگاكان.