سەردێر

قائیمقامیەتی سلێمانی؛ لیژنەی ریستۆرانت نزیكەی 60 شوێنی داخستووە

خەڵك
لیژنەی ریستۆرانتی قائیمقامیەتی سلێمانی ئاماری كاروچالاكی شەش مانگی رابردوی خۆی بڵاودەكاتەوە كە زیاتر لە 1500 سەردانی ئەنجام داوە و 56 شوێنیشی داخستووە.

كوردۆ عەزیز، سەرۆكی لیژنەی ریستۆرانتی سەر بەلیژنە هاوبەشەكانی قائیمقامیەتی سلێمانی رایگەیاند: لە شەش مانگی رابردودا لە (1.1 بۆ 2021.7.1) لیژنەكە (1561) سەردانی بۆ كافتریا، كۆفی شۆپی كێشانی نێرگەلە، ریستۆرانت، ئۆتێل، مۆتێل و هەمو ئەو شوێنانەی هاوڵاتیان، میوانان و گەشتیارانی شاری سلێمانی بۆ بەسەر بردنی كاتێكی خۆش روی تێدەكەن، ئەنجامداوه، لەو ژمارە‌ (67) شوێنیان ئاگادار كراونەتەوە پابەندی رێنمایەكانی كاركردن بن وه ‌هەروەها (299) پسوڵەی سەرپێچیش تۆماركراوە.

وتیشی:”بەشێكی زۆری شوێنەكان پابەندی رێنماییەكانی تەندروستی، ڤێتێرنەری، گەشتوگوزار و مەرجەكانی دیكەی كاركردنن، بەڵام هەندێ جار بەهۆی چەند بارەكردنەوەی سەرپێچییەوە بڕیاری داخستنی شوێنەكان دەد‌رێت، هەربۆیە‌ لەشەش مانگی رابردودا لیژنەی ریستۆرانت بەفەرمانی قائیمقامی سلێمانی (56) شوێنی داخستوە‌ و خاوەنەكانیشیانی روبەڕوی رێكاری یاسایی توند كردوەتەوە”‌.

ڕاشیگەیاند، یاسا رێگری لە هاتوچۆكردنی منداڵی نەوجەوان و تەمەن خوار (18) ساڵ بۆ گازینۆ، كافتریای نێرگەلە و خواردنەوە كحولییەكان كردوە‌، لەلایەن لیژنە هاوبەشەكانەوە‌ خاوەن شوێنەكان ئاگاداركراونەتەوە كە تابلۆی (هاتنە ژورەوە بۆ خوار تەمەن 18 ساڵ قەدەغەیە) لە شوێنەكانیان هەڵبواسن و هیچ جۆرێك‌ خواردن و خواردنەوە یاخود نێرگەلە پێشكەش بە مناڵی نەوجەوان نەكەن، بەپێچەوانەوە شوێنەكە روبەڕوی داخستن و خاوەنەكەشی رێكاری یاسایی توندی بەرامبەر دەگیرێته ‌بەر.

لیژنەی ریستۆرانت یەكێكە لەلیژنەكانی قائیمقامیەتی سلێمانی، ئەندامانی لیژنەكە لەكەسانی شارەزا و نوێنەری فەرمانگە خزمەتگوزارییەكانی (گەشتوگوزار، تەندروستی، ڤێتێرنەری، ئاسایشی ئابوری و نشینگە)ـی سلێمانی پێكهاتون كه ‌بەشێوەیەكی زانستی پشكنین بۆ هەمو ئەو خواردەمەنی و خزمەتگوزاریانە دەكەن شوێنەكان پێشكەشی میوانەكانیانی دەكەن.