سەردێر

فاسۆڵیا و دۆشاوی تەماتە دابەش دەكرێن

خەڵك-
وەزارەتی بازرگانی حكومەتی فیدراڵ، گەیشتنی ماددەی فاسۆڵیای سپی بۆ بەرچنەی بەشەخۆراك ڕادەگەیەنێت كە وابڕیارە لە سەرەتای مانگی تەمموزدا دابەش بكریت.

بەپێی بەیاننامەیەك كە لەلایەن وەزارەتی بازرگانی عیراقەوە بڵاوكرایەوە”دابەشكردنی بەرچنەی خۆراك كە لەسەر بڕیاری ئەنجومەنی وەزیرانە، لە چوارچێوەی پلانی كۆمپانیای مەوادی خۆراكییە بۆ جێبەجێكردنی پرۆژەی بەرچنەی خۆراك و ماددەكانی شەكر و زەیت و برنج و هەردوو ماددەی دۆشاوی تەماتە و پاقڵەمەنییەكان لەخۆدەگرێت”.

هەر لە بەیاننامەكەدا هاتووە”لەدوای وەرگرتنی هەردوو ماددەی شەكر و برنج لەلایەن گەنجینەكان و لقەكانی كۆمپانیاكە لە بەغدا و پارێزگاكان، ماددەی پاقلەمەنیش (فاسۆڵیای سپی) گەیشت و لە پاش ئەنجامدانی پشكنینی لە تاقیگە بۆ سەلامەتی و شیاوی بۆ بەكاربردنی مرۆیی، دەست بە دابەشكردنی دەكرێت”.

وەزارەتی بازرگانی عیراق دەڵێت”ئەم پەرەسەندنە لە بابەتی بەرچنەی خۆراك لەڕووی زیادكردنی ژمارەی جۆرەكان و هەڵبژاردنی باشترین جۆر بە بەرزترین كوالێتی، بۆ مەبەستی دابەشكرنیەتی بەسەر هاووڵاتیاندا وەك بەرچنەیەكی خۆراكی تەواو كە دەبێتە مایەی دابەشكردنی بەشێوەیەكی ڕێكخراو و بەدەستهێنانی ڕەزامەندی هاووڵاتیان بەرانبەر بە باشی ئەو خزمەتگوزاریانەی لەلایەن وەزارەتە لەو لایەنەوە پێشكەش دەكرێت”.