سەردێر

هەڵمەتی كوژراندنەوەی ئۆتۆمبێل دژی گرانی بەنزین ئەنجام دەدرێت

خەڵك-
ڕۆژ بەڕۆژ نرخی بەنزین لە هەرێمی كوردستان بەرزدەبێتەوە و بڕیارە سبەینێ‌ لەدژی ئەوە هەڵمەتی كوژاندنەوەی ئۆتۆمبێل لە بەردەم پارێزگای سلێمانی ئەنجام بدرێت.

لە ساڵی ڕابردوودا كاتێك نرخی بەرمیلێك نەوتی خاو بۆ 5 دۆلار دابەزی، نرخی لیترێك بەنزین تەنها 150 دینار بە 3 قۆناغ ەرزان كرا، بەڵام لە ئێستادا، كە نرخی نەوت بەرزبۆتەوە نەك ئەو بڕە پارەیەی خراوەتەوە سەر، بەڵكو ڕۆژ بەڕۆژ گرانتر دەكرێت و ئەوەش ناڕەزایی لێكەوتۆتەوە.

لە هەفتەی ڕابردوودا نرخی بەنزین گران كرا و ئەوەش ناڕەزایی هاووڵاتیانی لێ‌ كەوتەوە و لە سلێمانی و بەشێكی شارەكانی هەرێم گردبوونەوە و ناڕەزایی ئەنجام درا و ئەوەش ئەنجوومەنی پارێزگای سلێمانی هێنایە دەنگ و كۆبوونەوەیەك لەگەڵ پارێزگار ئەنجامدرا و بڕیار درا كار بۆ هەرزان كردنی نرخەكەی بكرێت.

لای خۆشیەوە، جوتیار عادل، وتەبێژی حكومەتی هەرێم ڕۆژی چوار شەممەی ڕابردوو لە كۆنگرەیەكی ڕۆژنامەوانیدا وتی، “كاریان كردووە بۆ جێگیر كردنی نرخی بەنزین و ڕێگری كردن لە گران بوونی و بۆ ئەوەش حكومەت لەسەرخەتە”.

بەڵام تەنها ڕۆژێك دواتر و لەدوێنێوە نرخی بەنزین گرانتر كراوە و بەپێیی بەدواداچوونی (خەڵك) نرخی یەك ایتر بەنزینی نۆرماڵ بووە بە 750 دینار و موحەسەن 800 دینار و سوپەر 875 دینار.

بەپێی بانگەوازێك، كە لە تۆڕە كۆمەڵایەتییەكان بڵاوكراوەتەوە، هاووڵاتیان و شۆفێران ڕایانگەیاندووە، سبەینێ‌ شەممە لە كاتژمێر 10ی بەیانی هەڵمەتی كوژاندنەوەی ئۆتۆمبێل لە بەردەم بینای پارێزگای سلێمانی ئەنجام دەدەن دژی بەرزكردنەوەی نرخی بەنزین.