سەردێر

لوبنان دەبێتە نێوەندی بازرگانی مادەی هۆشبەر

دەوڵەتانی كەنداو رێگری لە سەوزە و میوەی لوبنانی دەكەن

خەڵك-

هێزە ئاسایشییەكانی لوبنان لە فڕۆكەخانەی نێودەوڵەتی بەیرووت دەستیانگرت بەسەر تۆمەتبارێك كە بازرگان و قاچاخچی مادەی هۆشبەر بووە، ئەمە لە دوای رۆژێك دێت كە حكومەتی لوبنان بەڵێنی دا بە توندی بەرەنگاری بازرگانیكردن بە مادەی هۆشبەر ببێتەوە بۆ رازیكردنی عەرەبستانی سعودیە بە هەڵگرتنی رێگری لە چوونی بەرهەمی سەوزە و میوەی لوبنانی بۆ عەرەبستان.

عەرەبستانی سعودیە هەفتەی رابردوو بڕیاریدا بە رێگری لە چوون و تێپەڕینی بەرهەمی سەوزە و میوەی لوبنانی بە خاكەكەیدا دوای ئەوەی دەستیان گرت بە كامیۆنێك هەناری لوبنانیدا كە لەنێو هەنارەكاندا مادەی هۆشبەر شاردرا بووەوە و پۆلیس رایگەیاند ئەوە چالاكی بەقاچاخبردنی مادەی هۆشبەر بووە.

لە دوای عەرەبستان وڵاتانی دیكەی كەنداو لە راگەیەنراوەكانیاندا پشتیوانیان بۆ عەرەبستان راگەیاند ئەمەش مەترسی لای لوبنان دروستكرد كە رووبەڕووی قەیرانی ئابووری بێ پێشینە دەبێتەوە بەهۆی بڕیاری ئەم دەوڵەتانەوە بۆ رێگری لە چوونی بەرهەمە لوبنانییەكان.

پۆلیسی لوبنان دەڵێت ئەو كەسەی لە فڕۆكەخانەی بەیرووت دەستگیركراوە 11 كیلۆگرام مادەی كۆكایینی پێبووە لە بەرازیلەوە هاتووە لە فڕۆكەیەكدا بووە.