سەردێر

پەرلەمانتارێك مەترسیەك ئاشكرا دەكات

خەڵك
ئەندامێكی پەڕلەمانی كوردستان ڕایدەگەیەنێت لە خاڵی سنووری حاجی ئۆمەران دیاردەیەكی مەترسیدار هەیە، كە پێویستە حكومەتی هەرێم بە زووی پێشی پێبگرێت بۆ كارئاسانی كۆتایهێنان بە لێبڕنی مووچە.

كاروان گەزنەیی ئەندامی پەڕلەمانی كوردستان لە پەڕەی خۆی لە تۆڕی كۆمەڵایەتی فەیسبووك بڵاویكردووەتەوە، لە ئێستادا دوو كۆمپانیا كە شیش و بەردی پوكە، كە بۆ دروستكردنی بلۆك بەكار دەهێندرێت، داخڵ دەكەن، لێخۆشبوونی فەرمییان لە لایەن حكومەتی هەرێم و وەزارەتی داراییەوە بۆ دەركراوە.

لە كاتێكدا كۆمپانیای شیشەكە، ڕۆژانە نزیكەی ٢٠-٢٥ بارهەڵگر داخڵی هەرێم دەكات، كە بۆ هەر باڵهەڵگرێك (٢٣) تۆن شیش هەڵدەگرێت، واتا لە ماوەی مانگێكدا، (٦٠٠) بارهەڵگر زیاتر داخڵ دەبێت و ئەو ڕێژەیەش دەكاتە (١٣،٨٠٠) تۆن.

دەشلێت، گومرگی هەر تۆنێك شیش بریتییە لە (١٢٠) دۆلار و كۆی گشتی پارەكە دەكاتە، (١.٥) ملیۆن دۆلار بەرەو ژوور و بۆ سێ مانگ دەكاتە نزیكەی (٤-٥) ملیۆن دۆلار.

ئاماژە بەوەشدەكات، هەمان هاوكێشە بۆ بەردی پوك دروستە، كۆمپانیای بەخشراو ڕۆژانە (١٠-١٥) بارهەڵگر داخڵ دەكات، واتا نزیكەی (٢٥) تۆن لە مانگێكدا و گومرگی هەر تۆنێك (٤٠) دۆلارە بە ڕسوماتەوە و پارەكەی دەكاتە سەرووی چەندان ملیۆن دۆلار.

ئەو پەرلەمانتارە ئەوەشدەڵێت، پێكەوە داهاتی گومرگی بەخشراوی ئەو دوو كۆمپانیایە چەندان ملیۆن دۆلار دەكات و حكومەت بە ڕەزامەندی وەزارەتی دارایی بەخشینی هەمیشەیی بۆ دەركردوون.

ئەوەشی وتووە، ئەگەر حكومەت ئەو جۆرە تاڵانییە و دەیانی دیكەی هاوشێوە لە خاڵە سنوورییەكان كۆتای پێبهێنێت، دەتوانێت مووچە بە زیادەوە دابەش بكات، هەرچەندە ئێستاش داهات بە زیادەوە لەبەردەستە بۆ دابەشكردنی مووچە بەبێ لێبڕین.

كاروان گەزنەیی دەشڵێت، “ئەگەر بەزووی ئەو تاڵانییە كۆتای پێ نەهێندرێت، سكاڵا لەسەر وەزارەتی دارایی تۆمار دەكەم بۆ ئەوەی ڕوونكردنەوە بدەن بۆ ڕای گشتی كە ئایا لە بەرامبەر چی لێخۆشبوونییان بۆ ئەو دوو كۆمپانیایە دەركردووە و بەڵگەی تەواویشم لەبەردەستە”.