سەردێر

عیراق، بڕی هەناردە و داهاتی نەوتی مانگی ڕابردوو ڕادەگەیەنرێت

خەڵك-
وەزارەتی نەوتی عیراق بڕی نەوتی هەناردەكراو و داهاتەكەی لە مانگی ئاداری ڕابردوو ئاشكرا دەكات.

بەپێی بەیاننامەیەك كە ئەمڕۆ پێنج شەممە لەلایەن وەزارەتی نەوتی عیراقەوە بڵاوكرایەوە”، بەپێی داتاكانی هەناردەی نەوت، كە لەلایەن كۆمپانیای سۆمۆوە پێیان دراوە، لە مانگی ئاداری ڕابردوو بڕی 91 ملیۆن و 311 هەزار و 929 بەرمیل نەوت هەناردەی بازاڕەكانی جیهان كراوە”.

هەر لە بەیاننامەكەی وەزارەتی نەوتدا هاتووە”كۆی داهاتی بەدەستهاتوو دەكاتە 5 ملیار و 782 ملیۆن و 711 هەزار دۆلار”، ئەمەش بەراورد بە مانگی پێشوو ڕووی لە زیادبوون كردووە.

وەزارەتی نەوتی عیراق دەڵێت”بەبۆنەی بەرزبوونەوەی بەهای نەوت لە بازاڕی جیهانیدا هەر بەرمیلێك نەوت بە بڕی 63 دۆلار و 32 سەنت فرۆشراوە”، ئەمەش براورد بە مانگی ڕابردوو كە نرخی بەرمیلێك كەمتر بوو لەم نرخەی ئێستا، بەرزبوونەوەی بەرچاوی بەخۆوە بینیوە.