هەڤاڵ ئەبوبەكر: داهاتی سلێمانی لەهەموو پارێزگاكانی دیكە زیاترە

سەردێر

سلێمانی ـ نزار جەزا
پارێزگاری سلێمانی ڕایدەگەیەنێت، داهاتی سلێمانی لەهەموو پارێزگاكانی دیكە زیاترە و ئەگەر لێینەبرێت و خەرجبكرێت بەشی هەموو سلێمانی دەكات.

هەڤاڵ ئەبووبەكر، پارێزگاری سلێمانی لە دیدارەكەدا ڕایگەیاند، داوای لامەركەزی داوایەكی ڕەوایە، ئەزموونەكانی دنیاش جەخت لەئەوەدەكەنەوە، لەسەر بنەمای ئەرك و بەرپرسیارێتی لامەركەزیەت دەتوانێت حكومەتی هەرێم بەهێزتر بكات.

ئاماژەی بەئەوەشدا، ئێستا ئەو ئیحساسە نەماوە، كە سەر بەحكومەتین، بۆنمونە ئەو هەموو زەوییە لەسلێمانی سووتا پەیوەندیم پێوەنەكراوە.

باسی لەئەوەشكرد، لەڕووی یاساییەوە جێبەجێكردنی لامەركەزی ئاسانە و سێ هەنگاوی دەوێت، یەكەم یاسای ژمارە سێی ساڵی 2009 جێبەجێبكرێت، كە بەشێك لەلامەركەزی تیایە.

ئەوەشی خستەڕوو، پێویستە هەمواری ئەم یاسایەش بكرێت، چونكە وەڵامی داخوازییەكانی خەڵك ناداتەوە، هەروەها یاسای ئەنجوومەنی وەزیران لەسەر بنەمای یاسای ژمارە سێ هەموار بكرێتەوە.

وتیشی، “داهاتی سلێمانی ئەگەر لێی نەبڕێت و بۆ خەرجی خەڵك خەرج بكرێت، داهاتی لەهەموو پارێزگاكانی دیكە زیاترە”.

دەشڵێت: “ئێمە دەوڵەت ڕاناگەیەنێن تاكو بزانین داهاتی سلێمانی چەندە، بەڵكو داوای لامەركەزیەت دەكەین”.

ئەمڕۆ شەممە دیداری سلێمانی بۆ لامەركەزیەت لەلایەن دوو زانكۆی سلێمانییەوە بەڕێوەچوو، كە پێیانوایە كاری ئەكادیمییەكانە گرنگی لامەركەزیەت ڕوونبكەنەوە.

زانكۆی سلێمانی و زانكۆی پۆلیتەكنیكی بەهاوكاری ناوەندی كاروباری یاسایی یەكێتیی نیشتیمانیی كوردستان دیداری سلێمانی بۆ لامەركەزی ئەنجامدەدەن.

ماوەیەكی درێژە بەشێوەی فەرمی و نافەرمی لەسەر ئاستی باڵادا قسە لەسەر لامەركەزیەت دەكرێت، بەڵام هێشتا هەنگاوی كرداری بۆ نەنراوە و تەنها قسەی لەسەر دەكرێت.