سەردێر

“لەسلێمانی وەبەرهێنێك ژمارەیەك دوكانی زیادەڕۆی هەر یەكەی بە 25 دەفتەر دۆلار فرۆشتووە”

خەڵك-
پەڕلەمانتارێكی یەكێتی لە پەڕلەمانی كوردستان ئاشكرای دەكات، لە سلێمانی وەبەرهێنێك ژمارەیەك دوكانی بە زیادەڕۆ دروست كردووە و هەر بە زەویەتی هەر دوكانێكی بە 25 دەفتەر دۆلار فرۆشتووە.

هاوڕی مەلا ستار، سەرۆكی لیژنەی ئاوەدانكردنەوە لە پەرلەمانی كوردستان لەكۆنفرانسێكی رۆژنامەنووسیدا، كە لە بەردەم ئەو دوكانانەی دروست دەكرێن سازی كردبوو ڕایگەیاند، ئەو وەبەرهێنە ئەو دوكانانەی بە زیادەڕۆ دروست كردووە، كە هەر بەزەوی پێش دروست كردنی هەر دوكانێكی بە 25 دەفتەر دۆلار فرۆشتووە و 12 دوكانە، كە دەكاتە نزیكەی 3 ملیۆن دۆلار.

ڕاشیگەیاند، دروستكردنی ئەو دوكانانە لەسەر ئەو زەوییە لەكاتێكدایە، پێشمەرگە و ئاسایش و فەرمانبەر مەترێك زەوی پێ‌ ڕەوا نابینرێت پێی بدرێت.

وتیشی، “چەند ڕۆژێكە لەگەڵ جێگری سەرۆكی حكومەت و پارێزگاری سلێمانی و سەرۆكی شارەوانی سلێمانی و وەبەرهێنانی سلێمانی لەسەر خەیتن و توانیمان پڕۆژەكە ڕابگرین”.

ئاشكراشی كرد، بەپێی سایت پلانی پڕۆژەكە، كە شوقەی نیشتەجێبوونە، ئەو شوێنەی دوكانەكانی بەزیادەڕۆ لەسەر دروست كراوە بۆ پەرژین و دیواری پڕۆژەكە تەرخان كراوە، بەڵام دیوارەكەی ڕوخاندووە و ئەم دوكانانەی لەسەر دروست كراوە.

سەرۆكی لیژنەی ئاوەدانكردنەوە لە پەرلەمانی كوردستان ئاماژەی بەوەكرد، “داوا لە حكومەت ئەكەم نەهێڵن ئەمە بە یاسایی بكرێت، چونكە ئێستا نایاساییە و چاودێر دەبین بەسەرییەوە.

جەختیشی كردەوە، شارەوانی مۆڵەتی پێداوە بەداخەوە بەبێ‌ ئەوەی بگەڕێتەوە بۆ وەبەرهێنان، بەڵام كە سایت پلانەكەیمان لە وەبەرهێنان وەرگرت دەركەوت شوێنی دیواری یەكە نیشتەجێبوونەكانە نەك دوكان، بۆیە جێگری سەرۆكی حكومەت هاتۆتە سەر خەت و كارەكەیان پێ‌ ڕاگیراوە.