سەردێر

كاتی دەنگدانی بودجە دیاریدەكرێت

ئەمڕۆ كاتی دەنگدان لەسەر بودجە دیاریدەكرێت و بەشی كوردیش یەكلایینەكراوەتەوە

خەڵك-

ئەندامێكی پەرلەمانی عێراق دەڵێت ئەمڕۆ بڕیار لەوە دەدرێ‌ كەی خوێندنەوە بۆ پرۆژە یاسای بودجەی 2021 بكرێت و شاندی هەرێمیش سەردانی بەغداد دكاتەوە.

ڕێزان شێخ دلێر ئەندامی پەڕلەمانی عێراق بە (خەڵك)ی راگەیاند، ئەمڕۆ لیژنەی دارایی لەگەڵ سەرۆك وەزیران كۆبوونەوەیان هەیەو بڕیار لەوە دەدەن چ ڕۆژێك خوێندنەوە بۆ پڕۆژە یاسای بودجە بكرێت و دەنگی لەسەر بدرێت.

وتیشی، بڕیارە شاندی هەرێمی كوردستان بە زووترین كات سەردانی بەغداد بكاتەوە، چونكە ئەم هەفتەیە دەنگدان لەسەر بودجە دەكرێت.

رێزان شێخ دلێر لە بارەی كاتی سەردانی شاندی هەرێم بۆ بەغدا دەڵێت: دڵنیا نیم لەوەی كە ئەمڕۆ شاندەكە دەگەڕێنەوە یان نا، بەڵام بە دڵنیایی دەبێت سەردان بكەن لەم هەفتەیەداو گفتوگۆكان دەستپێبكەنەوە.

ئاماژەی بەوەشكرد، ڕوون نییە پشكی كورد لە بودجەدا چۆن یەكلادەكرێتەوە و ئەوەی هەیە تەنها ئەو دوو بڕگەیە كە پەیوەستە بە كورد و تا ئێستا وەك خۆی ماوەتەوە، ئەوانیش پەیوەستن بە بودجەو نەوتی هەرێم.