سەردێر

كەرتی گەشتیاری زیانی 1300 ملیار دۆلاری پێگەیشتووە

خەڵك-
كەرتی گەشتیاری جیهانی، زیانی 1300 ملیار دۆلاری پێگەیشتووە لە ساڵی 2020 بەهۆی ئەو كۆتوپێوەندەی بەهۆی پەتای ڤایرۆسی كۆرۆناوە بەسەر هاتووچۆ و گواستنەوەدا سەپێنران.

بەپێی بەیاننامەیەك كە لەلایەن ڕێكخراوی گەشتیاری جیهانی سەر بە نەتەوە یەكگرتووەكانەوە بڵاوكرایەوە”ئەم زیانەی بە كەرتی گەشتیاری گەیشتووە، 11 هێندەی زیانە تۆماركراوەكانی تەنگژەی ئابوری ساڵی 2009یە، گەشتیاریی لە جیهاندا لە ساڵی 2020، بەراورد بە ساڵی پێشتر، بەڕێژەی 84% پاشەكشەی كرد”.

بڵاوبوونەوەی ڤایرۆسی كۆرۆنا لە ساڵی ڕابردوودا، تەنگژەیەكی ئابوری بێ‌ پێشینەی لە جیهاندا دروست كرد و وەك ڕێكخراوی گەشتیاریی جیهانی ئاماژەی پێدەكات، لە ساڵی 2020 بڕی ئەو زیانەی كە تەنیا بە كەرتی گەشتیاریی گەیشتووە دەگاتە 1300ملیار دۆلار.

ڤایرۆسی كۆرۆنا كە سەرەتا لە مانگی كانوونی یەكەمی ساڵی 2019 لە شاری وۆهانی هەرێمی هۆبی چینەوە سەریهەڵدا، تائێستا بۆتە مایەی گیانلەدەستدانی 2.176.000 كەس لە جیهاندا.