سەردێر

پرۆژەكانی هەواری شار دەستپێدەكەن

خەڵك-بەشی هەواڵ

 

قائیمقامیەتی سلێمانی ڕایدەگەیەنێت، ئاستەنگەكانی دەستپێكردنی پرۆژەكانی پاركی هەواری شاریان چارەسەركردووە.

ئەمڕۆ دووشەممە لە دیوانی قائیمقامیەت ئاوات محەمەد، قائیمقامی سلێمانی لەگەڵ لایەنە پەیوەنیدارەكان لە شارەوانی و پاركی هەواری شار و بەڕێوەبەرایەتی گشتی وەبەرهێنانی سلێمانی كۆبووەوە.

لە كۆبوونەوەكەدا، گرفت و ئاستەنگەكانی بەردەم وەبەرهێنەرانی پڕۆژە خزمەتگوزارییەكانی پاركەكە خرایەڕوو، قائیمقامی سلێمانی رایگەیاند : پاركی هەواری شار یەكێكە لە شوێنە گشتی و گەشتیارییەكانی شاری سلێمانی و بەهۆی گرنكی پاركەكە كە بووەتە شوێنی حەوانەوە و وەرزشكردن و كات بەسەربردنی هاووڵاتیان، ئەوەی پێویست بێت بۆ گەشەسەندن و پێشخستنی پاركەكە هەنگاوی بۆ دەنێین و ئاستەنگ و گرفتەكانی بەردەم وەبەرهێنەران ناهێڵین بۆ دەستپێكردنی پرۆژەكان .

لەو كۆبوونەوەیەدا ڕێبین جەمیل بەڕێوەبەری پاركی هەواری شار رایگەیاند: جگە لە پاراستنی ژینگەو سەوزایی و باشكردنی خزمەتگوزارییەكان، هەوڵ دەدەین لەگەڵ ئەو وەبەرهێنەرانەی داوایان پێشكەش كردووە بۆ دروستكردنی پرۆژەكانیان لەپاركەكەدا كۆبونەوەیەكی فراوان بەئامادەبوونی سەرجەم لایەنە پەیوەندیدارەكان ئەنجام بدەین و ئاستەنگ و گرفتەكانیان بۆچارەسەر بكەین.

بەڕێوەبەری پاركی هەواری شار راشیگەیاند: ئەو پرۆژانەی لەپاركەكەدا ئەنجام دەدرێن بریتین لە (شاری یاری، مەلەوانگە، یاریگا، باخچەی ئاژەڵان، ڕێستۆرانت و كافتریا)و چەندین پرۆژەی دیكە.