سەردێر

نرخی خانووبەرە لە هەرێم ڕووی لە دابەزینە

خەڵك-ئارام سەردار
سێكتەری خانووبەرە لە ساڵی ٢٠٢٠ بەرامبەر بە ٢٠١٩ بەشێوەیەكی گشتی نرخەكان بەڕێژەی لە ١٪، كەمی كردوە، بەڵام وەك خاوەنی كۆمپانیایەكی عەقارات دەڵێت: “ئەگەر ڤاكسینی كۆرۆنا دابەش بكرێت و بودجە پەسەند بكرێت نرخی خانووبەرە بەرزدەبێتەوە”.

سەلام فەقێ كەریم، خاوەنی كۆمپانیای عەقارات حاجی سەلام، لەكۆنفڕنسێكی ڕۆژنامەوانیدا ڕایگەیاند، بەپێی ئەو بەراوردەی كردویانە لە سێكتەری خانووبەرە لەنێوان ساڵی ٢٠٢٠ بەرامبەر بە ٢٠١٩ بەشێوەیەكی گشتی نرخەكان بەڕێژەی لە ١٪ كەمی كردوە، بەڵام جیاوازیش هەیە لەنێوان جۆرەكانی ئەم سێكتەرە وەك زەوی و خانوو، كە نرخیان كەمێك بەرزبۆتەوە، بەڵام شووقە و زەوی كشتووكاڵی كەمی كردوە بەپێی مانگەكانیش نرخ دەگۆڕێت.

دەشڵێت: “بەرزی و نزمی نرخەكان بەپێی مانگەكان گۆڕانكاری پێوەدیارە و بەرزبوونەوەی نرخەكان لەسێ مانگی یەكەمی ساڵی ٢٠٢٠ بووە، بەهۆی قەیرانی دارایی و كۆرۆنا و كێشەكانی نێوان هەولێر و بەغداد بەڕێژەی جیاواز كەمیان كرد”.

لەبارەی بەرزبوونەوەی نرخەكانیش بەپێی توێژینەوەكەی عەقارات حاجی سەلام، نرخی زەوی لە ٢٠٢٠ بەراورد بە ٢٠١٩ بەڕێژەی لە ٢.٣٣٪ بەرزبۆتەوە، خانوو بەڕێژەی لە٢.٨٦٪ و كرێی خانووش بەڕێژەی لە١.٣٣٪ بەرزبۆتەوە، لەبەرامبەردا نرخی شوقە بەڕێژەی ٢.٦٦٪ كرێی شووقە بەڕێژەی لە٤.١٣٪ كەمی كردوە.

لەبارەی زەوی بازرگانی و كشتووكاڵی، بەوی بازرگانی نرخەكەی بەڕێژەی لە٠.٨٤٪ بەرزبۆتەوە، بەڵام زەوی كشتووكاڵی بەڕێژەی نزیكەی لە٥٪ نرخی كەمی كردوە.

باسی لەوەشكرد، پێشبینی دەكەین ئەگەر بوودجەی ٢٠٢١ پەسەندبكرێت و ڤاكسین دابەش بكرێت و نەخۆشێ كۆرۆنا كەم ببێتەوە، بازاڕی خانووبەرە جووڵەی باشی بۆ دروست بێت، چونكە لە هەرێمی كوردستان سەقامگیری ئاسایش و ئارامی هەیە نرخی نەوتیش بەرزبۆتەوە، چاكسازیەكانیش بەردەوام بن، كە ئەمانە دەبنە هۆی دابەشكردنی مووچه ئەوا هەموو ئەمانە هۆكارن بۆ گەشەی سێكتەری خانووبەرە.