سەردێر

لەسلێمانی ئەمڕۆ دابەشكردنی نەوت دەگاتە گەڕەكێكی دیكە

ئایا دۆلار نرخی نەوتی حكومی گران دەكات؟

خەڵك- بەشی هەواڵ
ئەمڕۆ دابەشكردنی نەوت لە سلێمانی بەردەوامە و دەگاتە گەڕەكی مەجیدبەگ لە سنووری مەڵبەندی سێ‌ و سەرۆكی لیژنەی دابەشكردنی سووتەمەنی-ش دەڵێت: “نرخی نەوتی سپی جێگیرە و هەر بەرمیلێك بە 44 هەزار دینار دەدرێت بە هاووڵاتیان”.

تەها جەمال، سەرۆكی لیژنەی دابەشكردنی سووتەمەنی لە سلێمانی بۆ (خەڵك) ڕایگەیاند، ئەمڕۆ شەممە لەناو شاری سلێمانی بەردەوامن لە دابەشكردنی نەوتی سپی بەسەر هاووڵاتیاندا و ڕۆژانی سێ‌ شەممەش نەوت دەنێرن بۆ شارۆچكە و شارەدێیەكان.

ڕاشیگەیاند، ئەمڕۆ لە سنووری مەڵبەندی سێ‌ لە گەڕەكی مەجیدبەگ نەوت دابەش دەكەن و ئەگەر هیچ كێشەیەك نەبێت ئەوا لە هەفتەی داهاتوودا دابەشكردنی نەوت لە مەڵبەندی سێ‌ كۆتایی دێت.

سەبارەت بە دەنگۆی گرانبوونی نرخی نەوتی حكومی بەهۆی بەرزبوونەوەی بەهای دۆلار وتی، “بەهیچ شێوەیەك نرخی نەوتی سپی گران نەبووە و هەر بەرمیلێك بە 44 هەزار دینار دەدەین بە هاووڵاتیان و ئەو نرخە بۆ ناوشار و دەرەوەی شار وەكو یەكە و نەگۆڕاوە”.