سەردێر

پارێزگاری هەولێر هۆشداری گرانفرۆشی دەدات

خەڵك- بەشی هەواڵ
پارێزگاری هەولێر بە وەكالەت بۆ لەنزیكەوە ئاگاداربوون لە نرخی كاڵا و خۆراك، بازاڕی سەنتەری شاری بەسەركردەوە و ڕایگەیاند، ڕیگە نادەین كەس یاری بەنرخ و گرانكردنی بازاڕ بدات.

هێمن قادر، پارێزگاری هەولێر بەوەكالەت، بەیاوەری نەبەز عەبدولحەمید، قائیمقامی ناوەند بەمەبەستی لەنزیكەوە ئاگاداربوون لە ڕەوشی بازاڕ و بەدواداچوون بۆ جێگیری نرخی كەل و پەل و كاڵاكان و چاودێری كردنی بازاڕ و جموجۆڵی كاسبكار و دوكاندارن، بازاڕی سەنتەری شاری هەولێری بەسەركردەوە.

بەپێی ڕاگەیەنراوێكی پارێزگای هەولێر، سەرەتا پارێزگار ناو بازاڕی بەرگدوران و كاسبكارانی ئەو بازاڕەی بەسەركردەوە و لەنزیكەوە لە كەموكوڕی و پێداویستی و گرفتەكانی كۆڵییەوە، پاشان سەردانی پاركی ناوەندی شار و سەنتەری خانەنشینانی كردو و گوێی لەداواكاری و خواستی هاووڵاتییان گرتووە.

هێمن قادر ڕایگەیاندووە، “بەهەموو شێوەیەك ئەوەی لەتواناماندابێت ئەنجامی دەدەین بۆ خزمەتكردنی هاوشاریانی خۆمان و ڕیگە نادەین كەس یاری بەنرخ و گرانكردنی بازاڕ و بارشانی هاووڵاتییان بكات”.

ڕاشیگەیاند، “دڵنیاتان دەكەینەوە ئەوەی لەتوانای ئێمەدا بێت و بەئێمە بكرێت، بۆ خزمەتكردنی بازاڕ و كاسبكارانی بازاڕ درێغی لێناكەین و وەكو پارێزگای هەولێر هاوكارتانین”.