سەردێر

كێشەی ئاوی سلێمانی چارەسەر كرا

خەڵك- بەشی هەواڵ
دوای وەستانی ناردنی ئاوی خواردنەوە لە پڕۆژەی ئاوی دوكانەوە بۆ سلێمانی بەهۆی كێشەی كارەباوە، بە هەوڵی كارمەندانی هەردوو بەڕێوەبەرایەتی كارەبا و ئاوی سلێمانی كێشەكە چارەسەر كرا و دابەشكردنی ئاو لە گەڕەكەكان و قەزا و ناحییەكان ئاسایی دەبێتەوە.

ئامانج جەلال، وتەبێژی بەڕێوەبەرایەتی ئاوی سلێمانی بۆ (خەڵك) ڕایگەیاند، بەهۆی بڕانی كارەبا لەهێڵی دووی ئاوی دوكان- سلێمانی لە ڕۆژی دوو شەممەوە كێشەی ناردنی ئاوی خواردنەوە بۆ هاووڵاتیان لەناو شاری سلێمانی و قەزا و ناحییەكانی دەورووبەری دروست بوو، هەر بۆیە داوامان لە هاووڵاتیان كرد تاوەكو دەست بە ئاوەوە بگرن و بەفیڕۆی نەدەن.

ڕاشیگەیاند، كە بە هەوڵ و ماندووبوونی كارمەندان لە هەردوو بەڕێوەبەرایەتی كارەبا و ئاوى سلێمانی توانرا كێشەكە چارەسەر بكرێت و دەست بە ناردنی ئاوی خواردنەوە بكرێتەوە.

ئاشكراشی كرد،لە ئێستادا دابەشكردنی ئاو لەهێڵی دووی ئاوی دوكان- سلێمانی دەستی پێكردۆتەوە و تا سبەینێ 6/1/2021 دابەشكردنی ئاو ئاسایی دەبێتەوە.

بەڕێوەبەرایەتی ئاوی سلێمانی لەڕێگەی پڕۆژەی ئاوی سەرچنار و هەردوو پڕۆژەی ئاوی دوكان-سلێمانی، ئاوی پاكی خواردنەوە بۆ هاووڵاتیانی شاری سلێمانی و دەورووبەری و قەزا و ناحیەكانی (پیرەمەگروون و چەمچەمەڵ و شۆڕش و بازیان و تەكیە و ئەڵلایی) دابین دەكات.