سەردێر

لیژنەكانی چەمچەماڵ ئاماری ساڵێكیان بڵاوكردەوە

خەڵك- بەشی هەواڵ
لیژنە هاوبەشەكانی قائیمقامیەتی قەزای چەمچەماڵ ئاماری ساڵی ڕابردوو بڵاودەكاتەوە و ڕایدەگەیەنێت، كە لە كۆی 200 شوێن، 127 شوێن ئاگاداركراونەتەوە.

لیژنە هاوبەشەكانی قائیمقامیەتی قەزای چەمچەماڵ لە ڕاگەیەنراوێكدا ئاماژەی بەوەكردووە، لەساڵی ٢٠٢٠دا لیژنەكانیان (١٣ تۆن و ٥٠٠ كیلۆ) شمەكی بەسەرچوو و نەشیاو بۆ بەكارهێنانیان لەناوبردووە و (200) شوێن بەسەركراونەوە و ڕێنماییان پێدراوە و لەو ژمارەیەش (١٢٧) شوێن ئاگاداركراونەتەوە، كە پابەندی ڕێنماییەكان بن .

ئاماژەی بەوەشكردووە، (٥٦) كۆبوونەوە بە دەزگا پیشەییەكان و پیشەوەرانی بوارە جیاوازەكانی بازاڕ كراوە .

ڕاشیگەیاندووە، بە كۆی گشتی ٣ ملیۆن و ٥٠٠ هەزار دینار غەرامەی سەرپێچیكاران كراوە .

لیژنە هاوبەشەكانی قائیمقامیەتی قەزای چەمچەماڵ دەشڵێت: “هەر لەو ساڵەدا ژمارەیەك شوێن داخراون و بەشێكیان ڕووبەڕووی دادگا كراونەتەوە و بەڵێننامە بە ژمارەیەكی تریان پڕكراوەتەوە تاوەكو سەرپێچییەكە دووبارە نەكەنەوە”.