سەردێر

“لە شوێنە گەشتیارییەكان ئاهەنگ قەدەغەكرا بەڵام لە شەقامەكان نا”

خەڵك-ئارام سەردار
وتەبێژی دەستەی گەشتوگوزاری هەرێم ڕایدەگەیەنێت، بۆ پاراستنی تەندروستی هاووڵاتیان بڕیار دەرچوو ئاهەنگ و گردبوونەوە نەكرێت، بۆیە لەشوێنە گەشتیاریەكان بڕیارەكە جێبەجێ كرا، بەڵام ئەوەی جێگای سەرنج بوو لە شەقامەكان گردبوونەوە كرا.

نادر ڕۆستی، وتەبێژی دەستەی گەشتوگوزاری هەرێمی كوردستان لەبارەی كەرتی گەشتیاری بە(خەڵك)ی ڕاگەیاند، بۆ پاراستنی تەندروستی هاووڵاتیان بڕیار دەرچوو ئاهەنگ و گردبوونەوە نەكرێت، بۆیە لەشوێنە گەشتیاریەكان بڕیارەكە جێبەجێ كرا، بەڵام ئەوەی جێگای سەرنج بوو لە شەقامەكان گردبوونەوە كرا، لەكاتێكدا ڕەنگە باشتربوایە لەشوێنە گەشتیاریەكان ئاهەنگ بكرایە ئەوكات بەڕێكاری تەندروستی بەڕێوەدەچوون، بەڵام ئەوەی لەشارەكان كرا كەمترین كۆنتڕۆلی هەبووە و دەمامك بەكارنەهێنرابوو تێكەڵی زۆریش هەبوو، واتە ڕێنماییە تەندرووستیەكان جێبەجێ نەكران.

دەشڵێت: “ناكرێ بڕیار بۆ شوێنە گەشتیارییەكان دەربكرێ و بەرپرسانی گەشتوگوزار ڕاوبۆچوونیان وەرنەگیرێ، چونكە بڕیاری ڕاگرتنی ئاهەنگەكان زیانی بە شوێنە گەشتیاریەكان گەیاند، چونكە زۆربەی ئامادەكارییەكان گەیشتبوونە قۆناغی كۆتایی و خەرجی زۆر كرابوو، گرێبەست كرابوو لەگەڵ هونەرمەند و گرووپی گەشتیاری، بەڵام لەناكاو بڕیار دەرچوو”.

ئەوەشی خستەڕوو، پێویستە هاووڵاتی و دوكاندار و بازگە و هەموو شوێنە گەشتیارییەكان ڕێز لە گەشتیار بگرن، چونكە ئەوان پارە دێننە بازاڕەكانی كوردستان و گەشتوگوزاریش تەنیا بە دەستەیەك یان وەزارەتێك پێش ناكەوێ، بەڵكو پێویستە سەرجەم وەزارەتەكان و دامەزراوەكانی حوكمی و كەرتی تایبەت و هاووڵاتییان هاوكار بن.

وتیشی، “ساڵانە پلان و بەرنامەیان هەیە بۆ پێشخستنی گەشتوگوزار، لە ٢٠٢١ پلان بۆ زۆر لایەنی بەرەوپێشبردنی گەشتوگوزار دادەنرێ”.

سەبارەت بەپەلاماردانی گەشتیاران ئەوەی خستەڕوو، پێویستە ڕێز لە گەشتیاران بگیرێت، پێویست ناكات بابەتی سیاسی و توندڕەوی و قەومی تێكەڵ بە گەشتیاری بكرێ و گەشتیار لەسەر ئەم بابەتانە ئەزیەت بدرێ، چونكە گەشتوگوزار بابەتێكی ئابوورییە و دێت پارە خەرج بكات نەوەك بۆ پرسێكی سیاسی.