سەردێر

دابەشكردنی نەوت لە سلێمانی دەستپێدەكاتەوە

خەڵك- بەشی هەواڵ
بەهۆی پشووەكانی سەری ساڵی زاینییەوە ئەم هەفتەیە لەناو شاری سلێمانی نەوتی سپی دابەش نەكرا و سەرەتای هەفتەی داهاتوو لە صەند گەڕەكێكی مەڵبەندی سێ‌ دابەشكردنی نەوتی سپی دەستپێدەكاتەوە.

تەها جەمال، سەرۆكی لیژنەی دابەشكردنی سووتەمەنی لە سلێمانی بۆ (خەڵك) ڕایگەیاند، بەبۆنەی پشووی سەری ساڵەوە ئەم هەفتەیە نەوت دابەش نەكرا، چونكە بانك نییە و ناتوانن پارەی نەوت ببەنە بانك.

ڕاشیگەیاند، تاوەكو هەفتەی داهاتوو بڕێكی زۆرتر نەوت بەردەست دەبێت و لە ڕۆژی شەممەی داهاتوو لەناو شاری سلێمانی دەست بە دابەشكردنی نەوت دەكەنەوە لە گەڕەكەكانی ئیسكان و مەجیدبەگ، كە دەكەونە سنووری مەڵبەندی سێ‌.

ئاشكراشی كرد، ڕۆژانی شەممە لەناو شاری سلێمانی و ڕۆژانی سێ‌ شەممە لەدەرەوەی شار نەوت دابەش دەكرێت و پڕۆسەكە بەردەوامە و بۆ هەر بەرمیلێك بڕی 44 هەزار دینار لە هاووڵاتی وەردەگیرێت.