حەلەب لە كەوتنی تەواوەتی نزیكبۆتەوە و بەشێكی لەلایەن هێزە كوردییەكانەوە و بەشێكی دیكەی لەلایەن گرووپە چەكدارەكانی سەر بە توركیاوە كۆنتڕۆڵ كراوە و سوپای ئەسەد لە پاشەكشەی بەردەوامدایە بەرەو حمس و ڕوسیا-ش وەك پاڵپشتی ڕژێمی سوریا دەستی بە جوڵە كرد و هێرشێكی خوێناوی لەناو حەلەب ئەنجامدا.
دوانیوەڕۆی ئەمڕۆ فڕۆكە جەنگییەكانی ڕوسیا لە حەلەب هێرشیان كردە سەر گردبوونەوەیەكی گرووپە چەكدارەكان و بەهۆیەوە دەیان چەكدار و هاووڵاتی مەدەنی كوژران و بریندار بوون.
بەپێی ڕاپۆرتی ڕوانگەی سوری بۆ مافەكانی مرۆڤ، لە ئەنجامی هێرشەكەی ڕوسیا لە بازنەی ئەلباسیل لە شاری حەلەب لانیکەم 16 هاووڵاتی کوژران و 20ی دیکەش برینداربوون.
بەپێی ڕاپۆرتی ڕوانگەكە، ژمارەی کوژراوانی سەربازی و مەدەنی لە ئۆپەراسیۆنی “ڕاگری لە دەستدرێژی” کە بۆ چوارەمین ڕۆژی خۆی لە لادێکانی ئیدلب و حەلەب بەردەوامە، لە بەرەبەیانی ٢٧ی ئەم مانگەوە گەیشتووەتە ٣٢٧ کەس.
بۆ بینینی ڤیدیۆكە كلیك لێرە بكە
ئەنجامەکان بەم شێوەیە دابەشکران:
– ١٥٥ کەس لە “دەستەی تەحریر شام” کوژراون.
– 28 کوژراو لە فراکسیۆنەکانی “سوپای نیشتمانی”.
– 100 کوژراوی هێزەکانی ڕژێم و چەكدارەكان، ئەوانیش بریتین لە: (79 ئەندامی هێزەکانی ڕژێم کە 4 ئەفسەری پلە جیاوازن، 6 کەسیان لە میلیشیاکانی لایەنگری ئێرانی ڕەگەزنامەی سوریان، 15 کەسیشیان لە ڕەگەزنامەی غەیرە سوریان).
– 24 هاوڵاتی مەدەنی شەهید بوون: منداڵێک لە بۆردومانی زەمینی و 23 لە هێرشە ئاسمانییەکانی ڕوسیا، کە 4 منداڵ و 3 ژن بوون.
– لە بۆردومانی دەستەی تەحریر شام بۆ سەر شاری زانکۆ لە شاری حەلەب، ٤ خوێندکاری زانکۆ كوژران.
– 16 هاووڵاتی بەهۆی بۆردومانی فڕۆکەکانی سەر بازنەی ئەلباسیل لە شاری حەلەب كوژران.
