ئێمە لە تۆرە کۆمەڵایەتیەکان

راپۆرت

سەرما و بەفر و باران هەرێمی كوردستان دەگرێتەوە

خەڵك- بەشی هەواڵ
بەپێی پێشبینییە كەشناسییەكان دۆخی كەشوهەوای هەرێم بەهۆی ئەو بەفرەی باریوە سارد دەبێت و باران بە شێوەی پچڕ پچڕ دەبارێت و بەفریش ناوچە شاخاوییەكان دەگرێتەوە.

سادق عەتیە، شارەزا و پسپۆڕی كەشناسی عیراقی لە هەژماری خۆی لە فەیسبووك ئاماژەی بەوەكردووە، شەپۆلێكی سەرما ناوچە جیاوازەكانی وڵات دەگرێتەوە و لە ناوچەكانی ناوەڕاستی وڵات دەگاتە ئاستی بەستن و لە ناوچەكانی هەرێمی كوردستانیش كەشوهەوا زۆر سارد دەبێت.

ئاماژەی بەوەشكردووە، ئەمشەو لە ناوچە شاخاوییەكانی سنووری سلێمانی و دهۆك ئەگەری بارین باران و بەفر هەیە و لە باكور و ڕۆژئاوای موسڵ-یش ئەگەری بارانێكی بەلێزمە هەیە.

ئاشكراشی كردووە، ڕۆژی یەك شەممە بەتایبەتی لەكاتەكانی بەیانیدا لە دهۆك و هەولێر ئەگەری بارینی باران هەیە.

لای خۆشیەوە، دەستەی گشتی كەشناسی و بوومەلەرزەزانی عیراق لە ڕاگەیەندراوێكدا ئاماژەی بەوەكردووە، لە زۆربەی ناوچەكانی هەرێمی كوردستان بە درێژایی ڕۆژی یەك شەممە ئەگەری بارینی باران هەیە و هەورە تریشقەی لەگەڵ دەبێت و لە ناوچە شاخاوییەكانیش ئەگەری بەفر بارین هەیە.

ڕاشیگەیاندووە، ڕۆژی دوو شەممە لە ناوچەكانی ناوەڕاستی وڵات ئاسمان نیمچە هەور و زۆربەی كاتیش هەوری تەواو دەبێت و لە ناوچەكانی باشوور ئاسمان ساماڵ دەبێت، بەڵام لە ناوچەكانی هەرێم ئاسمان هەور دەبێت لەگەڵ بارینی باران و بوونی هەورە تریشقە و لە ناوچە شاخاوییەكانیش بەفر دەبارێت.

دەربارەی ڕۆژی سێ‌ شەممە پێشبینی كردووە، “لە ناوچەكانی ناوەڕاستی وڵات ئاسمان نیمچە هەور دەبێت و لەكاتەكانی شەودا دەبێت بە هەور و باران بارین دەستپێدەكات لەگەڵ بوونی هەورە تریشە، بەڵام لە ناوچەكانی هەرێم ئاسمان لەنێوان نیمچە هەور و هەوری تەواو دەبێت”.

لای خۆشیەوە، كەشناسی هەرێمی كوردستان لە ڕاگەیەندراوێكدا ڕوونی كردۆتەوە، سبەینێ‌ یەك شەممە ئاسمان لەنێوان نیمچە هەور و هەوری تەواو دەبێت لەگەڵ بارینی باران لە كات و شوێنی جیاجیا.

ڕاشیگەیاندووە، بەفرێكی كەم لە ناوچە شاخاوییەكان دەبارێت.

ماوەی چەند ڕۆژی ڕابردوو شەپۆلێكی بەفر و باران ناوچەكانی هەرێمی كوردستانی گرتەوە و بەهۆیەوە بەفرێكی زۆر لە ناوچە شاخاوی و سنوورییەكان باری.

راپۆرت

ترەمپ، جۆلانی پێشكەشی ناتانیاهۆ كرد
نەتەوە یەكگرتووەكان و كۆمكاری عەرەبی و سوریا هەڵوێستیان وەرگرت

خەڵك- بەشی هەواڵ
سەرۆكی ئەمریكا بەرزاییەكانی جۆلان، پێشكەش بە ئیسڕائیل دەكات و دەشڵێت: “دەمێكە پلانیان بۆ داڕشتووە”، لە بەرامبەریشدا نەتەوە یەكگرتووەكان و كۆمكاری عەرەبی دژی بڕیارەكەی ترەمپ وەستانەوە و حكومەتی سوریاش جەختدەكاتەوە، كە پێشێلكاری خاكی سوریایە.

بەرزاییەكانی جۆلان بەپێی نەخشەی وڵاتان خاكی سوریایە و لە ساڵی 1967-ەوە، كە نزیكەی 52 ساڵە لەلایەن سوپای ئیسڕائیل-ەوە داگیركراوە و ناوچەیەكی ستراتیجی سنووری نێوان سوریا و ئیسڕائیلە.

ئەمڕۆ دوو شەممە 25ی ئاداری 2019، لە كۆنگرەیەكی ڕۆژنامەوانی هاوبەشی نێوان دۆناڵد ترەمپ، سەرۆكی ئەمریكا و بنیامین ناتانیاهۆ، سەرۆك وەزیرانی ئیسڕائیل لە واشنتۆن، ترەمپ بڕیاری بە فەرمی ناساندنی سەروەری ئیسڕائیلی بەسەر بەرزاییەكانی جۆلانی سوریا واژۆ كرد.

ترەمپ لە كۆنگرە ڕۆژنامەوانییەكەدا وتی، “ئیسڕائیل مافی ڕەهای هەیە بۆ بەرگری لەخۆ كردن”.

ترەمپ پێشتریش لە تویتێكدا سەبارەت بە دانپێدانانی ئەمریكا بە سەروەری ئیسڕائیل بەسەر بەرزاییەكانی جۆلان ڕایگەیاندبوو، كە “ئێستا كانی ئەوەیە ئەمریكا دان بنێت لەسەر كۆنتڕۆڵی ئیسڕائیل بەسەر جۆلان، كە ماوەی 52 ساڵە كۆنتڕۆڵی كردووە”.

لای خۆشیەوە، نەتەوە یەكگرتووەكان لە بەیاننامەیەكدا ئاماژەی بەوەكردووە، كە دۆخی یاسایی جۆلان لەڕووی نێودەوڵەتییەوە بە بڕیارەكەی ترەمپ ناگۆڕێت و وەك خۆی دەمێنێتەوە.

هاوكات، ئەحمەد ئەبو غەیت، ئەمینداری گشتی كۆمكاری وڵاتانی عەرەبی لە لێدوانێكی بۆ میدیاكان ڕایگەیاند، كە ئەو بڕیارەی ئەمریكا بۆ دانپێدانان بە كۆنتڕۆڵی ئیسڕائیل بەسەر جۆلان بەهەموو شێوەیەك دەچێتە دەرەوەی یاسای نێودەوڵەتی.

ڕاشیگەیاند، كە بڕیارەكەی ترەمپ دۆخی یاسایی جۆلان ناگۆڕێت.

هەروەها، ڕوسیا هەڵوێستی بەرامبەر بڕیارەكەی ترەمپ ڕاگەیاند و لە بەیاننامەیەكدا ئاماژەی بەوەكردووە، كە ئەو بڕیارە هەڕەشەی ناسەقامگیری و دروست بوونی ئاژاوە لە ناوچەكە دەكات و ئەو هەوڵانە لەناو دەبات، كە بۆ گێڕانەوەی ئاشتی دراون”.

لە كاردانەوەی ئەو بڕیارەدا، حكومەتی سوریا هەڵوێستی خۆی ڕاگەیاند و جەختی كردەوە، كە ئەوە پێشێلكاری ڕاستەوخۆ و ئاشكرای سەروەری خاكی سوریایە.

ئاژانسی هەواڵی (سانا)ی فەرمی سوریا لە زاری سەرچاوەیەكی وەزارەتی دەرەوەی وڵاتەكە بڵاویكردەوە، بڕیارەكەی ترەمپ بۆ لكاندنی جۆلان بە كیانی داگیركاری جولەكە پێشێلكاری ئاشكرای سەروەری خاكی كۆماری سوریایە.

وتوشیەتی، “ئەو بڕیارە بەرجەستەكردنی هاوپەیمانی دوژمنكارانەی ئەمریكا و ئیسڕائیلە دژی نەتەوەی عەرەب و بەردەوام ئەمریكا دژی عەرەب بووە بەهۆی پاراستنی بێ‌ سنووری ئیسڕائیل”.

جەختیشی كردۆتەوە، كە ترەمپ مافی یاسایی ئەوەی نییە بە زۆر و هێز خاكی وڵاتان داگیر بكات.

ئەم بڕیارەی سەرۆكی ئەمریكا لەكاتێكدایە، كە پێشتریش قودس-ی وەك پایتەختی ئیسڕائیل ناساند.

بەردەوام بە لە خوێندنەوە

راپۆرت

تفەنگ و چەكە زێڕینەكانی سەدام حسێن چییان بەسەرهات؟

خەڵك- بەشی هەواڵ
دوای داگیركردنی عیراق لە ساڵی 2003، سوپای ئەمریكا زۆرێك لەو چەكە زێڕینەكانی لەنێوان گەوهەرە زۆرەكانی سەدام حسێندا دۆزییەوە. وێڕای ئەوەش ئەو سەربازانەی، كە لەسەرەتاوە هاتنە نێو بەغدا و ئەركی پاسەوانی كۆشكەكانیان خرایە ئەستۆ، تۆمەتی دزی و تاڵانییان ڕووبەڕوو كراوەتەوە.

بڕی ئەو چەكە دیاری نەكراوە، كە دۆزراوەتەوە و لەكوێ‌ شاردراوەتەوە، بەپێی ئەو زانیارییانەش بێت، كە بڵاوكراونەتەوە، هەندێك لە سەربازانی ئەمریكا كە تێوەگلابوون لە بەقاچاخبردنی ئەو چەكانە، دەستیگركراون.

 

چەكی كڵاشینكۆفی زێڕین (تابۆك)
كۆپییەكە لە چەكی یوكسلاڤی (ئێم 70)، سەربازانی ئەمریكا لە نزیك كەركوك دۆزیویانەتەوە و ڕادەستی ئوسترالیا كراوە، كە لەو ناوچەیەدا یارمەتییەكانی پێشكەش دەكرد.
دەوترێت، ئەو چەكە دیاری سەدام بووە بۆ عودەی كوڕی، یان بە پێچەوانەوە.

 

دەمانچەی ستیرلینگی زێڕین
ئەو دەمانچەیە لە ئەكادیمیای نیشتمانی وەزارەتی ناوخۆی بولگاریایە، كە بەشێوەیەكی یاسایی گەیشتۆتە وڵاتەكە و بەر لە جەنگ بۆ بولگاریا ڕەوانەكرا، بەو پێیەی لەلایەن سەدام حسێنەوە بە دیاری دراوە بە سەرۆكی ئەكادیمیاكە، ئەمەش لەبەرانبەر مەشقپێكردنی كادرەكان لە عیراق. دەمانچەكە زێڕینە و لە پێوەری 9 ملیمە و تا ئەندازەیەكی زۆر لە دەمانچەی ستیرلینگ دەچێت.

ئەو پرسیارەی خۆی دروست دەبێت ئەوەیە: بۆچی ژمارەیەكی كەم لەو چەكە عیراقییە زێڕینانە لە مۆزەخانەكانی جیهاندان و بۆكوێ‌ براون؟
لەڕاستیدا گواستنەوە و هەڵگرتنی چەك بەبێ‌ بەڵگەنامە، پێشێلكارییە بۆ یاسای دادوەریی سەربازی لە ویلایەتە یەكگرتووەكان و ئینتەرپوڵ و نەتەوە یەكگرتووەكان و ڕێكەوتنی جنێڤ. وەرگرتنی ڕەزامەندی بۆ ئەو كارەش زۆر بە قورس دەكرێت. بەجۆرێك هەوڵدان بۆ دەستبەركردنی سەروەت و سامان، وایكردووە زۆرێك لە سەربازان دووچاری ئەنجامدانی تاوانی جەنگ ببن.

لەو بارەیەوە، لە ساڵی 2003 لە فڕۆكەخانەی (هیسرۆ) لە لەندەن، سەربازێكی ئەمریكایی دەستگیركرا، كە هەوڵیدابوو تفەنگێكی (ئەی كەی-47) و دەمانچەیەك و تفەنگێكی تری نەناسراو، بۆ ویلایەتە یەكگرتووەكان ڕەوانە بكات.

لە ساڵی 2012، نووسینگەی لێكۆڵینەوە فیدڕاڵییەكان، دوو پیاوی دەستگیركرد، كە هەوڵیاندابوو ئەو چەكانە بفرۆشن، كە پێشتر لەلایەن سەدام حسێنەوە خاوەندارییان دەكرا و بەهاكەیان دەگەیشتە زیاتر لە ملیۆنێك دۆلار، لەنێوان ئەو چەكانەشدا: دەمانچەیەكی جۆری ماگنۆم 357 كە نەخشەی هەندێك لە ئاژەڵەكانی لەسەر هەڵكۆڵدرابوو. لەگەڵ دەمانچەیەكی جۆری ” Coonan Arms.357 Magnum” كە زاخاوكرابوو بە نیكل و زێڕ، و دوو پیتی “QS”ی لەسەر هەڵكۆڵدرابوو، وەك ئاماژەكردنێك بۆ ناوی قوسەی سەدام حسێن. دەمانچەیەكی تری ” Llama.45ACP” كە هەمان نەخشی لەسەر بوو.

بەردەوام بە لە خوێندنەوە

راپۆرت

وەرزی ڕەزبڕین لەشارباژێڕ

شارباژێڕ- نزار جەزا

لەگەڵ نزیكبوونەوەی وەرزی بەهار، خاوەن ڕەزەكان دەست بە بڕینی ڕەزەكانیان دەكەن، بۆئەوەی ڕەزەكەیان ترێیەكی جوان و باشی هەبێت، ئەم كارەش لەهەندێك گونددا بەهەرەوەزری دەكرێت.

بەردەوام بە لە خوێندنەوە
کام لەم وەزارەتانەی کابینەی ٨ لە ئاست خزمەتکردن بە هاولاتیان جێدەستی دیار بووە؟

کوردستان