ئێمە لە تۆرە کۆمەڵایەتیەکان

راپۆرت

هەوڵێكی دیكەی لێكنزیكبوونەوەی پارتی و یەكێتی شكستیهێنا

خەڵك-بەشی هەواڵ

بەپێی زانیارییەكانی گەیشتوو بە (خەڵك) ئاڵوگۆڕی نامەكەی نێوان مەسعود بارزانی و كۆسرەت ڕەسوڵ عەلی وەك هەوڵێكی دیكە بۆ لێكنزیكبوونەوەی پارتی و یەكێتی شكستیهێنا دوای كۆبوونەوەكەی دووهەمی پەڕلەمانی كوردستان بۆ هەڵبژاردنی لیژنەی یاسایی بە بێ یەكێتی.

بەپێی زانیارییەكانی (خەڵك) دوای سازكردنی كۆبوونەوەی پەڕلەمان و هەڵبژاردنی لیژنەیی یاسایی و ڕێكنەكەوتنی یەكێتی و پارتی لەسەر كێشەكانیان، یەكێتی شاندێكی باڵای بە سەرۆكایەتی كۆسرەت ڕەسوڵ عەلی جێگری سكرتێری گشتی ناردووەتە بەغدا تاكو لەسەر كێشەكانی كەركوك و كێشەكانی دیكە لەگەڵ بەغدا گفتووگۆ بكەن.

بەپێی سەرچاوەكان، هۆكاری شكستی هەوڵەكانی بارزانی و كۆسرەت ڕەسوڵ بۆ نزیككردنەوەی پارتی و یەكێتی، دەگەڕێتەوە بۆ ئەوەی ئەو سەركردە باڵایانە لە نامەكانیاندا نەچوونە نێو وردەكاری كێشەكانەوە، تەنها بە ڕووكەش باسی ئاساییكردنەوەی پەیوەندییەكان و چارەسەركردنی ناكۆكییەكانیان كردووە.

لە نوێترین لێدواندا دەربارەی هەڵوێستی پارتی، ڕۆژ نوری شاوێس ئەندامی مەكتەبی سیاسیی پارتی دیموكراتی كوردستان لە لێدوانێكدا بۆ هەواڵنێران، ئاشكرایكرد، سوورن لە سەر پێكهێنانی كابینەی نوێی حكومەتی هەرێمی كوردستان و پێشوازیش لە هەر لایەنێك دەكەن خوازیاری بەشداریكردن لەو كابینەدا بێت.

ناوبراو لە بارەی كۆبوونەوەی پارتی و یەكێتییەوە دەڵێت “نەمبیستووە شاندی پارتی و نێچیرڤان بارزانی سەردانی سلێمانی بكەن بۆ كۆبوونەوە لەگەڵ یەكێتیدا، ئێمە لە ڕابردوودا زۆر سەردانی سلێمانیمان كردووە، كاتی ئەوەیە ئەوان سەردانی ئێمە بكەن”.

لای خۆیەوە ئازاد جۆڵا ئەندامی مەكتەبی پەیوەندییەكانی یەكێتی نیشتیمانی كوردستان بە (خەڵك)ی ڕاگەیاند، ئەو هەنگاوەی پارتی دیموكراتی كوردستان دەیهاوێت لەپەڕلەمانی كوردستان و لەڕووی سیاسیشەوە، خزمەت بە بەرژەوەندی گشتی هەرێمی كوردستان و ئەو بارودۆخەی ئێستای ناوخۆ ناكات بەتایبەت ناكۆكی و دووركەوتنەوەی یەكێتی و پارتی.

جۆڵا دەشڵێت “هاووڵاتیانی هەرێمی كوردستان چاوەڕوانی ئەوە بوون كە یەكێتی و پارتی لەیەكتر نزیكببنەوە و بەیەكەوە نەخشەڕێگەی چوار ساڵی داهاتوو دیاریبكەن، چونكە واقعی كوردستان بەم شێوەیەیە، بەتایبەت دوای نامەكەی بارزانی بۆ جێگری یەكەمی سكرتێری گشتی ئومێد هەبوو دانیشتن لە نێوان یەكێتی و پارتی بكرێت و چارەسەری كێشەكان بكرێت، تاوەكو بگەن بە ڕێككەوتنی سیاسی، ئینجا گفتوگۆ بكەن لەسەر پەڕلەمان و چارەسەری كێشەی لیژنەكان و سەرۆكایەتی هەرێم و كەركوك و بەغدا.

ئەوەشی خستەڕوو، هەڵبژاردنی لیژنەی یاسایی لەپەڕلەمانی كوردستان، ئەوە دەردەخات پارتی جدی نییە لە مەسەلەی ڕێكخستنی نێوماڵی كورد و شەراكەتی ڕاستەقینە و چارەسەركردنی كێشەكان، پارتی پێمان دەڵێت ئەو بەرنامانەی هەیەتی، دەیهەوێت قۆناغ بە قۆناغ جێبەجێیان بكات، بۆیە دەرئەنجامەكەش هەرچی بێت، خەڵكی كوردستان دەزانێت دەكەوێتە ئەستۆی كێ.

ئەو ئەندامەی مەكتەبی پەیوەندییەكانی یەكێتی باس لەوەش دەكات، جگە لەوەی یەكێتی بەشدار نییە لە هەڵبژاردنی لیژنەی یاسایی، هێز و لایەنەكانی دیكەش نیگەرانن، هێزێكی وەك یەكگرتوو كە خاوەنی زیاتر لە ٨٠ هەزار دەنگە، پەراوێز دەخرێت، ئەو كورسی نەبێت لە لیژنەی یاسایی، كەچی لایەنی دیكە چارەكی ئەو دەنگەی نییە، ئەندامی هەیە، بۆیە هیوادارین ئەم بارودۆخە بگۆڕدرێت بۆ لێكنزیكبوونەوەی لایەنەكان، نەوەك بەم شێوەیە بێت.

بەپێی سەرچاوەكانی (خەڵك) هەوڵەكانی لێكنزیكبوونەوە و كۆبوونەوەی پارتی و یەكێتی وەستاون.

لەوبارەیەوە ئازاد جۆڵا جەختی لە زانیارییەكان كردەوە و ئاشكرایكرد “تاوەكو ئێستا هیچ كاتێك دیاری نەكراوە بۆ ئەوەی یەكێتی و پارتی كۆببنەوە”.

لای خۆشیەوە ڕێبوار بابكەیی ئەندامی پەڕلەمانی كوردستان لەفڕاكسیۆنی پارتی بە(خەڵك)ی ڕاگەیاند، یەكێتی و پارتی ئەگەر ڕێكنەكەوتن بەدیلی ڕێككەوتن چیە، ئایا دوو ئیدارەیی زیندوو دەكرێتەوە كە توخمەكانی دووئیدارەیی نییە و گونجاو نییە وەك سەردەمی ساڵانی نەوەدەكان، چونكە ئێستا هەرێمی كوردستان هەڵومەرجێكی دیكەی هەیە جیا لەوكاتە و ڕەوایەتییەكی نێونەتەوەیی هەیە كە وڵاتان بەشێوەیەكی فەڕمی مامەڵە لەگەڵ حكومەت و هەرێمەكەمان دەكەن كە پایتەختەكەی هەولێرە.

ڕاشیگەیاند، هەر پایتەختێك بەناوی سلێمانی دروست بكرێت لەسەر ئاستی ناوچەیی و نێودەوڵەتی و ناوخۆیی دانی پێدانانرێت، بۆیە بەدیلی ڕێككەوتن، ڕێككەوتنە لەگەڵ یەكێتی، چونكە ئەگەر یەكێتی بەشداربێت لەحكومەت یان ئۆپۆزسیۆن هەردەبێت بگەڕێتەوە بۆ پەڕلەمانی كوردستان، وەك دامەزراوەیەكی تەشریعی، دەبێ كادیران و ئەندامانی یەكێتیش دڵخۆش بن بەوەی پەڕلەمان نەكەوتووەتە نێودەمەقاڵێی سیاسی، تەنها هەنگاو كاراكردنەوەی پەڕلەمان بووە.

ئەوەشی خستەڕوو، یەكێتی و پارتی بۆ پێكهێنانی حكومەت دەتوانن زۆر زیاتر گفتوگۆ بكەن، ئەگەر ناكۆكیشیان هەبێت ئاساییە و لەدوای نامەكەی بارزانی و كۆسرەت ڕەسوڵ زەمینەیەكی ڕەخساوە بۆ ئەوەی دانیشتن لەنێوان یەكێتی و پارتی بكرێت، دواجاریش پێمانوایە یەكێتی دێتەوە پەڕلەمان و بەشداری كارادەبێت لەپێكهێنانی كابینەی نوێی حكومەت.

ریکلام

راپۆرت

پسپۆڕێك: 80%ی هاووڵاتیان تووشی كۆرۆنا دەبن
عیراق، ئەو لایەنانەی سودییان لە كۆرۆنا بینیوە ئاشكرا دەكرێن

خەڵك- بەشی هەواڵ
پەرلەمانتارێكی سەربەخۆ لە پەرلەمانی عیراق پێیوایە سێ‌ لایەن سودییان لە ڤایرۆسی كۆرۆنا بینیوە لە عیراق، پسپۆڕێكی تەندروستی گشتیش لەگەڵ حاڵەتی پابەندنەبوونی هاووڵاتیان بە ڕێكارەكانی خۆپارێزی، 80%ی كۆمەڵگەی عیراقی تووشی پەتاكە دەبێت.

باسم خەشان پەرلەمانتاری سەربەخۆ لە پەرلەمانی عیراق، لە لێدوانێكی ڕۆژنامەوانیدا ڕایگەیاند”دەركەوتنی ڤایرۆسی كۆرۆنا لە وڵات و كاریگەرییەكانی لەماوەی چەند مانگی ڕابردوو، بەشێوەیەكی ڕوون بەرەنجامی شۆڕشی تشرینیان لە گۆڕانكارییە شاوەڕوانكراوەكان دواخست و هاوبەشییان كرد لە هێشتنەوەی هێزە سیاسییەكان لە ڕەوشی ئێستایاندا، بۆیە دەكرێت بڵێین هەموان سودییان لە ڤایرۆسەكە بینی جگە لە گەلی عیراق”.

بە وتەی خەشان”سێ‌ لایەن سودییان لە ڤایرۆسی كۆرۆنا بنیوە كە هێزە سیاسییە دەستڕۆیشتووەكان، بەو هۆیەی پارێزگارییان لە بوونی خۆیان كردووە لەبەرانبەر گۆڕانكارییەكان، لەگەڵ گرێبەستە گەورەكان كە لەماوەی ڕابردوودا واژۆكران، وێڕای سودوەرگرتنی بازرگانانی دەرمانە خراپەكان لەڕووی ساغكردنەوەی كاڵاكانیان لە بازاڕ”.

ئەو پەرلەنتارە پێیوایە”كۆرۆنا بۆتە مایەی ڕاگرتنی زۆرێك لە چالاكییە گرنگەكان لە وڵاتدا، بە تایبەتیش حكومییەكان، چونكە ڕێژەی دەوام 25% تێناپەڕێنێت، بۆیە هاووڵاتیان زەرەرمەندی گەورەن لەم تەنگژەیەی ڕوودەدات”.

پێشتر پسپۆڕێكی لە تەندروستی گشتی، پێشبینی كردبوو 80%ی گەلی عیراق تووشی ڤایرۆسی كۆرۆنا ببێت، باسی لە پێویستی هەنگاونانی عیراق كردبوو بۆ گەیشتن بە قۆناغی پێكەوەژیان لەگەڵ پەتاكە.

د. هەیسەم عوبێدی ڕایگەیاندبوو”عیراقییەكان و هەموو گەلانی جیهان، گەیشتوونەتە ئەو بڕوایەی كە پێویستە پێكەوەژیان لەگەڵ ڤایرۆسی كۆرۆنادا بكرێت، دوای ئەوەی ماوەیەكی زۆر بەسەر قەدەغەكردنی هاتووچۆدا تێپەڕی، هەروەها ژیان ناكرێت لەمە زیاتر ڕابوەستێت”.

بە بۆچوونی ئەو پسپۆڕە”هۆكاریی بەرزبوونەوەی ڕێژەی تووشبوون بۆ كەمكردنەوەی ڕێوشوێنەكانی قەدەغەكردنی هاتووچۆ لەكانی جەژنی قوربان و تێكەڵبوونی خەڵك لە بازاڕەكان، یان لە سەردنەكان دەگەڕێتەوە كە ڕێگەی بۆ زیاتر بڵاوبوونەوەی پەتاكە خۆشكرد”.

عوبێدی پێشبینی كرد”70-80%ی كۆمەڵگەی عیراقی تووشی ڤایرۆسی كۆرۆنا ببێتە بەپێی چەمكی بەرگری كۆمەڵایەتی، ناشكرێت ڕەوشەكە كۆنترۆڵ بكرێت تا بەشێوەیەكی پلەبەندی تووشبوون لەنێو كۆمەڵگەدا ڕوونەدات”.

پسپۆڕەكەی تەندروستی گشتی عیراق دەڵێت”كردنەوەی مۆڵەكان و ڕێگەدان بە هاتووچۆكردن، ڕێخۆشكەرن بۆ ڕوودانی حاڵەتی پابەندنەبوونی گەورە و بە تایبەتیش لەنێو توێژی لاوان كە زەمینەسازی بۆ تووشبوونی ملیۆنی خۆش دەكەن، ئەمەش عیراقییەكان دەخاتە ڕەوشێكی قورسەوە، چونكە دامەزراوەی تەندروستی لەو دەمەدا توانی لەخۆگرتنی ئەو ژمارە گەورەیەی نامێنێت”.

سەبارەت بە داواكارییەكانی هەڵگرتنی هەردوو شێوازیی قەدەغەكردنی هاتووچۆ، عوبێدی وتی”لەوبڕوایەداین پێكەوەژیان پێویستە هاوشان بێت لەگەڵ سەپاندنی ڕێكاریی توند كە هاووڵاتیان پابەند بكات بە خۆپاراستن و سەپاندنی سزای دارایی بەسەر سەرپێچیكاران، بۆ خۆلادان لە تۆماركردنی ژمارەیەكی گەورەی تووشبوان، بەركەوتن لەگەڵ ڤایرۆسەكەدا چەند زیاتر بێت، هێندە تووشبوو كاریگەریی لەسەر دروستدەبێت، بۆیە جەخت لەسەر پێویستی بەستنی كەمامە و سەپاندنی لە شەقامەكان و فەرمانگە و شوێنەكانی كار دەكەینەوە”.

د. هەیسەم عوبێدی ئاماژەی بە دەنگۆی تەوژمی دووەمی كۆرۆناش كرد كە بە وتەی ئەو”ڕوودانی جێگیر نییە، گەر ڕووشبدات لە عیراق، ئەوا 25%ی گەل كاریگەر نابێت بە پەتاكە، چونكە تووشبووە و لە ماوەی 6 مانگی ئەم ساڵدا بەرگری وەرگرتووە، گەر ڕووبدات، ئەوا نیشانەكانی جیاوازدەبن لەوەی لەئێستادا هەیە”.

بەردەوام بە لە خوێندنەوە

راپۆرت

وردەكاریی نوێ‌ لەسەر ڤاكسینی دژە كۆرۆنا ئاشكرادەكرێت

خەڵك- بەشی هەواڵ
دەسەڵاتدارانی ڕوسیا وردەكاریی نوێ‌ لەبارەی ڤاكسینە ڕوسییەكەی دژ بە ڤایرۆسی كۆرۆنا ئاشكرادەكەن.

چاوەڕوان دەكرێت یەكەمجار بۆ پزیشكان و مامۆستایان بەكاربهێنرێت كە دەكرێت لە كۆتایی ئەم مانگە یان سەرەتای مانگی ئەیلوبی داهاتوو پرۆسەی بەكارهێنەكەی دەستپێبكات.

لەڕێنماییە تایبەتەكانی بەكارهێنانی ڤاكسینە نوێیەكە كە لەلایەن ناوەندی (گامالی) ڕوسی بۆ پەتاكان و بایۆلۆجی دەركراوە هاتووە”ڤاكسینەكە بریتیە لە دەرزییەك كە لە دەماری (دەلتوید) لە شان دەدرێت. گەر ئەستەمیش بوو لەو شوێنە بدرێت، ئەوا لە دەماری پانی ڕان دەدرێت”.

لەپێناو پتەوكردنی بەرگری لەش، دوو جار دەرزییەكە لێدەدرێت كە یەكەمیان پێكهاتەیەكی ڤاكسینەكەی تێدایە، دوای 3 هەفتەش جارێكی تر كەسەكە ڤاكسینێكی تر وەردەگرێت كە پێكهاتەی دووەمی ڤاكسینەكەی تێدایە.

ڕێنماییەكان ئاماژە بە تێبینییەك دەكەن كە بریتییە لەوەی، ئەو كەسەی دەرزییەكەی لێدەدرێت، پێویستە بۆ ماوەی 30 خولەك لەژێر چاودێری پزیشكان یان پەرستاراندا بێت.

پێشتر ڤلادیمێر پۆتین سەرۆكی ڕوسیا ڕایگەیاندبوو، كچەكەی ڤاكسینی دژ بە ڤایرۆسی كۆرۆنای لەسەر خۆی تاقیكردۆتەوە كە بە وتەی ئەو، لەگەڵ وەرگرتنی یەكەم ڤاكسیندا پلەی گەرمای لەشی گەیشتۆتە 38 پلەی سەدی، بەڵام لەكاتی وەرگرتنی دووەم ڤاكسیندا پلەی گەرمای بەرزنەبۆتەوە و پاشان پلەی گەرمای جەستەی ئاسایی بۆتەوە، لەئێستاشدا تەندروستی زۆر باشە.

دەزگای (روس زدراڤ نادزور) چاودێری تەندروستی ڕوسی ڕایگەیاندبوو، پلانی هەیە لە دوای بەكارهێنانی ڤاكسینەكە توێژینەوە لەسەر چەندان هەزار كەس بكات، تا چاودێری ئەگەری دەركەوتنی دیاردە لاوەكییە ناچاوەڕوانكراوەكان بكات لەنێو ئەوانەی ڤاكسینەكەیان بەكارهێناوە.

بەردەوام بە لە خوێندنەوە

راپۆرت

وردەكارییەكانی دەخرێنەڕوو
لێكۆڵینەوەكان بەشێك لە هۆكاریی تەقینەوەكەی بەیروت ئاشكرادەكەن

خەڵك- بەشی هەواڵ
سەرچاوە ئاگادارەكان ڕایدەگەیەنن، لێكۆڵینەوە سەرەتاییەكان ئاماژە بە چەندان ساڵ پشتگوێخستتن و بێخەمی دەسەڵاتداران دەكەن لەڕووی عەمباركردنی ماددەیەكی مەترسیدار لە بەندەری بەیروت كە بووە هۆی ئەو تەقینەوەیەی تێیدا زیاتر لە 100 كەس بونە قوربانی.

ئاژانسی (رۆیتەرز) لە زاری سەرچاوەیەكی ئاگادارەوە بڵاویكردەوە:”مەسەلەی سەلامەتی عەمباركردن، چەندان جار خراوەتە بەردەست لیژنەكان و دادوەران، بەڵام هیچ فەرمانێك دەرنەكرا بۆ گواستنەوەی ئەو ماددەیە كە خێرا گڕدەگرێت، یان لەناوبردنی”.

بە وتەی سەرچاوەكە:”ئاگرێك لە گەنجینەی ژمارە نۆی بەندەرەكە كەوتەوە و گەیشتە گەنجینەی ژمارە 12 كە نیتراتی ئەمۆنیۆمی تێدا عەمباركراوە”.

سەرچاوەكە دەڵێت:”تەقینەوەكەی 4ی تەمموز بەهێزترین تەقینەوە بوو كە بەیروت بەخۆیەوە بینی، لەكاتێكدا شارەكە هێشتا برینەكانی جەنگی ئەهلی كە سی ساڵ درێژەی كێشا ساڕێژ نەبوون، سەرباری ئەوەش بە تەنگژەیەكی دارایی تونددا تێدەپەڕێت كە دەرهاویشتەی دەیان ساڵ لە گەندەڵی و خراپ بەڕێوەبردنی ئابورییە”.

بەدەری زاهیر، بەڕێوەبەری گشتی گومرگی لوبنان بە ڕۆژنامەوانانی ڕاگەیاندووە”گەمرگ شەش بەڵگەنامەی بۆ دەسەڵاتی دادوەریی بەرزكردۆتەوە و هۆشداریی داوە لەبارەی مەترسی گەورەی ماددەكە”.

بە وتەی ئەو بەرپرسە لوبنانییە”داوامان كرد سەرلەنوێ‌ هەناردە بكرێتەوە، بەڵام ئەوە ڕوەینەدا و هۆكارەكەشی بۆ شارەزایان و پەیوەنیدارەكان بەجێدەهێڵین”.
سەرچاوەیەكی تر كە فەرمانبەرە لە بەندەرەكە بە (رۆیتەر)ی ڕاگەیاندووە”شەش مانگ لەمەوبەر تیمێك نیتراتی ئەمۆنیۆمی نێو گەجینەكەی تەماشاكرد و هۆشداریدا لەوەی كە گەر نەگوازرێتەوە،هەموو بەیروت دەتەقێنێتەوە”.

بەپێی ئاژانسەكە، دوو بەڵگەنامە هەن كە تێیاندا گومرگی لوبنانی لە ساڵانی 2016 و 2017 داوای لە دەسەڵاتی دادوەریی كردووە، تا داوا لە دامەزراوە دەریاییە پەیوەندیدارەكان بكات، ماددەكە هەناردەبكەن، یان ڕەزامەندی لەسەر فرۆشتنی نیتراتی ئەمۆنیۆم دەرببڕن كە لەڕێی كەشتی باری (رۆسۆس)ەوە هێنرا و لە گەنجینەی 12دا بۆ زامنكردنی سەلامەتی بەندەرەكە هەڵگیراوە”.

یەكێك لە بەڵگەنامەكان، ئاماژە بە چەند داواكارییەكی هاوشێوە دەكات لە ساڵانی 2014 و 2015.

ماڵپەڕی شیب ئەرستید. كۆم، كە تۆڕێكە مامەڵە لەگەڵ سكاڵا یاساییەكانی كەرتی بار دەكات، لە ڕاپۆرتێكیدا لە ساڵی 2015 ڕایگەیاندووە، كەشتی رۆسۆس كە بە ئاڵای مۆڵدافیاوە لە دەریادا گەشتی كردووە، كاتێك ڕووبەڕووی كێشەی تەكنیكی بووە لە گەشتە دەریاییەكەی لە جۆرجیاوە بۆ مۆزەمبیق، ، لە مانگی ئەیلولی 2013 لە بەیروت لەنگەری گرت و 2750 تەن نیتراتی ئەمۆنیۆمی هەڵگرتبوو.

بەپێی ماڵپەڕەكە”دوای ئەوەی پشكنینی بۆكراوە، ڕێگە لە بەڕێكەوتنی گیراوە، پاش ماوەیەكی كەمیش خاوەنی بارەكە دەستبەرداریی بارەكەی بووە، ئەمەش دوو قەرزاریی ناكۆكی ناچار كردووە سكاڵای ئاسایی بەرزبكەنەوە”.

ئەو ماڵپەڕە دەڵێت”بەهۆی مەترسییەكانی پەیوەست بە هێشتنەوەی نیتراتی ئەمۆنیۆم لەسەر كەشتییەكە، دەسەڵاتداران ناچاربوون بارەكە بگوازنەوە بۆ نێو گەنجینەكانی بەندەرەكە”.

بەردەوام بە لە خوێندنەوە

کوردستان