ئێمە لە تۆرە کۆمەڵایەتیەکان

راپۆرت

بە وێنە.. مێژووی سەرڕێژبوونی دەریاچەی دووكان دوای 31 ساڵ دووبارە دەبێتەوە

خەڵك- ئەحمەد عەبدوڵڵا

ئاستی ئاوی بەنداوی دووكان نزیكەی 10 مەتر لە ساڵی ڕابردوو بەرزترە و دەتوانێت ملیارێك و 500 ملیۆن مەتر سێجای دیكە ئاو كۆبكاتەوە و پاشان دەبێت ئاوە زیادەكە بەربدرێتەوە، بەوەش لە ماوەی 31 ساڵی ڕابردوودا پێوانەیەكی مێژووییتر تۆمار دەكات و دوو جۆر مەترسى دروست دەكات.

بەنداوی دووكان تەمەنی 65 ساڵە و دەتوانێت 7 ملیار مەتر سێجا ئاو كۆبكاتەوە و یەكەم بەنداوی كۆنكرێتی گەورەیە لەسەر ئاستی عێراق و لەسەر ڕووبەری 250 كلیۆمەتری دووجا دروستكراوە بۆ چەند مەبەستێكی سەرەكی كە گرنگترینیان كۆكردنەوەی ئاوی پێویست بۆ خواردنەوە و كشتوكاڵ، ڕێگری لە مەترسییەكانی لافاوی ساڵانە و سامانی ماسی، گەشتیاری و بۆ یەكجاریش لە مێژوودا بەنداوەكە پڕبووە و سەرڕێژی كردووە لە ساڵی 1988 دا و ئەگەری زۆرە ئەمساڵیش هەمان سیناریۆی پێش 31 ساڵی ڕابردوو دووبارە بێتەوە.

محەمەد تاهیر، بەڕێوەبەری بەنداوی دووكان لە چاوپێكەوتنێكدا لەگەڵ (خەڵك) باسی لەوەكرد، هیچ مەترسییەك لەسەر ڕووخانی بەنداوەكە نییە، چونكە بەپێی خشتەیەك ئیدارەی ئاو لە دەریاچەكەدا دەكرێت و بەردەوامیش پشكنین بۆ ئامێرە هەستیارەكانی دەكرێت “لەكاتی پڕبووندا دوو جۆر مەترسی دروست دەكات لەلایەك بۆ سەر كەرەستەكانی پڕۆژەی بەنداوی دووكان، بەهۆی دروستبوونی فشار و لۆدێكی زۆرەوە لەسەر بەنداوەكە، لەلایەكی تر بۆ سەر ئەو موڵكانەی لە خوارووی دەریاچەكەوەن و لەسەر ڕۆخی ڕووبارەكە دروستكراون، لەوانەیە زیانی بۆ هاووڵاتیان هەبێت، هەرچەندە نازانرێت لە دوو مانگی داهاتوودا هەمان بڕی ئاومان بۆ دێت، ساڵی 1988 ناچاربووین لە چركەیەكدا دوو هەزار و 250 مەتر سێجا ئاو بەربدەینەوە، لەو كاتەدا یاسا جێبەجێ‌ دەكرا و بەپێی یاسای ژمارە 59 ئاستی بەرزترین لافاو دیاری دەكرێت و پاشان 20 مەتری دیكەش دیاری دەكرێت، بەڵام ئێستا حساب بۆ ئەو یاسایە ناكرێت و هەندێك فەرمانگە ئەو شوێنانەشیان تاپۆ كردووە و بەوەش دەوڵەت دەكەوێتەژێر بەرپرسیارەتی قەرەبووكردنەوەش”.

محەمەد تاهیر، بەرێوەبەری بەنداوی دووكان

بەڕێوەبەری بەنداوی دووكان ڕوونیكردەوە، بەهۆی تەسكبوونەوەی ڕێڕەوی ئاوی زێی دووكانەوە، ئەگەر ڕێژەیەكی كەمتر لە ساڵی 1988 یش بەربدەنەوە، هاووڵاتیان زیانی زیاتر دەكەن.

بەنداوی دووكان “ڕێڕەوی دەمەجەڕە Spill way”ی هەیە كە لە حاڵەتی پڕبوونی بەنداوەكەدا ئاوە زیادەكە دەچێتە دەرەوە و ساڵی 1988 یش بۆ یەكەمجار بەكارهاتووە، مەبەستی دروستكردنی ئەو ڕێڕەوە ئاوییەش بۆ كەمكردنەوەی لۆدی ئاوەكە و دورخستنەوەی مەترسییە لەسەر بەنداوەكە و بەڕێوەبەری بەنداوەكەش دەڵێت”لە ڕێگەی قائیمقامیەتی دووكانەوە ئەو هاووڵاتیانەمان ئاگادار كردووەتەوە كە پڕۆژەیان هەیە لە خوار بەنداوەكە هەموو كاتێك لە ئامادەباشیدابن، ئەگەر لافاویش بێت لەدەسەڵاتی ئێمەدا نامێنێت و ئاوەكە لە ڕێگەی ڕێرەوەكە خۆی پێدا دەكات و دەردەچێت”.

ئاوی زێی بچوك لە نێو قەزای دووكاندا

بەنداوی دووكان لەسەر زێی بچوك دروستكراوە و سەرچاوەی سەرەكی زێیەكەش لە سنووری سەردەشتی ڕۆژهەڵاتی كوردستانەوە دەڕژێتە نێو خاكی هەرێمەوە، ئێران لەسەر زێیەكە 16 بەنداوی دروستكردووە، كە دیارترینیان بەنداوی كۆڵەسێی سەردەشتە كە توانای گلدانەوەی 500 ملیۆن مەتر سێجا ئاوی هەیە و كاریگەری زۆری هەبووە لەسەر كەمكردنەوەی داهاتی ئاوی بەنداوی دووكان، بۆیە بە بڕوای چاودێرانی بوارەكە حكومەتی هەرێم دەبوو پێشتر بیرى لە دروستكردنی بەنداوی یاریدەدەر بكردایەوە، بەتایبەتی لە ناوچەكانی قەڵادزێ‌ و شارباژێڕ بۆ كەمكردنەوەی لۆد لەسەر بەنداوی دووكان، بەتایبەت كە لقێكی دیكەی زێی بچووك سەرچاوەكەی لە شارباژێڕەوەیە.


محەمەد تاهیر، بەڕێوەبەری بەنداوی دووكان پێیوایە، دروستكردنی بەنداوی دیكە لە نێو هەرێمدا لەسەر زێی بچوك پێویستە، بەڵام دەبێت پێشتر بە وردی خوێندنەوەی بۆ بكرێت، بۆ ئەوەی نەبێتە هۆكاری كەمبوونەوەی ئاوی بەنداوەكە”دروستكردنی بەنداو ئەگەر بۆ كەمكردنەوەی داهاتی ئێمە بێت وەك ئێران زیانی زۆری دەبێت، چونكە پێویستە بە وردی خوێندنەوەی بۆ بكرێت و ئیدارە بكرێت و فەرمانگە و ئەندازیاری پسپۆڕی بۆ دابنرێت، بەڵام پێویستە ئەگەر بەپێی بەرنامەیەكی زانستی دروست بكرێن، چونكە ئەو بەنداوانەش پڕ دەبن و ئێمەیش دەتوانین سودیان لێوەربگرێن”.

حكومەتی هەرێم بە پلانێك بەنیازە چەند بەنداوێك لەسەر زێی بچوك دروستبكات لە ناوچەكانی شارباژێڕ “بەنداوی زەلان، خێوەتە”، هەروەها بەنداوی “دەڵگە” لە قەڵادزێ‌ كە دەتوانێت نزیكەی 120 ملیۆن مەتری سێجا ئاو كۆبكاتەوە.

بەهۆی ڕێژەی زۆری باران بارینی ئەمساڵەوە كە لە هەندێك ناوچەكەدا گەیشتووەتە نزیكەی 900 ملیم، ئاستی بەنداوە ستراتیژییەكانی هەرێم كوردستان زۆری زیادییان كردووە و بەوەش ڕێژەیەكی زۆر لە قوڕ و لیتەی لە ناوچە شاخاوییەكانەوە هێناوەتە ناو بەنداوی دووكانەوە كە بەوتەی بەڕێوەبەری بەنداوەكە ساڵانە دەگاتە نزیكەی 8 ملیۆن تەن و ئەوەش كاریگەری نەرێنی دەبێت لەسەر كەمكردنەوەی تەمەنی بەنداوەكە، بەڵام ئێران بۆ درێژكردنەوەی تەمەنی بەنداوەكانی لەم وەرزەدا ئاو كۆناكاتەوە و لە كۆتایی بەهاردا دەست دەكات بە گرتنەوەی ئاوی ڕووبارەكان و بەڕێوەبەری بەنداوی دووكان لەوبارەوە دەڵێت”ئێران لە هاویندا دەست دەكات بۆ گرتنەوەی ئاوەكە و داهاتی ئاوی ئێمە كەمدەكاتەوە، بەڵام لەم وەرزەدا ئاو كۆناكاتەوە، بۆ ئەوە دوربێت لە قوڕ و لیتەی لافاو، نەك گرتنەوەی ئاو پلانی گۆڕینی ڕێڕەوی ئاوەكەشیان داناوە و دەیانەوێت بە تەواوەتی ئاوی ڕووبارەكان وشكبكەن و بیگەڕێننەوە بۆ نێوخۆی ئێران، بۆ نمونە ئاوی زێی بچوك بگەڕێنێتەوە بۆ دەریاچەی ورمێ‌”.

گفتووگۆی بەرێوەبەری بەنداوی دووكان و ڕۆژنامەنوس ئەحمەد عەبدوڵڵا، ئامادەكاری ڕاپۆرتەكە

ماوەی دوو ساڵە ئێران لە سەرەتای مانگی حوزەیراندا ئاوی زێی بچوك دەگرێتەوە، ئەوەش مەترسییەكی جدی لەسەر شادەماری ئاوی بەنداوەكە دروستكردووە”40%ی داهاتی ئاوی دووكان لە ئێرانەوە دێت، 60%ی ئاوی ناوخۆییە و وەرزییە، بەڵام ئاوی زێی بچوك هەمیشەییە و ماوەی دوو ساڵە ئێران دەیگرێتەوە”، بەڕێوەبەری بەنداوی دووكان وای وت.

ئێستا بەنداوی دووكان نزیكەی 5 ملیار و 500 ملیۆن مەتری سێجا ئاوی تێدا كۆكراوەتەوە و پێشبینی ئەوەی لێدەكرێت بۆ جاری دووەم لە تەمەنیدا پڕ بێت و ئاو لە ڕێڕەوی دەروازەدارەوە بچێتەدەرەوە و زیانی لێبكەوێتەوە، مێژوو جارێكی تر دووبارە بێتەوە و هاوشێوەی ساڵی 1988، بەنداوەكە پڕ بێت.

ریکلام

راپۆرت

پسپۆڕێك: 80%ی هاووڵاتیان تووشی كۆرۆنا دەبن
عیراق، ئەو لایەنانەی سودییان لە كۆرۆنا بینیوە ئاشكرا دەكرێن

خەڵك- بەشی هەواڵ
پەرلەمانتارێكی سەربەخۆ لە پەرلەمانی عیراق پێیوایە سێ‌ لایەن سودییان لە ڤایرۆسی كۆرۆنا بینیوە لە عیراق، پسپۆڕێكی تەندروستی گشتیش لەگەڵ حاڵەتی پابەندنەبوونی هاووڵاتیان بە ڕێكارەكانی خۆپارێزی، 80%ی كۆمەڵگەی عیراقی تووشی پەتاكە دەبێت.

باسم خەشان پەرلەمانتاری سەربەخۆ لە پەرلەمانی عیراق، لە لێدوانێكی ڕۆژنامەوانیدا ڕایگەیاند”دەركەوتنی ڤایرۆسی كۆرۆنا لە وڵات و كاریگەرییەكانی لەماوەی چەند مانگی ڕابردوو، بەشێوەیەكی ڕوون بەرەنجامی شۆڕشی تشرینیان لە گۆڕانكارییە شاوەڕوانكراوەكان دواخست و هاوبەشییان كرد لە هێشتنەوەی هێزە سیاسییەكان لە ڕەوشی ئێستایاندا، بۆیە دەكرێت بڵێین هەموان سودییان لە ڤایرۆسەكە بینی جگە لە گەلی عیراق”.

بە وتەی خەشان”سێ‌ لایەن سودییان لە ڤایرۆسی كۆرۆنا بنیوە كە هێزە سیاسییە دەستڕۆیشتووەكان، بەو هۆیەی پارێزگارییان لە بوونی خۆیان كردووە لەبەرانبەر گۆڕانكارییەكان، لەگەڵ گرێبەستە گەورەكان كە لەماوەی ڕابردوودا واژۆكران، وێڕای سودوەرگرتنی بازرگانانی دەرمانە خراپەكان لەڕووی ساغكردنەوەی كاڵاكانیان لە بازاڕ”.

ئەو پەرلەنتارە پێیوایە”كۆرۆنا بۆتە مایەی ڕاگرتنی زۆرێك لە چالاكییە گرنگەكان لە وڵاتدا، بە تایبەتیش حكومییەكان، چونكە ڕێژەی دەوام 25% تێناپەڕێنێت، بۆیە هاووڵاتیان زەرەرمەندی گەورەن لەم تەنگژەیەی ڕوودەدات”.

پێشتر پسپۆڕێكی لە تەندروستی گشتی، پێشبینی كردبوو 80%ی گەلی عیراق تووشی ڤایرۆسی كۆرۆنا ببێت، باسی لە پێویستی هەنگاونانی عیراق كردبوو بۆ گەیشتن بە قۆناغی پێكەوەژیان لەگەڵ پەتاكە.

د. هەیسەم عوبێدی ڕایگەیاندبوو”عیراقییەكان و هەموو گەلانی جیهان، گەیشتوونەتە ئەو بڕوایەی كە پێویستە پێكەوەژیان لەگەڵ ڤایرۆسی كۆرۆنادا بكرێت، دوای ئەوەی ماوەیەكی زۆر بەسەر قەدەغەكردنی هاتووچۆدا تێپەڕی، هەروەها ژیان ناكرێت لەمە زیاتر ڕابوەستێت”.

بە بۆچوونی ئەو پسپۆڕە”هۆكاریی بەرزبوونەوەی ڕێژەی تووشبوون بۆ كەمكردنەوەی ڕێوشوێنەكانی قەدەغەكردنی هاتووچۆ لەكانی جەژنی قوربان و تێكەڵبوونی خەڵك لە بازاڕەكان، یان لە سەردنەكان دەگەڕێتەوە كە ڕێگەی بۆ زیاتر بڵاوبوونەوەی پەتاكە خۆشكرد”.

عوبێدی پێشبینی كرد”70-80%ی كۆمەڵگەی عیراقی تووشی ڤایرۆسی كۆرۆنا ببێتە بەپێی چەمكی بەرگری كۆمەڵایەتی، ناشكرێت ڕەوشەكە كۆنترۆڵ بكرێت تا بەشێوەیەكی پلەبەندی تووشبوون لەنێو كۆمەڵگەدا ڕوونەدات”.

پسپۆڕەكەی تەندروستی گشتی عیراق دەڵێت”كردنەوەی مۆڵەكان و ڕێگەدان بە هاتووچۆكردن، ڕێخۆشكەرن بۆ ڕوودانی حاڵەتی پابەندنەبوونی گەورە و بە تایبەتیش لەنێو توێژی لاوان كە زەمینەسازی بۆ تووشبوونی ملیۆنی خۆش دەكەن، ئەمەش عیراقییەكان دەخاتە ڕەوشێكی قورسەوە، چونكە دامەزراوەی تەندروستی لەو دەمەدا توانی لەخۆگرتنی ئەو ژمارە گەورەیەی نامێنێت”.

سەبارەت بە داواكارییەكانی هەڵگرتنی هەردوو شێوازیی قەدەغەكردنی هاتووچۆ، عوبێدی وتی”لەوبڕوایەداین پێكەوەژیان پێویستە هاوشان بێت لەگەڵ سەپاندنی ڕێكاریی توند كە هاووڵاتیان پابەند بكات بە خۆپاراستن و سەپاندنی سزای دارایی بەسەر سەرپێچیكاران، بۆ خۆلادان لە تۆماركردنی ژمارەیەكی گەورەی تووشبوان، بەركەوتن لەگەڵ ڤایرۆسەكەدا چەند زیاتر بێت، هێندە تووشبوو كاریگەریی لەسەر دروستدەبێت، بۆیە جەخت لەسەر پێویستی بەستنی كەمامە و سەپاندنی لە شەقامەكان و فەرمانگە و شوێنەكانی كار دەكەینەوە”.

د. هەیسەم عوبێدی ئاماژەی بە دەنگۆی تەوژمی دووەمی كۆرۆناش كرد كە بە وتەی ئەو”ڕوودانی جێگیر نییە، گەر ڕووشبدات لە عیراق، ئەوا 25%ی گەل كاریگەر نابێت بە پەتاكە، چونكە تووشبووە و لە ماوەی 6 مانگی ئەم ساڵدا بەرگری وەرگرتووە، گەر ڕووبدات، ئەوا نیشانەكانی جیاوازدەبن لەوەی لەئێستادا هەیە”.

بەردەوام بە لە خوێندنەوە

راپۆرت

وردەكاریی نوێ‌ لەسەر ڤاكسینی دژە كۆرۆنا ئاشكرادەكرێت

خەڵك- بەشی هەواڵ
دەسەڵاتدارانی ڕوسیا وردەكاریی نوێ‌ لەبارەی ڤاكسینە ڕوسییەكەی دژ بە ڤایرۆسی كۆرۆنا ئاشكرادەكەن.

چاوەڕوان دەكرێت یەكەمجار بۆ پزیشكان و مامۆستایان بەكاربهێنرێت كە دەكرێت لە كۆتایی ئەم مانگە یان سەرەتای مانگی ئەیلوبی داهاتوو پرۆسەی بەكارهێنەكەی دەستپێبكات.

لەڕێنماییە تایبەتەكانی بەكارهێنانی ڤاكسینە نوێیەكە كە لەلایەن ناوەندی (گامالی) ڕوسی بۆ پەتاكان و بایۆلۆجی دەركراوە هاتووە”ڤاكسینەكە بریتیە لە دەرزییەك كە لە دەماری (دەلتوید) لە شان دەدرێت. گەر ئەستەمیش بوو لەو شوێنە بدرێت، ئەوا لە دەماری پانی ڕان دەدرێت”.

لەپێناو پتەوكردنی بەرگری لەش، دوو جار دەرزییەكە لێدەدرێت كە یەكەمیان پێكهاتەیەكی ڤاكسینەكەی تێدایە، دوای 3 هەفتەش جارێكی تر كەسەكە ڤاكسینێكی تر وەردەگرێت كە پێكهاتەی دووەمی ڤاكسینەكەی تێدایە.

ڕێنماییەكان ئاماژە بە تێبینییەك دەكەن كە بریتییە لەوەی، ئەو كەسەی دەرزییەكەی لێدەدرێت، پێویستە بۆ ماوەی 30 خولەك لەژێر چاودێری پزیشكان یان پەرستاراندا بێت.

پێشتر ڤلادیمێر پۆتین سەرۆكی ڕوسیا ڕایگەیاندبوو، كچەكەی ڤاكسینی دژ بە ڤایرۆسی كۆرۆنای لەسەر خۆی تاقیكردۆتەوە كە بە وتەی ئەو، لەگەڵ وەرگرتنی یەكەم ڤاكسیندا پلەی گەرمای لەشی گەیشتۆتە 38 پلەی سەدی، بەڵام لەكاتی وەرگرتنی دووەم ڤاكسیندا پلەی گەرمای بەرزنەبۆتەوە و پاشان پلەی گەرمای جەستەی ئاسایی بۆتەوە، لەئێستاشدا تەندروستی زۆر باشە.

دەزگای (روس زدراڤ نادزور) چاودێری تەندروستی ڕوسی ڕایگەیاندبوو، پلانی هەیە لە دوای بەكارهێنانی ڤاكسینەكە توێژینەوە لەسەر چەندان هەزار كەس بكات، تا چاودێری ئەگەری دەركەوتنی دیاردە لاوەكییە ناچاوەڕوانكراوەكان بكات لەنێو ئەوانەی ڤاكسینەكەیان بەكارهێناوە.

بەردەوام بە لە خوێندنەوە

راپۆرت

وردەكارییەكانی دەخرێنەڕوو
لێكۆڵینەوەكان بەشێك لە هۆكاریی تەقینەوەكەی بەیروت ئاشكرادەكەن

خەڵك- بەشی هەواڵ
سەرچاوە ئاگادارەكان ڕایدەگەیەنن، لێكۆڵینەوە سەرەتاییەكان ئاماژە بە چەندان ساڵ پشتگوێخستتن و بێخەمی دەسەڵاتداران دەكەن لەڕووی عەمباركردنی ماددەیەكی مەترسیدار لە بەندەری بەیروت كە بووە هۆی ئەو تەقینەوەیەی تێیدا زیاتر لە 100 كەس بونە قوربانی.

ئاژانسی (رۆیتەرز) لە زاری سەرچاوەیەكی ئاگادارەوە بڵاویكردەوە:”مەسەلەی سەلامەتی عەمباركردن، چەندان جار خراوەتە بەردەست لیژنەكان و دادوەران، بەڵام هیچ فەرمانێك دەرنەكرا بۆ گواستنەوەی ئەو ماددەیە كە خێرا گڕدەگرێت، یان لەناوبردنی”.

بە وتەی سەرچاوەكە:”ئاگرێك لە گەنجینەی ژمارە نۆی بەندەرەكە كەوتەوە و گەیشتە گەنجینەی ژمارە 12 كە نیتراتی ئەمۆنیۆمی تێدا عەمباركراوە”.

سەرچاوەكە دەڵێت:”تەقینەوەكەی 4ی تەمموز بەهێزترین تەقینەوە بوو كە بەیروت بەخۆیەوە بینی، لەكاتێكدا شارەكە هێشتا برینەكانی جەنگی ئەهلی كە سی ساڵ درێژەی كێشا ساڕێژ نەبوون، سەرباری ئەوەش بە تەنگژەیەكی دارایی تونددا تێدەپەڕێت كە دەرهاویشتەی دەیان ساڵ لە گەندەڵی و خراپ بەڕێوەبردنی ئابورییە”.

بەدەری زاهیر، بەڕێوەبەری گشتی گومرگی لوبنان بە ڕۆژنامەوانانی ڕاگەیاندووە”گەمرگ شەش بەڵگەنامەی بۆ دەسەڵاتی دادوەریی بەرزكردۆتەوە و هۆشداریی داوە لەبارەی مەترسی گەورەی ماددەكە”.

بە وتەی ئەو بەرپرسە لوبنانییە”داوامان كرد سەرلەنوێ‌ هەناردە بكرێتەوە، بەڵام ئەوە ڕوەینەدا و هۆكارەكەشی بۆ شارەزایان و پەیوەنیدارەكان بەجێدەهێڵین”.
سەرچاوەیەكی تر كە فەرمانبەرە لە بەندەرەكە بە (رۆیتەر)ی ڕاگەیاندووە”شەش مانگ لەمەوبەر تیمێك نیتراتی ئەمۆنیۆمی نێو گەجینەكەی تەماشاكرد و هۆشداریدا لەوەی كە گەر نەگوازرێتەوە،هەموو بەیروت دەتەقێنێتەوە”.

بەپێی ئاژانسەكە، دوو بەڵگەنامە هەن كە تێیاندا گومرگی لوبنانی لە ساڵانی 2016 و 2017 داوای لە دەسەڵاتی دادوەریی كردووە، تا داوا لە دامەزراوە دەریاییە پەیوەندیدارەكان بكات، ماددەكە هەناردەبكەن، یان ڕەزامەندی لەسەر فرۆشتنی نیتراتی ئەمۆنیۆم دەرببڕن كە لەڕێی كەشتی باری (رۆسۆس)ەوە هێنرا و لە گەنجینەی 12دا بۆ زامنكردنی سەلامەتی بەندەرەكە هەڵگیراوە”.

یەكێك لە بەڵگەنامەكان، ئاماژە بە چەند داواكارییەكی هاوشێوە دەكات لە ساڵانی 2014 و 2015.

ماڵپەڕی شیب ئەرستید. كۆم، كە تۆڕێكە مامەڵە لەگەڵ سكاڵا یاساییەكانی كەرتی بار دەكات، لە ڕاپۆرتێكیدا لە ساڵی 2015 ڕایگەیاندووە، كەشتی رۆسۆس كە بە ئاڵای مۆڵدافیاوە لە دەریادا گەشتی كردووە، كاتێك ڕووبەڕووی كێشەی تەكنیكی بووە لە گەشتە دەریاییەكەی لە جۆرجیاوە بۆ مۆزەمبیق، ، لە مانگی ئەیلولی 2013 لە بەیروت لەنگەری گرت و 2750 تەن نیتراتی ئەمۆنیۆمی هەڵگرتبوو.

بەپێی ماڵپەڕەكە”دوای ئەوەی پشكنینی بۆكراوە، ڕێگە لە بەڕێكەوتنی گیراوە، پاش ماوەیەكی كەمیش خاوەنی بارەكە دەستبەرداریی بارەكەی بووە، ئەمەش دوو قەرزاریی ناكۆكی ناچار كردووە سكاڵای ئاسایی بەرزبكەنەوە”.

ئەو ماڵپەڕە دەڵێت”بەهۆی مەترسییەكانی پەیوەست بە هێشتنەوەی نیتراتی ئەمۆنیۆم لەسەر كەشتییەكە، دەسەڵاتداران ناچاربوون بارەكە بگوازنەوە بۆ نێو گەنجینەكانی بەندەرەكە”.

بەردەوام بە لە خوێندنەوە

کوردستان