بەڕێوەبەرایەتی بازرگانی خۆراكی هەولێر ماددە خۆراكییەكانی ناو كۆتا بەشەخۆراكی ئەمساڵ ئاشكرا دەكات و دەڵێت: سەرەڕای پشووی فەرمی دەستیان بە دابەشكردنی سەبەتەی نۆیەمی خۆراك لەسەر لیستی مانگی 12ی ئەمساڵ كردووە.
بەڕێوەبەرایەتی بازرگانی خۆراكی هەولێر لە ئاگادارییەكدا بۆ هاووڵاتیان و بریکارانی خۆراک ڕایگەیاندووە، هەرچەندە پشووی فەرمیە لە سەرجەم دام و دەزگاکانی حکومەت، بەڵام بەشێک لە فەرمانبەرانی بەڕێوەبەرایەتی خۆراک و کۆمەڵگای کۆگاکان دەوامی ئاسایی خۆیان دەکەن بۆ دابەشکردنی بەشەخۆراکی مانگانەی هاووڵاتیان ئەمەش لەبەر بەرژەوەندی هاووڵاتیان.
ڕوونیشی كردۆتەوە، ئەم بەشەخۆراکەی دابەشدەکرێت سەبەتەی نۆیەمی ئەمساڵە لەسەر لیستی مانگی ١٢ / ٢٠٢٤ کە پێکهاتووە لە (زەیت و شەكر و برنج و نیسك و لەتكەنۆك و دۆشاوی تەماتە).
ئاشكراشی كردووە، لە بنكە دوورەكان تەواوی بەشەخۆراك دابەشكراوە و لە بنكەكانی ناوشار هەموو ماددە خۆراكییەكان دابەشكراوە جگە لە زەیت و دۆشاوی تەماتە، كە لەبەر جەردی سەری ساڵ دەكەوێتە هەفتەی داهاتووەوە و بنكەكانی دەورووبەریش بەشێكی ماددە خۆراكییەكانیان دەكەونە ساڵی نوێوە.
