ئێمە لە تۆرە کۆمەڵایەتیەکان

کوردستان

حەشدی شەعبی لە(خەڵك)ەوە دەنگۆیەك سەبارەت بە پێشمەرگە ڕەتدەكاتەوە

خەڵك- بەشی هەواڵ
وتەبێژی حەشدی شەعبی- محیوەری باكوور، ڕەتیدەكاتەوە قسەی لەسەر گەڕانەوەی هێزەكانی پێشمەرگە كردبێت بۆ ناوچە جێناكۆكەكان و بابەتەكە وابەستەی لێكتێگەیشتنەكانی نێوان هەرێم و بەغدا دەكات.

عەلی حسێنی، وتەبێژی حەشدی شەعبی- محیوەری باكوور لە لێدوانێكی تایبەت بە (خەڵك) ڕایگەیاند، ئەو لە زاری ئەرشەد ساڵحی، سەرۆكی بەرەی توركمانییەوە قسەی كردووە، كە چاوی بە فەرماندەكانی سوپای عیراق كەوتووە و ڕەتیكردۆتەوە هێزەكانی پێشمەرگە جارێكی تر بگەڕێنەوە بۆ ناوچە جێناكۆكەكان.

وتیشی، “ئەو بابەتە پەیوەستە بە لێكتێگەیشتنەكانی نێوان هەرێمی كوردستان و حكومەتی فیدڕاڵ”.

بە وتەی عەلی حسێنی، “پرسی گەڕانەوەی هێزەكانی پێشمەرگە بۆ ناوچە جێناكۆكەكان پەیوەندی بە حەشدی شەعبییەوە نییە، ئەو بابەتە لەنێوان هەولێر و بەغدا گفتوگۆی لەسەر دەكرێت و گەڕانەوە و نەگەڕانەوەی پێشمەرگەش بۆ ئەو ناوچانە بەندە بە پەرەسەندنی گفتوگۆكانەوە”.

پێشتر یەكێك لە ماڵپەڕە عیراقییەكان، لە زاری عەلی حسێنی، وتەبێژی حەشدی شەعبی- محیوەری باكوورەوە بڵاویكردبۆوە، كە جارێكی تر هێزەكانی پێشمەرگە ناگەڕێنەوە بۆ ئەو ناوچانەی پێش 16ی ئۆكۆتبەری 2017 تێیدا جێگیربوون.

پێشتر فەرماندەیەكی پێشمەرگە لە هێزەكانی 70ی یەكێتی نیشتمانی كوردستان بە (خەڵك)ی ڕاگەیاندبوو، چەند یەكەیەكی سەربازی گواستراونەتەوە بۆ نزیك شارۆچكەی خورماتوو، كە پێشتر سنوری هێزەكانی عیراق بوون.

بە وتەی ئەو فەرماندەیە، “ئەو سنورە لە ژێر دەسەڵاتی هێزەكانی عیراقدا بووە، بەڵام هیچ هێزێكی سەربازی ئەوانی لێنەبووە، بە ڕێككەوتن هێزی پێشمەرگە گەڕاوەتەوە ئەو شوێنانە، كە چوار ڕەبایەی سەربازین”.

ئەو فەرماندەیە، كە نەیوست ناوەكەی بڵاوبكرێتەوە دەڵێت: “مەبەستی چوونی هێزی پێشمەرگە بۆ سنوورەكە بۆ چاودێریكردنی دۆخی ئەمنی ناوچەكەیە، چونكە ماوەیەكە جموجۆڵی چەكدارانی داعش لەو سنوورەدا زیادی كردووە”.

کوردستان

لە سلێمانی سێ‌ كەس كچێك دەڕفێنن

خەڵك- بەشی هەواڵ
مەفرەزەكانی بنكەی پۆلیسی ئازادی لە سلێمانی سێ تۆمەتباریان دەستگیركرد، كە كچێكیان ڕفاندبوو.

بەڕێوەبەرایەتی پۆلیسی پارێزگای سلێمانی لە ڕاگەیەندراوێكدا، كە وێنەی دەست (خەڵك) كەوتووە ئاماژەی بەوەداوە، پاش تۆماركردنی سكاڵای یاسایی لەلایەن ھاووڵاتییەكەوە، كە كچەكەی ڕفێنراوە، ھێزەكانی پۆلیس لێكۆڵینەوەكانیان دەستپێكرد و زانیاری پێویستیان لەسەر تۆمەتباران كۆكردەوە.

ئاشكراشی كردووە، لەماوەیەكی كەمدا توانرا دوو تۆمەتبار بەناوەكانی (د، ك، م – م، غ، م) دەستگیر بكرێن.

جەختیشی كردۆتەوە، دواتر توانرا تۆمەتباری سەرەكی بەناوی (ن، ك، ق) دەستگیر بكرێت، كە لەكاتی دەستگیركردنیدا كچەكەشی لەگەڵدا بووە.

پۆلیسی سلێمانی دەشڵێت: “لەئێستادا ھەرسێ تۆمەتبار بەبڕیاری دادوەر و بەپێی ماددەی ٤٢١ ڕاگیراون و لێكۆڵینەوەكان بەردەوامن”.

بەردەوام بە لە خوێندنەوە

کوردستان

وەزیرێكی پارتی دەستی لە پۆستە حزبیەكەی كێشایەوە

خەڵك- بەشی هەواڵ
وەزیری شارەوانی و گەشتوگوزاری حكومەتی هەرێم لە پشكی پارتی، دوای دەستبەكاربوونی لە كابینەی نۆیەمی خكومەتی هەرێم دەستی لە پۆستە حزبیەكەی كێشایەوە.

ساسان عەونی، وەزیری شارەوانی و گەشتوگوزاری حكومەتی هەرێم، لە ساڵی 2011-ەوە  بەرپرسی ڕێكخراوە جەماوەرییەكانی پارتی دیموكراتی كوردستان بووە و ڕۆژی پێنج شەممە 22ی ئاب دەستبەرداری پۆستە حزبیەكەی بووە و وەك خۆی دەڵێت: “كاركردنم لە وێستگەیەكەی پڕ ئەزموونی كاری پارتایەتی كۆتایی ھات و ماڵئاواییم لەو ھەڤاڵە خۆشەویستانەم كرد كە بەیەكەوە ئەزموونێكی پڕ بەخششی كاری پێكەوەییمان ئەنجامدا”.

ساسان عەونی، لە هەژماری خۆی لە فەیسبووك ئاماژەی بەوەكردووە، “لەژێر چاودێری ھەڤاڵ ڕێبوار یەڵدا، ئەندامی مەكتەبی سیاسی و بەرپرسی مەكتەبی ڕێكخستن و بەئامادەبوونی خۆی و ئەڤین ھروری، ئەندامانی سەركردایەتی، لە بارەگای دەستەی ڕێكخراوە جەماوەری و پیشەییەكان و بە ئامادەبوونی ھەڤاڵانی ئەندامی دەستە و سەرۆك و نەقیبی سەندیكا و ڕێكخراوو كۆمەڵەكان و نوێنەری ڕێكخراوەكانی كۆمەڵگەی مەدەنی و سكرتێر و ستافی ھەرسێ ڕێكخراوی قوتابیان و لاوان و ئافرەتان و ئەندام بەش و كادرانی دەستە، مەڕاسیمی ئاڵوگۆڕی بەرپرسیارێتی دەستەی ڕێكخراوە جەماوەری و پیشەییەكان سازكرا”.

وەك ساسان عەونی ئاشكرای كردووە، بەرپرسیارێتی ڕێكخراوە جەماوەریەكانی پارتی دراوەتە “ئەڤین ھروری”.

بەردەوام بە لە خوێندنەوە

کوردستان

كاتی كۆنگرە دیاری دەكات
كۆمەڵی ئیسلامی داوای یەكهەڵوێستی بۆ هەڵبژاردنەكانی كەركوك دەكات

خەڵك – بەشی هەواڵ
ئەنجوومەنی سیاسیی كۆمەڵی ئیسلامی لە كۆبوونەوەی ئاسایی خۆیدا داوای ئاسایی كردنەوەی پەیوەندی ‌و یەك هەڵوێستی نێوان سەرجەم لایەنە كوردستانییەكان دەكەن لەپرسە نەتەوەییەكاندا.

ئەنجوومەنی سیاسی كۆمەڵی ئیسلامی لە ڕاگەیەنراوێكدا، كە وێنەیەكی دەست (خەڵك) كەوتووە ڕایگەیاندووە، ئەمڕۆ شەممە 24/8/2019 لەشاری هەولێر بە سەرپەرشتی عەلی باپیر، ئەمیری كۆمەڵی ئیسلامی كوردستان، ئەنجوومەنی سیاسی كۆمەڵی ئیسلامی كۆبوونەوەی ئاسایی ئەنجامدا و لە كۆبونەوەكەدا دۆخی سیاسیی هەرێم‌ و عیراق‌ و ئاماژەكانی گۆڕانكاری سیاسی لە ناوچەكە تاوتوێ كرد.

ئەنجوومەنی سیاسی كۆمەڵی ئیسلامی جەختی لەسەر بەردەوامی هەڵوێستی كۆمەڵی ئیسلامیی لەبەرژوەندی خەڵك ‌و جەماوەر كردۆتەوە، هەروەك باس لەئامادەكارییەكانی بەستنی كۆنگرەیەكی سەركەوتوو كرا، كە بڕیارە لەمساڵدا كۆمەڵی ئیسلامی كۆنگرەی چوراەمی خۆی ببەستێ.

ئەنجوومەنی سیاسیی بەپێویستی زانی سەرجەم ئەندامان ‌و ئۆرگانەكانی حزبەكەی وزەی خۆیان بخەنە گەڕ بەمەبەستی ئەنجامدانی كۆنگرەیەكی سەركەوتوو لەپێناو بەرەوپێشبردنی زیاتری كار و پڕۆژەی كۆمەڵی ئیسلامیی لەداهاتوودا.

هاوكات لەكۆبوونەوەكەدا ئەنجوومەنی سیاسیی كۆمەڵ هەڵبژاردنەكانی ئەنجوومەنی پارێزگاكانی عیراقی خستە بەرباس ‌و لەوپێناوەشدا ئاسایی كردنەوەی پەیوەندیی و یەك هەڵوێستی نێوان سەرجەم لایەنە كوردستانییەكانی بەپێویست زانی‌ لەپرسە نەتەوەییەكاندا، بۆ ئەوەی بتوانن لەناوچە كێشەلەسەرەكاندا بەتایبەت پارێزگای كەركووك ئامانجە نەتەوەییەكان بێننەدی.

بەردەوام بە لە خوێندنەوە

کوردستان