ئێمە لە تۆرە کۆمەڵایەتیەکان

راپۆرت

(خەڵك) ڕوونكردنەوەی شارەوانی سلێمانی لە بارەی بڕیاری مۆڵەتی بینا بە زەویی 200 مەتری بڵاودەكاتەوە

خەڵك_ ئامەد حەسەن

بڕیارێكی شارەوانی سلێمانی بۆ ڕێگرتن لە دابەشكردنی زەویی بۆ چەند بەش كاردانەوەی هاووڵاتیان و لایەنە پەیوەندیدارەكانی لێكەوتووەتەوە و شارەوانی سلێمانی و تۆماری خانووبەرەش لەوبارەیەوە ڕوونكردنەوە دەدەن.

نەورۆز میرە بەڕێوەبەری بەشی هونەری لە شارەوانی سلێمانی بە (خەڵك)ی ڕاگەیاند، پێشتر هەر زەوییەك كە ڕووبەرەكەی لە 142 مەتر زیاتر بووایە و چەند سەهمێك بووایە، دەیتوانی دابەش بكرێت و هەر بەشە و “سورە قەید”ی سەربەخۆی خۆی وەربگرێت، بەڵام ئێستا ئەوە ڕاگیراوە، ناتوانێت دوو “سورە قەید” وەربگرێت، بەپێی ئەم بڕیارە نوێیە، بەڵكو تەنها دەتواندرێت بكرێت بە سەهم ‌و چەند سەهم بێت، تەنها یەك سورە قەید وەردەگرێت، بەڵام هەر سەهمە و مۆڵەتی بینای خۆی هەیە.

ناوبراو ڕوونیشیكردەوە، هەندێك لە شارەوانییەكان وایانزانی كە پێدانی مۆڵەتیش بە زەوییە سەهمەكان ڕاگیراوە، بۆیە ئێمە نوسراوێكمان بۆ وەزارەتی شارەوانی كردووە، كە ئەو بڕیارەی داویانە مۆڵەتی بیناش دەگرێتەوە یان تەنها دوولەتكردنی دەگرێتەوە بۆ دوو سورەقەیدی سەربەخۆ؟، بۆیە تا ئەو كاتە و وەڵامی ئەوان، نوسراومان بۆ شارەوانییەكانی سنورەكەمان كردووە كار بكەن بە ڕێنماییەكانی ئەنجومەنی شارەوانی بۆ ئەو موڵكانەی لە چەند سەهمێك پێكهاتوون بۆ پێدانی مۆڵەت پێیان وەك پێشتر.

دەشڵێت “ئەو موڵكانەی سەهمن هیچ كێشەیان بۆ وەرگرتنی مۆڵەت نییە، بەڵكو ناتوانن بیكەن بە دوو سورە قەید، دەبێت یەك سورە قەیدیان هەبێت، چونكە ڕاگیراوە”.

ناوبراو ئاماژەی بەوەشكرد، ئەو زەوییانەی پێشتر كراون بە سەهم یان چەند لەت كراون و تاپۆ كراون هیچ كێشەیەكیان نییە و كەس ناتوانێت دەستكارییان بكات، بەڵام بۆ جێبەجێكردنی بڕیارێك لە وەزارەتی شارەوانی ئەگەر دەریبكات بۆ ڕاگرتنی مۆڵەت دەبێت بۆ قۆناغی ئایندە بێت و سەرەتا لە تاپۆوە دەستپێبكرێت و هیچ زەوییەك نەكرێت بە سەهم، بەڵام ئەوانەی پێشتر كراون كێشەیان نییە.

هاوكات زەردەشت ڕەفیق وتەبێژی شارەوانی سلێمانی بە (خەڵك)ی ڕاگەیاند، بە هەڵە تێگەیشتن لە بڕیارەكەی شارەوانی سلێمانی هەیە، بەپێی بڕیارەكە زەوییەكی 300 مەتری دەكرێت بە 2 سەهمی 150 مەتری و دوو خانووشی تێدا دروستدەكرێت، لە تاپۆكەشیدا هەر خاوەنە و 150 مەتری خۆی بە ناوەوە دەبێت، بەڵام وەك پێشتر ناتوانرێت بكرێت بە دوو سورەقەیدی سەربەخۆ، واتە یەك سورە قەیدی دەبێت و ئیفراز ناكرێت بۆ دوو بەش.

دەشڵێت “ئەوەی ئێستا گۆڕانكاری كراوە تەنها ئەوەیە زەوییەكی 300 مەتری بۆ نموونە ناكرێت بە دوو بەشی سەربەخۆ و دوو سورە قەید، بەڵام دەكرێت بە سەهم و مۆڵەتی بیناشی هەیە و هیچ كێشەیەكی نییە و تاپۆكەشی دەكرێت بە ناوی دوو سەهمەكەوە”.

هاوكات ئاراس كەریم جێگری بەڕێوەبەری كارگێڕی بەڕێوەبەرایەتی تۆماری خانووبەرەی سلێمانی/2، بە (خەڵك)ی ڕاگەیاند، تاكو ئێستا ئیشوكار و مامەڵەی هاووڵاتیان تایبەت بە ئیفرازی زەوی و سەهمەكان وەك خۆی دەڕوات، پێشتر چۆن بووە هەروایە و هیچ گۆڕانكارییەك نییە، هیچ نووسراوێكیشمان لەسەر ئەو بابەتە بۆ نەهاتووە.

دەشڵێت “پێدانی مۆڵەتی بینا بە زەوییەك ڕووبەرەكەی هەرچەندێك بێت، ئەوە پەیوەندی بە شارەوانییەوە هەیە و پەیوەندی بە تۆماری خانووبەرەوە نییە”.

راپۆرت

(خەڵك) وردەكاری جووڵەی هێزەكانی پێشمەرگەی كوردستان بەرەو سنوورەكانی ئێران بڵاودەكاتەوە

خەڵك-بەشی هەواڵ
هاوكات لەگەڵ زۆرتربوونی گرژییەكانی نێوان ئەمریكا و ئێران و مۆڵدانێكی هێزێكی زۆری سوپای پاسداران بە چەكوچۆڵی قورسەوە لە سنوورەكانی هەرێمی كوردستان، هێزی پێشمەرگەی كوردستان دەست بەجووڵە دەكات بەرەو سنوورەكانی ئێران.

بەپێی زانیارییەكانی گەیشتوو بە (خەڵك) لەسەرچاوە هەرێمییەكانەوە، هێزێكی پێشمەرگەی كوردستان ئەوانەی سەر بە یەكێتی نیشتمانی كوردستانن، بە چەكی قوورسەوە بەرەو سنوورەكانی ئێران لە ناوچەكانی پشدەر و ڕانیە و قەڵادزێ  جووڵەیان پێكراوە.

هاوكات لە چەند ڕۆژی ڕابردوودا هێزێكی زۆری سوپای پاسداران بە چەكی قوورسەوە لە سنوورەكانی هەرێمی كوردستان لە ناوچەكانی شنۆ، پیرانشار، سەردەشت، مەریوان و سەرپێڵی زەهاو جێگیربوون و خەریكی خۆڕێكخستنەوە و نوێكردنەوەی پایەگا كۆنەكانن بەتایبەت لە ناوچەی جاسووسانی سەردەشت هاوسنوور لەگەڵ ناوچەكانی پشدەر و شاڕباژێڕ لە هەرێمی كوردستان.

سەرچاوەیەكی لەشكری كە نەیویست ناوی بڵاوبكرێتەوە بۆ (خەڵك)ی ڕوونكردەوە ئەو جموجۆڵە لەشكرییانە پەیوەندییان بە زۆرتربوونی گرژییەكانی نێوان ئەمریكا و ئێرانەوە هەیە، بەتایبەت ئێران ئامادەكاری لەشكری خۆی دەكات بۆ پاراستنی سنوورەكانی و ڕێگری لە دەربازی هێزی چەكداری حیزبە ئۆپۆزسیۆنە كوردییەكان كە هێزی چەكداریان لەسەر سنوورەكان هەیە.

هەروەها سەرچاوەكە، ڕوونیشیكردەوە، جووڵەی هێزەكانی پێشمەرگەش لە چوارچێوەی ئامادەكاری پێشوەختە بۆ هەر پێشهاتێك بەتایبەت كە لە هەندێك ناوچە هێزی ئۆپۆزسیۆنی كوردی ئێران لە نێو خاكی هەرێمدا هەن و لەگەڵ دروستبوونی گرژیی یان تێكچوونی ڕەوشی نێوخۆی ئێران ڕەنگە دەربازی نێو ڕۆژهەڵاتی كوردستان ببن و لەم حاڵەشدا ئەگەری تێكەهەڵچوونی لەشكری و تێكچوونی ڕەوشی ئاسایشی ناوچە سنوورییەكانی هەرێم هەیە.

لەبارەی جووڵەكردن بە هێزەكانی پێشمەرگەی كوردستان، قارەمان شێخ كەمال جێگری سەرۆك ئەركانی هێزەكانی پێشمەرگەی هەرێمی كوردستان لە لێدوانێكدا بۆ (خەڵك) جووڵەكردنی بە هێزەكانی پێشمەرگە بەرەو دەڤەری ڕاپەڕین پشتڕاستكردەوە و ئاشكرایكرد “ئەوە هەنگاوێكی نوێی هێزی پشتیوانی دووە كە لە ڕانیە بارەگایەكی نوێیان كردووەتەوە”.

هاوكات ناوبراو ڕاشیگەیاند، هەندێك چەك و هێز هەیە، گواستراونەتەوە بۆ سنووری ڕاپەڕین، بەڵام پەیوەندی بە ئێران و هیچ شوێنێكی دیكەوە نییە.

ئاشكراشیكرد، جوڵە بە یەكەكانی سەر بە هێزی پشتیوانی دوو لە سلێمانی كراوە و چووەتە بارەگایەكی نوێی هێزی پشتیوانی دوو لە ناوچەی پشدەر.

بەردەوام بە لە خوێندنەوە

راپۆرت

ئەمڕۆ ساڵوەگەڕی كۆچی دوایی نەوشیروان مستەفا ئەمینە

خەڵك- بەشی هەواڵ

ئەمڕۆ دووهەمین ساڵوەگەڕی كۆچی دوایی نەوشیروان مستەفا ئەمین سیاسەتمەداری ناسراوی كوردە.

نەوشیروان مستەفا ئەمین بە سیاسەتمەدار و نووسەرێكی نێوداری كوردستان ناسراوە ‌و كاریگەری گەورەی لەسەر گۆڕەپانی سیاسی باشووری كوردستان هەبووە.

نەوشیروان مستەفا ئەمین لە 22ی كانوونی دووهەمی 1944 لە شاری سلێمانی لە دایكبووە و قۆناغەكانی سەرەتایی و ناوەندی و دواناوەندی لە سلێمانی و كۆلێژی زانستە سیاسییەكانی لە بەغدا خوێندووە.

ناوبراو لەسەرەتای ساڵانی شەستەكانەوە پەیوەندی بەكاری ڕێكخراوەیی و سیاسی لە نێو ڕیزەكانی یەكێتی قوتابیانی كوردستان- پارتی دیموكراتی كوردستاندا كردووە و دواتر یەكێكبووە لە دامەزرێنەرانی یەكێتی نیشتمانی كوردستان لە ساڵی 1975 و دواتریش بووەتە جێگری سكرتێری گشتی یەكێتی.

لە ساڵی 2009دا بزووتنەوەی گۆڕانی دامەزراندووە و بووەتە ڕێكخەری گشتی ئەو حزبە.

ناوبراو خاوەنی چەندین كتێبە لە بوارەكانی مێژوو و ڕۆژنامەوانی و ئەدەبی كوردیدا و لەبەشێك لە كتێبەكانیدا تیشكی خستووەتەسەر مێژووی شۆڕشی كورد و ناكۆكییەكانی نێو شۆڕشەكان.

نەوشیروان مستەفا ئەمین لە 19ی ئایاری 2017 دوای ململانێیەكی زۆر لەگەڵ نەخۆشیدا لە شاری سلێمانی كۆچی دواییكرد و لە گردی زەگەرتە بارەگای سەرەكی گۆڕان لە شاری سلێمانی بەخاك سپێردرا.

بەردەوام بە لە خوێندنەوە

راپۆرت

ئەمڕۆ ساڵوەگەڕی یەكەم هەڵبژاردنی پەڕلەمان و سەرۆكایەتی كوردستانە

خەڵك- بەشی هەواڵ

ئەمڕۆ ساڵوەگەڕی یەكەم هەڵبژاردنی پەڕلەمان و سەرۆكایەتی هەرێمی كوردستانە لە 19ی ئایاری 1992.

لە 19ی ئایاری 1992 دوای ڕاپەڕینەكەی ئاداری 1991 یەكەم هەڵبژاردنی پەڕلەمانی كوردستان ئەنجامدرا كە تێیدا حەوت لیست و قەوارە بەشدارییان تێدا كرد.

بەپێی یاسای هەڵبژاردنەكان كە لەلایەن كۆمەڵێك یاساناسەوە ئامادەكرابوو و بەرەی كوردستانی پەسەندیكردبوو، پێویستبوو هەرلایەنێك 7%ی دەنگەكان بەدەستبهێنێت بۆ ئەوەی بگاتە پەڕلەمان، بەمهۆیەوە تەنها پارتی و یەكێتی و زەحمەتكێشان گەیشتنە پەڕلەمان.

پارتی و یەكێتی لە كۆی 105 كورسی پەڕلەمان نیوەی كورسییەكانیان بەدەستهێنا و پێنج كورسیش بۆ مەسیحییەكان داندرا.

لەسەر ئەنجامی هەڵبژاردنەكان ناكۆكی كەوتە نێوان پارتی و یەكێتی و ئەنجامەكەیان پەسەندنەكرد وەكخۆی كە بە پێی ئەنجامەكان پارتی بە ڕێژەیەكی كەم لەپێش یەكێتییەوە بوو، بەڵام دواتر بە ڕێككەوتن حكومەتی هەرێم لە نێوان پارتی و یەكێتیدا پێكهات.

دواتر بەهۆی هەڵگیرسانی شەڕی نێوخۆوە هەڵبژاردنی خوولی دووهەم دوای سێزدە ساڵ لە 30ی كانوونی دووهەمی 2005 سازكرا و تێیدا یەكێتی و پارتی لیستی هاوبەشیان هەبوو و زۆرینەی كورسییەكانیان بەدەستهێنا.

خولی سێهەمیش لە 25ی تەمووزی 2009 هەڵبژاردنی بۆ سازكراو یەكێتی و پارتی بە هەمانشێوە لیستی هاوبەشیان هەبوو، بۆیەكەمجار لیستێكی بەهێزی ئۆپۆزسیۆن بە ناوی گۆڕان پەیدابوو كە 25 كورسی هێنا و كورسییەكانی یەكێتی و پارتی بۆ 59 كورسی دابەزین.

هەڵبژاردنی خوولی چوارهەم لە 21ی ئەیلوولی 2013 سازكرا و یەكێتی و پارتی هەریەكەیان لیستی خۆیان هەبوو لەگەڵ لیستە ئۆپۆزسیۆنەكاندا پارتی 38 كورسی و یەكێتی 18 كورسییان بەدەستهێنا و گۆڕان 24 كورسی بەدەستهێنا.

خولی پێنجەمی پەڕلەمانیش دوای ساڵێك لە دواخستنی لە 30ی ئەیلوولی 2018 سازكرا و پارتی و یەكێتی و لیستە ئۆپۆزسیۆنەكان بە لیستی سەربەخۆ بەشداربوون، پارتی 45 كورسی و یەكێتی 21 كورسی و گۆڕان 12 كورسییان بەدەستهێنا.

بە ڕای چاودێرانی سیاسی لە ماوەی 27 ساڵی ڕابردووی تەمەنی پەڕلەمانی كوردستان و لە هەر پێنج خولەكەیدا پەڕلەمان لەلایەن حزبە دەسەڵاتدارەكانەوە دەستوپێی بەستراوە و ڕێی لێگیراوە كە كاروباریی ئاسایی و یاسایی خۆی لە یاسادانان و چاودێریكردن بكات، بگرە بۆ بەرژەوەندییەكانی حزب و دەسەڵاتدارەكان بەكارهێندراوە لە قۆناغەكاندا.

گرنگترین ئەو ڕووداوانەی لە ماوەی 27 ساڵی ڕابردوودا بەسەر پەڕلەمانی كوردستاندا هاتوون یەكێكیان بریتییە لە ڕووداوەكانی 31ی ئابی 1996 كە لە گەرمەی چڕبوونەوەی شەڕی نێوخۆی پارتی و یەكێتیدا لەشكری عیراق بەتانك و زرێپۆشەوە هاتەوە نێو گۆڕەپانی پەڕلەمان.

یەكێكی دیكەشیان لە كاتی چڕبوونەوەی ناكۆكییەكانی پارتی و گۆڕان لەسەر یاسای سەرۆكایەتی هەرێم لە مانگی ئۆكتۆبەری 2015 لەلایەن هێزە ئەمنییەكانی هەولێرەوە ڕێ لە گەڕانەوەی یوسف محەمەد سەرۆكی پەڕلەمان گیرا و دەرگەی پەڕلەمان داخرا.

پەڕلەمانی كوردستان لە تەمەنی خۆیدا جگە لە خوولی چوارهەم، لە سەرجەم خولەكانی دیكەدا سەرۆكەكانی پارتی و یەكێتی بوون، لەخوولی چوارهەمدا یوسف محەمەد لە پشكی گۆڕان سەرۆكی پەڕلەمان بوو، بەڵام دوای كەمتر لە دووساڵ لەلایەن پارتی دیموكراتی كوردستانەوە لە پۆستەكەی دوورخراوە.

هاوكات لە هەمان ڕۆژدا لە 19ی ئایاری 1992دا هەڵبژاردن بۆ ڕێبەری بزووتنەوەی ڕزگاریخوازی كوردستان سازكرا و تێیدا جەلال تاڵەبانی، مەحمود عوسمان، مەسعود بارزانی و عوسمان عەبدولعەزیز خۆیان كاندیدكرد، بەڵام بەهۆی پەسەندكردنی ئەنجامەكانی هەڵبژاردنەوە هیچكام لە كاندیدەكان نەبوونە ڕێبەری كوردستان.

بەردەوام بە لە خوێندنەوە

کوردستان