ئێمە لە تۆرە کۆمەڵایەتیەکان

ئابوری

عیراق لەبەرهەمهێنانی نەوتدا چوارەمی جیهانە

خەڵك- بەشی هەواڵ
بەپێی ڕاپۆرتێكی دامەزراوەی پۆلێنی (GFP)ی جیهانی بۆ ساڵی 2018، عیراق لەسەر ئاستی جیهان چوارەم وڵاتی بەرهەمهێنی نەوتە.

بەپێی ڕاپۆرتێكی دامەزراوەی پۆلێنی (GFP)ی جیهانی بۆ ساڵی 2018، ڕوسیا لە پلەی یەكەمی جیهاندایە بۆ بەرهەمهێنانی نەوت و بڕی بەرهەمهێنانی نەوتی خاوی گەیشتۆتە 10.550 ملیۆن بەرمیل لە ڕۆژێكدا، سعودیەش لە پلەی دووەمدایە و بەرهەمی ڕۆژانەی 10.460 ملیۆن بەرمیل بووە، ویلایەتە یەكگرتووەكانیش بە بەرهەمهێنانی 8.853 ملیۆن بەرمیل لە ڕۆژێكدا لە پلەی سێیەمدایە.

ڕاپۆرتەكەی دامەزراوەی پۆلێنی (GFP) عیراقی لە پلەی چوارەمدا وەك گەورەترین بەرهەمهێنی نەوتی خاو لە جیهاندا دیاری كردووە ،كە بەرهەمی ڕۆژانەی گەیشتۆتە 4.452 ملیۆن بەرمیل، ئێرانیش لە پلەی پێنجەمدایە بە 4.068 ملیۆن بەرمیل لە ڕۆژێكدا، چین بە بەرهەمهێنانی 3.981 ملیۆن بەرمیل لە ڕۆژێكدا لە پلەی شەشەمدایە، لە پلەی حەوتەمیشدا كەنەدا ناوی هاتووە و لە ڕۆژێكدا 3.679 ملیۆن بەرمیل نەوتی بەرهەمهێناوە.

ئیمارات بە بەرهەمهێنانی 3.106 ملیۆن بەرمیل لە ڕۆژێكدا لە پلەی هەشتەمی گەورە بەرهەمهێنەكانی نەوتی جیهانە، كوێت لە پلەی نۆیەمدایە و بەرهەمی ڕۆژانەی گەیشتۆتە 2.924 ملیۆن بەرمیل، لە پلەی دەیەمیشدا بەرازیل-ە، كە بەرهەمی ڕۆژانەی گەیشتۆتە 2.515 ملیۆن بەرمیل.

ئابوری

یاسین مەحمود: شەقامی 100 مەتری سلێمانی وەبەرهێنان دەخاتە قۆناغێكی نوێوە

خەڵك-بەشی هەواڵ

وتەبێژی یەكێتی وەبەرهێنەرانی كوردستان ڕایدەگەیەنێت، دروستكردنی شەقامی 100 مەتری شاری سلێمانی بواری وەبەرھێنان دەخاتە قۆناغێكی نوێوە و دەشڵێت: “جێگری سەرۆك وەزیران زۆر گرنگی بەو پڕۆژەیە دەدات”.

بڕیارە لە ماوەیەكی نزیكدا شەقامی 100 مەتری شاری سلێمانی بچێتە بواری جێبەجێكردنەوە و بەپێی زانیارییەكانی (خەڵك) بە سێ قۆناغ پڕۆژەكە جێبەجێ دەكرێت و یەكێكە لە پڕۆژە گەورە و ستراتیژییەكانی شاری سلێمانی.

یاسین مەحمود، وتەبێژی یەكێتی وەبەرھێنەرانی كوردستان بە (خەڵك)ی ڕایگەیاند، درووستكردنی شەقامی 100 مەتری شاری سلێمانی زۆر گرنگە و بڕیارە بە سەرمایەی خەمڵێنراوی 300 ملیۆن دۆلار بەشی تاسڵوجە-عەربەت لە چەند مانگی داهاتوودا بكەوێتەكار و بە تەواوبوونیشی بواری وەبەرھێنان لە پارێزگای سلێمانی دەخاتە قۆناغێكی نوێوە.

وتیشی، “لەئێستادا گەورەترین كێشەی وەبەرھێنەرانی سلێمانی ئەوەیە، كە شوێنێكی گونجاو نییە خزمەتگوزاری پێدا تێپەڕێت و بتوانین وەبەرھێنانی تێدابكەن، چونكە لە ڕابردوودا شەقامەكانی 30 مەتری و 40 مەتری و 60 مەتری سلێمانی ھەبووە و ھەمووی بووە بە وەبەرھێنان و ئێستا بوار نەماوە بۆ وەبەرهێنان”.

ئاشكراشیكرد، بە تەواوبوونی شەقامی 100 مەتری زیاتر لە ملیارێك دۆلار وەبەرھێنان زیاد دەبێت و دەتوانرێت چەندین پڕۆژەی وەبەرھێنان جێبەجێ بكرێت، چونكە نێوان شەقامی 60 مەتری و 100 مەتری پانتاییەكی فراوانە و پڕ دەبێت لە خزمەتگوزاری و چەندین پڕۆژەی وەبەرهێنانی تێدا ئەنجام دەدرێت.

ئاماژەی بۆ ئەوەشكرد، قوباد تاڵەبانی، جێگری سەرۆكی ئەنجوومەنی وەزیران زۆر گرنگی بە پڕۆژەكە دەدات و دەیەوێت ئەمساڵ ئەو شەقامە بكەوێتە بواری جێبەجێكردنەوە.

بەردەوام بە لە خوێندنەوە

ئابوری

ئەمریكا مەرجێك بۆ بازرگانی نێوان عیراق و ئێران دادەنێت

خەڵك- بەشی هەواڵ
سەرەڕای سزاكانی ئەمریكا بۆ سەر كۆماری ئیسلامی ئێران و قەدەغەكردنی مامەڵە لەبواری وزە لەگەڵ ئەو وڵاتە، بەڵام واشنتن بە دانانی مەرجێك عیراقی لەو بڕیارە بەخشیوە.

ئاژانسی (ڕۆیتەرز) لە زاری بەرپرسێكی عیراقیەوە بڵاویكردۆتەوە، كە ئەمریكا بڕیاریداوە بە بەخشینی عیراق لە قەدەغەی ئەمریكی بۆ سەر كەرتی وزەی ئێرانی و ڕێگەی داوە عیراق غاز و چەند كاڵایەكی دیكە لە تاران بكڕێت و مامەڵەی لەگەڵ بكات.

وەك بەرپرسە عیراقیەكە وتویەتی، “ئەمریكا مەرجی ئەوەی بۆ حكومەتی عیراقی داناوە، كە دەبێت لە مامەڵەكانی لەگەڵ ئێران دراوی جۆری دۆلار نەدان بەو وڵاتە”.

ئاشكراشی كردووە، كە وەزارەتی دارایی عیراق هەژمارێكی بانكی لە بانكێكی حكومی كردۆتەوە بۆ پێدانی بەهای ئەو پێویستیانەی لە ئێرانی دەكرێت بە دینار.

بەردەوام بە لە خوێندنەوە

ئابوری

سبەی تەنها مووچەی یەك وەزارەت دابەشدەكرێت

خەڵك – بەشی هەواڵ
سبەی تەنها مووچەی یەك وەزارەت خەرج دەكرێت و سەرچاوەیەكی داراییش دەڵێت: “هێشتا هیچ بڕە پارەیەك لە بەغداوە بۆ دابەشكردنی مووچەی فەرمانبەرانی هەرێم ڕەوانە نەكراوە”.

سەرچاوەیەك لە وەزارەتی دارایی و ئابووری حكومەتی هەرێم بە (خەڵك)ی ڕاگەیاند، بڕیارە سبەی دوو شەممە عیراق پارە ڕەوانەی هەرێم بكات و بەوەش دابەشكردنی مووچە خێراتر دەبێت.

ڕاشیگەیاند، سبەینێ‌ دوو شەممە 19ی ئابی 2019 تەنها مووچەی وەزارەتی داد دابەشدەكرێت.

ئەو سەرچاوەیە ئاماژەی بۆ ئەوەشكرد، لەگەڵ هاتنی پارەكەی بەغدا دەست بە دابەشكردنی مووچەی مانگی ئایاری فەرمانبەران دەكرێت و تاوەكو هەفتەی داهاتوو مووچەی سەرجەم وەزارەت و دەستە و فەرمانگەكان دابەشدەكرێت.

بەردەوام بە لە خوێندنەوە

کوردستان