ئێمە لە تۆرە کۆمەڵایەتیەکان

وتار

نێچیرڤان بارزانی لەبەردەم ئەگەرێكی كراوەدا

كارزان سەباح هەورامی

سەردانی ئەم دواییەی (نێچیرڤان بارزانی)، بۆ بەغدا كتو پڕ نەبوو، بڕیار بوو پێشووتر سەردانی سەرۆك وەزیرانی عێراقی كردبایە، بەڵام (دوو) رووداو هاتنە پێشەوە، دەبوو (نێچیرڤان بارزانی) هاوكێشەكەی راست بكردبایەتەوە، لەسەر چاوەیەكی باڵای پارتییەوە زانیومە كە (نێچیرڤان بارزانی)، هەوڵی یەكەمی: بەلارێدابردنی بودجەی گشتی عێراقی راستكردەوە، كە هەوڵێك هەبوو بۆ ئەوەی لەبەغداوە ئاستەنگ لەبەردەم پرۆژە بودجەی عێراق دروست بكرێت ئەویش لێدان بوو لە پشكی كوردستان و سەپاندنی چوار مەرج بوو، زانیاری تەواو هەبوو كە فشار لەسەر (عادل عەبدول مەهدی)سەرۆك وەزیرانی عێراق هەبوو، لەبارەی پرسی بودجەوە، هەڵبەتە لەم هەوڵەدا گومان لە (حەیدەر عەبادی) هەبوو كە ئێستا بوەتە سەرمەشقی ئەو ئاراستەی عێراق بگەرێنێتەوە بۆ هەشتاكانی سەدەی رابردوو و سەرپەرشتی رەوتێك دەكات تەواو پێچەوانەی ئەو رەوتەیە كە (عادل عەبدول مەهدی) رۆڵی تێدا دەبینێت و دەیەوێت لەگەڵ هەرێمی كوردستان رێككەوێك، هەوڵی دووەم: ئاراستەیەك هەبوو بۆ ئەوەی پرسی (رێككەوتنی پێشمەرگە و سوپای عێراق) بۆ كەركووك دوابخرێت، و ئەو هەماهەنگییەی لەنێوان هەولێر و بەغدا هەبوو لەسەر پرسی گەرانەوەی پێشمەرگە بۆ كەركووك بەئاراستەیەكی دیكە بڕوات، ئەمەش لەسەردانی (نێچیرڤان بارزانی) بۆ بەغدا چارەسەر كرا. هەڵبەتە دوای سەردانەكە رێككەوتنێك لەنێوان هەولێر و بەغدا كرا بۆ ئەوەی دوو لێژنە دروست بكرێت، (لێژنەیەك بۆ هەماهەنگی پێشمەرگە و سوپای عێراق و لێژنەیەكی دیكە بۆ پرسی بودجە كە د.فوئاد حوسێن، وەزیری دارایی عێراق) سەرپەرشتی دەكات، ئەگەرێكی بەهێز هەبوو كە (نێچیرڤان بارزانی) ئەو سەردانەی نەكردبایە هەردوو پرسەكە بەلارێدا ببرابایە.

بۆ داهاتووش (نێچیرڤان بارزانی) وەك سەرۆكی هەرێم، هەموو ئەگەرێك لەبەردەمی كراوە دەبێت كە دەبێت بە هاوبەشی لەگەڵ (عادل عەبدول مەهدی)، رێگا لەو هەوڵانە بگرن كە دەیانەوێت عێراق و كوردستان بگەرێنێتەوە بۆ 16ی ئۆكۆتبەر، رەنگ بێت هیچ حزبێك بەقەد پارتی دەستی بە سیاسەتی ژێر بەژێر لەگەڵ بەغدا نەسوتابێت، بەتایبەت دوای پێشنیاری بڕینی بەشە بودجەی كوردستان و خستنەوەی دامەزراوەكانی كوردستان بۆ ژێر دەستی بەغدا لەلایەن هەندێك سەركردەی حزبییەوە، بۆیە پارتی زیاتر لە جاران دەیەوێت چاوی لەسەر بەغدا نەبرێت.

رەنگ بێت لەنێوان هەولێر و بەغدا (كۆمیتەیەك یان لەشێوەی فۆرمێكی دیكە) دروست بكرێت كە ئەم كۆمیتەیە سەرپەرشتی كاری ئیداری و دارایی و سەربازی بكات، رەنگ بێت سەرۆكی كۆمیتەكە كاك (نێچیرڤان بارزانی و عادل عەبدول مەهدی) بن، كە بەهێزترین ئەگەرە و رەنگە لە داهاتوودا و لەدوای پێكهێنانی حكوومەتی هەرێمی كوردستان، (عادل عەبدول مەهدی) سەردانی هەرێمی كوردستان بكات و لەو بارەوە رێككەوتن بكرێت، هەرچەندە ئێستا لەسەر پرسی كەركووك و بودجە لێگەیشتنی باش هەیە و لە داهاتوویەكی نزیكدا پێشمەرگە و سوپای عێراق ئیدارەیەكی مەدەنی بۆ كەركووك دیاری دەكەن، بەڵام ئەمەگرنگە لە سێكتەرەكانی دیكەش رەنگ بداتەوە، كاری (نێچیرڤان بارزانی) لەبەغدا ماوە، رەنگ بێت خواستی (مەهدی) ئەوە بێت لەم قۆناغەدا هەرێمی كوردستان پشتیوانی بێت، چونكە نایەوێت لە هەرێمی كوردستانەوە دژایەتی بكرێت، خۆشی باش لەوە گەیشتووە كە پشتیوانی كوردستان و پارتی وەك حزبی دووەمی جەماوەری لە عێراق بۆ ئەو زۆر گرنگ دەبێت، كاتی خۆی چونكە (عەبادی و مالیكی و ئیبراهیم جەعفەر) كەوتنە دژبەری كوردستانەوە، نەیان توانی حوكمرانیەكی باش بكەن.

رەنگ بێت بەشێكی دیكەی نزیك بوونەوەی بەغدا لە كوردستان، پەیوەندی بەهاوكێشە نێودەوڵەتییەكەوە بێت كە دەیانەوێت جارێكی دیكە سیاسەتێكی تازە بۆ عێراق دابرێژنەوە كە دووربێت لە هەڵەكانی رابردوو، بەتایبەت (وشكردنی سەرچاوەكانی ئێران لە عێراق و هاتنەوەی سوپای ئەمەریكا بۆ عێراق و دوورخستنەوەی میلیشیا و حەشد لە سنوورەكانی عێراق و دووبارە هاتنەوەی كوردستان بۆ هاوكێشە سیاسییەكانی عێراق) كە سەرجەمیان ئەوە دەخوازێت سەركردایەتییەكی تازە لە عێراقدا رۆڵی خۆی ببینێت، بۆیە سەرجەم ئەو سەركردانەی ئێستای كوردستان و عێراق لە حكوومەتی داهاتووی عێراق رۆڵی دەبیینن، دەبێت سەرجەم ئەگەرەكانیان لەبەردەم كراوە بێت كە جارێكی دیكە رەوتێك لە عێراق ئەم پێكەوەیییە لەناو نەبات، چونكە ئەوەی ئێستا باجی داوە لە سیاسەتی رابردووی عێراق بەرانبەر بە كوردستان، خەڵكی كوردستان بووە، بۆیەگرنگە هەردوولا بگەرێنەوە بۆ سەر مێزی گفتووگۆ و دیالۆگی نیشتیمانی بەرێوە بچێت.

وتار

یه‌كێتی له‌ نێوان ریستارده‌ سیاسیه‌كه‌ی گۆڕان و پارتیدا

سـوپا سه‌لام

دوای واژۆكردنی رێكه‌وتنه‌كه‌ی پیرمام له‌ لایه‌ن (بزوتنه‌وه‌ی گۆڕان) و تێپه‌ڕاندنی دانیشتی په‌ڕله‌مانی كوردستان به‌بێ دووه‌م گه‌وره‌ترین فراكسیۆن، ده‌كرێت بڵێن بزوتنه‌وه‌ی گۆڕان ریستاردێكی ته‌كنیكی زۆربه‌ی حزبه‌ ته‌قلیدیه‌كانی ئه‌نجامدا كه‌ ئامانجی به‌هێزكردنی سه‌نگیی ئیداری خۆیه‌تی له‌ ڕێگه‌ی حكومه‌ته‌وه‌ كه‌ بتوانێ به‌لایه‌نی كه‌مه‌وه‌ كادرانی خۆی ئاشت بكاته‌وه‌، ده‌رئه‌نجامی ئه‌م جوڵه‌یه‌ش هه‌واداری گۆڕان بڕیاری له‌ باره‌وه‌ ده‌دات، به‌ڵام هه‌نگاوێكی تازه‌ و نامۆ نه‌بوو، چونكه‌ له‌ یادمانه‌ دوای چه‌ند ڕۆژێك له‌ ڕاگه‌یاندنی ئه‌نجامه‌كانی هه‌ڵبژاردن له‌سه‌ر زاری زۆرێك له‌ به‌رپرسه‌ باڵاكانی بزوتنه‌وه‌ی گۆڕان ئاوازی به‌شداریكردن له‌ كابینه‌ی نۆیه‌م ده‌بسیترا به‌ هه‌ر نرخێك بێت! .

كه‌واته‌ هه‌ر گله‌ییه‌كی هه‌واداری (ی ن ك) ئه‌گه‌ر هه‌بێ له‌وباره‌یه‌وه‌ ئه‌وا خوێندنه‌وه‌ی دروستی بۆ ئه‌و بزوتنه‌وه‌یه‌ نه‌كردووه‌ له‌ 2014 ه‌وه‌ هه‌تا  ئه‌مڕۆ، دواتر ئه‌و بزوتنه‌وه‌یه‌ دوای زیاتر له‌ 3 ساڵ پاسڤكردنی وه‌زیره‌كانی و ده‌ركردنی سه‌رۆكه‌كه‌ی له‌ په‌ڕله‌مان و به‌رده‌بارانكردنی كاندیده‌كانی له‌ ناو شه‌قلاوا، هاوكات دابه‌زینی ژماره‌ی كورسیه‌كانی به‌ رێژه‌ی له‌ (%50) ، هه‌روه‌ها دروست بوونی هێزێكی تازه‌ به‌ ناوی (نه‌وه‌ی نوێ) كه‌ جڵه‌وه‌ی شه‌قامی ناڕازی و سه‌دای ئۆپۆزسیۆنی به‌ رێژه‌یه‌كی باش لێسه‌ندووه‌…هتد، مه‌حكومه‌ به‌وه‌ی ئه‌م جوڵه‌ ته‌كنیكیه‌ له‌گه‌ڵ پارتی ئه‌نجامبدات، هه‌روه‌ها ئه‌و ئۆفه‌رانه‌ی پارتی پێشكه‌شیان ده‌كات له‌ (ی ن ك) و هێزه‌كانی دیكه‌دا به‌دی ناكات، به‌ڵام شیله‌ی ژاڵه‌ی ئه‌م رێكه‌وتنه‌ به‌ تامی هه‌نگوینی قه‌ندیل له‌ زاری شه‌قام به‌گشتی و هه‌واداری بزوتنه‌وه‌ی گۆڕان بدرێ لوتكه‌ی گه‌وجاندنه‌، چونكه‌خودی ڕێكه‌وتنه‌كه‌ی پیرمام له‌ نێوان به‌رپرسانی یه‌كه‌می هه‌ردوولا واژۆ نه‌كراوه‌ و ئه‌گه‌ری پابه‌ندبوون پێوه‌ی لاوازه‌.

هه‌روه‌ها له‌ ئه‌ته‌كیه‌تی پێكهێنانی حكومه‌تدا نه‌بووه‌ حزبێك به‌ ئه‌ندازه‌ی چاره‌كی حزبی براوه‌ كورسی په‌ڕله‌مانی هه‌بێت و له‌مه‌كته‌بی سیاسی هێزی براوه‌ ڕێكه‌وتن واژۆ بكات، هه‌وادارانی دڵنیا بكات له‌ ڕێی خاڵه‌كانی ئه‌م ڕێكه‌وتنه‌وه‌ هه‌ژموونی به‌رنامه‌ی خۆی له‌م حكومه‌ته‌دا فه‌رز ده‌كات! له‌ كاتێكدا سه‌رجه‌م خاڵه‌كانی رێكه‌وتنه‌كه‌ش (كاك نه‌وشیروان) وته‌نی “عیبره‌ت له‌ جێبه‌جێكردنیدایه‌” ڕه‌نگه‌ بوترێ ئه‌مه‌ ڕۆژگار بۆمان ده‌سه‌لمێنێ،به‌ڵام ده‌رهاویشته‌كانی هه‌ر له‌یه‌كه‌م چركه‌ ساته‌وه‌ له‌ شه‌رعیه‌تدان به‌ هه‌ژموونی پارتی به‌سه‌ر سه‌رۆكایه‌تی په‌ڕله‌ماندا خۆی به‌دیارخست، هه‌روه‌ها مێسجێكی ئاشكرای به‌ به‌ره‌ی ئۆپۆزسیۆنی جاران و (ی ن ك)یشدا كه‌ ئه‌گه‌ر ئێوه‌ له‌ كاروانه‌كه‌ی كۆتایی 2015 به‌جێتان نه‌هێشتین،ئێمه‌ له‌ ئێستادا ئێوه‌ به‌جێده‌هێڵین. له‌لایه‌كی دیكه‌وه‌ ئه‌م ریستارده‌ سیاسه‌ی بزوتنه‌وه‌ی گۆڕان كه‌ پاوه‌ره‌كه‌ی له‌ پیرمام بوو، بووه‌ هۆی تێپه‌ڕاندنی دانیشتی په‌ڕله‌مانی كوردستان به‌بێ یه‌كلایی كردنه‌وه‌ی (یه‌ك تیمی له‌ به‌غداد و، شه‌راكه‌تی ڕاسته‌قینه‌ له‌ حكومه‌تی هه‌رێم و، پرسی كه‌ركوك ) .

ناڕاسته‌وخۆ دانپێدانانی ئه‌و دوو هێزه‌ بوو كه‌ (یه‌كێتی نیشتمانی كوردستان) خاوه‌نی په‌یامی یه‌كڕیزی نیشتمانی و حكومه‌تی شه‌فاق و پرسی كه‌ركوك و ناوچه‌ دابڕاوه‌كانه‌، بۆیه‌ ده‌كرا ئه‌م دوو هێزه‌ هیچ نه‌بێ له‌به‌ر پێگه‌ی جه‌ماوه‌ی خۆشیان بێت له‌سه‌رخۆ و هۆشیارانه‌ ئه‌و جووڵه‌ سیاسیه‌یان بكردایه‌.

بەردەوام بە لە خوێندنەوە

وتار

بۆ گۆڕان و یەكێتی
لێگەڕێن با خەڵك كەمێك پشوو بدات

لوقمان غەفوور

ئەگەر لەمن بپرسن، نەك رێكەوتن، بەڵكو چوونی بزووتنەوەی گۆڕان بۆ ناو حكومەت چۆنە! یەك و دووی لێناكەم، ئەڵێم زۆر زۆر خراپە.
كێشەی ئێمەی كورد، بەخۆشمەوە لەوەدایە خوێندنەوە بۆ رووداوەكانی كوردستان لەسەر بنەمای پاشخانی رەفتاری رابردووی حزبەكان ئەكەین، من كە دەڵێم چوونی بزووتنەوەی گۆڕان بۆ ناو حكومەتێك خراپە كە پارتی و یەكێتی تێدا بێت، لەسەر هەڵسوكەوتەكانی رابردووی پارتی رەنگڕێژی دەكەم، رەنگە تاكە بەدیلەكەشم ئەوە بێت كە ئەم حزبە با ئۆپۆزسیۆن بێت، بەڵام تا ئەم ساتە هیچ لێكدانەوەیەكم نییە دوای ئۆپۆزسیۆن بوون چی بكات باشە!، تاكە هۆیەكیش كە ناتوانم وەڵامم هەبێت بۆ دوای ئۆپۆزسیۆنبوون ئەوەیە، سایكۆلۆژیای كۆمەڵگەی كوردی ئۆپۆزسیۆن بوونی بۆ چەند ساتێكی سیاسی ئەوێت. بەمانایەكی تر، هەندێك خەڵك پێی باشە گۆڕان ببێت بە ئۆپۆزسیۆن و لەماوەی ساڵێكدا یەكێتی و پارتی لابەرێت و خۆی لەجێگەی حكوم بكات، بەدڵی لایەنگرانی و هەڵسوڕاو و دەنگدەرانی هەڵسوكەوت بكات لەو حوكمكردنەكەدا، بەڵام لە زەمینەیەكی دیار و گونجاوی ئێستادا ئەمە خەونە! هەر بۆیە زۆرجار یۆتۆبیا ئەمانباتە سەر تونێلێكی نادیار، كە دەرئەنجام خۆمان لەشوێنێك ئەبینینەوە ونبووین، ئەمەی كە تەنانەت من و هەندێكیش ئەمانەوێت ئەو ونبوونەیە.
دەگەڕێمەوە سەر ئەوەی كە بەڕاستی خەڵك، هاووڵاتی، ئەندامانی كۆمەڵگە، پێویستیان بە پشووە، جا ئەم پشووە چۆن دەستەبەردەبێت؟، كێ دەستبەری دەكات؟ دەستەبەركردنی ئارامیی لەكوردستان بۆ كۆمەڵگەیەكی تر جودایە، لە ئەمریكا جۆرێكە، لەئەوروپا و ئەفریكا دەشێت جۆرێكی تر بێت كە من نایزانم، لەئەمریكا ئەگەر بتەوێت ئارامی كۆمەڵگەی ئەمریكی تێكبدەیت، دوو كارەكتەری لێ بێنەدەرەوە، رێك ئەبێت بە كۆمەڵگەیەكی هەمەجی، ئەویش “بزنس و پۆلیس”-ە، لەكاتێكدا لە كوردستان ئەم دوو كاركتەرە بوون و نەبوونی وەك یەكە، لەكوردستان، حزبە سیاسییەكان ئارامی دابیندەكەن، ئەگەر حزبە سیاسییەكان و كارەكتەرەكانیان ئارام و سەنگین نەبن، بەدڵنیایی كۆمەڵگە ئارام و خۆشبەخت نابێت، ئەتوانیت تۆ وەك خوێنەرێك بیركەیتەوە، ئەگەر نێوانی حزبەكان شڵۆق و شێواو و تەشەنوجاوی بێت بزانە چۆن دۆخی كۆمەڵگە تێكدەدات! هەربۆیە لەئێستادا لەگەڵ ئەوپەڕی توڕەیم لە بزووتنەوەی گۆڕان بۆ بەشداری حكومەت، بەڵام هیچ دژەبۆچوونێكم لا نییە بۆ ئەم بزووتنەوەیە، چونكە گەیشتوومەتە بڕوایەك بۆئەوەی دۆخی كۆمەڵگەی كوردی لە باشوور جێگیر و بارگاوی نەبێت بەنائارامی پێویستە ئیتر رێگەخۆشكرێت نێوانی حزبەكان خۆش بێت.
لەكۆبوونەوەیەكدا ساڵی 2011 لەگەڵ هەڤاڵ مام جەلال- یادی بەخێر و جێگەی پڕ نوور بێت، برادەرێكی هەولێری كەوتە قسە لەسەر ئەوەی كە لەهەولێر پارتی غەدر زۆر لەیەكێتی و كادرەكانی دەكات و تا ئێستا هیچ پۆستێكی حكومەتی خۆجێی لەهەولێر لەژێر دەستی یەكێتی-دا نییە، مام جەلال زۆر بەهێمنی و لەسەرخۆییەوە وتی:”ئێمە و پارتی، ساڵانێكی زۆر شەڕمان كرد، جگە لەشەهیدبوونی چەندین رۆڵەی ئەم میللەتە سوودی نەبوو، ئێستا بەڕاستی ناكرێت لەسەر وەرگرتنی پۆستی دوو بەڕیوەبەر نێوانمان تێكدەین و ئارامی كۆمەڵگەكە بشێوێنین، ئەمە چییە ئێمە كەمێك غەدرمان لێكراوە، ئەگەر ئەوە غەدرە، ئارامی كۆمەڵگەی تێدا دەستەبەربێت، ئەوا من قبوڵمە!” جا ئەمە قسەی 8 ساڵ لەمەوبەرە نەك ئێستا، كە بەڕاستی كۆمەڵگەی كوردی لەوەناچێت لەوە زیاتر توانای بەرگەگرتنی نارامی و تەشەنوجاتی نێوان حزبەكانی هەبێت.
بەرای من دەبێت یەكێتی نیشتمانی كوردستان وردبینانەتر مامەڵە لەگەڵ رووداوەكان بكات، بمانەوێت و نەمانەوێت، سەركردایەتییە كۆنەكانی ئەم هێزە وایان لەدۆخی یەكێتی كردووە كە بەم قەبارە ناسازەیەوە دەركەوێت، یەكێتی و سەركردایەتییەكەی پرسیارێك لەخۆیان ناكەن ئەگەر ئێستا 45 كورسی پەرلەمانی هەبوایە بەم شێوەیە مامەڵەی لەگەڵ دەكرا؟! یەكێتی پێویستە واز لەشەڕی ساردی بێنێت لەگەڵ پارتی، ماڵە شێواوەكە كۆكاتەوە و كۆنگرە ببەستێت، كادرە تۆراو و زیزەكانی لەریزی حزبەكان بگێڕێتەوە ببێتەوە بە حزبی ژمارە یەك لە كوردستان نەك وەك گۆڕان تەنیا خزاونەتە سنووری تەسكی ناوچەی سلێمانی، كێشەی ئەم حزبە ئەوەیە تا ئەم ساتە پرسیار لەخۆی ناكات بۆ وایلێهاتووە، لەبری بیر لەدۆخی حزبەكە بكاتەوە و گۆڕانكاری بەسەر تەواوی حزبایەتی بهێنێت، بیر لەبەدەستهێنانی پۆستێك ئەكاتەوە لە پەرلەمان یان حكومەت، لەئەمریكا ترەمپ هێشتا دوو ساڵی ماوە كەچی دیموكراتەكان كاردەكەن بۆ خستنی ترەمپ و دەستبەركردنی سەرۆكایەتی 2020، سەركردەیەكی وەك دیموكراتەكانی جۆن كییری بەئاشكرا دەڵێت:”ئەمریكا بەرگەی هەڵبژاردنەوەیەكی دیكەی ترەمپ ناگرێت.” لەكاتێكدا دۆخی كۆمەڵگەی ئەمریكی بەو شێوەیە ئاڵۆزكاو نییە بەهۆی ترەمپ-ەوە، بەڕاستی هەندێك سەركردەی یەكێتی قسەی سەیر و سەمەرە دەكەن و دەڵێن پرۆسەی سیاسی شكست دەهێنێت لەدابەشكردنی پۆستەكان بەم شێوەیە، من نازانم پرۆسەكە خۆی هەیە تا شكست بهێنێت؟!
بۆ من بزووتنەوەی گۆڕان بەشدار بێت یان یەكێتی نیشتمانی یان هیچیان بەشدار نەبن، هیچ لەبابەتەكە ناگۆڕێت، بەڵام كۆمەڵگەیەك هەیە لە باشوری كوردستان، تاكەكانی هێندە هیلاك و ماندوو كراون بەحزبایەتییەوە، لەئێستا خەڵكەكەی باش و خراپی حزبی كوردییان تێكەڵ و پێكەڵ كردووە، ئەگەر سبەی هەڵبژاردن.

بەردەوام بە لە خوێندنەوە

وتار

وێنە گەورەکە ببینن

سالار مەحمود

دانیشتنەکەی پەرلەمان وێنەیەکی پیشانداین، سەرۆکایەتیەکی یەک رەنگ و مۆزایک، تەنیا لەسەردەمی دوو ئیدارەییدا سەرۆکایەتی پەرلەمان گوزارشت بووە لەیەک هێڵ.
گۆڕان و پارتی ئەم کردەیەیان سەرەتای خولی پێشوو خولی سێیەمی پەرلەمانیشدا کرد، بەڵام ئاکامەکەی بە دەرکردنی سەرۆکی پەرلەمان و وەزیرەکانی گۆڕان کۆتایی هات، کە زەقترین نمونەی زیندووکردنەوەی ئاسەوارەکانی دوو ئیدارەیی بوو، کۆتایی ئەمەش هیوادارم هەرگیز وانەبێ. 

لە زۆر وێستگەی حوکمڕانی کوردستاندا بەهەمووانەوە ئەم پەرلەمانە بریندار کراوە حەق نەبوو دەستپێکەکەى ئەم خولەش بەم جۆرەبێ.
لەم هەفتەیەوە پەرلەمان سەرقاڵی دانانی لیژنە هەمیشەییەکانی دەبێ بەتایبەتی لیژنەی یاسایی بۆ هەموارکردنەوەی یاسای سەرۆکایەتی هەرێم بۆ دوو مەبەست:
یەکەم: سەرۆکی هەرێم لەناو پەرلەمانەوە هەڵبژێردرێ نەک لەناو خەڵک.
دووەم: دامەزراوەی سەرۆکایەتی هەرێم کارا بکرێتەوە و یاسای هەڵپەساردنەکە بەماددەیەک لاببەن.
دواتر راسپاردنی کاندیدی پێکهێنانی حکومەت کە لەپەرلەمانەوە ناساندنی بۆ دەکرێ پێویستە ئاراستەی سەرۆکی هەرێم بکرێ بۆ راسپاردنی تەشکیلی کابینە.
ئایا پارتی دەتوانێ بەبێ یەکێتی ئەم هەنگاوانە بنێ بە سانایی لە رووی یاساییە ئەشێ، بەڵام لە رووی واقعییەوە بەدڵنییایەوە هیچ ئاسان نییە.

دانیشتنی پەرلەمانی کوردستان تەنیا بریتی بوو لەو خۆ تەکاندن لە تۆزی ئەو ململانێ زیانمەندەی پارتی لە پۆستی سەرۆککۆماردا کردی، کەواتە با لێرەوە بڵێین (یەک بەیەک).
هەرچەندە یەکێتی لەمەدا هیچی لەدەستنەداو پارتیش شتێکی ئەوتۆی دەستنەکەوتوە، بۆ گۆڕانیش وا باشتربوو هاوبەشی ئەم کردەیە نەبوایە یا تەرەفگیری نەکردایە، چونکە لانی کەم ناکۆک کەوتۆتەوە لەگەڵ خواستی بنکە جەماوەریەکەی.

وێنە گەورەکە ئەمەیەی خوارەوەیە:
بەرژەوەندی هەردوو لایەنەکەو خەڵکیش وا دەخوازێ قۆناغێکی نوێ دەستپێبکرێ و رێکەوتن لەنێوان یەکێتی و پارتی دروست ببێ لەسەر ئاستی عیراق و هەرێم بەکەرکوکیشەوە.

کەم و زۆری پۆست و شەراکەت لەدابەشکردنی پۆست کەمتر گرنگە، بەڵکو یەکخستنی هێزو توانا بۆ جێبەجێکردنی بەرنامەی نیشتمانی گرنگترە، ئەگینا لەئاستە جیاجیاکاندا پۆستەکان بۆ هەموو لایەکان بەتایبەتیش گۆڕان و پارتی و یەکێتیش تاقیکراونەتەوە.
وێنە گەورەکە بریتیە لە واقعیترین هاوکێشە ئەویش یەک پاکێجیە بۆ رێکەوتنێکی سیاسی گشتگیری یەکێتی و پارتی.
لەبارەی زەرەرو قازانجەوە ئەوەی زیان دەکات لەم کێشمە کێشە سیاسیانەدا تەنیا هاونیشتمانی و خەڵکە ئەگینا (كُلُّ حِزْبٍ بِمَا لَدَيْهِمْ فَرِحُونَ)!

بەردەوام بە لە خوێندنەوە
کام لەم وەزارەتانەی کابینەی ٨ لە ئاست خزمەتکردن بە هاولاتیان جێدەستی دیار بووە؟

کوردستان