ئێمە لە تۆرە کۆمەڵایەتیەکان

ئابوری

دوای هەواڵێكی (خەڵك) ئەنجوومەنی پارێزگای سلێمانی بەدواداچوون دەكات

خەڵك- بەشی هەواڵ
دوابەدوای هەواڵێكی (تۆڕی میدیایی خەڵك) سەبارەت بە تێكچوون و ڕووخانی بەشێكی پردی باناڵێ‌ لە ناوچەی شارباژێڕ، ئەنجوومەنی پارێزگای سلێمانی بەدواداچوون بۆ ئەو پرسە دەكات و ئەندامێكی ئەو ئەنجوومەنەش دەڵێت: “بەدواداچوونمان بۆ چەند پرسێكی دیكەش كردووە”.

ڕێكەوت زەكی، ئەندامی ئەنجوومەنی پارێزگای سلێمانی بۆ (خەڵك) ڕایگەیاند، ئەمڕۆ ۱۰-۲-۲۱۰۹ لەگەڵ هاوڕێیانم لەلیژنەی پلان و پڕۆژەكانی ئەنجوومەنی پارێزگای سلێمانی سەردانی بەڕێوەبەرایەتی گشتی ڕێگاوبان و ئاوەدانكردنەوە و نیشتەجێكردنی سلێمانیمان كرد بۆ مەبەستی بەدواداچوونی چەند پڕۆژەیەك لەسنوری سلێمانی و خستنەڕووی كیشە و گرفتی ئەم ڕێگایانە.

وتیشی، “یەكێك لەو كێشانەی بەدواداچوونمان بۆ كردووە بریتیە لە پردی باناڵی لەسنوری شارۆچكەی ماوەت، كە لەهەفتەی ڕابردوودا بەهۆی لافاووە ڕووخاوە.

ئاماژەی بەوەشكرد، بەدواداچوونمان كردووە بۆ پڕۆژەی نەخۆشخانەی ۲۹۱ قەرەوێڵەیی لەسنوری ئیدارەی ڕاپەڕین، كە بەهۆی چەند كێشەیەكەوە پڕۆژەكە وەستاوە و هەروەها پڕۆژەی شوقە و یەكەكانی نیشتەجێبوون لەسیتەك و زڕگوێز، كە تائێستا بەردەوام كاری تێدا دەكرێت.

بە وتەی ڕێكەوت زەكی، لیژنەكەیان بەدواداچوونی بۆ ڕێگای سلێمانی – كەلار بەتایبەت پردەكان كردووە، كە مەترسی زۆریان لەسەرە و بەشێكیان ڕووخاوە لەگەڵ ڕێگای سیدساق – هەڵەبجەی شەهید، كە بەردەوام كاری تێدا دەكەن و بودجەی پێویستی بۆ تەرخان كراوە، بەڵام تائێستا تەواونەكراوە.

ڕاشیگەیاند، كە بەدواداچوونیان كردووە بۆ پڕۆژەی ڕێگای عازەبان- زەنگیان لەناحیەی سیتەكو پڕۆژەی چەوڕێژكردنی ڕێگای دێلێژە.

گوندی باناڵێ سەر بە شارۆچكەی ماوەت-ە لە شارباژێڕ، لقێكی سەرەكی ڕووباری زێی بچووك بە پێش گوندەكەدا تێپەڕ دەبێت و لە وەرزی باران باریندا ڕێگای پەڕینەوە نامێنێت و هاوڵاتییەكانی دەبێت ڕێگایەكی دوور ببڕن، تاكو دەگەنە پردی قەشان لە سەر ڕووبارەكە، بەڵام لەماوەی ساڵانی ڕابردوودا خەڵكی گوندەكە لەڕێگەی پردێكی هەڵواسراوی لەتەختە دروستكراوەوە هاتووچۆیان دەكرد، بەڵام ساڵی ڕابردوو بەڕێوەبەرایەتی ئاوەدانكردنەوەی سلێمانی پردێكی كۆنكرێتی دیكەی بۆ دروستكردن، بەڵام بەهۆی باران و لافاوی هەفتەی ڕابردووەوە بەشێكی پردەكە داڕوخا.

ئابوری

لە سلێمانی سێ‌ شوێن داخران

خەڵك- بەشی هەواڵ
بەڕێوەبەرایەتی چاودێری تەندروستی سلێمانی ڕایدەگەیەنێت، لەبەر نەبونی مەرجەكانی تەندروستی و نەبونی مۆڵەت تەنها لە ماوەی یەك ڕۆژدا (۳) شوێن داخران.

بەڕێوەبەرایەتی چاودێری تەندروستی سلێمانی لە ڕاگەیەندراوێكدا، كە وێنەی دراوە بە (خەڵك) ئاماژەی بەوەكردووە، لەبەر نەبونی مەرجەكانی تەندروستی و نەبونی مۆڵەتنامەی تەندروستی و هەبوونی مەوادی ماوە بەسەرچوو لەكاتی سەردانی تیمەكانی چاودێری تەندروستی سلێمانی بڕیار درا بە داخستنی سێ‌ شوێن لە سنوری گەڕەكەكانی سلێمانی شوێنەكان.

ئاشكراشی كردووە، نانەواخانەیەك لەگەڕەكی شۆڕش سەروو نەخۆشخانەی شۆڕش و نزیك مزگەوتی نزا داخراوە لەگەڵ ماركێتێك و نانەواخانەیەك لە گەڕەكی ئیبراهیم ئەحمەد لە نزیك مزگەوتی بەهەشت.

جەختیشی كردۆتەوە، كە ئەو شوێنانە ئاگاداركراونەتەوە تاكو مەرجە تەندروستیەكان جێبەجێ نەكەن شوێنەكەیان بۆناكرێتەوە .

بەردەوام بە لە خوێندنەوە

ئابوری

سێ‌ مادەی بەشەخۆراك دابەشدەكرێت
لەسەر قەرەبووكردنەوەی بەشەخۆراكی فەوتاو ڕوونكردنەوە دەدرێت

خەڵك – بەشی هەواڵ
بەڕێوەبەری كۆمپانیای دابەشكردنی خۆراك لە سلێمانی ڕایدەگەیەنێت، بەردەوامن لە دابەشكردنی بەشەخۆراكی هاووڵاتیان بۆ مانگی ئایار و دەشڵێت: “بۆ مانگی حەوت-یش پسوڵەی وەرگرتنمان بۆ كراوە و چاوەڕێی هاتنی بەشەخۆراكی ئەو مانگەش دەكەین”.

شەوكەت محەمەد، بەڕێوەبەری كۆمپانیای دابەشكردنی خۆراك لە سلێمانی بە (خەڵك)ی ڕاگەیاند، لە ئێستادا دابەشكردنی بەشەخۆراك لە ناو سلێمانی تەواو بووە، بەڵام دابەشكردن لە دەرەوەی شار دەستی پێكردووە و لە كۆتاییەكان نزیك بۆتەوە.

وتیشی، “لە ئێستادا هەرسێ بەشەخۆراكی زەیت و شەكر و برنجی مانگی پێنجی ئەمساڵ دابەشدەكرێت و ناوچەی شارەزوور تەواوبووە و دەستمان كردووە بە ئیدارەی ڕاپەڕین، ڕۆژانە دابەشكردنمان بۆ ئەو ناوچانە هەیە”.

ڕاشیگەیاند، بۆ مانگی شەش هیچ بەشەخۆراكێكی تێدا نیە و بۆ مانگی حەوت-یش پسوڵەمان لە بەغداوە بۆ كراوە و چاوەڕێی هاتنی بەشی سلێمانی دەكەین و هەر بە گەیشتنی ئەویش دابەشدەكرێت.

لە بارەی قەرەبووی خۆراكی فەوتاوی هاووڵاتیان بەڕێوەبەری كۆمپانیای دابەشكردنی خۆراك ئاشكراشیكرد، لە ئێستادا هیچ باسێك نیە و هیچ نووسراوێكمان بەدەست نەگەیشتووە، چاوەڕێ دەرچوونی ڕێنمایی دەكەین لە بەغداوە بێت بۆمان تا كاری لەسەر بكەین.

بەردەوام بە لە خوێندنەوە

ئابوری

ژووری بازرگانی سلێمانی هۆشداری لە گرانبوونی نرخی شتومەك دەدات

خەڵك – بەشی هەواڵ
سەرۆكی ژووری بازرگانی و پیشەسازی سلێمانی ڕایدەگەیەنێت، بەشێك لە بارە ترانزێتەكانی بازرگانان لە مەرزی باشماخ ڕادەگیرێن و ڕێگە نادرێت بێتە هەرێمی كوردستانەوە، دەشڵێت: “ئەگەر بەزووترین كێشەكە چارەسەر نەكرێت زیانی گەورە بەكەرتی ئابووری هەرێمی كوردستان دەكەوێت”.

ئەمڕۆ ١٧ی تەمموزی ٢٠١٩، ژمارەیەك لە بازرگانانی شاری سلێمانی بە مەبەستی چارەسەر كردنی كێشە و گرفتەكانیان سەردانی ژووری بازرگانی و پیشەسازی سلێمانیان كرد و لەگەڵ سیروان محەمەد، سەرۆكی ژوورەكە كۆبوونەوە.

ئەو بازرگانانە ئاماژەیان بۆ ئەوەكردووە، زیاتر لە ١٥٠ بارهەڵگر لەبەرئەوەی لەدیوی ئێرانی مەرزی باشماخەوە وەسڵی ٥٠ دۆلاریان بۆ نەكراوە ڕاگیراون و ڕێگە نادرێت بێتە هەرێمی كوردستانەوە.

سیروان محەمەد، سەرۆكی ژووری بازرگانی و پیشەسازی سلێمانی لە لێدوانێكی ڕۆژنامەوانیدا ڕایگەیاندووە، بازرگانان نیگەران لەوەی، كە بارەكانیان بە بیانوی نەبڕینی وەسڵی ٥٠ دۆلاری لە دیوی ئێرانەوە ڕێگری لێ دەكرێت، كە ئەمە مەترسیەكی گەورەیە بۆ سەر دەروازە سنووریەكانی هەرێمی كوردستان.

وتیشی، “ئەگەر ئەم كێشەیە بەردەوام بێت، بازرگانان ناچارن ڕێگای بازرگانی بگۆڕن و لە مەرزەكانی ناوەڕاست و باشوری عیراقەوە كاڵاكانیان هاوردە بكەن”.

ڕاشیگەیاندووە، داوام لە وەزیری دارای و ئابوری حكومەتی هەرێم و پارێزگاری سلێمانی ئەوەیە بێنە سەرخەت و كێشەكە چارەسەر بكەن تا بازرگانان تووشی زەرەر و زیانی زیاتر نەبن، چونكە ئەگەر بە زووترین كێشەكە چارەسەر نەكرێت زیانی گەورە بە كەرتی ئابووری هەرێمی كوردستان دەكەوێت كاڵا و شتومەك لەسەر هاووڵاتیان گران دەبێت و بازرگانان ناچار دەبن ڕێرەوی كاری بازرگانی بگۆڕن.

بەردەوام بە لە خوێندنەوە

کوردستان