ئێمە لە تۆرە کۆمەڵایەتیەکان

راپۆرت

“ئارامی قەتماغەی كوردستان”
چل و یەك ساڵ بەسەر شەهیدبوونی ئارامدا تێدەپەڕێت

خەڵك-بەشی هەواڵ
ئارامی سەركردە ٤١ساڵە دواهەواری لەتەنگی سەرە ، هەڤاڵ كوێستانی شاعیروپێشمەرگەی دێرین لەپارچە شیعرێكدا بۆ كاك ئارام دەڵێ:

دەبا فاشیەكان بزانن وا ئێستاكە لەكوردستانی ئاراما
لەكوردستانی قەتماغە و كێڵگەی زاما
هەر دەوەنە و بن تاشە بەردی چیایە
سەنگەرێكە و قوتابخانەی دروستبوونی ئارامێكی تری تیایە

شاسوار جەلال سەعید، ناسراو بە ئارام، یان شەهید ئارام (تشرینی دووەمی 1947 – 31ی كانوونی دووەمی 1978) ، كەسێتییەكی كاریگەری ناو یەكێتیی نیشتمانیی كوردستان و سكرتێری كۆمەڵەی ڕەنجدەرانی كوردستان بوو.
ئارامی سەركردە كە لەساڵی 1947 لەسلێمانی لەدایكبووە، لەسەرەتای لاوێتییەوە تێكەڵاوی كاری سیاسەت و دنیای رۆشنبیری بووەو بەلێزانی و لێوەشاوەیی خۆی، توانیویەتی لەڕیزی پێشەوەی خەباتی لاوان و خوێندكاراندا بێت.
ئارام، كەسێتییەكی هێمن و رەوشتبەرزو پەسەندی لەناو خەڵكدا هەبووەو ئاسۆی بیری فراوانبووە.
لەكۆنگرەی سەرتاسەری قوتابیانی عیراقدا لەساڵی 1969 بەئاشكراو تەواوەتی رۆڵی كاریگەرو پێداگریی لەسەر خواست و ئاواتی قوتابیان دەركەوت كە لەناو هۆڵی كۆنگرەدا رووبەڕووی پیاوانی رژێم لە (یەكێتیی نیشتمانیی قوتابیانی عیراق) وەستایەوەو لەگەڵ هاوڕێكانیدا (نوێنەرایەتی قوتابیانی كوردستان) كشانەوەو هۆڵی كۆنگرەیان بەجێهێشت.

شەهید ئارام بە كەسێكی چالاك لە بواری رۆژنامەگەرییدا دەركەوتبوو

شەهید ئارام، رۆژنامەنووسێكی چالاك بووەو لەساڵانی حەفتاكانی سەدەی رابردوو چەندین بابەتی بەپێزو بەكەڵكی لەرۆژنامەی هاوكاریی بڵاوكردۆتەوە، هەروەها خوێنەرێكی جددی و بەردەوام بووە، بەهۆی شارەزاییەكەیەوە خزمەتی زۆری بەبزاڤی وشەو ئەدەبیاتی كوردیكردووە، لەگەڵ لاپەڕەی (سیاسەتی دەرەوە)ی رۆژنامەی هاوكاریی و دواتریش رۆژنامەی برایەتی لەكۆتایی ساڵی 1973و سەرەتای ساڵی 1974 بەگۆڕانكارییەكانی سیاسەتی جیهانی ئاشنابووە، لەو رووشەوە سەبارەت بەزۆربەی رووداوو بەسەرهاتەكانی ئەو رۆژگارە، وتارو شیكردنەوەی هەبووەو رای خۆی دەربڕیووە. ئارامی سەركردە هێندە وردبین و هۆشیاربووە لەكاتی نسكۆی شۆڕشی ئەیلول پێیوابووە دەبێت لەئاستی رووداوەكان پەلەپەل و هەڵەشەیی نەكرێت، بەڵام سوریش بووە لەسەرئەوەی كە هەڵوێستی بوێرانەی هەبێت و پەیوەندی نێوان خەڵك و خۆیان نەپسێت.

شەهید ئارام لەگەڵ خێزانەكەی

ساڵی 1975 كە یەكێتیی نیشتمانیی كوردستان دامەزرا، شاسواری نەمر توانی بیسەلمێنێت كە یەكێكە لەسەركردە دیارو كاریگەرەكانی ناو ئەو حزبە نوێیە، كاتێكیش بڕیاری هەڵگیرساندنەوەی شۆڕشی نوێ لەساڵی 1976دا درا، ئەو ئامادەبوو پێش هەموویان بچێتە شاخ و چەكی بەرەنگاریی هەڵبگرێت، بەلام هەلومەرجی ئەوكاتە واپێویستی دەكرد كە بەنهێنی لەشاردا بمێنێتەوەو سەرقاڵی بەهێزكردنی رێكخستنەكان بێت، لەوبوارەشدا توانی شانەو رایەڵەكانی رێكخستنی كۆمەڵەی رەنجدەرانی كوردستان و (ی.ن.ك) فراوانبكات و دەستەی پێشمەرگەی سەرەتایی ئامادەو گۆشدەكردو رەوانەی گۆڕەپانی خەباتی نوێی دەكردن دەزگای ئەمن ٦٠هەزار دینار دەكەنە دیاری بۆ ئەوكەسەی كە كاك ئارام بكوژێت كاك حەمە سەعیدە قەڵەوپێشمەرگە ی دێرینی ی ن. ك وهاوڕێی كاك ئارام لە بەرنامەیەكی تایبەت بەشەهید ئارام لەكەناڵی كوردسات دەڵێت، لەدائیرەی ئەمن مەلەفێكی تایبەت بەكاك ئارام وهاوڕێكانی دروست كرابوو كەبەوردی بەشوێنیاندا دەگەڕان و٦٠هەزار دیناریشیان وەك دیاری بۆئەوكەسە دانرابوو كە كاك ئارام بكوژێت.

ئارام نەیهێشت ڕێخستنەكان دوای خاڵە شیهاب لەیەك بترازێن لەو سەردەمە دژوارەی كە سەركردایەتی كۆمەڵە كەوتە بەر شاڵاوی رژێم و هەندێكیان شەهیدكران و هەندێكیش زیندانی كران، كاك ئارام لەو بارودۆخە ناسكەدا كە كۆمەڵە زەبری كوشندەی بەركەوت و بێ سەركردە مایەوە، توانی شیرازەی رێكخستنەكان لەترازان بپارێزێت و ئەو سەرگەردانییەش كە هەبوو توانی نەیعێڵێت و گیانێكی نوێ و تۆكەی كردەوە بە بەر رێكخراوەكەدا، هەروەها توانیشی وەك سەركردەیەكی تازە هەڵكەوتوو یەكێك بێت لەوانەیكە لەخەباتی نهێنی و داڕشتنی بناغەی شۆڕش و سیاسەتی (ی.ن.ك)و لەتەكنیك و دروشمەكان و لەداڕشتنی یەكەمین پەیڕەوی ناوخۆی هێزی پێشمەرگەو چۆنیەتی دروستكردنی دەستەی پارتیزانەكان و پەیوەندی تێكۆشەرانی شۆڕشی پێشوو بەشۆڕشی نوێ و رۆڵی كاریگەرو بەرچاوی هەبێت.

جگەلەوەی هەموو ئەو بەیانانەی كە دەنوسران بە شەونخونی و نهێنی ماڵەوماڵ گەڕان و بەبێ پەناگە، لەوبارودۆخە سەختەدا ئەو نوسیونی، یەكەم بەیاننامەی دامەزراندنی كۆمەڵەی خوێندكارانی كوردستانی نوسیوەو یەكەم نامیلكەی یەكێتی وەرگێڕاوەتە سەر زمانی كوردی. مانگی 10ی ساڵی 1976 كاك ئارام روویكردۆتە شاخ و لەوقۆناغەشدا بەئارامی گەشەی بەشۆڕشی داوەو لێزانانە توانی بەردی بناغەی كاروانی نوێ لەبەرەنگاربوونەوە دابنێت. ئارام وكاریگەری ڕۆشنبیری ئەو ماوەیەی كە شەهید ئارام لەشاخ بوو، تفەنگ و قەڵەمە بەبڕشتەكەی هاوتای یەك بوون بۆ هەردوو قۆناغەكەی خەبات، بەنهێنی چاپخانەیەكی سەرەتایی لەناوچەی قەرەداغ دانابوو بەیاننامەو بڵاوكراوەكانی شۆڕشی دەسنوس و چاپ دەكرا، هێندە بە بەرنامەو وردبین بوو لەكاركردندا توانیبووی خەڵكی هەموو ئەو ناوچانەی كە پیایدا دەگەڕاو رێبازی شۆڕشی بۆ رووندەكردنەوە، باوەڕی تەواویان بە وتەو قسەكانی كاك ئارام دەركردو دڵسۆزیی و خۆشەویستییەكی لەرادەبەدەریان بۆی هەبوو.

كاریگەریی ئەم كەسێتییە لەناو یەكێتی نیشتمانیی كوردستاندا بە جۆرێك بوو كە بۆخۆی داڕێژەری بیر و هزری گشتی ڕێكخستنەكان و سیاسەتە گشتییەكانی حیزبەكە بوو. یەكێتیی پێكهاتەیەك بوو لە بیری چەپی تەواو و بیری سۆشیالیزم، ئارام بۆخۆی چەپێكی كاریگەر بوو، هەر بۆیە كاریگەری لەسەر بیروباوەڕی گشتیی حیزبەكە هەبوو. چۆنیەتی شەهیدبوونی ئارامی سەركردە مەلابەختیار لێپرسراوی دەستەی كارگێڕی مەكتەبی سیاسی ی ن ك لەنوسینێكدا لەسەر شەهید ئارام كە لە ژمارە (1791) ی رۆژنامەی كوردستانی نوێ لە رۆژی 1999/1/31، بڵاوكراوەتەوە. دەڵێت ئێوارەی 30 لەسەر 1978/1/31، ئارام لەگەڵ (ئاوات قارەمانی) ‌و پێشمەرگەیەكی دیكەدا دەبن‌و دێنە (تەنگی سەر).

شەهید ئارام لەگەڵ كۆمەڵێك لە هاوڕێیانی

بەمەبەستی ئەوەی ژمارەیەكی دیكەی (ئاڵای شۆڕش) بنووسێ‌ (ئارام) بریار دەدا یەك دوو شەو لە پەناگای (تەنگی سەردا) لە ماڵی (عەلی تەنگی سەری) بمێنێتەوە. هاوڕێكانی ئیزن دەدا. شەو دەمێنێتەوە (بێ‌ حەرەسیات) بەیانییەكەی گوند كش‌و مات دەبێ‌. دەورو عەسر، جوتیارەكان ڕەوە جاشێك دەبینن، كاك ئارام ئاگاداردەكەنەوە، ئەویش لە ترسی ئەوەی نەكا ئیخباری كرابێ‌، چەكەكەی دەكاتە شان‌و بۆ ئەوەی هەستی پێ‌ نەكەن، بە شێنەیی شۆڕ دەبێتەوە خوار ئاوایی. لە دورەوە جاشەكان دەبینن‌و دەپرسن ئەوە كێ‌یە؟ خەڵكەكە دەڵێن جوتیارێكی گوندەكەمانە، جاشێك بە دووربین سەیری دەكاو تەركیزی دەكاتە سەر، لەو كاتەدا كاك ئارام تفەنگەكەی لە شانێكەوە دەگوازێتەوە بۆ شانەكەی تری، بەم گواستنەوەیە تفەنگەكەی دەبریسكێتەوە‌و جاشی دوربین لە چاو ئاگاداری (قالەو تەحسین) دەكا، بە كۆمەڵی دوای دەكەون. بە حوكمی ئەوەی شەهید ئارام لاواز بوو، هەرچەندە دەكا ناتوانێ‌ زۆر لێیان دووربكەوێتەوە، یان خۆی بشارێتەوە، بە كوردە ناموسەش، پێی شەرم دەبێ‌ تفەنگەكەی فڕێ‌ بدات هەتا سوكەڵەتر هەڵ بێ‌، بە خاوە خاوی كاك ئارام‌و تاوە تاوی جاشەكان، پێشی لێدەگرن‌و تەقەی لێدەكەن‌و شەهیدی دەكەن، هەتا لێیان نەكۆڵیبۆوە نەیان زانیبوو (ئارام)ە. بەو شێوەیە .. وێرای زیرەكی‌و هەڵكەوتووی، بەڵام بێ‌ ئەزموونی عەسكەری‌و باش گوێ‌ نەدانە دوژمن، (ئارام)ی خستە داوێكی جەرگ بڕەوە لە توانای دەیان ساڵی ئەم سەركردە لێهاتووە، كوردو كوردستان‌و ڕەنجدەرانی بێ‌ بەش بوون.

 

ئەم راپۆرتە لەلایەن رۆژنامەنوس (كاوان ئەحمەد حەمەساڵح هەڵەبجەیی)یەوە ئامادەكراوە

ریکلام

راپۆرت

ئاسایشی عێراق لەمەترسیدایە

خەڵك- بەشی هەواڵ

لیژنەی ئاسایش و بەرگری پەرلەمانی عێراق ئەمڕۆ شەممە داوای كرد هەرچی زووە سنورێك بۆ هێرشە بەردەوامەكانی سەر باڵیۆزخانەی ئەمریكا و هێزە بیانییەكان لە وڵات رابگیرێت.

محەمەد رەزا ئالحەیدەر لە كۆنگرەیەكی رۆژنامەوانیدا لە پەرلەمانی عێراق لە بەغدا وتی: عێراق ئاستەنگی مەترسیداری لە پێشە، پێویستە هەڵوێستی ئاشكراو بوێرانەی هەبێت، هەوڵ نەدات بۆ رازیكردنی هەندێك.

وتیشی: ئەو هێرشە رۆژانەییانەی دەكرێنەسەر نوێنەرایەتی و بارەگا فەڕمییەكانی دەوڵەت، بەپێی یاسای نێودەوڵەتی و پەیماننامەكان مافی پارێزگارییان هەیە.

راشیگەیاند، عێراق خاوەنی سەروەرییە و دەستور و یاسای هەیە، بۆ هیچ لایەنێك نییە پێشێلی ئەو یاسا و دەستورە بكات یان دەستدرێژی بكاتەسەر، بۆیە دەبێت هەمووان روبەڕوی ئەو پێشێلكارییانە ببنەوە بەشێوەیەكی یەكلاكەرەوە.

ئاماژەی بەوەشكرد هێرشەكان ناوبانگی وڵات ناشیرین دەكەن و شكۆی لاواز دەكات لە ناوەندە جیهانییەكاندا.

داواشی لە سەرۆك وەزیران كرد لیژنەیەكی تایبەت بە لێكۆڵینەوە لە هێرشەكانی سەر نوێنەرایەتییە بیانییەكان و دامەزراوە عێراقییەكان پێك بهێنێت.

لە هەفتەكانی رابردوو هێرشەكانی سەر باڵیۆزخانەی ئەمریكا و هێزە ئەمریكییەكان زیادیكردووە لە عێراق و بوونە نیمچە ڕۆژانە.

ئەمریكا ئەو هێرشانە دەخاتە ئەستۆی میلیشیا شیعەكانی سەر بە ئێران، بۆیە مایك پۆمپەیۆ وەزیری دەرەوەی ئەمریكا هۆشداری داوەتە بەرهەم ساڵح سەرۆك كۆماری عێراق تاكو هێرشەكان رابگیرێن بە پێچەوانەوە باڵیۆزخانەی ئەمریكا لە عێراق دادەخرێـت.

بەپێی راپۆرتی میدیاكانی ئەمریكاش لە حاڵی كشانەوەی باڵیۆزخانەی ئەمریكا لە عێراق، ئەمریكا گورزی ئاسمانی لەمیلیشیا شیعەكان دەوەشێنێـت.

بەمهۆیەوە دوێنێ مستەفا كازمی سەرۆك وەزیرانی عێراق كۆبونەوەیەكی بە سەركردەكانی شیعە كردووە و هۆشداریی و هەڕەشەكەی ئەمریكای پێداون.

بەردەوام بە لە خوێندنەوە

راپۆرت

زاواكەی ئەردۆغان هەرای ناوەتەوە

خەڵك- بەشی هەواڵ

وەزیری دارایی و گەنجینەی توركیا ئێستا زیاتر لە هەموو كەسێك مشتومڕی لەتوركیادا دروستكردووە و سیاسییەكانی دابەشكردووە بەسەر پشتیوان و دژیدا، بەڵام بوونە زاوای رەجەب تەیب ئەردۆغان سەرۆكی توركیا نەیارەكانی زیاتركردووە بەتایبەت دوای قەیرانە یەك لە دوای یەكەكانی ئابووری و زاواكەی ئەردۆغانی روبەروی گەردەلولی ناڕەزایی كردەوە.

بایراك كێیە؟

بیرات بایراك لە 1978 لە ئیستەنبوڵ لەدایكبووە، كوڕی سادق بایراك سەرمایەداری ناسراوە، یەك برای هەیە لە خۆی گەورەترە بە ناوی سادق بایراك لە بنەڕەتدا خێزانەكەیان خەڵكی ناوچەی ترابزۆنن.

خوێندویەتی لە ناوەندی فاتح و دواتر لە زانكۆی ئیستەنبوڵ بەشی ئینگلیزی، لە 2002 بڕوانامەی ماستەری ئابووری لە زانكۆی پاس لە نیویۆرك وەرگرتووە و دكتۆرای لە زانكۆی قدیس حاس وەرگرتووە بەناونیشانی وزەی كارەبا لە رێگای سەرچاوەی وزەی جێگرەوەوە.

بایراك لە ساڵی 2004 لەگەڵ ئەسرای كچی ئەردۆغان هاوسەرگیری كردووە كە ئەو كات ئەردۆغان سەرۆك وەزیران بوو، ئەوكات ژمارەیەكی زۆر لە سەركردەكان ئامادەی ئاهەنگی هاوسەرگیرییەكەی بوون لەوانە عەبدوڵڵا گول، بوڵەنت ئەرینج.

كارەكانی بایراك

كاری كردووە لە كۆمپانیای چالیك هۆڵدینگ لە ماوەی خوێندنی ماستەرەكەی لە 2002 تا 2006 وەك رێكخەری دارایی لە نوسینگەی كۆمپانیاكە لە ئەمریكا و لە 2006 گەڕاوەتەوە توركیا، كاریكردووە وەك جێگری بەڕێوەبەری كاروباری دارایی كۆمپانیای هۆڵدینگ و 2007 بووە بەبەڕێوەبەری هۆڵدینگ.

لە 2013 لە كەرتی تایبەتەوە چووە كەرتی گشتی وەك گۆشەنووس لە رۆژنامەی سەباح كاری كرد لەگەڵ بەڕێوەبەری بەشی دارایی و بانكی زانكۆی مەڕمەڕە لە ئیستەنبوڵ و ژمارەیەك پۆستیشی لە رێكخراوەكانی كۆمەڵگەی مەدەنی هەبووە.

چوونە نێو حكومەت

لە 2015 لە رێگەی ئەكەپەوە بەشداری كرد لە حكومەت وەك وەزیری وزە لە كابینەكەی ئەحمەد داود ئۆغلۆ دەستبەكاربوو دواتر لە كابینەكەی عەلی یلدرمیش تا 2018 و هاتنەكایەی سیستمی سەرۆكایەتی بە سەرۆكایەتی ئەردۆغان بەردەوام بوو و لەوێ بووە وەزیری دارایی و گەنجینە تا ئێستا.


دوو ساڵی رابردوو توركیا دوچاری گەورەترین قەیرانی دارایی بووە بەتایبەت هاوینی 2018 بەهۆی دابەزینی بەهای لیرەی توركی كە بووە 7.31 لەبەرامبەر دۆلاری ئەمریكی، لە كاردانەوەی قەیرانی برۆنسۆن لەنێوان سەرۆكانی توركیا و ئەمریكا و تاكوئێستا جگە لە هەندێك كاتی باشبوون بەردەوام بەهای لیرە روو لە داكشانە بەتایبەت دوای بڵاوبونەوەی نەخۆشی كۆرۆنا كە كاریگەری لەسەر ئابووری توركیا دروستكردووە.

بەپێی راپرسییەكان بایراك كاریگەری خراپی بەشێوەی راستەوخۆ كردووە لەسەر ئاستی جەماوەری ئەردۆغان لە شەقامدا.

هیشام گونای رۆژنامەنووسی تورك بۆ العربیە وتی: ئەدای وەزیری گەنجینە و دارایی زۆر لاوازە لە كاتی وەرگرتنی پۆستەكەیەوە، بەتایبەت لیرە بەهاكەی پاشەكشەی گەورەی كردووە لەبەرامبەر دۆلار، پێشتر 4.5 بووە ئێستا 7.5ە ئەمە بەڵگەی نەمانی متمانەی بازاڕە بە وەزیر.

وتیشی: ئەو رەوشەی وڵاتی پێدا تێپەڕ دەبێت كاریگەری گەورەی هەیە لە سەر دابەزینی بەهای دۆلار، هاوكات هەوڵی كودەتاكەش كاریگەری هەبوو لەسەر وەبەرهێنانی بیانی راستەوخۆ لە توركیا، نەخۆشی كۆرۆناش كە كاریگەری لەسەر جیهان هەبووە توركیاشی گرتووەتەوە.

ئاماژەی بەوەشكرد نزیكی وەزیری گەنجینە لە ئەردۆغانەوە كە زاوایەتی هەستیاری زیاتركردووە لەلایەن نەیارەكانیەوە زیاتر كراوەتە ئامانج نەك تەنها بەهۆی ئەدای لاوازی لە ئیدارەدانی ئابووری.

رونیشیكردەوە كەناڵی ئاوی ئەستەنبوڵ و یانەی وەرزشی ترابزوون دوو پرۆژەی ترن كە رەخنەی زۆر لەسەر ئەوانە لە وەزیری گەنجینە و دارایی دەگیرێت.

بەردەوام بە لە خوێندنەوە

راپۆرت

دۆناڵد ترەمپ بۆچی بە جولەکەکان دەڵێت ئێوە قەرزاری منن؟

خەڵک

دۆناڵد ترەمپ بە جولەکەکانی ئەمریکا ڕاگەیاندووە، کە وڵاتی جولەکەکانی خۆشەوێت کە ئیسرائیلە. دۆناڵد ترەمپ جولەکەکانی هانداوە کە پێویستە خۆشەویستی و دڵسۆزێکی دوو-لایەنیان هەبێت لەنێوان ئیسرائیلی وڵاتی ڕەسەن و ئەمریکای وڵاتی نیشتەجێبوو.

ترەمپ بە ڕوونی ئەوەی بە جولەکەکان وتوە کە ئەو لەسەر و بەندی هەڵبژاردنەوەیدایە وەک سەروەکی ئەمریکا و پێویستە تەواوی جولەکان پشتیوانی لێبکەن. جەختی لەوەش کردەوە کە پێویستە تەواوی جولەکەکانی ئەمریکا دەنگی پێبدەن، چونکە بەڕاستی ئەوان قەرزاری دۆناڵد ترەمپن. هۆشداری ئەوەشیدا “ئەگەر دەنگ بە من نەدەن ئەوا ئیسرائیل دەکەوێتە کێشەیەکی گەورەوە”.

دۆناڵد ترەمپ چەند کۆتەیشنێکی گرنگی دەربڕی بۆ جولەکەکان کە پێک هاتوون لە مانە. ” چیتان پێدەکرێت لە [هەڵبژاردنەکەی مانگی یانزە] بۆمی بکەن، ئەگەر نا ئیسرائیل دەکەوێتە کێشەی گەورەوە”، “ئەمە کاتێکی گرنگە لە ژیانی ئێوەی جولەکە، ئەگەر ئاسایش و ئارامیتان دەوێت دەنگم پێبدەن”. ئێوە ژمارەتان زۆرە لەسەر خاکی ئەمریکا و لەنێوان ٥ ملیۆن بۆ ٨ ملیۆن دانیشتوو دەبن.

ترەمپ لە بەردەوامی قسەکانیدا وتی، ” با لە بیرم نەچێت، ڕاپرسیەکی هەڵبژاردنی پێشوتانم دۆزیوەتەوە بەتەواوەتی توشی شۆکتان کردم، دەزانن کە سەدا ۲٥٪ دەنگتان بە من داوە، چەند خەمبارکەرە. لە کاتێکدا زاواکەم و کچەکەم کە شوی بە جولەکەیەک کردوە و ئێستا منداڵێکی خوێن جولەکەیان بووە. بۆ دەنگم پێ نادەن؟. دڵنیابن ئەگەر جۆ بایدن زۆرینەی دەنگەکان بەدەست بهێنێت دەکەونە کێشەوە. “لەبیر مەکەن، دەنگدان بە من واتا دەنگدانە بە خاکی ڕەسەنی خۆتان، دڵسۆزی نواندنە بۆ خاکی ئیسرائیل”

دۆناڵد ترەمپ ناوبانگێکی گەورەی بەوە پەیداکردوە کە سەرۆکێکی پرۆ-ئیسرائیلیە، دۆناڵد ترەمپ بە نهێنی ئەوەی بە سەروەکی ڕێخراوی جولەکەکانی ئەمریکا(ستیڤن گرین بێرگ و ماکلۆم هۆیلین) وتووە، کە چی ماوە بۆ ئیسرائیل نەکات؟. دانم ناوە بە زەوی “بەرزایەکانی جۆلاندا” وەک خاکێکی خاوەن سەروەری ئیسرائیلی، باڵوێزخانەی ئەمریکام گواستەوە بۆ جۆرسەلیم، پلانێکی ئاشتی جاڕداوە کە دەوڵەتی فەلەستینی دەکاتە قسەی گیرفان و بێ-واتا، چەندین دەوڵەتی عەرەبی سوونیم لەگەڵ ئاشتکردنەوە کە دیاترینیان ئیمارات و بەحرێن بوون، و بێگومان دەوڵەتێکی تر لەسەر ڕێگایە بۆ ئاسایکردنەوە پەیوەندیەکانی لەگەڵ ئیسرائیل، ئەوە سوپاریزێکی گەورەی تر بەڕێوەیە.

مایک پۆمپیۆ وەزیری دەرەوەی ئەمریکا لە لێدوانێکدا ڕایگەیاند، “دۆناڵد ترەمپ نێردراوێکی خودایە بۆ پارستنی ئیسرائیل لە کۆماری ئیسرائیل ئێران”. چی ماوە دۆناڵد ترەمپ بۆ پارستی خاکی جولەکە و ئاسوودەی خەڵکی جولەکە نەیکات، بۆ دەنگی پێنادەن؟

وەرگێڕانی لە ئینگلیزیەوە: هەڵۆ ساڵح

بەردەوام بە لە خوێندنەوە

کوردستان