ئێمە لە تۆرە کۆمەڵایەتیەکان

ژینگە

كەشوهەوای هەرێم دەگۆڕێت و پلەی گەرما بەرزدەبێتەوە

خەڵك- بەشی هەواڵ
كەشناسی عیراق پێشبینییەكانی بۆ دۆخی كەشوهەوای ڕۆژانی داهاتوو بڵاودەكاتەوە و شارەزایەكی كەشناسی-ش دەڵێت: “گۆڕانكاری لە كەشوهەوا ڕوودەدات و پلەی گەرما بەرزدەبێتەوە”.

سادق عەتیە، پسپۆڕ و پێشبینیكاری كەشناسی عیراقی لە هەژماری خۆی لە فەیسبووك ڕایگەیاندووە، ئەم هەفتەیە زۆربەی كات ئاسمان لە سەرجەم ناوچەكانی عیراق و هەرێمی كوردستان ساماڵ دەبێت و دۆخی كەشوهەوا جۆرێك لە سەقامگیری وەردەگرێت و هیچ حاڵەتێكی كەشناسی وەك باران و بەفر تۆمار ناكرێت.

ڕاشیگەیاندووە، لە ڕۆژی سێ‌ شەممەوە پلەكانی گەرما ڕوو لە بەرزبوونەوە دەكەن و كەشوهەوا دەگۆڕێت.

لای خۆشیەوە، دەستەی كەشناسی و بوومەلەرزەزانی عیراق لە بەیاننامەیەكدا ئاماژەی بەوەكردووە، ڕۆژی دوو شەممە ئاسمانی ناوچەكانی عیراق و هەرێم زربەی كات نیمچە هەور دەبێت و هەندێك كاتیش هەور دەبێت و كەمێكیش پلەكانی گەرما بەرزدەبنەوە.

ئاشكراشی كردووە، لە كاتەكانی بەیانیدا لە ناوچەكانی هەرێمی كوردستان تەم ڕوودەدات.

ڕوونیشی كردۆتەوە، كە ڕۆژی سێ‌ شەممە ئاسمان زۆربەی كات نیمچە هەور دەبێت لە ناوچەكانی هەرێم، بەڵام لە ناوچەكانی باشوور ئاسمان ساماڵ دەبێت و پلەكانی گەرما وەك خۆی دەمێنێتەوە و گۆڕانكاری ئەوتۆ ڕوونادات.

سەبارەت بە ڕۆژی چوار شەممە ڕایگەیاندووە، ئاسمانی سەرجەم ناوچەكانی وڵات ساماڵ دەبێت و لەكاتی بەیانیدا تەم دروست دەبێت لە ناوچەكانی ناوەڕاستی وڵات و هەرێمی كوردستان و پلەكانی گەرماش بەرزدەبنەوە.

ژینگە

لە قەزای پێنجوێن (100) دۆنم پوش و پاوان سووتان

خەڵك- بەشی هەواڵ

بە هۆكارێكی نادیار ئاگرێكی بەرفراوان لە گوندی هەرگێنەی سەر بە قەزای پێنجوێن كەوتەوە و بەهۆیەوە100 دۆنم پوش و پاوان سوتان.

پۆلیسی دارستان و ژینگەی سلێمانی لە ڕاگەیەندراوێكدا ئاماژەی بەوەكردووە، دەست بەجێ مەفرەزەكانی بەشی پۆلیسی دارستان و ژینگەی پێنجوێن گەیشتنە شوێنی ڕووداوەكە و توانراوە بە هاوكاری ڕێكخراوی ملەكەوە و خاڵی باشماخ ئاگرەكە كونترۆڵ بكرێت.

سەبارەت بە زیانەكانیش نوسراوە”زیانی ئاگرەكە (100) دۆنم پوش و پاوان و داری سروشتی سووتاون”.

بەردەوام بە لە خوێندنەوە

ژینگە

ئایا داری (سەبەحبەح، چەتر) ژەهراوییە و مەترسی بۆ مرۆڤ هەیە؟

خەڵك- بەشی هەواڵ

دوای بڵاوبونەوەی دەنگۆی مەترسی درەختی سەبەحبەح و مەترسی لەسەر ژیانی مرۆڤ، شارەوانی چەمچەماڵ لە زاری د. هەڵەت ڕەشیدەوە چەند ڕاستییەكی سەبارەت بەو درەختە ئاشكراكرد.

د. هەڵەت ئاماژەی بەوەكردووە، داری سەبەحبەح دارێكی دۆستی ژینگەیە و نیشتمانی سەرەكی ئەم دارە باكوری هیند و باشوری ڕۆژهەڵاتی ئاسیایە، تەمەنی ئەم دارە لە نێوان 150 بۆ 200 ساڵە، ئەم دارە لە هەموو جۆرە خاكێك سەوز دەبێت، تەنانەت لە خاكی لمیشدا توانای گەشەی هەیە، ڕەگی ئەم دارە زیاتر بە ئاسۆیی بڵاو دەبێتەوە و كەمتر بە ستوونی دەچێتە قوڵایی خاكەوە، ڕەگەكەی بە 3 مەتر بڵاودەبێتەوە، بۆیە واباشترە لەكاتی چاندنی بە دەوری 3 مەتر لەگەڵ دارێكی تر بچێنێت.

دەشڵێت: “باشترین كاتیش بۆ چاندنی ئەم دارە كاتێكە پلەی گەرمی لەنێوان 20 بۆ 32 پلەی سەدی بێت،(بۆ هەرێمی كوردستان ئەم پلەیە لەمانگەكانی نیسان و ئایار و ئەیلول و تشرینی یەكەم فەراهەمە).

سەبارەت بە سوودەكانی داری سەبەحبەح د. هەڵەت دەڵێت: “داری چەتر سوودی زۆرە، لەبەر زۆری سوودەكانی لە نیشتمانی ڕەسەنی خۆی، كە هیندستانە بەداری دەرمانخانەی لادێ ناسراوە، هۆكاری ئەمەشە دەگەڕێتەوە بۆ ئەوەی ئەم دارە مادەیەك دەردەدات دەبێتە هۆی ئەوەی مێشوولە و مێش لە دەورووبەری دارەكە دووربكەوێتەوە، واتە چاندنی ئەم دارە لەنزیك ماڵ و شوێنە گشتیەكان هۆكارێكە بۆ دورخستنەوەی مێش و مێشوولە و كەمكردنەوەی مەترسی تووشبون بەنەخۆشی مەلاریا، هەروەها 1 دۆنم زەوی چێنراو بەم دارە توانای نیشتاندنی 30 تەن لە تۆز و خۆڵی هەیە لەساڵێكدا”.

ئاشكراشی كردووە، سودێكی تری ئەم دارە دەردانی مادەیەكی ترە، كە دەبێتە هۆی لەناوبردنی ڤایرۆسی هەوكردنی جگەر لە جۆری B، جگەلەوەش لە پیشەسازی دروستكردنی دەرمانیش بەشدارە بەتایبەت لە دروستكردنی هەویری ددان و دەرمانەكانی هەوكردنی گەدە و ڕیخۆڵە و چارەسەری پێست و سابونیشی بۆ تەندروستی پێست لێ دروست دەكرێت.

ڕوونیشی كردۆتەوە، سەبارەت بەناوی دارەكە، جگە لەناوی زانستی دارەكە هەر وڵاتێك ناوی تایبەت بە دار دادەنێت لە هیند پێی دەوترێ دەرمانخانەی لادێ، لە عیراق پێی دەوترێت سەبەحبەح، لە میسر پێی دەڵێن نیم، لە كوردستانیش بە چەتر ناسراوە.

سەبارەت بە ژەهراوی بوونی دارەكە جەختیشی كردۆتەوە، بەو شێوەیە نیە مرۆڤ بكوژێت.

بەردەوام بە لە خوێندنەوە

ژینگە

لە جەژنی قورباندا پۆلیسی دارستان 19 كەسی دەستگیر كردووە

خەڵك- بەشی هەواڵ
بەڕیوەبەرایەتی پۆلیسی دارستان و ژینگەی سلێمانی لەسەرجەم بنكە و بەشەكانی لەڕۆژانی پشوی جەژنی قورباندا بەردەوام مەفرەزەكانیان لە ئەركدابوون بۆ ڕێگریكردن لە سەرپێچیكاران و پارێزگاری كردن لە سروشت و ژینگەی كوردستان بۆ ئەو مەبەستە بە چەند هۆكارێكی جیاواز 19 سەرپێچیكار دەستگیر كراون و ڕووبەڕووی یاسا كراونەتەوە .

عەمیدی پۆلیس، هێمن كمرخان ئەفندی، بەڕێوەبەری ڕاگەیاندن لە بەرێوەبەرایەتی پۆلیسی دارستان و ژینگەی پارێزگای سلێمانی بۆ (خەڵك) ڕایگەیاند، پۆلیسی دارستان بەتایبەت لە پشووەكانی جەژنی قورباندا بەگیانێكی لەخۆبوردییەوە لە گەڕان و پشكنیندا بوون بۆ ڕێگریكردن لە سەرپێچیكاران و پارێزگاریكردن لە سروشت و ژینگەی كوردستان و لە ئەنجامی چەند دەرچوونێكی مەفرەزەكانمان لە سنورەكانی (سیتەك، سلێمانی، گاپیڵۆن، بازیان، قەرەداغ) توانیان (19) سەرپێچیكار دەستگیربكەن بەهۆكاری كەوتنەوەی ئاگر و زیادەڕەوی و بیرلێدان و ڕاوكردنی ماسی .

ڕوونیشی كردەوە، لە ئەنجامی دەرچوونێكی بنكەی پۆلیسی دارستان و ژینگەی سیتەك توانیان (7) سەرپێچیكار دەستگیر بكەن، كە زیادەڕەویان كردبووە سەر موڵكی گشتی، هاوكات لە سلێمانی توانرا (2) سەرپێچیكار دەستگیر بكەن لەسەر دیاردەی بیرلێدان بەشێوەیەكی نایاسایی و پۆلیسی دارستانی گاپیڵۆن-یش توانیان (7) ڕاوچی دەستگیر بكەن، كە سەرقاڵی ڕاوكردن بوون و هەر لەچوارچێوەی ڕۆژانی پشووی جەژندا لە سنوری قەرەداغ (3) هاووڵاتی دەستگیر كران بەهۆكاری ئاگركەوتنەوە.

ئاشكراشی كرد، زەرەر و زیانی ئاگرەكە سووتانی زیاتر لە (5000) دۆنم پووش و پاوانە لە سنوری بازیان و قەرەداغ لەگەڵ ئەوانەشدا دەستگیراوە بەسەر (2) جیهازی بیرلێدان و (1) مۆلیدەی كارەبایدا .

عەمید هێمن دەشڵێت: “پەڕاوی لێكۆڵینەوە ڕێكخراوە و ڕادەستی دادوەر كرا بۆ وەرگرتنی ڕێكاری یاسایی”.

بەردەوام بە لە خوێندنەوە

کوردستان