ئێمە لە تۆرە کۆمەڵایەتیەکان

وتار

بەرازیل، ئازارشکێن بە قاوە و تۆپی پێ

بەرازیلیەکان زۆرینەیان لاتینۆسی هەژارن، ڕۆژانە پێیەکانیان لەسەر خاکێکی جادویی دادەنێن، جگە لە پەیکەرە گەورەکەی حەزرەتی مەسیح لە رێۆ دی جانێرۆ، خاوەنی خاکێکی تەڕی کشتوکاڵین کە باشترین جۆرەکانی قاوە لە نمونەی روبۆستا و ئارابیکا بەرهەم دەهێنێت، لەسەدا 35ی قاوەی جیهان بەرهەم دەهێنن، زانستی سەردەم بە بەڵگەی زانستیەوە سەلماندویەتی قاوە تاڵ و تفتەکەیان هاوشێوەی مۆرفین ئازارشکێنە.

وڵات وڵاتێکی کراوەیە و خەڵکەکەی وەک ناوی خۆیان شارەزای سەمای سامبان، ئەو سەمایەی منداڵ تا پیریان جوڵە بە جوڵە نمایشی دەکەن، لە ماڵەوە، کۆڵان، سەرشەقامەکان بۆنی قاوە دەکەیت و نمایشی ئەفسانەیی سامبا دەبینیت، ژیان لەم خاکەدا برییتیە لە ژیانی شاهانەیی یان هەژاری و ناوەند بونی نییە، بەڵام کاتێک بابەتەکە دەگاتە ئاستی وەرزش ڕوحەکان یەکدەگرن، نەهەژار دەمێنێت نە زەنگین.
تۆپی پێ لە ئەوروپا تەشەنە دەکات بەرەو ئەمریکای لاتین، بەرەو ئۆرۆگوای بۆ کەناراوەکانی ریڤەرپلەیت لە ئەرجەنتین پاشان بۆ کەنار دەریاکانی ساوپاولۆ و ریۆ، لێرەدا دەوڵەمەندان فێری کلتورە وەرزشیەکەی ئینگلاند و نەمسا و ئەوروپیەکان دەبن، بەڵام زۆرینەی هەژاران ئەم ئسوڵی یارییکردنە نە فێر دەبن و نە لێی دەزانن بەهەوای شانی خۆیان سەمای سامبای تێکەل دەکەن، بەشێوەیەک کە ئێستاش پێوەیان دیارە و ناتوانن لێی بترازێنن.
بەرازیلیەکان بەدرێژایی مێژوو بەهۆی داگیرکەران و هەژاریەوە لەزۆر شت بێبەش بوون، بۆیە کە شتێکی بەردەستیان خۆشبوێت مەحاڵە بەئاسایی بیگرن یان دەستبەرداری بن، دەگێڕنەوە پورتوگالیەکان کۆنگفو و کاراتێیان لێ قەدەغە دەکەن، ئەمان دێن تێکەڵەی سامبا و باراناوی لەگەل هونەرە جەنگییەکان تێکەڵ دەکەن ئەوەش دەبێتە کۆپۆێرا کە لە زۆرینەی یارییە قیتالیەکان بەهێزترە، بەوشێوەیە داگیرکاری پورتوگال دەخەڵەتێنن گوایە سەما دەکەن، بەڵام لەکاتی پێویستدا سەما دەکەنە کۆپۆێرا و حەسیر مەیدانی سەربازەکانیان دەکەن.
پێلێ دەڵێت: بنەمای تۆپی پێی ئێمە فوتساڵ و یاریی کەنار دەریاکانە، پێویستە گرنگی پێبدەین، بەوشێوەیە مۆرکە بەرازیلیەکە بەردەوامی دەبێت، ئەو شێوازەی هەموو قوتابخانەکانی تر ئیرەیی پێدەبەن لەهەمان کاتدا سودی لێوەردەگرن.
کەواتە نمایش و نازناو بنەمای تۆپی پێی دامەزراوی بەرازیلە.
29.6.1958 کاتژمێر 5:09 بەکاتی کوردستان، کۆتایی مۆندیالە و تۆپێک لە زاگالۆوە دەگاتە پێیەکانی ڤاڤا و ئەم ئەفسانەیە لە شاری سۆلنای سویدی لەبەردەم 49 هەزار سویدی سەرکێشدا گۆلی یەکسانبون تۆمار دەکات (1-1), لێرەوە مێژووی تۆپی پێی بەرازیل لە چیرۆکێکی ئەفسانەییەوە دەبێتە مێژووی نوسراو و بە سیحری گارینشا جارێکی تر ڤاڤا و پیلێ و زاگالۆ مێژوو بە پێنج گۆڵ دەنوسنەوە و یەکەم نازناوی مۆندیال بەدەست دەهێنن.
مێژوو بە پێکهاتەیەکی کەم ئەندامەوە دەنوسنەوە!!!
قاچ کورتێک و پەنجە براوێک و بربرەیەکی خوار و مێردمندالێک کە تائێستاش بەهێزترین ئەفسانەکان نەیانتوانیوە هاوکێشەی ڕیکۆردەکانی شیتەڵ بکەن (پێلێ).
ئەگەر ئەوە جادوی پێکهاتەیەکی کۆڵەوار بێت، دەبێت 1994 بە بونی ڕۆماریۆ و بایانۆ و دۆنگا و تافارێل، لە 2002 بەبونی ڕۆناڵدۆی دیاردە و ڕیڤاڵدۆ و کافو چ هێزێک لە جەستە و ڕوحیاندا کارلێکی کردبێت؟!
دەبێت سەردەمەکانی سوکرات و زیکۆ و تۆستاو و جێرزینهۆ و ئەلبێرتۆ و دیدی چۆن تێپەڕیان کردبێت؟!
کێ دەتوانێت لێدەرکردنەکانی “فینۆمینۆ” بە جەستە دووبارە بکاتەوە؟ کێ دەتوانێت هونەرەکەی ڕۆناڵدینهۆ و لیۆنایدس هەڵگرێتەوە مەگەر نایمارێکی بەرزایلی نەبێت؟
ڕۆماریۆ دەڵێت: ڕووم نەکردۆتە گۆڵێک و بە دڵتەنگی گەڕابێتمەوە.
ئایا هێرشبەرەکانی ئێستا و ئەوساش بەو کوالیتیەن؟! ئەو ڕۆماریۆ ئەسمەرەی ڕقی لە پێلێیە و ئاشقی درێسە زەردەکەشیەتی.
دۆمینگۆس دا گۆیای بەرگریکار دەڵێت: لەیاریی کردن و لێدانی یاریزانان دەترسام، لەسەردەمی ئێمەدا رەش ئەسمەرەکان دەکەوتنە بەر لێشاوی شەق و تێهەڵدانی ڕکابەران، جارێک براکەم پێی وتم: تۆ سەمای سامبا نازانیت؟ بەراستی ئەوە بیرۆکەیەکی نایاب بوو، وەک سەمای میۆدینهۆ ران و قاچم دەجولاند و بەتۆپەوە لە لێدانەکان دەرباز دەبووم.، کاتێک زانیم ئەم سەمایەی من دەیکەم داهێنانە لە هونەری لێدەرکردندا.
بەبیر خۆتی بهێنەرەوە، تۆ ڕووبەڕوی پێیەک دەبیتەوە پێی دەڵێن پێیە بەرازیلیە نەسرەوتەکان، بە سەماوە یارییت لەگەل دەکات و زەردەخەنە لەسەر لێوانیەتی، چاوەڕێی بردنەوە دەکەیت؟ نەخێر، لە خراپترین ساتەکانیاندا تەنها بەرگری چارەسەری تۆی ڕکابەرە.
لەکۆتایدا دەگەمە ئەو بیرکردنەوەیەی خاکی بەرازیل تەنها بۆ قاوەکانی رۆبۆستا و ئارابیکا لەبار نییە، بەڵکو سیحرەکەی بۆ پێی خەڵکەکەشی دەگوێزرێتەوە، زەویەکەی زەوی بەرهەمهێنانی تۆپی پێیە، ئەگەر قاوەکەی ئازارشکێن بێت ئەوا تۆپی پێیەکەی ئازاردەری ڕکابەران و ئازارشکێنی هاونیشتیمانەکانیەتی، هەر لەبەرئەوەشە بەرازیلیەکان بەبێ تۆپی پێ ناژین، ئازارەکانیان بە تۆپی پی کەم دەکەنەوە.
بپرسە بۆ خاوەنی لەشفرۆشی بێشومارن؟ هۆکارەکەی تەنها نەبونی نییە، بەڵکو خەمی پەیداکردنی نان لەلایان هاوتای تەماشاکردنی فلۆمینێز ی و سانتۆس و فلامینگۆیە.
خەم، ئازار، ئازارشکێن، قاوە و تۆپی پێ، سامبا و لێدەرکردن…
ئەوە بەرازیلە ” ئو میلۆرا دی هیستۆریا دو فوتبۆڵ”، هاندەرتان نیم، بەڵام ناتوانم تەماشاتان نەکەم.، ئێوە ئەوکرێمەن دەکرێت بەسەر کێکەکەدا، بەبێ ئێوە تۆپی پێ تامی نییە، بەڵام بەخۆشحاڵیەوە ئێوە هەمیشە هەن، لە یانەکان، لە مۆندیالەکان…

پێگه‌ی نوسه‌ر له‌ تۆڕی کۆمه‌ڵایه‌تی فه‌یسبوک…

وتار

ئایه‌ ده‌زانن گریزمان چ گۆڕنكارییه‌ك له‌ به‌رشه‌لۆنه‌دا دروست ده‌كات؟

هه‌وراز كاوه‌

فۆڕت نایت گه‌یشته‌ یاریگای كامپانۆ، ئه‌و نیمار نییه‌ و ده‌رفه‌تێكی (120) ملیۆن یۆرۆی ڕه‌ت بكاته‌وه‌، كه‌چی به‌ڕازیلییه‌كه‌ داوای ده‌رفه‌تی دووه‌م ده‌كات بۆ هاتنه‌وه‌ی یاریگای خه‌ونه‌كان. به‌ هاتنی ئه‌نتۆن گریزمان یانه‌ی به‌رشه‌لۆنه‌ ڕزگاریان بوو له‌وه‌ی به‌ ته‌نیا به‌ پلانێك یاریی بكه‌ن، ئه‌و جێگره‌وه‌ی سوارێز نییه‌، چونكه‌ جۆرێتی زۆری هه‌یه‌ بۆ یاریكردن له‌ هێڵی پێشه‌وه‌، به‌ تایبه‌تی به‌وه‌ ناسراوه‌ خۆی له‌ به‌رامبه‌ر ون ده‌كات و جه‌سته‌یه‌شی بۆ ئه‌مه‌ گونجاوه‌، كه‌ لێره‌ شوێنی ته‌كتیكی ئه‌و یاریزانه‌ له‌م وه‌رزه‌دا بۆ ئێوه‌ باس ده‌كه‌م.

(4ـ4ـ2) له‌گه‌ڵ سوارێز)دا
سه‌ره‌تا به‌م پلانه‌ یانه‌ی بلوگرانه‌ ده‌توانێت زۆرێك له‌ یارییه‌كانی ئه‌نجام بدات، به‌و مه‌رجه‌ی یاریی گه‌وره‌نه‌بن، ئه‌ویش له‌به‌ر ئه‌وه‌ی سیانه‌ی پێشه‌وه‌ ده‌توانن به‌ شێوه‌یه‌كی تاكی باش گوشار دروست بكه‌ن و تۆپه‌كان بگرن و بگێڕانه‌وه‌، نه‌خشه‌ی یه‌كه‌م ئاسانه‌ میسی ڕۆڵی ژمار (10)ـی ده‌بیێت و ده‌كشێت بۆ قوڵایی به‌رگری به‌رامیه‌ر، هه‌روه‌ها سوارێز و گریزمان له‌ پێشه‌وه‌ ده‌بن، به‌ دڵنیایه‌وه‌ فه‌ڕه‌نسییه‌كه‌ له‌و كه‌سانه‌یه‌ یارمه‌تی به‌رامبه‌ره‌كه‌ی زۆر ده‌دات. (4ـ4ـ2ـی دایمۆند) ئه‌مه‌ به‌وجۆریه‌ گریزمان له‌ ڕاست و دیمبلی له‌ چه‌پ و میسی ئازادیه‌كی زۆری ده‌بێت له‌ پشتی ئه‌مانه‌وه‌، ئه‌م نه‌خشه‌یه‌ واده‌كات دووانه‌ی باڵ به‌خێرایی زۆره‌وه‌ بچنه‌ سه‌ر گۆڵی ڕكابه‌ر و یاریگاكه‌ درێژ بكه‌نه‌وه‌ و دووانه‌ی تاك به‌رگریش كه‌متر سه‌ربكه‌ون بۆ یارمه‌تیدانی هێرشبه‌ران و كۆتایی هاتنی ڕۆماڵی تۆپه‌كان، به‌وه‌ش به‌رگری به‌رشه‌ بۆ هه‌میشه‌ له‌ جوڵه‌ی زۆر و هه‌ڵه‌ ده‌پارێزرێن.

(4ـ3ـ3) میسی و ژماره‌ 9ـی خه‌یاڵی)
له‌مكاته‌دا لیۆ میسی ده‌گه‌ڕێته‌وه‌ باری یاریی جارانی كاتێك گواردیۆلا ڕاهێنه‌ری بوو، ئه‌و دێته‌ باڵی ڕاست و گریزمان له‌ سه‌ر و دیمبڵی به‌رامبه‌ری ده‌بێت، لێردا تیپه‌كه‌ پێویستی به‌ یاریزانی ژماره‌ (8) هه‌شت ده‌بێت وه‌ك ئارسه‌ر و دی یۆنگ، كه‌ به‌ بۆچوونی من: ئارسه‌ر بۆ ئه‌و شوێنه‌ و پشته‌وه‌ی میسی گونجاوه‌، چونكه‌ ئه‌وه‌ی دیكه‌ هێشتا دیار نییه‌ چۆن یاریی ده‌كات، به‌ڵام ئارسه‌ر توانای هه‌یه‌ هه‌م نزیك بێت له‌ لیۆ و هه‌میش له‌ پانتایی ناوه‌ڕاستی یاریگا به‌رگری و ڕووبه‌ره‌ به‌تاڵه‌كان به‌یه‌كه‌وه‌ ببه‌ستێته‌وه‌. له‌ حاڵی (4ـ3ـ3)ـی ئازادا ئه‌وه‌ میسی و سوارێز و گریزمان پێكه‌وه‌ ده‌بن، ئه‌م لایه‌نه‌یان ئاسانه‌ و ته‌نیا پێویستی به‌ هاوكاری و لێكگه‌یشتنی نیوان ئه‌و سیانه‌ خۆیانه‌، به‌و مه‌رجه‌ی هێڵی ناوه‌ڕاست پارێزگاری له‌ به‌هێزی لایه‌نی جه‌سته‌یی و هه‌ماهه‌نگی نێوانیان بكه‌ن.

(4ـ4ـ2)ـی فلات به‌بێ‌ میسی)
یانه‌ی به‌رشه‌لۆنه‌ پێویستی به‌وه‌یه‌ پێشوویه‌كی زۆر به‌ میسی بدات، هاتنی گریزمان ئه‌و هه‌له‌ زیاتر دروست ده‌كات و ڕاهێنه‌ریش دوورنیه‌ بیر له‌وه‌ بكاته‌وه‌ ئه‌مساڵ به‌هۆی ته‌مه‌نه‌وه‌ زیاتر میسی له‌ یارییه‌ گه‌وره‌كان و چامپیۆنسلیگ به‌شداری پێ‌ بكات، له‌وكاته‌دا ناچاره‌ له‌ پاڵ سوارێز یاریی به‌ گریزمان و دیمبڵی بكات، كه‌ هه‌میشه‌ یه‌كێكیان ده‌بێت له‌سه‌ر هێڵی هێرشبه‌ری لا بێت، له‌ به‌رامبه‌ردا پێده‌چێت ڤیدال له‌ تاكی چه‌پ بێت بۆ زیاتر هاوسه‌نگی دروستكردن له‌ هێڵی به‌رگری و هێرش، جگه‌ له‌مه‌ دی یۆنگیش گه‌ورترین ڕۆڵی ده‌بێت بۆ یارمه‌تیدانی ئه‌وانه‌ی پێشه‌وه‌، به‌ڵام له‌گه‌ڵ هاتنی نیمار ئه‌وه‌ گه‌وره‌ترین كێشه‌ بۆ پێكهاته‌ی تیپه‌كه‌ دروست ده‌بێت، به‌ تایبه‌تی ڕاهێنه‌ر ناتوانێت له‌ نێوان سه‌ره‌كییه‌كان و یه‌ده‌گه‌كان پێكهاته‌یه‌ك دروست بكات. هه‌ر چۆنێك بێت گریزمان ده‌بێته‌ ئه‌و كه‌سه‌ی زۆربه‌ی گرفته‌ هونه‌رییه‌كانی تیپه‌كه‌ چاره‌سه‌ر ده‌كات، به‌ تایبه‌تی ئه‌و له‌ (2014)ه‌وه‌ له‌ لالیگا یاریی ده‌كات (180) یاریی كردووه‌ له‌گه‌ڵ (94) گۆڵ، ئه‌مه‌ش پێمان ده‌ڵێت، به‌رشه‌لۆنه‌ هه‌ڵه‌ی نه‌كردووه‌ له‌ هێنانی ستاره‌ تازه‌كه‌ی.

بەردەوام بە لە خوێندنەوە

وتار

بیھێنە پێش چاوی خۆت، دوو جۆر ئوتۆمبێل و دوو جۆر ڕاهێنەر

بەرهەم جەلال

بۆ جێگایەكی دوور دەڕۆیت دوو جۆری ئوتۆمبێل ئامادەیە بۆ ئەوەی ڕێگاكەی پێی ببڕیت.

جۆری یەكەم ئوتۆمبێلێكی كۆنە ھەمیشە خەیاڵت لای ئەوەیە كاسكێت نەسوتێت، حەماوە بەرز نەبێتەوە، ڕۆن و ئاو تێكەڵ نەكات، تەگەر جام نەبێت، ئۆستۆب بگرێت، مەكینە بوخار نەكات لە ڕێگا، تایە پەنجەر نەبێت، فیول پەمپ نەوەستێت …. ھتد

جۆری دووھەم ئوتۆمبێلێكی ئاخر مۆدێل شەغال، كوشن چلد، تەبرید، ناو خەنەیی، كامل شاشە، سیدی بۆكس، چركەی تێدا نەبێت، سلاید، پانۆراما، ئاوێنە كارەبایی و چوار لا كامێرە، فوول حاسە، فوول بەنزینی موحەسەن.

پێ دەچێت بە ھەر یەکێکیان بگەیتە ئامانج و مەنزڵ، بەڵام پرسیارەكە ئەمەیە: كامیان خۆشتر دەتگەیەنێتە جێ ؟ کامیان چێژی تایبەتیت پێ دەبەچشێت ؟

گریمان جۆری یەكەم گەشت و جۆری دووەم نەگەیشت، بەڵام جۆری یەكەم چێژەكەی لێھاتۆتە دەرەوە و بە پشتیدا چۆتە خوارەوە، ڕاستە گریمانەی ئەوەش دەكرێت جۆری دووھەم نەگات، بەڵام لانی كەم دڵی بەوە خۆشە ئوتۆمبێلەكە نایابە.

بە کورتی، جۆری یەكەمی ئوتۆمبێلەكە ھاوتای ڕاھێنەرێكە ھێچ بیر و فێكر و ستایلێكی تایبەت بەخۆی نییە، چاوی لەوەیە تەنیا سەركەوتن بەدەست بھێنێت یان نازناو ببات، لە كاتێكدا تا نازناو یان سەركەوتنەكە بەدەست دەھێنێت نیوە گیان دەبێت.

جۆری دووھەمی ئوتۆمبێلەكەش ھاوتای ڕاھێنەرێكە خاوەن فەلسەفە و ستایلی تایبەت بە خۆیەتی، بۆیە چێژ لە ڕێگا و گەشتەوەردەگرێت، گەر نازناوەكەش ببات لەوە نایابتر نییە، چونكە لەسەر توانای فكر و جوڵە بەدرێژایی ئەو گەشتە ڕێیكردوە.

بەردەوام بە لە خوێندنەوە

وتار

کۆپا ئەمێریکا پاڵەوانیەتیەکی بەهێز و کەم بایەخکراو

ئەحمەد هێرۆیی

کۆپا ئه‌مێریكا یەکێک لە پاڵەوانێتیە کیشوەرییە بەهێزەکان، کە لە ساڵی 1916وە سەری هەڵداوەو لەلایەن یەکێتی تۆپی پێی ئەمەریکای باشوورەوە بەڕێوەدەچێت. بەڵام ئەم پاڵەوانێتییە سەرەڕای بەهێزییەکەی خاڵی لاوازی ئەوەیە کە بەشێوەیەکی هەڕەمەکی بەڕێوەدەچێت، لەبەرئەوەی ئەم جامە لە وەتەی هەیە کەس نازانێت کەی بەڕێوەدەچێت.

ئەم پاڵەوانێتییە لە سەرەتای دروستبوونیدا هەموو ساڵێک بەڕێوەدەچوو مەگەر بە هۆکارێک ساڵێک نەکرابێت، بەڵام دواتر یەکێتی تۆپی پێی ئەمەریکای باشوور ویستی ساڵەکانی بەڕێوەچوونی ئەم پاڵەوانێتییە ڕێکبخات بۆ ئەوەی هاوشێوەی پاڵەوانێتییەکانی دیكه‌ گرنگی خۆی پەیدا بکات، هەر بۆیە بڕیاریدا ئەم جامە بە 4 ساڵ جارێک بەڕێوەبچێت، بەڵام دووبارە ئەم یەکێتییە پابەند نەبوو بە بڕیارەکەیەوە، كه‌ هەتا ئێستاش هەر لەسەر شێوازە هەڕەمەکییەکەی خۆی بەردەوامه‌.

نموونەیەکی زیندوو لە بێسەرەوبەریی بەڕێوەچوونی ئەم پاڵەوانێتییە لە ماوەی ساڵانی 2015 تاوه‌كو 2020 چوار جاره‌ ئه‌نجام ده‌درێت، ئەم یەکێتیە هەر جارەو شتێک دەکەن بە بیانوو بۆ ئه‌وه‌ی کەی پێیان خۆش بوو پاڵەوانێتییەکە بەڕێوەبەرن، لە کاتێکدا ساڵەکانی بەڕێوەچوونی پاڵەوانێتییەکانی دیكه‌ جێگیرە و بە هیچ هۆکارێک دەستکاری ناکرێن، هەر ئەمەش وایکردووە پاڵەوانێتییەکانیان گرنگی و سەنگی زیاتریان هەبێت بەراورد بە کۆپا ئه‌مێریكا، دەتوانم بڵێم ئەوەندە گرنگییەی هەشیەتی و ئەوەی وای لە بینەری تۆپی پێ کردووە سەیری کۆپا ئه‌مێریكا بکات ئەوەیە کە هەردوو هەڵبژاردەی بەرازیل و ئەرجەنتین کە خاوەنی هاندەرێکی زۆرن لە سەرتاسەری جیهاندا لەم جامەدا بەشداری دەکەن، کە هەردوو هەڵبژاردە خاوەنی گەورەترین ئەفسانەکانی مێژووی تۆپی پێن.

ئەگەرنا هەمووان درک بەوە دەکەن كه‌ کۆپا ئه‌مێریكا لە زۆر لایەنەوە زۆر دواکەوتووترە بەراورد بە پاڵەوانێتییە بەهێزەکانی دیكه‌، مەبەستی ئەم قسەیەم لە لاوازی هەڵبژاردەکان نییە، بەڵکو لایەنی هونەری و رێکخستنی پاڵەوانێتییەکەیە کە وایکردووە بەمشێوەیە دەربکەوێت.

من لێرەدا بۆ ئەوەی زیاتر روونیبکەمەوە کە کۆپا ئه‌مێریكا کەم بایەخترە لە پاڵەوانێتییەکانی دیكه‌، نموونەیەک بە هەڵبژاردەی بەرازیل دەهێنمەوە کە ئەم هەڵبژاردەیە بە بەهێزترین هەڵبژاردەی مێژووی تۆپی پێ دادەنرێت، بەڵام ژمارەی نازناوەکانی کۆپا ئه‌مێریكای نیو ئەوەندەی ئۆرۆگوای و ئەرجەنتینە، بێگومان هۆکاری سەرەکی ئەمەش ئەوەیە کە لە مێژوودا بەرازیل زۆربەی جارەکان بە پێکهاتەی یەدەگەوە بەشداری ئەم جامەی کردووە، ئەمەش ئەوە دەردەخات کە ئەم پاڵەوانێتییە تا ئێستا تەنانەت نەیتوانیوە وا لە هەڵبژاردەکان و یاریزانانی ئەم کیشوەرە بکات بە تامەزرۆییەوە چاوەڕوانی ئەم جامە بکەن بۆ ئەوەی بەشداری تێدا بکەن.

لەسەر ئاستی یاریزانانیش دەمەوێ نموونەیەک بە یاریزان رۆناڵدینیۆ بهێنمەوە، ئەم یاریزانە کە توانی سەرجەم نازناوەکان لەگەڵ هەڵبژاردەی بەرازیلدا بەدەستبهێنت و له‌ ساڵی 1999 کۆپا ئه‌مێریكای بردەوە، دواتر و دوای بەناوبانگبوونی هەر جارەو بە بیانوویەک بەهیچ شێوەیەک ئامادەنەبوو بەشداری لەم پاڵەوانێتییەدا بکات، یان کاکا لە ژیانی دا بەشداری کۆپای نەکردووه‌، ئەستێرەکانی دیكه‌ی سامبا بەهەمانشێوە. ته‌نانه‌ت مارادۆنا دوای بردنەوەی مۆندیال ئیدی بۆی گرنگ نەبوو کۆپا بباتەوە یان نا، ئەوانەو چەندین نمونەی دیكه‌ کە دەرخەری ئەو راستیەن کە یەکێتی تۆپی پێی ئەمەریکای باشوور تا ئێستا نەیتوانیوە پاڵەوانیەتیەکی رێک و پێکی تایبەت بەخۆی هەبێت، لە کاتێکدا دەکرا لەبری ئەوەی هەموو ساڵێک کۆپا ئه‌مێریكا بکرێت وەک ئەوروپیەکان بیر لە پاڵەوانێتییەکی هاوشێوەی نەیشن لیگ بکەنەوە ئەوکات هەم دەبوو بە داهێنان بۆیان هەم کۆپا ئه‌مێریكاش سەنگ و قورسایی زیاتری دەبوو.

بەردەوام بە لە خوێندنەوە

کوردستان