ئێمە لە تۆرە کۆمەڵایەتیەکان

چاوپێکەوتن

ئینێستا: منیش هه‌ر ئه‌وه‌م ده‌کرد که‌ ئیداره‌ی به‌رشلۆنه‌ کردویه‌تی و پێویسته‌ گرنگی به‌ “لاماسیا” بدرێت !

خه‌ڵک سپۆرت – ڕۆژنامه‌ی سپۆرت

ئه‌ندرێس ئینێستای ئیسپانی ئه‌ستێره‌ی یانه‌ی ڤیسڵ کۆبی ژاپۆنی چاوپێکه‌وتنێک له‌گه‌ڵ ڕۆژنامه‌ی “سپۆرت”ی که‌ته‌لۆنی ئه‌نجام ده‌دات، تیایدا ئاماژه‌ به‌ چه‌ندین بابه‌تی په‌یوه‌ندیدار به‌ یانه‌ی به‌رشلۆنه‌ ده‌کات و داوا ده‌کات گرنگی زیاتر به‌‌ فێرگه‌ی “لاماسیا” بدرێت.

دینیس سوارێز ویستی وه‌ک تۆ له‌ بارسا سه‌رکه‌وتن به‌ده‌ست بهێنێت به‌ڵام نه‌یتوانی، وادیاره‌ ئه‌م بیرۆکه‌یه‌ هه‌موو جارێک له‌ به‌رشلۆنه‌ کار ناکات…

هه‌ندێجار بارودۆخه‌کان جیاوازن، تۆ ده‌ته‌وێت له‌ یانه‌یه‌ک جێگه‌ی خۆت بکه‌یته‌وه‌ و ئه‌وه‌ش وا ده‌کات بڕیاری گرنگ بده‌یت، سوارێز خاوه‌نی به‌هره‌یه‌ و ئه‌زمونی باشی هه‌یه‌ له‌ مامه‌ڵه‌کردن له‌گه‌ڵ ئه‌و جۆره‌ باردۆخانه‌دا، متمانه‌م به‌تواناکانیه‌تی و هیوادارم هه‌لی یاریی کردنی پێبدرێت.

ده‌رباره‌ی ئالینا و ڕیکی پۆیگ ڕات چییه‌؟

کاتێک لاوانی یانه‌که‌ ده‌بینم هه‌ستێکی ناوازه‌م ده‌بێت و ئه‌وه‌ی له‌گه‌ڵ ئه‌واندا ڕووده‌دات وه‌ک خه‌ون وایه‌، پێویسته‌ سود له‌و چانسانه‌ وه‌ربگرن که‌ له‌پێکهاته‌ی یه‌که‌م پییان ده‌درێت و ده‌بێت به‌هه‌موو هێزی خۆیانه‌وه‌ مه‌شق و ڕاهێنان بکه‌ن.

هه‌موان باسی ئه‌وه‌ ده‌که‌ن که‌ دووباره‌ پێکهاته‌ی سه‌رده‌می زێڕینی گواردیۆلا له‌ یانه‌ی به‌رشلۆنه‌ کۆده‌بنه‌وه‌، به‌ڵام ئه‌مجاره‌ وه‌ک ئیداره‌ی یانه‌، ئه‌وه‌ ڕاسته‌؟

ئه‌وه‌ بیرۆکه‌یه‌کی نایابه‌، داهاتو ده‌ریده‌خات چی بۆ ئێمه‌ هه‌ڵگرتووه‌، ئێمه‌ وه‌ک هانده‌رێک خۆشه‌ویستیمان بۆ یانه‌که‌ هه‌یه‌ و ماوه‌یه‌کی زۆرمان له‌وێ به‌ڕێکردووه‌، به‌نسبه‌ت منه‌وه‌ حه‌ز ده‌که‌م ئه‌وه‌ی فێری بووم له‌ بارسا بیبه‌خشم به‌ که‌سانی تر، نازانم به‌ چ شێوه‌یه‌ک ئه‌وکاره‌ بکه‌م و ئه‌ویش له‌کاتێکدا ده‌بێت که‌ ئاماده‌بم، ئه‌وه‌ی باس ده‌کرێت ته‌نها بیرۆکه‌یه‌ و ناشزانم کێ سه‌رۆکی یانه‌ ده‌بێت.

 

“بیرم له‌وه‌ نه‌کردۆته‌وه‌ ببم به‌ یاریده‌ده‌ری گواردیۆلا، نازانم له‌چه‌ند ساڵی داهاتودا چی ڕووده‌دات”

 

له‌ داهاتودا خۆت وه‌ک یاریده‌ده‌ری گواردیۆلا ده‌بینیت؟

له‌ڕاستیدا بیرم له‌وه‌ نه‌کردۆته‌وه‌ و نازانم له‌چه‌ند ساڵی داهاتودا چی ڕووده‌دات، له‌ئێستادا ته‌رکیزم له‌سه‌ر ئه‌وه‌یه‌ که‌ من یاریزانم له‌ یانه‌یه‌ک له‌ وڵاتێکی تر، که‌ی کۆتاییم به‌ یاریی کردن هێنا ئه‌وکات بیر له‌و بابه‌تانه‌ ده‌که‌مه‌وه‌.

به‌پێی ئه‌و گواستنه‌وانه‌ی ئیداره‌ی یانه‌ ئه‌نجامیداوه‌، ده‌کرێت بڵێین ده‌توانن نازناوی چامپیۆنز لیگ به‌ده‌ست ده‌هێنن؟

پێموایه‌ به‌رشلۆنه‌ هه‌میشه‌ له‌توانایدایه‌ نازناوه‌که‌ به‌ده‌ست بهێنێت، پێکهاته‌که‌ خه‌ون و حه‌زێکی له‌ڕاده‌به‌ده‌ریان بۆ نازناوه‌کان هه‌یه‌، کاته‌کان جیاوازن و جاری وا هه‌یه‌ به‌ کاتی ناهه‌موار و جاریش هه‌یه‌ به‌ کاتی خۆشدا تێپه‌ڕ ده‌که‌یت، هه‌ندێجار باشترین یانه‌ نازناوه‌که‌ به‌ده‌ست ناهێنێت، به‌بۆچونی من ئه‌م پێکهاته‌یه‌ی بارسا شایسته‌ی زیاتره‌، ڕاسته‌‌ له‌م چه‌ند وه‌رزه‌ی رابردودا به‌پێی پێویست ده‌رنه‌که‌وتون، به‌ڵام هیوادارم له‌ داهاتودا بتوانن.

سه‌یر نییه‌، ڕیاڵ مه‌درید له‌م چه‌ند ساڵه‌دا به‌جوانترین شێوه‌ یاریی نه‌کردووه‌ و له‌گه‌ڵ ئه‌وه‌شدا خاوه‌نی نازناوه‌کان بووه‌؟

هه‌میشه‌ پێموابووه‌ یانه‌یه‌ک ده‌توانێت جوان یاریی نه‌کات و نازناوی خولی یانه‌ پاڵه‌وانه‌کان به‌ده‌ست بهێنیت، ئه‌م پاڵه‌وانێتیه‌ له‌سه‌ر ئه‌نجامه‌کان وه‌ستاوه‌، به‌ڕای من شتێکی هه‌ڵه‌یه‌ بڵێن یانه‌یه‌ک شایسته‌ی نه‌بووه‌ و به‌ده‌ستی هێناوه‌.

مان سیتی و پاریس سانت جێرمان ده‌توانن نازناوه‌که‌ به‌ده‌ست بهێنن؟

ئه‌م دوو یانه‌یه‌ وه‌به‌رهێنانی زۆریان له‌ پێکهاته‌کانیاندا کردووه‌ و چه‌ندین یاریزان و راهێنه‌ری به‌توانایان کڕیوه‌، بێگومان ده‌توانن نازناوه‌که‌ به‌ده‌ست بهێنن، هه‌روه‌ها ناوی لیڤه‌رپوڵیش ده‌خه‌مه‌ نێوانیانه‌وه‌ و ئه‌وانیش له‌م وه‌رزه‌دا ئاستیان ناوازه‌یه‌، کێشه‌که‌ له‌وه‌دایه‌ خولی یانه‌ پاڵه‌وانه‌کان خولێکی ئاڵۆزه‌ و له‌ یه‌ک یارییدا خراپ ده‌رکه‌ویت هه‌موو شتێک شکست ده‌هێنێت.

هه‌ڵسه‌نگاندنت بۆ مێسی چۆنه‌ دوای ئه‌وه‌ی له‌دوای تۆ شاره‌ی کاپیتانۆی پێبه‌خشرا؟

ئه‌م مه‌سه‌له‌یه‌ بۆ مێسی نوێ نییه‌، به‌ڵکو‌ چه‌ندین ساڵه‌ وه‌ک سه‌رکرده‌ی پێکهاته‌ی بارسا ده‌رکه‌وتووه‌، له‌ئێستادا هیچ له‌ مه‌سه‌له‌که‌ نه‌گۆڕاوه‌ و ته‌نها شاره‌یه‌ک کراوه‌ته‌ قۆڵه‌کانی، ئه‌وه‌ش پاڵپێوه‌نه‌رێکی باشه‌.

دوای ئه‌وه‌ی چه‌ندین کێشه‌ی دروست کرد، مێسی و بۆسکێتس وه‌ک سه‌رکرده‌کانی یانه‌ پاڵپشتی عوسمان دیمبیلی-یان کرد و لێبورده‌ییان به‌رامبه‌ری نیشاندا، ڕات چییه‌؟

من وه‌ک کێشه‌ نایبینم، مێسی و بۆسکێتس چاره‌سه‌ریان له‌به‌رده‌ستدابوو و توانیویانه‌ به‌ سه‌رکه‌وتویی دۆخه‌که‌ هێور بکه‌نه‌وه‌، ئه‌م مه‌سه‌له‌یه‌ کۆتایی هاتووه‌ و نامه‌وێت له‌وه‌ زیاتر گرنگی پێبده‌ن، دوو کاپتنه‌که‌ ئه‌وه‌یان کرد که‌ پێیان وایه‌ دروسته‌.

 

“به‌خته‌وه‌ری ئه‌وه‌یه‌ که‌‌ مرۆڤ به‌دوایدا ده‌گه‌ڕێت، ژاپۆن وڵاتێکی مه‌زن و ناوازه‌یه‌ و هه‌رگیز له‌و وڵاته‌دا هه‌ست به‌ غه‌ریبی ناکه‌یت”

 

مێسی ده‌ڵێت لاوانی لاماسیا متمانه‌یان به‌خۆیان نه‌ماوه‌ بۆ گه‌یشتن به‌ پێکهاته‌ی یه‌که‌م، له‌گه‌ڵ بۆچونه‌کانی ئه‌ودایت؟

هاوڕام له‌گه‌ڵیدا، بێگومان ئه‌وه‌ی مێسی ده‌یڵێت راسته‌، پێویسته‌ پشت به‌ لاوانی یانه‌که‌مان ببه‌ستین و گرنگی زیاتر به‌تواناکانیان بده‌ین تا باشتر به‌ره‌وپێش بچن، له‌گه‌ڵ ئه‌وه‌شدا پێموانییه‌ که‌ نابێت یانه‌که‌ یاریزان بکڕێت و ته‌نها پشت به‌ لاماسیا ببه‌ستێت، به‌ڵکو ته‌نها پێویسته‌ لێکدانه‌وه‌یه‌ک بکه‌ین به‌ر له‌ گواستنه‌وه‌کان بزانین چ یاریزانێکی لاماسیا ده‌توانێت له‌ پێگه‌ی یاریزانی داواکراودا یاریی پێده‌کرێت، ئه‌گه‌ر یاریزانێکی باشمان هه‌بێت ده‌بێت چانسی پێبدرێت، ئه‌گه‌رنا ناچارین یاریزان بکڕین.

هه‌ستت به‌چی کرد کاتێک چاوت به‌ هاوڕێکانت که‌وته‌وه‌ له‌ به‌رشلۆنه‌؟

نایابه‌ کاتێک چاوت به‌ یاریزانان و راهێنه‌ران و ده‌سته‌ی هونه‌ری یانه‌ی پێشوت ده‌که‌وێت‌، هه‌ستێکی تایبه‌تم هه‌یه‌ هه‌رگیز وه‌سف ناکرێت، چونکه‌ من نیوه‌ی ژیانم له‌م یانه‌یه‌ به‌ڕێکرد، خۆشحاڵبووم بینیم هه‌مووان سه‌لامه‌تن.

سه‌ره‌ڕای دووری نێوان ژاپۆن و ئیسپانیا، له‌ ژاپۆن هه‌ست به‌ به‌خته‌وه‌ری ده‌که‌یت؟

به‌خته‌وه‌ری ئه‌وه‌یه‌ که‌‌ مرۆڤ به‌دوایدا ده‌گه‌ڕێت، ژاپۆن وڵاتێکی مه‌زن و ناوازه‌یه‌ و هه‌رگیز له‌و وڵاته‌دا هه‌ست به‌ غه‌ریبی ناکه‌یت، به‌خێرایی خۆم گونجاندووه‌ و خێزانه‌که‌شم به‌هه‌مان شێوه‌ خۆشحاڵن.

ئه‌گه‌ر تۆ راهێنه‌ری بارسا بویتایه‌، مۆریلۆی به‌رگریکارت ده‌کڕی؟ یان پشتت به‌ لاوانی لاماسیا ده‌به‌ست؟

بێگومان ئه‌وه‌م ده‌کرد که‌ ئیداره‌ی یانه‌ کردویانه‌، چونکه‌ ئیداره‌ی یانه‌ له‌من باشتر ئاگاداری ورده‌کارییه‌کانن و ڕه‌نگه‌ له‌ لاماسیا به‌رگریکارێکی وه‌ها باشمان نه‌بێت که‌ بتوانێت جێگه‌ی ساموێل ئومتیتی بگرێته‌وه‌.

چاوپێکەوتن

نایمار: پێکانەکان منیان کوشت و لە پاریس سانت جێرمان بەردەوام دەبم

خەڵک سپۆرت

نایمار دا سیلڤای بەرازیلی ئەستێرەی یانەی پاریس سانت جێرمان لەچاوپێکەوتنێکدا چەندین زانیاری نەبیستراو دەربارەی داهاتووی لە خولی فەرەنسا و ئامانجەکانی ئەم وەرزەی ئاشکرا دەکات.

لەگواستنەوەکانی هاوینەی ڕابردودا نایماری ئەستێرەی بەرازیلی نزیکبوو لە یانەی پاریس سانت جێرمانەوە ڕوو لە بەرشلۆنە بکات، بەڵام گفتوگۆکان بۆ گواستنەوەی بەهۆی پێداگری ئیدارەی پاریسەوە شکستیان هێنا، دواتریش بەهۆی پێکانەوە ماوەیەکی دوور و درێژ دوورکەوتەوە و هاندەرانی یانە زەبەلاحەکەی پاریس لەدوای گەڕانەوە ئامادەنەبوون پێشوازی لێبکەن و تا ئەم ساتە پەیوەندی نێوان یاریزانەکە و ئەڵتراسی پاریس ئاسایی نەبۆتەوە.

ئەستێرەکەی سیلیساو چاوپێکەوتنێک لەگەڵ گۆڤاری فرانس فوتباڵ ئەنجام دەدات، ڕەنگە بەهۆی لێدوانەکانیەوە بەیانی ئاشتەواییەکی درێژخایەن لەگەڵ هاندەرانی یانەکەیدا بکات، ئەمەش کورتەیەکە لە چاوپێکەوتنەکە:

پێکانەکان

“پێکانەکان لەم وەرزەدا منیان کوشت، بەهۆی دوورکەوتنەوەمەوە زۆر لەئاستم دابەزی، ئامانجم ئەوەیە توانا جەستەییەکانم بگێڕمەوە و نازناوە بەکۆمەڵەکان بۆ پاریس بەدەست بهێنم”.

پەیوەندی لەگەڵ مێسی

“مێسی کەسێکی نزیکمە و هاوڕێیەکی خۆشەویستە، هەمیشە بەو شێوەیە دەمێنێتەوە”.

مباپێ و هاورێیەتی

” مباپێ خاوەن کەسایەتیەکی ناوازەیە و نزیکترین هاوڕێمە، لەشێوازی یاریکردنیدا خەسڵەتێکی ناوازە و تایبەت هەیە لەیاریزانەکانی تردا نییە”.

بەپرسیارێتی لەنێو یاریگا

” هیچ شتێک تێروتەسەل وبێهەڵە نییە تەنها خودا نەبێت، هەموو کەسێک کەموکەرتی هەیە، سەرکردەی ڕاستەقینە لەنێو یاریگادا ئەو یاریزانەیە کە یاریدەدەری سەرکەوتنی یانەکەی دەبێت، دەکرێت ئەو کەسە کاپتنی پێکهاتە بێت یان گۆڵکار و هەر یاریزانێکی تر، هەر یاریزانێکیش خاوەنی خەسڵەت و کەسایەتی تایبەت بەخۆیەتی”.

دەبێتە یاریزانی ژمارە یەک؟

نامەوێت ببمە ئەستێرەی یەکەم، بەڵکو دەمەوێت یاریی تۆپی پێ بکەم لەبەرئەوەی بوارەکەم خۆشدەوێت، هەتا لەنێو یاریگادا بم بەختەوەر دەبم، لەهەموو یارییەکیشدا لەسەدا سەدی تواناکانم بەگەڕ دەخەم”.

نایماری ڕاستەقینە

“کەمێکن ئەوانەی نایماری ڕاستەقینە دەناسن و ئەوانەش هاوڕێ و خێزانەکەمن، ئەوەی هاندەر دەیبینێت شتێکی جیاوازە و ڕەنگە کەمێک بێت لە کەسایەتی من، لەڕاستیدا من کەسایەتیەکی ئاشتیخوازم وحەزم بە بەسەربردنی کاتی خۆشە لەگەڵ هاوڕێیان و خێزانەکەم”.

بۆچی هاوینی ڕابردوو دەیویست لە پاریس بڕوات؟

(بەپێکەنینەوە) “هێشتا دوو وەرز لە بۆندەکەمدا ماوە و یانەکە زیاتر بەرەوپێش دەچێت، پێویستە ئەوپەڕی تەرکز بکەین بۆ بەدیهێنانی خەونەکانی ئەم وەرزەمان، پێویستە زۆرترین نازناوەکان بەدەست بهێنین و نازناوی خولی یانە پاڵەوانەکانی ئەوروپا ئامانجی سەرەکیمانە”.

لە پاریس بەردەوام دەبێت

“پێشەنگی بۆ یانەی پاریس سانت جێرمانە و چەندین ئامانجی گەورەمان هەیە، ئامانجی سەرەکیش هەمیشە بردنەوەی یارییەکانە و دەبێت هەموو هێزی خۆمان لەپێناو یانەکەماندا بەگەڕ بخەین، لەنێو یاریگادا گیانم لەپێناو سەرکەوتنی یانەکەم فیدا دەکەم و تا کۆتایی بۆندەکەشم پابەند دەم”.

بەردەوام بە لە خوێندنەوە

چاوپێکەوتن

لوکاس هێرناندێز: زێدان باشترینی فەرەنسایە و خۆم بە قەرزاری سیمیۆنی دەزانم

خەڵک سپۆرت – سپۆکس سپۆرت

لوکاس هێرناندێزی فەرەنسی بەرگریکاری یانەی بایرن میونشن، چاوپێکەوتنێک لەگەڵ تۆڕی “سپۆکس سپۆرت” ئەنجام دەدات و بەم شێوەیە وڵامی پرسیارەکان دەداتەوە:

هەواڵی پێکانەکەیی و ئامانجی گەڕانەوەی

ئێستا زۆر باشم و هێشتا ١٠ ڕۆژم لەبەردەمدا ماوە بۆ گەڕانەوە، پەرۆشم بۆ گەڕانەوە و یاریدەدانی یانەکەم، ئامانجم گەیشتنە بەوپەڕی تواناکانم لەنیوەی دووەمی وەرزدا.

دوورخستنەوەی نیکۆ کۆڤاچ

کۆڤاچ ڕاهێنەرێکی نایابە و لە کارەکانی داهاتوویدا هیوای سەرکەوتنی بۆ دەخوازم، بەڵام کیمیای ڕاهێنەرەکە لەگەڵ یاریزانان و پێکهاتەی یانەکە نەگونجا و دوورخرایەوە.

ئەگەری بەردەوامبوونی هانز فلیک

بۆچی بەردەوام نەبێت؟! کارێکی باش دەکات و ئاستی پێکهاتەکە بە چاودێری ئەم ڕاهێنەرە بەرزبووەتەوە، ئەگەر بارودۆخەکە بەو شێوەیە بەردەوام بێت لەو باوەريدام تا کۆتایی وەرز بەردەوامی پێدەدرێت.

گواستنەوە بە (٨٠) ملیۆن کاریگەرییەکانی ئەو نرخە بەرزە

بڕی ئەو پارەیەی پێمدراوە نابێتە بارگرانی لەسەرم، بەڵام بێگومان دەمەوێت بیسەلمێنم کە شایەنی ئەو پارە زۆرە بووم و متمانەی یانەی بایرن میونشن بەدەست دەهێنم، زۆر پەرۆشم بۆ گەڕانەوەو سەلماندنی تواناکانم.

کاریگەری ڕەخنەکانی ڕۆمەنیگە و ئۆلی هۆنێس

هۆنێس و ڕۆمەنیگە دوو کەسایەتی گەورەن و مافی خۆیانە ڕەخنە بگرن کاتێک پێکهاتەکەمان شایەنی ڕەخنەبێت، بۆ نمونە کاتێک بە فرانکفۆرت دۆڕاین.

لە ڕووبەروبونەوەی فرانکفۆرت چی ڕوویدا؟

نازانم، چونکە لوێ نەبووم، بەڵام کاتێک لەوێ بووم لەوە تێگەیشتم کە ڕەخنەکان ڕووەو سەرکەوتن و ڕاستکردنەوەی هەڵەکان ئاڕاستەمان دەکەن، نەک ڕوخاندنمان.

بۆچی پەیوەندی بە بایرنەوە کرد؟

کاتێک ساڵحەمیدزیچ پەیوەندی پێوەکردم دووجار بیرم نەکردەوە و یەکسەر ڕازی بووم، پێویستی نەکرد کەس قەناعەتم پێبکات، هەمیشە حەزم بەوەبوو بۆ یەکێک لە یانە گەورەکانی ئەوروپا یاریی بکەم و بایرنیش یەکێکە لە گەورەکان، خۆشحاڵم ئەو بڕیارەمدا و هەست بە باشتربوون دەکەم.

جیاوازی نێوان بایرن و ئەتلەتیکۆ مەدرید

لە ئەتلەتیکۆ ئەو لایەنە هونەریە بەهێزەمان نەبوو کە لە بایرن بوونی هەیە، لەوێ زیاتر پشتمان بە لایەنە ئابوریەکان دەبەست و گرنگی بە تەکنەلۆجیا دەدرا لەبری توانستە جەستەییەکان.

خەونی گریزمانە

ئەو یاریزانەی حەزدەکەم لە بایرن یاریی لەگەڵ بکەم ئەنتوان گریزمانە، چەندین ساڵ هاوڕێی نزیکی یەکتری بووین و هیوادەخوازم ڕۆژێک لە ڕۆژان پەیوەندیمان پێوە بکات.

ئەو یاریزانەی لەتەمەنی لاوێتیدا سەرسامی کردووە

دوو یاریزان سەرسامیان کردبووم، لیزارازۆ لەبەرئەوەی لەهەمان پێگەی ئێستای مندا یاریی دەکرد، هەروەها زینەدین زێدان کە باشترین یاریزانی فەرەنسیە لەمێژوودا.

باشترین ڕاهێنەر

دیێگۆ سیمیۆنی، تەمەنم ١٦ ساڵ بوو چاوم پێیکەوت، لەو کاتەوە لەگەڵمدا بووە تائێستا و خۆم بە قەرزاری دەزانم.

بەهێزترهن بەرگریکاری جیهان

ڤێرجیل ڤان دایک، لەئێستادا هیچ بەرگریکارێک لە ڤان دایک باشتر نییە و لەگەڵ لیڤەرپوڵ وەرزێکی بەهێزی بەڕێکرد.

بەردەوام بە لە خوێندنەوە

چاوپێکەوتن

ڤاڵڤێردی: گریزمان بەرامبەر ئەتلەتیکۆ یاریی دەکات و دیمبیلی خەمباری کردین

خەڵک سپۆرت – بارسا تی ڤی

ئێرنێستۆ ڤاڵڤێردی ڕاهێنەری یانەی بەرشلۆنە، چاوپێکەوتنێک لەگەڵ کەناڵی بارسا ئەنجام دەدات و ئاماژە بە چەندین بابەتی گرنگی ڕۆژ دەدات، ئەمەش کوورتەیەکە لەچاوپێکەوتنەکە:

لەبارەی پێکانی عوسمان دیمبیلیەوە چی دەڵێیت؟

ئەوەی بەسەر دیمبیلی هاتووە خەمباری کردوین، بەر لەوەی توشی پێکان بێت زۆر بەباشی مەشقەکانی ئەنجام دەدا، دڵنیاتان دەکەینەوە کە بە وریاییەوە ئاگاداری دەبین.

هۆکاری پێکانەکانی چییە؟

نازانم پێکانەکەی هەمان پێکانی ماسولکەیی پێشووە یان نا، بەڵام یەکەم جار نییە توشی پێکان دەبێت و چەند جارێک دووبارە بۆتەوە، ئێمە لەلایەن خۆمانەوە دەمانەوێت گرنگی زیاتری پێبدەین و زیاتر ئاگاداری دۆزی جەستەیی بین.

مێسی و سوارێز هاوسەنگی و خۆگونجاندنیان بۆ گەڕاوەتەوە، ئەمە کاری کێیە؟

مێسی و سوارێز ماوەیەکی زۆرە بەیەکەوە یاریی دەکەن، لەنێو یاریگادا کە هاوسەنگی بەدەست دەهێنن هەموو هەلێکیان بە گۆڵ کۆتایی دێت.

گرنگ بوو بەرامبەر دۆرتمۆند سەرکەوتن بۆ قۆناغی (١٦)ی چامپیۆنز لیگ مسۆگەر بکەن؟

بەڵێ، سات بەساتی یارییەکە لەکاتی خۆیدا ژیاین، ئامانجمان ئەوەبوو بەخێرایی سەرکەوتن مسۆگەر بکەین.

لەڕووی دەرونیەوە بوژانەوە؟

بێگومان، کەمێک لەڕووی دەرونیەوە بوژاینەوە، خۆشحاڵین کە توانیمان بە پلەی یەکەمی گروپە بەهێزەکەمان سەرکەوین، ئێمە پاڵێوراوی سەرەکی بووین و پێویست بوو ئەو ڕاستیە بسەلمێنین.

گریزمان وردە وردە خۆی دەگونجێنێت…

گریزمان لەنێو یاریگادا وزەیەکی زیاترمان پێدەدات، پێویستە لەوەش زیاترمان پێشکەش بکات و لەگەڵ مێسی وسوارێز باشتر خۆی بگونجێنێت، چونکە یاریزانێکی گەورەیە.

پێتوایە لە داهاتوودا دووانەی مێسی و گریزمان سەرکەوتو دەبن؟

ئەوان دوو یاریزانی ناوازەن، یاریزانە گەورەکان زۆر بەباشی لەیەکتری تێدەگەن، بۆ مێسی و گریزمان پێموایە کاتی زیاتریان پێویستە.

ئومتیتی گەڕاوەتەوە سەر ئاستە بەرزەکەی، پێتوایە گەڕاوەتەوە؟

بەڵێ، ئومتیتی یاریزانێکە لە ئاستی باڵادایە و خۆشحاڵین بەگەڕانەوەی، هیوادارین لەسەر هەمان ئاست بەردەوام بێت.

گریزمان بەرامبەر ئەتلەتیکۆ یاریی دەکات؟

گریزمان بۆ ڕووبەروبونەوەی ئەتلەتیکۆ مەدرید ئامادەیە، بەڵی بەشداری دەکات.

بەرشلۆنە لە قەیرانەکان دەرباز بووە؟

هەمیشە باس لەوە دەکەن گوایە ئێمە لە قەیرانداین و پاشان باس لە دەربازبوونمان دەکەن، ئەوە بابەتێکی زیندوو و بەردەوامە، بەڵام ئێمە ئامانجمان بردنەوەی سەرجەم ڕووبەڕوبونەوەکانە و هەست ناکەین لەو باردۆخانەدا بین، لە قورسترین کۆمەڵەی خولی یانە پاڵەوانەکان ململانێمان کرد، ماندوبووین و سەرکەوتین، ئەوەش بۆ ئێمە واتای سەرکەوتنی هەیە و دەریدەخات هەمیشە لەسەر ڕێگەی ڕاست بووین.

بەردەوام بە لە خوێندنەوە

کوردستان