ئێمە لە تۆرە کۆمەڵایەتیەکان

کوردستان

تۆمەتبارێك پاش 10 ساڵ لەسلێمانی دەستگیركرا
زانیاری نوێ‌ دەربارەی دۆسیەی سێوان و منداڵەكانی ڕاگەیەنرا

 

سلێمانی ـ نزار جەزا

بەڕێوەبەرایەتی پۆلیسی پارێزگای سلێمانی دەستگیركردنی تۆمتبارێكی پاش 10 ساڵ لە ئەنجامدانی تاوانەكە ڕاگەیاند و زانیاری نوێی لەبارەی سووتانی سێوان قادر و منداڵەكانی لە چەمچەماڵ بڵاوكردەوە.

نەقیب سەركەوت ئەحمەد، وتەبێژی پۆلیسی سلێمانی لەو كۆنگرە ڕۆژنامەوانییدا باسی لە دۆسیەی گیان لەدەستدانی سێوان قادر كرد و وتی، “هەموو لێكۆڵینەوەكانی پۆلیس تەواو بووە و چاوەڕوانی بڕیاری دادگا دەكەن، بەڵام تاكو ئێستا هاوسەری سێوان دانی نەناوە بە كوشتنی هاوسەرەكەی و منداڵەكانیدا”.

ئاشكراشی كرد، تۆمەتبارێكیان دەستگیر كردووە،، كە لە ساڵی ٢٠٠٩دا بە هاوكاری دوو تۆمەتباری تر تاوانێكی كوشتنیان ئەنجامدابوو.

وتەبێژی پۆلیسی سلێمانی دەستگیركردنی كەسێكی ڕاگەیاند، كە لە كاتی مامەڵەی كڕین و فرۆشتنی ئۆتۆمبێلدا، ئۆتۆمبێلەكەی فڕاندبوو، بەڵام دوای ١٥ خولەك لە فڕاندنی تۆمەتبارەكە دەستگیر كرا.

کوردستان

“مووچەی فەرمانبەران بەبەرچاوی پەڕلەمان و دادگاوە فت كرا”

خەڵك- بەشی هەواڵ
ئەندامێكی خولی پێشووی پەڕلەمانی عیراق لە فراكسیۆنی گۆڕان و دادوەری دەستلەكاركێشاوەی هەرێم ڕایدەگەیەنێت، لەھەرێم نزیكەی ٣ بۆ ٤ ملیار نەك ملێۆن دۆلاریش نەك دینار مووچەی فەرمانبەرانی ئەمساڵ كەس نەیزانی چی لێكرا و بەنوێژی نیوەڕۆ لەبەرچاوی پەرلەمان و دادگا و داواكاری گشتی فت كرا.

لەتیف مستەفا، دادوەری دەستلەكاركێشاوە و پەڕلەمانتاری خولی پێشوو لە عیراق لە هەژماری خۆی لە فەیسبووك لە نووسینێكدا سەبارەت بە (ڕاكان جبوری و فەرمانی گرتن و میدیاكانی ھەرێم) ئاماژەی بەوەكردووە، میدیاكانی ھەرێم كردویانە بەھەڵا كەوا دادگای كەركوك فەرمانی گرتنی بۆ ڕاكان جبوری، پارێزگاری كەركوك دەركردوە لەسەر گەندەڵی، بە دڵنیاییەوە گەندەڵە و شایستەی دەیەھا فەرمانی گرتنە، چونكە بەرپرسی تەنفیزی نیە لە عیراق گەندەڵ نەبێت.

دەشڵێت: “ئەم بابەتە لایەنێكی ڕۆشنیشی تێدایە، دادوەری لێكۆڵینەوەی كەركوك فەرمانی گرتن بۆ باڵاترین فەرمانبەری تەنفیزی لە سنوری پارێزگاكە لەسەر 900 ملێۆن دینار دەردەكات و دەبێ جێبەجێش بكرێ، كەچی لەھەرێم نزیكەی ٣ بۆ ٤ ملیار نەك ملێۆن دۆلاریش نەك دینار مووچەی فەرمانبەرانی ئەمساڵ كەس نەیزانی چی لێكرا و بەنوێژی نیوەڕۆ لەبەرچاوی پەرلەمان و دادگا و داواكاری گشتی فت كرا و ھیچ دەزگایەك فزەی لێوە نەھات”.

جەختیشی كردۆتەوە، دادگا و داواكاری گشتی خۆیان لێ كەڕكرد وەك ئەوەی لە ماڵە دراوسێكەمان ڕویدابێ، ئەندامێكی داواكاری گشتی بەڕێز ویستی سكاڵا بكات توڕیاندا بۆ دەرەوەی ھەولێر.

ڕاشیگەیاندووە، دادگا و داواكاری گشتی لەسەردەمی دەسەڵاتی كوردی وا بچوك كراونەتەوە، كە نەك ھەرنەتوانن فەرمانی گرتن بۆ سەرۆكی ھەرێم یان سەرۆك وەزیران یان وەزیر یان پارێزگار یان بەڕێوەبەری گشتی و سەرۆكی حیزب و مەكتەب سیاسی و سەركردایەتی دەركەن، بەڵكو لە ئەندام كەرت و ئەندام ڕێكخراوەوە ھێڵی سورن و بڤەیە دادگا بەلایاندا بچێت، جا بەتەمای دەوڵەتی كوردیشن.

بەردەوام بە لە خوێندنەوە

کوردستان

“كۆكردنەوەی هێزی پێشمەرگە لەژێر چەتری مەرجەعێكدا مومكین نییە”

خەڵك-بەشی هەواڵ

ئەندامێكی خولی پێشووی پەڕلەمانی كوردستان ئاشكرای دەكات، زەحمەتە لەژێر چەتری مەرجەعیەتی و فەرماندەیەكدا هێزەكانی پێشمەرگە یەكبخرێنەوە.

بەپێی پڕۆژەیەكی ئەمریكی و بەریتانی و ئەڵمانی، هەوڵەكان بۆ یەكخستنەوەی هێزەكانی پێشمەرگە بەردەوامە، ئەمەش لەكاتێكدایە تا ئێستا جگە لە حزبی سۆسیالیست، یەكێتی و پارتی بە هەزاران هێزی سەربازییان هەیە و بێ گوێدانە حكومەت، خۆیان جوڵە بە هێزەكانیان دەكەن.

قادر ڕەزگەیی، ئەندامی پێشووی لیژنەی پێشمەرگە لە پەڕلەمانی كوردستان بە (خەڵك)ی ڕاگەیاند، بەو یەكە سەربازییانەی ئێستای پێشمەرگە و فەرماندەكان لە ڕووی مەعنەوی و مادییەوە، هەروەها لە ڕووی جۆری ڕێكخستن و ئەو مێژووەی لە ڕابردوودا هەبووە و بە لەبەرچاوگرتنی بونیادی هەردوو هێزەكە، یەكخستنەوەیان ئەركێكی قورس دەبێت.

وتیشی، “ئەگەر ئیرادەی سەربازیش هەبێت، ئەو هێزە سەربازییەی ئێستا هەیە دەرفەتی یەكخستنەوەیان نییە، بەشێوەیەك هەموویان لەژێر یەك چەتر و یەك مەرجەع و فەرماندەدا كۆببنەوە، كە ئەو مەرجەعە بتوانێت بەشێوەیەكی نیشتمانیانە ئاڕاستەی ئەو هێزە بكات”.

ئاماژەی بۆ ئەوەشكرد، یەكخستنەوەی هێزی پێشمەرگە ئەركێكی زۆر قورسە و بەو كەرەستەیەی ئێستا خەریكە بڵێم مومكین نییە بتوانرێت هەموو جیاوازییەكان ڕابماڵێت، هەرچەندە تەئكید لە یەكخستنەوەی هێزی پێشمەرگە دەكەینەوە، كە ئامانجە گەورەكەیە.

بەردەوام بە لە خوێندنەوە

کوردستان

لە قەرەداغ 100 دۆنم پووش و پاوان سووتا

خەڵك- بەشی هەواڵ
بەڕێوەبەرایەتی پۆلیسی دارستان و ژینگەی پارێزگای سلێمانی ئاشكرای دەكات، كە لە قەرەداغ 100 دۆنم پوش و پاوان سووتاوە.

بەڕێوەبەرایەتی پۆلیسی دارستان و ژینگەی سلێمانی لە ڕاگەیەندراوێكدا ئاماژەی بەوەكردووە، ساڵانە بەهۆی كەمتەرخەمی هاووڵاتیان هەزاران دۆنم پووش و پاوان دەسوتێت و هەرگیز قەرەبوو ناكرێتەوە، بۆیە لەپێناو پارێزگاركردن لە ژینگە پۆلیسی دارستان بەردەوام لە هەوڵ و ماندووبووندان بۆ كوژانەوەی ئاگرەكان.

ڕاشیگەیاندووە، ئاگریكی بەرفراوان كەوتەوە لەسنوری گوندەكانی (سەرزەل و قەڵاسورە)ی سەر بە سنوری قەرەداغ، دەستبەجێ مەفرەزەكانی بەشی پۆلیسی دارستان و ژینگەی قەرەداغ گەیشتە شوێنی ڕووداوەكە و توانیان بەهاوكاری هاووڵاتیانی سنورەكە و ئاگركوژێنەوە، ئاگرەكە كۆنتڕۆڵ بكرێت.

ئاشكراشی كردووە، كە بەهۆی ئاگرەكەوە لەو ناوچەیە (100) دۆنم پووش و سوتاوە و هۆكارەكەشی نەزانراوە.

بەردەوام بە لە خوێندنەوە

کوردستان