ئێمە لە تۆرە کۆمەڵایەتیەکان

کوردستان

گۆڕان مەرجی بەشداری كردنی لە حكومەت ڕاگەیاند

خەڵك- بەشی هەواڵ
وتەبێژی بزوتنەوەی گۆڕان مەرجی حزبەكەی لە چوونە ناو حكومەتی نوێی هەرێم ئاشكرادەكات و ڕایدەگەیەنێت، كاتێك بەشداری دەكات، كە ڕۆڵی هەبێ لە دانانی بەرنامەی كاری ئەو كابینەیە و دەشڵێت: “ناشكرێت داهاتی هەرێم دیارنەبێت و بڕەكەی بەپێشبینی و بۆچونی ئەم و ئەو بخەمڵێنرێت”.

د. شۆڕش حاجی، وتەبێژ و ئەندامی خانەی ڕاپەڕاندنی بزوتنەوەی گۆڕان لەوتارێكدا بەناونیشانی “گۆڕان چۆن بەشداری لەحكومەتی هەرێمدا دەكات؟”، كە میدیای حزبەكەی بڵاوی كردۆتەوە ئاماژەی بەوەكردووە، بزوتنەوەی گۆڕان جوڵانەوەیەكی جەماوەری سیاسییە و گۆڕانكاری لەسیستمی حوكمڕانی و چاكسازی لەجومگەكانی دەسەڵات لە كوردستانی ئامانجی سەرەكیەتی.

دەشڵێت: “بزووتنەوەی گۆڕان، تا ئەم ساتەوەختەش، خەباتی مەدەنی بە شاڕێی گۆڕانكاری دەزانێت لە هەرێمی كوردستان، لەبەر ڕۆشنایی ئەو ڕاستییەش بەرنامەی سیاسی ‌و شێوازی كاری خۆی داڕشتووە و بەو پێیەش هەنگاوەكانی داهاتووی دیاری دەكات.

ئەو ئەندامەی خانەی ڕاپەڕاندنی گۆڕان پێی وایە، “هەڵبژاردنەكان پڕ بوون لە تەزویر و ساختەكاری‌ و ڕێژەیەكی كەمی هاووڵاتیان بەشداریان لەو پڕۆسەیەدا كرد، ‌هەر بۆیە ژمارەی كورسی‌ و دەنگی ڕاگەیاندراوی لایەنە سیاسییەكان گوزارشت لە سەنگ ‌و پێگەی ڕاستەقینەی لایەنەكان ناكەن، سەرەڕای ئەوەش بزوتنەوەی گۆڕان بەبەرپرسیارانەوە پێشوازی لەپارتی دیموكراتی كوردستان كرد، بۆ گفتوگۆ و پێكهێنانی كابینەی نوێ”.

ئاشكراشی كردووە، بەشداریكردن لە حكومەتی داهاتووی هەرێم‌ یان بوون بە ئۆپۆزیسیۆن دوو بژاردەی وەك یەك كراوەن لەبەردەم بزووتنەوەی گۆڕاندا. هیچكام لەو دوو بژاردەیەش سەد لە سەد باش‌ و ئەوەكەی تر بە تەواوی خراپ نییە تاكو بتوانرێ بە ئاسانی یەكێكیان هەڵبژێردرێ.

د. شۆڕش حاجی نوسیویەتی، “بزووتنەوەی گۆڕان كاتێك بەشداری لە حكومەتی داهاتووی هەرێمدا دەكات، كە ڕۆڵی هەبێ لە دانانی بەرنامەی كاری ئەو كابینەیە بۆ ئەوەی داكۆكی لێبكات و كار بۆ جێبەجێكردنی بكات (لای بزوتنەوەی گۆڕان، كارنامەی حكومەت ئەولەویەتی یەكەمە)”.

ڕاشیگەیاندووە، ناكرێ‌ و نابێ چیتر چاوپۆشی لەوە بكرێ، كە دوای 27 ساڵ لە حوكمڕانی كوردی ئێستاش حكومەتی هەرێم خاوەنی هێزی چەكداری نیشتمانی ‌و دەزگای ئاسایشی نیشتمانی نەبێت‌ و ئەزموونەكەمان، كە بە خوێن‌ و فرمێسكی سەدان هەزار كەس بەدەست هاتووە، هەموو ساتێك لەبەردەم ترس‌ و دڵەڕاوكێی ئەگەری بەكارهێنانی هێزی چەكداری حیزبی‌ دژ بەیەك‌ و لەتكردنی ئەو بەشە بچووكەی هەرێم دابێ.

لە كۆتاییدا جەختی كردۆتەوە، “ناشكرێت داهاتی هەرێم دیارنەبێت و بڕەكەی بەپێشبینی و بۆچونی ئەم و ئەو بخەمڵێنرێت و خزمەتگوزارییەكانی وەك ئاو و كارەبا و تەندروستیی و پەروەردە لەنزمترین ئاستدابن و دادگاكانیش سەربەخۆ نەبن و هاوڵاتیانیش متمانەیان بەسیستمی دادوەری لەهەرێمدا نەبێت”.

کوردستان

“مووچەی فەرمانبەران بەبەرچاوی پەڕلەمان و دادگاوە فت كرا”

خەڵك- بەشی هەواڵ
ئەندامێكی خولی پێشووی پەڕلەمانی عیراق لە فراكسیۆنی گۆڕان و دادوەری دەستلەكاركێشاوەی هەرێم ڕایدەگەیەنێت، لەھەرێم نزیكەی ٣ بۆ ٤ ملیار نەك ملێۆن دۆلاریش نەك دینار مووچەی فەرمانبەرانی ئەمساڵ كەس نەیزانی چی لێكرا و بەنوێژی نیوەڕۆ لەبەرچاوی پەرلەمان و دادگا و داواكاری گشتی فت كرا.

لەتیف مستەفا، دادوەری دەستلەكاركێشاوە و پەڕلەمانتاری خولی پێشوو لە عیراق لە هەژماری خۆی لە فەیسبووك لە نووسینێكدا سەبارەت بە (ڕاكان جبوری و فەرمانی گرتن و میدیاكانی ھەرێم) ئاماژەی بەوەكردووە، میدیاكانی ھەرێم كردویانە بەھەڵا كەوا دادگای كەركوك فەرمانی گرتنی بۆ ڕاكان جبوری، پارێزگاری كەركوك دەركردوە لەسەر گەندەڵی، بە دڵنیاییەوە گەندەڵە و شایستەی دەیەھا فەرمانی گرتنە، چونكە بەرپرسی تەنفیزی نیە لە عیراق گەندەڵ نەبێت.

دەشڵێت: “ئەم بابەتە لایەنێكی ڕۆشنیشی تێدایە، دادوەری لێكۆڵینەوەی كەركوك فەرمانی گرتن بۆ باڵاترین فەرمانبەری تەنفیزی لە سنوری پارێزگاكە لەسەر 900 ملێۆن دینار دەردەكات و دەبێ جێبەجێش بكرێ، كەچی لەھەرێم نزیكەی ٣ بۆ ٤ ملیار نەك ملێۆن دۆلاریش نەك دینار مووچەی فەرمانبەرانی ئەمساڵ كەس نەیزانی چی لێكرا و بەنوێژی نیوەڕۆ لەبەرچاوی پەرلەمان و دادگا و داواكاری گشتی فت كرا و ھیچ دەزگایەك فزەی لێوە نەھات”.

جەختیشی كردۆتەوە، دادگا و داواكاری گشتی خۆیان لێ كەڕكرد وەك ئەوەی لە ماڵە دراوسێكەمان ڕویدابێ، ئەندامێكی داواكاری گشتی بەڕێز ویستی سكاڵا بكات توڕیاندا بۆ دەرەوەی ھەولێر.

ڕاشیگەیاندووە، دادگا و داواكاری گشتی لەسەردەمی دەسەڵاتی كوردی وا بچوك كراونەتەوە، كە نەك ھەرنەتوانن فەرمانی گرتن بۆ سەرۆكی ھەرێم یان سەرۆك وەزیران یان وەزیر یان پارێزگار یان بەڕێوەبەری گشتی و سەرۆكی حیزب و مەكتەب سیاسی و سەركردایەتی دەركەن، بەڵكو لە ئەندام كەرت و ئەندام ڕێكخراوەوە ھێڵی سورن و بڤەیە دادگا بەلایاندا بچێت، جا بەتەمای دەوڵەتی كوردیشن.

بەردەوام بە لە خوێندنەوە

کوردستان

“كۆكردنەوەی هێزی پێشمەرگە لەژێر چەتری مەرجەعێكدا مومكین نییە”

خەڵك-بەشی هەواڵ

ئەندامێكی خولی پێشووی پەڕلەمانی كوردستان ئاشكرای دەكات، زەحمەتە لەژێر چەتری مەرجەعیەتی و فەرماندەیەكدا هێزەكانی پێشمەرگە یەكبخرێنەوە.

بەپێی پڕۆژەیەكی ئەمریكی و بەریتانی و ئەڵمانی، هەوڵەكان بۆ یەكخستنەوەی هێزەكانی پێشمەرگە بەردەوامە، ئەمەش لەكاتێكدایە تا ئێستا جگە لە حزبی سۆسیالیست، یەكێتی و پارتی بە هەزاران هێزی سەربازییان هەیە و بێ گوێدانە حكومەت، خۆیان جوڵە بە هێزەكانیان دەكەن.

قادر ڕەزگەیی، ئەندامی پێشووی لیژنەی پێشمەرگە لە پەڕلەمانی كوردستان بە (خەڵك)ی ڕاگەیاند، بەو یەكە سەربازییانەی ئێستای پێشمەرگە و فەرماندەكان لە ڕووی مەعنەوی و مادییەوە، هەروەها لە ڕووی جۆری ڕێكخستن و ئەو مێژووەی لە ڕابردوودا هەبووە و بە لەبەرچاوگرتنی بونیادی هەردوو هێزەكە، یەكخستنەوەیان ئەركێكی قورس دەبێت.

وتیشی، “ئەگەر ئیرادەی سەربازیش هەبێت، ئەو هێزە سەربازییەی ئێستا هەیە دەرفەتی یەكخستنەوەیان نییە، بەشێوەیەك هەموویان لەژێر یەك چەتر و یەك مەرجەع و فەرماندەدا كۆببنەوە، كە ئەو مەرجەعە بتوانێت بەشێوەیەكی نیشتمانیانە ئاڕاستەی ئەو هێزە بكات”.

ئاماژەی بۆ ئەوەشكرد، یەكخستنەوەی هێزی پێشمەرگە ئەركێكی زۆر قورسە و بەو كەرەستەیەی ئێستا خەریكە بڵێم مومكین نییە بتوانرێت هەموو جیاوازییەكان ڕابماڵێت، هەرچەندە تەئكید لە یەكخستنەوەی هێزی پێشمەرگە دەكەینەوە، كە ئامانجە گەورەكەیە.

بەردەوام بە لە خوێندنەوە

کوردستان

لە قەرەداغ 100 دۆنم پووش و پاوان سووتا

خەڵك- بەشی هەواڵ
بەڕێوەبەرایەتی پۆلیسی دارستان و ژینگەی پارێزگای سلێمانی ئاشكرای دەكات، كە لە قەرەداغ 100 دۆنم پوش و پاوان سووتاوە.

بەڕێوەبەرایەتی پۆلیسی دارستان و ژینگەی سلێمانی لە ڕاگەیەندراوێكدا ئاماژەی بەوەكردووە، ساڵانە بەهۆی كەمتەرخەمی هاووڵاتیان هەزاران دۆنم پووش و پاوان دەسوتێت و هەرگیز قەرەبوو ناكرێتەوە، بۆیە لەپێناو پارێزگاركردن لە ژینگە پۆلیسی دارستان بەردەوام لە هەوڵ و ماندووبووندان بۆ كوژانەوەی ئاگرەكان.

ڕاشیگەیاندووە، ئاگریكی بەرفراوان كەوتەوە لەسنوری گوندەكانی (سەرزەل و قەڵاسورە)ی سەر بە سنوری قەرەداغ، دەستبەجێ مەفرەزەكانی بەشی پۆلیسی دارستان و ژینگەی قەرەداغ گەیشتە شوێنی ڕووداوەكە و توانیان بەهاوكاری هاووڵاتیانی سنورەكە و ئاگركوژێنەوە، ئاگرەكە كۆنتڕۆڵ بكرێت.

ئاشكراشی كردووە، كە بەهۆی ئاگرەكەوە لەو ناوچەیە (100) دۆنم پووش و سوتاوە و هۆكارەكەشی نەزانراوە.

بەردەوام بە لە خوێندنەوە

کوردستان