ئێمە لە تۆرە کۆمەڵایەتیەکان

ئابوری

بڕێكی زۆری دۆلار دەخرێتە بازاڕەوە و نرخەكەی دادەبەزێت

خەڵك- بەشی هەواڵ

بانكی ناوەندی عیراق لەڕێگەی زیادكردنی ئاشكراوە بڕێكی زۆری دراوی ئەمریكی (دۆلار) خستە بازاڕەكان و بەوهۆیەشەوە ڕۆژانە بەهای ئەو دراوە دادەبەزێت.

بەپێی بەیاننامەیەكی بانكی ناوەندی عیراق، كە ئەمڕۆ چوار شەممە بڵاوكرایەوە، بە زیادكردنی ئاشكرا بڕی 151.76 ملیۆن دۆلاری بە بانك و كۆمپانیاكانی حەواڵە فرۆشراوە و بەراورد بە ڕۆژی پێشوو، كە 139.93 ملیۆن دۆلار بوو، بەرزبوونەوەی بەرچاوی بەخۆوە بنیوە.

بانكی ناوەندی دەڵێت: “بڕی ئەو پارەیەی بۆ پتەوكردنی ڕەسیدی بانكەكانی دەرەوە فرۆشراوە گەیشتۆتە 150.16 ملیۆن دۆلار، بڕی 1.6 ملیۆن دۆلاریش بەشێوەی كاش فرۆشراوە”.

هەر لە بەیاننامەكەی بانكی ناوەندیدا هاتووە، نرخی یەك دۆلار بە 1190 دینار فرۆشراوە و لەو زیادكردنەدا 30 بانك كۆمپانیایەكی حەواڵەی دارایی بەشدارییان كردووە.

ڕۆژانە بەهۆی زیادبوونی خستنەڕووی دۆلار لە بازاڕەكاندا، بەهای دۆلاری ئەمریكی دادەبەزێت، خاوەن نووسینگەیەكی ئاڵوگۆڕی دراویش لە سلێمانی بە (خەڵك) ی ڕاگەیاند، “ئەمڕۆ 100 دۆلار بە 120 هەزار و 100 دینار مامەڵەی پێوەكراوە”.

بە بۆچوونی شارەزایانی بواری دراو، ئەگەر بڕی خستنەڕووی دۆلار بەوجۆرە بەردەوام بێت نرخەكەی لە بازاڕەكانی ناوخۆدا زیاتر دادەبەزێت.

ئابوری

لە سلێمانی دەست بەسەر دەرمانی سێكسی و قەڵەوبوون و دابەزاندنی كێشدا دەگیرێت

خەڵك- بەشی هەواڵ
لیژنە هاوبەشەكان هەڵمەتێكی فراوانی بۆ دەستبەسەرداگرتنی دەرمانی زیادكردن و كەمكردنی كێش و دەرمانە جنسییەكان دەستپێكرد و هەوڵمەتەكەش بەردەوام دەبێت و ڕێكاری توندی یاسایی بەرامبەر سەرپێچیكاران دەگرنە بەر.

لەشكر حەمید، سەرۆكی لیژنە هاوبەشەكانی قائیمقامیەتی سلێمانی ڕایگەیاند، تێبینیمان كردبوو لە هەندێك شوێن دەرمانی نایاسایی بەتایبەت ئەو دەرمانانەی، كە بۆ زیادكردن و كەمكردنەوەی كێش بەكاردەهێنرێن لەگەڵ دەرمانە سێكسییەكان دەفرۆشرێن، بۆئەو مەبەستەش وەكو لیژنە هاوبەشەكانی قائیمقامیەت و بە چاودێری قائیمقامی سلێمانی هەڵمەتێكی فراوانمان دەستپێكرد بۆ دەستگرتن بەسەر تەواوی ئەو دەرمانە نایاساییانەدا، هەر ئەمڕۆش لەناو شاری سلێمانی لە 9 شوێندا دەستمان بەسەر بڕێكی زۆر لەو دەرمانانەدا گرت و ڕێكاری پێویستمان لەگەڵ خاوەنەكانی گرتۆتە‌بەر.

وتیشی، ” بەشێكی ئەو دەرمانانە لەناو دوكانی فرۆشتنی جل و پێڵاودا دانراون و بەڕێگەی جیاواز دەفرۆشرێن بە هاووڵاتیان”.

سەرۆكی لیژنە هاوبەشەكان ئاماژەی بەشكرد، كە هیچكام لەو دەرمانانە بە كوالێتی كۆنتڕۆڵدا تێنەپەڕیون و پشكنینیان بۆنەكراوە، هەربۆیە ستیكەریان پێوە نییە.

لەشكر حەمید داوای لە هاووڵاتیان كرد، پێش هەموو شتێك لە ڕێگەی پەیجە ئۆنلاینەكانەوە دەرمان نەكڕن و لە هەر شوێنێكیش دەرمان دەكڕن دڵنیابنەوە لەوەی، كە ئەو شوێنە مۆڵتی هەیە و دەرمانەكەش ستیكەری لێدراوە، چونكە هەر دەرمانێك ستیكەری پێوە نەبوو نایاساییە.

وتیشی، “هەڵمەتی گەڕان بە دوای ئەو دەرمانانە و ئەو كەسانەی مامەڵەی پێوەدەكەن بەردەوام دەبێت و ڕێكاری پێویست لەگەڵ فرۆشیارەكەدا دەگیرێتەبەر، هەربۆیە لەكاتی بینینی فرۆشتنی دەرمانی كەمكردن و زیادكردنی كێش و دەرمانە سێكسیەكاندا دەستبەجێ لیژنە هاوبەشەكانی لێ ئاگاداربكەنەوە بۆئەوەی كاری پێویستی لەگەڵدا بكرێت”.

بەردەوام بە لە خوێندنەوە

ئابوری

لە سلێمانی ئارایشتگایەك داخرا

خەڵك- بەشی هەواڵ
لیژنە هاوبەشەكانی قائیمقامیەتی سلێمانی ڕایدەگەیەنێت، بەهۆی پابەند نەبوون بە مەرج و ڕێنماییە تەندروستییەكان، لیژنە هاوبەشەكانی قائیمقامیەتی سلێمانی ئارایشتگای (ئەمەل ئێرانی) لە گەڕەكی زەرگەتەی تازە داخست.

بەپێی ڕاپۆرتێكی لیژنەی ئارایشتگاكانی سەر بە لیژنە هاوبەشەكانی قائیمقامیەتی سلێمانی، “ئەو ئارایشتگایە سەرەڕای ئەوەی مۆڵەتی تەندروستی نەبووە و كارمەندەكانیشی كارتی تەندروستییان ئامادە نەبووە، كاری تاتۆی تێداكراوە بەبێ ئەوەی هیچ مۆڵەتێكی هەبێت”.

دەشڵێت: “لەسەر پێشنیاری لیژنە هاوبەشەكان و بە بڕیاری قائیمقامی سلێمانی ئارایشتگای ئەمەل ئێرانی بۆ ماوەی (7) ڕۆژ دادەخرێت و خاوەنەكەی ناچار دەكرێت پابەندی ڕێكاری تەندروستییە یاساییەكان بێت”.

لیژنە ئارایشتگاكانی سەر بە لیژنە هاوبەشەكان داوا لە خانمان دەكات، كە سەردانی هەر ئارایشتگایەك دەكەن لە بوونی مۆڵەت و مەرجە تەندروستییەكان دڵنیاببنەوە، لەكاتی بینینی هەر سەرپێچییەكیشدا لیژنە هاوبەشەكان ئاگاداربكەنەوە بۆ گرتنەبەری ڕێكاری پێویست لەگەڵ سەرپێچیكاردا.

بەردەوام بە لە خوێندنەوە

ئابوری

سبەینێ‌ مووچەی یەك شوێن دابەش دەكرێت

خەڵك- بەشی هەواڵ
وەزارەتی دارایی و ئابووری حكومەتی هەرێم دابەشكردنی مووچەی مانگی 11ی ساڵی ڕابردووی ئەنجوومەنی دادوەری ڕادەگەیەنێت.

سەرچاوەیەك لە وەزارەتی دارایی و ئابووری هەرێم بۆ (خەڵك) ئاماژەی بەوەكرد، كە سبەینێ‌ چوار شەممە 19ی شوبات مووچەی ئەنجوومەنی دادوەری دابەش دەكرێت.

ڕاشیگەیاند، كە چاوەڕێی گەیشتنی پارەی مووچەن لە بەغداوە، لەگەڵ گەیشتنی پارەكە خشتەی مووچەی سەرجەم وەزارەتەكان ڕادەگەیەنن.

نیوەی مانگی 2ی 2020 تێپەڕیوە و تا ئێستا مووچەی مانگی 11ی ساڵی ڕابردووی فەرمانبەران بە تەواوی دابەش نەكراوە.

بەردەوام بە لە خوێندنەوە

کوردستان