ئێمە لە تۆرە کۆمەڵایەتیەکان

کوردستان

كونسوڵی ئەمریكا: كشانەوەی هێزەكانمان لەسوریا مەرجدارە
سەعدی پیرە: پێویستە هاریكاری ئەمریكا و كورد بەردەوام بێت

خەڵك- بەشی هەواڵ
كونسوڵی گشتی ئەمریكا لە هەرێمی كوردستان لەگەڵ بەرپرسی پەیوەندییە گشتیەكانی یەكێتی كۆدەبێتەوە و ڕایدەگەیەنێت، لایەنە سیاسییەكانی هەرێمی كوردستان بگەنە ڕێكەوتن بۆ پێكهێنانی حكومەتی تازەی هەرێم و سەعدی پیرەش دەڵێت: “پێویست دەكات هاوپەیمانیەتی نێودەوڵەتی بەسەرۆكایەتی ئەمریكا و هاریكاری هێزە كوردییەكان بەردەوام بێت”.

بەپێی ڕاگەیەنراوێكی وتەبێژی فەرمی یەكێتی، دوای نیوەڕۆی ئەمڕۆ سێ شەممە ٨/١/٢٠١٩ سەعدی ئەحمەد پیرە ئەندامی مەكتەبی سیاسی و لێپرسراوی مەكتەبی پەیوەندییە گشتییەكانی یەكێتی نیشتیمانی كوردستان لە بارەگای مەكتەبی سیاسی لە شاری هەولێر پێشوازیكرد لە ستیڤن فەیگن، كونسڵی گشتی وڵاتە یەكگرتووەكانی ئەمریكا لە هەرێمی كوردستان و سیلڤیا ئیریس، بەرپرسی نوسینگەی سیاسی و ئابوری لە كونسڵخانەی ئەمریكا لە هەرێمی كوردستان.

كونسڵی گشتی ئەمریكا لە هەرێمی كوردستان ئاماژەی بە هەڵوێستی حكومەتی ئەمریكا كرد سەبارەت بە حكومەتی نوێی عیراق و كابینەی داهاتووی حكومەتی هەرێمی كوردستان و وتیشی، “واشنتۆن خوازیاری حكومەتێكی یەكگرتووە لە عیراق، كە ببێتە مایەی سەقامگیری سیاسی و ئابوری و خۆشگوزەرانی بۆ گەلانی عیراق بەگشتی و هاوكات خوازیارە لە زوترین كاتدا لایەنە سیاسییەكانی هەرێمی كوردستانیش بگەنە ڕێكەوتن بۆ پێكهێنانی حكومەتی تازەی هەرێمی كوردستان”.

سەبارەت بە بارودۆخی سوریا بەگشتی و ڕۆژئاوای كوردستان بەتایبەتی كونسڵی گشتی ئەمریكا لە هەرێمی كوردستان ئاماژەی بە دوایین هەڵوێستی كۆشكی سپی كرد، كە لە دوایین ڕوونكردنەوەدا دەڵێت: كشانەوەی هێزەكانمان مەرجدارە و بەشێوەیەكی لەسەرخۆدەبێت تا ئەوكاتەی دڵنیادەبین، كە ڕێكخراوی تیرۆرستی داعش بەتەواوی ڕیشەكێش بووە لە ناوچەكە و هاوكات دڵنیابین لەوەی هاوپەیمان و دۆستە كوردەكانمان پارێزراودەبن و هیچ هێز و لایەنێك نابنە هەڕەشە لەسەریان، ئەو پەیامەش لە ڕێگەی كەناڵە دیپلۆماتییەكانەوە بە وڵاتانی ناوچەكە گەیەندراوە.

لای خۆشیەوە، سەعدی ئەحمەد پیرە خۆشحاڵی خۆی بەدواین هەڵوێستی حكومەتی ئەمریكا نیشاندا و ئاماژەی بە مێژووی هاوپەیمانیەتی كورد و ئەمریكا كرد لەناوچەكەدا، كە بەدرێژایی ساڵانی ڕابردوو بەیەكەوە لەیەك سەنگەردا دژی تیرۆرستان جەنگاون.

وتیشی، “ڕاستە داعش لە ڕووی سەربازییەوە شكستی هێناوە و بەرەو لەناوچوون دەچێت، بەڵام وا پێویست دەكات هاوپەیمانیەتی نێودەوڵەتی بەسەرۆكایەتی ئەمریكا و هاریكاری هێزە كوردییەكان بەردەوام بێت بۆ ئەوەی لە ڕووی ئایدۆلۆژی و لۆجیستی و داراییشەوە سەرچاوەكانی پشتیوانی كردن لە داعش و گروپە تیرۆرستیەكانی تر بنەبڕ بكرێت”.

سەبارەت بە بارودۆخی سیاسی عیراق و هەرێمی كوردستان سەعدی ئەحمەد پیرە تەئكیدی كردەوە، كە پشتیوانی لە حكومەتی نوێی عیراق دەكەن، كەمافی هەموو پێكهاتەكانی تێدا پارێزراوبێت و وتیشی، “یەكێتی نیشتیمانی كوردستان لە هەوڵەكانی بەردەوامە بۆ گەیشتن بە ڕێكەوتنێكی سیاسی بۆ شێوازی پێكهێنانی حكومەتی نوێی هەرێمی كوردستان” .

کوردستان

وادەی 30 رۆژ دیاریكراوە بۆ هەرێم تا مەرجەكان لەبارەی دەروازە سنورییەكان جێبەجێ بكات

خەڵك – بەشی هەواڵ

سەرۆكی دەستەی دەروازە سنورییەكانی عیراق رایدەگەیەنێت، پێویستە لە ماوەی 30 رۆژدا سەرجەم دەروازە سنورییەكانی هەرێم لەگەڵ عیراق رێكبكەون و مەرجەكانی دەستەی دەروازە سنورییەكان جێبەجێ بكەن.
كازم عیقابی، سەرۆكی دەستەی دەروازە سنورییەكانی عیراق، رایگەیاند: بڕیاردراوە ئیدارەی سەرجەم دەروازە سنورییەكان لە هەرێمی كوردستان ملكەچی دەستەی دەروازە سنورییەكان بێت پشتبەست بە یاسای ژمارە30ی ساڵی 2019ی دەستەی دەروازە سنورییەكان.
بەگوێرەی ئەو بڕیارەی ئەنجومەنی وەزیران پشت دەبەسترێت بە فەرمانبەرانی هەرێمی كوردستان، كە خاوەنی شایستەیی و شارەزایی و لەسەر میلاكی دەستەی دەروازە سنورییەكان كاردەكەن، دووبارە لە دەروازە سنورییەكانی هەرێمی كوردستان بەگەڕدەخرێنەوە.
لە راگەیەندراوێكدا دەستەی دەروازە سنورییەكانی عێراق كە دوابەدوای كۆبوونەوەی سەرۆكی دەستەكە لەگەڵ ژمارەیەك لە بازرگان و نوێنەرانی لیژنەی هاوبەشی هەماهەنگی لە یەكێتی ژوورە بازرگانییەكانی عێراق ئاماژەی بەوە كردووە، پێویستە سەرجەم دەروازە سنورییەكانی هەرێم پابەندبن بە جێبەجێكردنی ئەو بەشەی تایبەتە بە ڕێككەوتننامە نێودەوڵەتییە ئیمزاكراوەكان.
لە راگەیەندراوەكەدا ئەوەش ئاشكراكراوە كە ماوەی 30 ڕۆژ مۆڵەت دراوە بۆ جێبەجێكردنی بڕیارەكە و وەزارەتی گواستنەوەی فیدراڵی دەست بە كاركردن دەكات لە سەرجەم دەروازە سنورییەكانی هەرێم بەگوێرەی یاسای وەزارەتی گواستنەوە.
جێی ئاماژەیە، رۆژی شەممە 19/1/2019 حكومەتی ناوەند و هەرێمی كوردستان لەسەر زۆربەی ڕێوشوێنه گومرگی و بازرگانییە هەڵپەسێردراوەكانی نێوانیان گەیشتنە ڕێككەوتن‌.

بەردەوام بە لە خوێندنەوە

کوردستان

لەپەلامارێكی تیرۆریستيدا لە سنوری خانەقین 2 پۆلیس كوژران

خەڵك – بەشی هەواڵ

له‌ سنوری قەزای خانه‌قین، تیرۆریستانی داعش پەلاماری خاڵێكی پشكنینی پۆلیسی فریاکه‌وتنی دیالەیاندا و بە هۆیەوە دوو پۆلیس کوژران.
سه‌رچاوه‌یه‌ک له‌ پۆلسی فریاکه‌وتنی دیاله‌ ئاشكرایكرد: کاتژمێر ٧:٣٠ی ئەمشەو تیرۆریستانی داعش لە نزیک گوندی شیرک لە ناوچه‌ی گڵه‌ی باكوری قەزای خانەقین پەلاماری خاڵێكی پشكنینی پۆلیسی فریاکەوتنی دیالەیان داوە.
سەرچاوەكەی پۆلیسی دیالە وتیشی، له‌ پەلامارەكەدا پۆلیسێک کوژرا و پۆلیسێکی تریش بریندار بوو، بەڵام دواتر بەهۆی سەختی برینەكەیەوە ئەویش گیانی لەدەستدا.
سەرچاوەكە ئاشكراشیكردووە، دوای پەلامارەكە تیرۆریستان ناوچەكەیان جێهێشتووە و بەرەو شوێنێكی نادیار هەڵهاتوون.

بەردەوام بە لە خوێندنەوە

کوردستان

لەساڵی رابردوودا 9413 پشكنینی شێرپەنجە لە نەخۆشخانەی شۆڕش ئەنجامدراوە

خەڵك – بەشی هەواڵ

بەڕێوەبەری نەخۆشخانەی شۆڕش ڕایگەیاند: لەساڵی 2018 دا زیاتر یەك ملیۆن و 110 هەزار نەخۆش تەنها لە دەوامی بەیانیان سەردانی ئەو نەخۆشخانەیان كردووە.
د. شەماڵ جەبار یاوەر بەڕێوەبەری نەخۆشخانەی شۆڕش، ئەمڕۆ یەكشەممە20/1/2019 لە كۆنفرانسێكی ڕۆژنامەوانیدا ئاماری كار و چالاكییەكانی ئەو نەخۆشخانەیەی لەساڵی 2018 خستەڕوو و ئاشكرایكرد، نەخۆشخانەكەیان بووە بە فێركاری و ساڵانە سەروو یەك ملیۆن نەخۆش بەمەبەستی وەرگرتنی چارەسەر سەردانیان دەكات، وتیشی،
كە تەنها لە ساڵی 2018 دا 9413 پشكنینی شێرپەنجە بۆ نەخۆشەكان لەنەخۆشخانەی شۆڕش كراون.
د. شەماڵ جەبار یاوەر وتیشی: 2695 نەشتەرگەری گەورە و 4497 نەشتەرگەری ناوەند بۆ نەخۆشەكان كراوە. لەبارەی هێڵكاری دڵ 33846 نەخۆش هێڵكاری دڵی بۆ كراوە، 18414 نەخۆش سۆنەری بۆ كراوە. لە بەشی پشكنینی تاقیگەیی 409961 پشكنینی تاقیگەیی بۆ نەخۆشەكان كراوە. 44860 تیشك بۆ نەخۆشەكان كراوە.
بەڕێوەبەری نەخۆشخانەی شۆڕش وتیشی: لەبەشی دان 18544 نەخۆش كاری بۆ كراوە، 166115 كەس تەداوی و دەرزی بۆ كراوە.
لەبەشی چاو 7030 نەخۆش لەخزمەتگوزارییەكان سوودمەند بوون، لەبەشی پێست 9947 نەخۆش كاری بۆ كراوە. 93747 كەس سەردانی بەشی فریاكەوتنیان كردووە، 482 نازوڕ و 3393 سكان بۆ نەخۆشەكان كراوە. 1071 نەخۆش شۆردنی گورچیلەی بۆ كراوە.
لیژنەی سەربازی 970 كاری كردووە و لیژنەی تایبەتی دەزگای پێشمەرگە و وەزارەتی پێشمەرگە پێداچوونەوە بۆ 6150 كەمئەندامی شاخ كردووە و 9413 نەخۆش پشكنینی شێرپەنجەیان بۆ كراوە.
د. شەمال جەبار یاوەر ئەوەشیخستەڕوو، لە هەفتەی رابردوودا بە هاوكاری رێكخراوی منداڵپارێزی كوردستان یەكەم نەشتەرگەری قەوقەعەی گوێ‌ بێ‌ بەرامبەر بۆ منداڵێك بەسەركەوتوویی ئەنجامدرا، وتیشی، لەداهاتوودا هەر منداڵێك لە رێكخراوی منداڵپارێز ناوی تۆمار كرابێت لە نەخۆشخانەكەیان بەبێ‌ بەرامبەر ئەو نەشتەرگەرییەیان بۆ ئەننجام دەدەن.

بەردەوام بە لە خوێندنەوە
کام لەم وەزارەتانەی کابینەی ٨ لە ئاست خزمەتکردن بە هاولاتیان جێدەستی دیار بووە؟

کوردستان

دوایین