ئێمە لە تۆرە کۆمەڵایەتیەکان

چاوپێکەوتن

ڤینیسیۆز: مارسێلۆ و کاسیمێرۆ ئامۆژگاریان کردم و مه‌شق کردن له‌ مه‌درید سه‌رچاوه‌ی خۆشیه‌کانمه‌

خه‌ڵک سپۆرت – ڕۆژنامه‌ی ئۆ گلۆبۆ

ڤینیسیۆز جونیۆری به‌رازیلی ئه‌ستێره‌ی هه‌ڵکشاوی یانه‌ی ریاڵ مه‌درید واده‌ی حه‌وانه‌وه‌کانی سه‌ری ساڵ له‌ وڵاته‌که‌ی خۆی به‌سه‌ر ده‌بات (به‌رازیل)، ڕۆژنامه‌ی “ئۆ گلۆبۆ” به‌هه‌لیان زانیوه‌ و چاوپێکه‌وتنێکی دوور و درێژیان له‌گه‌ڵدا ئه‌نجامداوه‌، زۆرینه‌ی ئه‌و پرسیارانه‌ش ئاڕاسته‌یان کردووه‌ ده‌رباره‌ی یانه‌ی ڕیاڵ مه‌درید و سه‌ره‌تاکانیه‌تی له‌و یانه‌ گه‌وره‌یه‌.

ئه‌مه‌ش کورته‌یه‌که‌ له‌چاوپێکه‌وتنه‌که‌:

سڵاو ڤینیسیۆز، سوپاس بۆ ئه‌م ده‌رفه‌ته‌…

سوپاس بۆ ئێوه‌، خۆشحاڵ ده‌بم به‌ چاوپێکه‌وتن له‌گه‌ڵتاندا، سڵاو بۆ خوێنه‌رانی ڕۆژنامه‌ مه‌زنه‌که‌تان.

یه‌که‌م نازناوت له‌گه‌ڵ یانه‌ی ڕیاڵ مه‌درید به‌ده‌ست هێنا، هه‌ست به‌ چی ده‌که‌یت؟

زۆر خۆشحاڵم و شانازی به‌خۆمه‌وه‌ ده‌که‌م که‌ یه‌که‌م نازناوم به‌درێسی ڕیاڵه‌وه‌ به‌ده‌ست هێنا، سه‌ره‌ڕای ئه‌وه‌ی ماوه‌یه‌کی که‌مه‌ له‌ یانه‌ نوێیه‌که‌م یاریی ده‌که‌م هه‌موو شته‌کان لێره‌ به‌خێرایی ڕوویاندا ئه‌وه‌ش وایکردووه‌ تاموچێژ له‌ ته‌واوی ورده‌کاری خه‌ونه‌کانم وه‌ربگرم، له‌گه‌ڵ ئه‌وه‌شدا هێشتا له‌داهاتودا تاقیکردنه‌وه‌ی زۆرمان له‌به‌رده‌مدایه‌ و هیوادارم نازناوی تریش بچنمه‌وه‌، من له‌ گه‌وره‌ترین یانه‌ی جیهان یاریی ده‌که‌م و لێره‌ به‌دیهێنانی ئه‌و خه‌ونانه‌ مه‌حاڵ نییه‌.

چاوه‌ڕوانت ده‌کرد له‌ جامی جیهانی یانه‌کان به‌شداریت پێبکرێت؟

له‌ڕاستیدا له‌و باوه‌ڕه‌دا نه‌بووم، سه‌ره‌تای وه‌رز له‌گه‌ڵ تیپی لاوانی ڕیاڵ ده‌ستم پێکرد و ئه‌وه‌ش کێشه‌ی بۆ دروست نه‌کردم و نه‌بووه‌ کۆسپ له‌به‌رده‌ممدا و ده‌مزانی له‌هه‌ر ساتێکدا بێت به‌رزم ده‌که‌نه‌وه‌ بۆ پێکهاته‌ی یه‌که‌م، به‌ڵام له‌و باوه‌ره‌دا نه‌بووم به‌و خێراییه‌ بگه‌مه‌ پێکهاته‌ی یه‌که‌م، سۆلاری ڕاهێنه‌ر شاره‌زای ئاست و تواناکانمه‌ و له‌ زۆرینه‌ی یارییه‌کاندا به‌شداری پێکردوم، زۆر سوپاسی ده‌که‌م چونکه‌ پێکهاته‌که‌مان چه‌ندین یاریزانی ناوازه‌ی تێدایه‌ و ململانێکانیش ئاسان نین.

 

“یاریزانانی ڕیاڵ مه‌درید زۆر به‌ڕێکوپێکی پێشوازیان لێکردم و یاریده‌یان دام به‌خێرایی خۆم بگونجێنم”

 

یاریزانانی پێکهاته‌ی یه‌که‌م چۆن پێشوازیان لێکردیت؟

زۆر به‌ڕێکوپێکی پێشوازیان لێکردم و یاریده‌یان دام به‌خێرایی خۆم بگونجێنم، لێره‌ هه‌مووان وه‌ک خێزانێکن و زۆربه‌یان ئامۆژگاریان کردم و باسی گرنگی قۆستنه‌وه‌ی ئه‌و هه‌لانه‌یان بۆ کردم که‌ له‌داهاتودا پێمده‌درێت، ئامۆژگاریان کردم چۆن تواناکانم هه‌ڵکۆڵم و به‌ره‌وپێش بچم، خۆشحاڵم ڕۆژانه له‌گه‌ڵ ده‌سته‌یه‌ک ئه‌ستێره‌ی جیهانیی‌ مه‌شق ده‌که‌م ئه‌وه‌ سه‌رچاوه‌ی خۆشی و شانازییه‌کانمه‌، حه‌زێکی له‌ڕاده ‌به‌ده‌رم هه‌یه‌ بۆ قۆستنه‌وه‌ی هه‌له‌کان و ئه‌نجامدانی مه‌شقه‌کان به‌وپه‌ڕی هێزه‌وه‌.

بێگومان مارسێلۆ و کاسیمێرۆ نزیکترین که‌س بوون لێته‌وه‌؟

ئه‌وه‌ ڕاسته‌، ئێمه‌ له‌هه‌مان وڵاته‌وه‌ هاتوین و ئه‌وان ئه‌زمونیان هه‌یه‌ و پێش من به‌م بارودۆخانه‌دا تێپه‌ڕیان کردووه‌، مارسێلۆ پێی وتم که‌ له‌هه‌مان بارودۆخدا په‌یوه‌ندی به‌ ڕیاڵه‌وه‌ کردووه‌ و به‌ هه‌وڵدان و کۆششی به‌رده‌وام هه‌موو شتێک له‌به‌رده‌میدا ئاسان بووه‌، هه‌روه‌ها کاسیمێرۆ ئامۆژگاری کردم که‌ به‌ چ هه‌وڵدانێک به‌و ئاسته‌ گه‌یشتووه‌ و بێگومان ئه‌و دوو یاریزانه‌ نمونه‌ن بۆ ژیانی من.

 

“چامپیۆنزلیگ گه‌وره‌ترین نازناوه‌ یانه‌یه‌ک به‌ده‌ستی ده‌هێنێت، زۆر په‌رۆشم بۆ یاریی کردن له‌م پاڵه‌وانێتیه‌ مه‌زنه‌”

 

له‌ مه‌درید پێیان وایه‌ تۆ داهاتوی ڕیاڵ مه‌دریدیت؟

هه‌موو ڕۆژێک بیر له‌ داهاتو ده‌که‌مه‌وه‌، به‌ڵام ته‌نها ته‌ماشای پێیه‌کانم ده‌که‌م و بیر له‌و ساته‌ ده‌که‌مه‌وه‌ که‌ تیایدا ده‌ژیم له‌به‌رئه‌وه‌ی به‌بێ به‌ره‌وپێشچون و به‌هێزکردنی تواناکانم له‌ ڕیاڵ مه‌درید هیچ داهاتویه‌کم نابێت، ئه‌وان هاتنه‌ به‌رازیل و هه‌موو شتێکیان کرد بۆ ئه‌وه‌ی له‌ پێکهاته‌که‌یاندا یاریی بکه‌م، منیش ده‌مه‌وێت وه‌ڵامی چاکه‌یان بده‌مه‌وه‌، به‌کورتی من به‌وشێوه‌یه‌ بیر ده‌که‌مه‌وه‌.

بیر له‌وه‌ ده‌که‌یته‌وه‌ نازناوی خولی یانه‌ پاڵه‌وانه‌کان به‌ده‌ست بهێنیت؟

ئه‌وه‌ گه‌وره‌ترین نازناوه‌ یانه‌یه‌ک به‌ده‌ستی ده‌هێنێت، زۆر په‌رۆشم بۆ یاریی کردن له‌م پاڵه‌وانێتیه‌ مه‌زنه‌ و به‌وپه‌ڕی توانامه‌وه‌ ده‌جه‌نگم بۆ ئه‌وه‌ی سود به‌ یانه‌که‌م بگه‌یه‌نم تا جارێکی تر نازناوه‌که‌ به‌ده‌ست بهێنێته‌وه‌.

چاوپێکەوتن

گنابری: لیرۆی سانی هاورێی نزیکمە، زۆر حەز دەکەم بەیەکەوە لە بایرن یاریی بکەین

خەڵک سپۆرت

سێرج گنابری ئەڵمانی ئەستێرەی یانەی بایرن میونشن چاوپێکەتنێک لەگەڵ ڕۆژنامەی “لیبوتێ”ی فەرەنسی ئەنجام دەدات، تیایدا وەڵامی چەندین پرسیاری گرنگ و پەیوەندیدار بە یانەکەیی و هەڵبژاردەی مەکینەکانی ئەڵمانیا دەداتەوە.

ئەمەش کورتەیەکە لە چاوپێکەوتنەکە:

بایرن چەندین گۆڕانکاری بەسەردا دێت، سەرۆکی یانە دەڕوات و یاریزانە بە ئەزمونەکانیش وازیان هێنا، داهاتووی یانەکە چۆن دەبینیت؟

بەش بەحاڵی خۆم وای دەبینم یانەکەمان خاوەنی پێکهاتەیەکی بەهێزە، ڕاستە سەرۆکی یانە و ڕۆبن و ڕیبێری ماڵئاواییان کردووە، بەڵام ئەگەر تەرکیز لەسەر داهاتوو بکەین باشتر دەبین، ئەوەی ڕوودەدات ئاساییە و لەهەموو یانەیەک ڕوودەدات.

جیاوازی نێوان خولی ئەڵمانیا و خولی ئینگلتەرا چییە، لەکاتێکدا تۆ لەهەردوو خولەکە یارییت کردووە؟

خولی ئینگلیزی زیاتر پشت بە هێزی جەستەیی دەبەستێت، پێموابێت ئەوە تەنها جیاوازی نێوانیانە.

چانسی بایرن لە خولی یانە پاڵەوانەکانی ئەوروپا چەندە؟

خولی یانە پاڵەوانەکان پاڵەوانێتیەکی ئاڵۆز و قورسە، ئێمە هەمیشە یانەیەکی ململانێکار بووین و لەنێو چوارچێوەی پاڵێوراوەکانداین، وەرزی ڕابردوو لە قۆناغی نیوەی کۆتایی بەرامبەر لیڤەرپوڵی پاڵەوان شکستمان هێنا، لەم وەرزەدا دەمانەوێت هەنگاوی زیاتر بنێین.

 

“کۆتینیۆ یاریزانێکی ئازا و جوامێرە و لەهیچ ڕکابەرێک ناترسێت، لە داهاتوودا سودی بۆ بایرن دەبێت”

 

مۆندیالی داهاتوو لە وڵاتی قەتەر دەبێت، بەنیازیت لەگەڵ هەڵبژاردەی ئەڵمانیا بەشداری بکەیت؟ بۆچونت چییە کە بۆ یەکەمین جارە لە وڵاتێکی عەرەبی ئەنجام دەدرێت؟

قورسە وەڵامت بدەمەوە، چونکە مۆندیال دوای سێ ساڵی تر ئەنجام دەدرێت و نازانم تا ئەوکاتە چی ڕوودەدات، بەڵام بە دڵنیاییەوە پەرۆشم بۆ بەشداریکردن تیایدا، ڕووداوێکی زەبەلاحە و خەونی هەمووانە، دەشزانم قەتەر خاوەنی توانایەکی زۆرە و لە ڕێکخستنی پاڵەوانێتیەکە سەرکەوتوو دەبێت.

ڕات چییە سەبارەت بە کڕینی کۆتینیۆ؟ لە سەرەتا دەرکەوتنەکانی بەدرێسی بایرنەوە لەخولی ئەڵمانیا چیت لێبەدی کرد؟

کۆتینیۆ یاریزانێکی ئازا و جوامێرە و لەهیچ ڕکابەرێک ناترسێت، هەمیشە دەیەوێت لەخزمەتی پێکهاتەکەدا بێت و بە دڵنیاییەوە لە داهاتوودا خزمەتێکی زۆری بایرن میونشن دەکات.

 

“بەبێ زیاد و کەم محەمەد سەڵاح یاریزانێکی زۆر نایابە، خەسڵەتەکانی ناوازەن، ئەنجام و دەستکەوتی باشی هەبووە”

 

ئامۆژگاریت بۆ لیرۆی سانێ چییە؟

بەڵێ، لیرۆی هاوڕێیەکی نزیکمە ، زۆر حەز دەکەم بەیەکەوە و بەدرێسی بایرنەوە یاریی بکەین.

پێتوایە نیکۆ کۆڤاچ پیاوی قۆناغە سەختەکانە و بۆ بایرن گونجاوە؟

کۆڤاچ ئەوەی نیشانداوە کە دەتوانێت کارێکی گەورە ئەنجام بدات، هەموو تواناکانی خۆی لەپێناو بایرندا بەگەڕخستووە، هیوادارم بەزوویی بتوانین بەیەکەوە ئەنجامە باشەکان بەدەست بهێنین.

ڕات چییە لەسەر تواناکانی محەمەد سەڵاحی میسڕی؟

بەبێ زیاد و کەم یاریزانێکی زۆر نایابە، خەسڵەتەکانی ناوازەن، ئەنجام و دەستکەوتی باشی هەبووە و ئەوەش بۆ مێژووی تۆمارکراوی لە بوارەکەدا زۆر باشە.

بەردەوام بە لە خوێندنەوە

چاوپێکەوتن

ڕۆبن: گواردیۆلا باشترین ڕاهێنه‌رم بووه‌ و ته‌مه‌ن و پێکان ڕێگه‌یان نه‌دا به‌رده‌وام بم

خه‌ڵک سپۆرت – بێلد سپۆرت

ئارێن ڕۆبنی هۆڵه‌ندی ئه‌ستێره‌ی ناوداری یانه‌ی بایرن میونشن له‌ هاوینی ٢٠١٩ وازهێنانی له‌ بواری تۆپی پێ ڕاگه‌یاند، حاڵی حازر یانه‌ ئه‌ڵمانیه‌ زه‌به‌لاحه‌که‌ له‌هه‌وڵدان پێگه‌که‌ی به‌ یاریزانێکی به‌توانا پڕبکه‌نه‌وه‌ و کڕینی فیلیپی کۆتینیۆ ده‌چێته‌ ئه‌و چوارچێوه‌یه‌وه‌، به‌ڵام پرسیاره‌که‌ ئه‌وه‌یه‌: ئایا ڕۆبن خۆی چۆن بیر له‌و بابه‌ته‌ ده‌کاته‌وه‌؟ وه‌ک وه‌ڵامێک بۆ ئه‌م پرسیاره‌ ڕۆژنامه‌ی “بێلد سپۆرت” چاوپێکه‌وتنێکیان له‌گه‌ڵدا ئه‌نجامدا و به‌م شێوه‌یه‌ وه‌ڵام ده‌داته‌وه‌:

سه‌باره‌ت به‌ کڕینی کۆتینیۆ له‌لایه‌ن بایرن میونشنه‌وه‌ بۆچونت چییه‌؟

زۆر خۆشحاڵم به‌ کڕینی یاریزانێک به‌و ئاسته‌ به‌رزه‌ له‌لایه‌ن یانه‌ی بایرن میونشنه‌وه‌، یاریزانێکی ناوازه‌یه‌ و خاوه‌نی چه‌ندین خه‌سڵه‌تی نایابه‌، هیوادارم له‌م وه‌رزه‌دا تواناکانی نیشان بدات و یاریده‌ده‌ری یانه‌که‌ بێت به‌وشێوه‌یه‌ی که‌ هه‌مووان چاوه‌ڕوانی ده‌که‌ن.

به‌درێژایی ماوه‌ی یاریکردنت، چ ڕاهێنه‌رێک له‌هه‌مووان زیاتر کاریگه‌ری له‌سه‌رت دروست کردووه‌؟

به‌درێژایی ماوه‌ی یاریکردنم له‌ یانه‌ی بایرن میونشن و چه‌ندین یانه‌ی گه‌وره‌ی تری ئه‌وروپا ژماره‌یه‌کی زۆر ڕاهێنه‌ری به‌توانا کاریان له‌گه‌ڵدا کردووم، به‌ڵام ئه‌گه‌ر پرسیاری ئه‌وه‌م لێده‌کیت کامیان به‌لامه‌وه‌ باشترینه؟‌ ڕاسته‌وخۆ پیپ گواردیۆلا هه‌ڵده‌بژێرم، به‌ کارکردن له‌گه‌ڵیدا زیاتر له‌ ڕاهێنه‌ره‌کانی ترتاموچێژم وه‌رگرت، ڕاهێنه‌رێکی نایابه‌.

بۆچی گواردیۆلا له‌ڕاهێنه‌ره‌کانی تر جیاوازه‌؟

کاتێک پیپ گواردیۆلا بووه‌ ڕاهێنه‌ری یانه‌ی بایرن میونشن من ته‌مه‌نم ٣٠ ساڵ بوو، له‌و ته‌مه‌نه‌دا یاریزان ته‌نها بیر له‌وه‌ ده‌کاته‌وه‌ پارێزگاری له‌توانا جه‌سته‌ییه‌کانی بکات، گرنگ به‌لای یاریزانه‌ به‌ته‌مه‌نه‌کانه‌وه‌ ئه‌وه‌یه‌ له‌ئاستێکی دیاریکراو به‌ره‌وخوار نه‌یه‌ن و خۆیان له‌ پێکان بپارێزن، به‌ڵام ئه‌وه‌ی له‌گه‌ڵ گواردیۆلا ڕوویدا شتێکی تر بوو، ئاستم به‌ره‌وسه‌ر ڕۆشت و تواناکانم زیاتر به‌ره‌وپێش چوون، هه‌روه‌ها له‌چه‌ندین پێگه‌ی جیاواز له‌نێو یاریگا یارییم کرد که‌ هه‌رگیز له‌و باوه‌ڕه‌دا نه‌بووم ڕۆژێک له‌ڕۆژان له‌و پێگانه‌دا یاریی بکه‌م، له‌به‌رئه‌وه‌یه‌ پێموایه‌ گواردیۆلا باشترین ڕاهێنه‌ره‌ له‌گه‌ڵیدا کارم کردووه‌.

 

“دوای وازهێنان له‌ جیهانی تۆپی پێ زۆر دوورناکه‌ومه‌وه‌، به‌نیازم تاقیکارییه‌کی تر له‌ژیانمدا ئه‌نجام بده‌م”

 

هه‌ست به‌چی ده‌که‌یت که‌ چیتر به‌ یه‌کجاره‌کی واز له‌یاریی تۆپی پێ ده‌هێنیت؟

هه‌ست و سۆزی تۆپی پێ و هه‌ستکردن به‌وه‌ی که‌هێشتا ده‌توانیت له‌بواری تۆپی پێدا شتێک بکه‌یت به‌ر واقعێکی به‌ئازار ده‌که‌وێت، بۆم ده‌رده‌که‌وێت که‌ من هێشتا ئه‌و لاوه‌ ١٦ ساڵه‌ نه‌ماوم گوێ به‌ پێکان نادات و به‌گڕوتینه‌وه‌ خه‌ونی ده‌رکه‌وتنی زیاتره‌، به‌ڵکو له‌به‌ر پێکان و ته‌مه‌ن‌ بڕیارمدا وازبهێنم.

به‌ته‌مایت له‌دوای وازهێنان چی بکه‌یت؟

دوای وازهێنان له‌ جیهانی تۆپی پێ زۆر دوورناکه‌ومه‌وه‌، به‌نیازم تاقیکارییه‌کی تر له‌ژیانمدا ئه‌نجام بده‌م که‌ کاری ڕاهێنانه‌، ده‌بمه‌ ڕاهێنه‌ری ئه‌و تیپه‌ی کوڕه‌ بچوکه‌که‌م یاریی بۆ ده‌کات.

بەردەوام بە لە خوێندنەوە

چاوپێکەوتن

کۆنتی: ئینتەرمیلان دەبێتە موفاجەئەی وەرز و دەبێت ڕکابەرە ئەورپیەکان لێمان بترسن

خەڵک سپۆرت – بی بی تی ڤی

لەم وەرزەدا هەمووان لە ماڵی ئینتەرمیلانەوە چاویان لەسەر ئەنتۆنیۆ کۆنتی ڕاهێنەری نوێی یانەکەیە، بەهیوان ئەم ڕاهێنەرە ئەزموندارە بتوانێت پڕۆژەیەکی سەرکەوتوو جێبەجێ بکات و وەرزی نوێ بیانگەڕێنێتەوە نێو گەورەکانی ئەوروپا، لەم بارەیەوە کەناڵی “بی بی تی ڤی” چاوپێکەوتنێکی لەگەڵ ئەنجام دەدەن و ڕاهێنەرەکە بە ڕاشکاوی وەڵامی پرسیارەکان دەداتەوە.

چاوەڕێ دەکەیت لە وەرزی نوێدا چ یانەیەک ببێتە موفاجەئەی ئیتاڵیا؟

هیوادارم ئەو موفاجەئەیەی باسی دەکەن یانەی ئینتەرمیلان بێت، چونکە یاریزانەکانم بەوپەڕی تواناوە کار لەسەر مەشقە ئامادەکارییەکان دەکەن و گڕوتینیان تێدایە، بەپرۆشن بۆ دەستپێکی وەرزی نوێ، بەو شێوەیەش دەکرێت بڵێم شایستەی نازناوەکانن.

لە خولی یانە پاڵەوانەکانی ئەوروپا ئامانجتان چییە؟

خولی یانە پاڵەوانەکان بابەتێکی جیاوازە و تیایدا ڕووبەرووی بەهێزترینەکانی کیشوەری ئەوروپا دەبینەوە، لەبەرامبەر گەورەیی ئەو یانانەدا ئێمە هەرگیز نابینە قوربانی، بەڵکو هەر یانەیەک بکەوێتە کۆمەڵەکەمانەوە پێویستە لێمان بترسێت، چونکە ئێمە ئینتەرین، ئامانجمان ئەوەیە لە وەرزی نوێدا هەیبەتی یانەکەمان بگێڕینەوە.

 

“لە پۆستی ڕاهێنه‌ری ئیتاڵیا هەست بە بابەتگەلێک دەکەیت کە لەهیچ پێگە و شوێنێکی تر هەستی پێناکرێت”

 

هێشتا سوریت لەسەر ئەوەی بە پلانی سێ بەرگریکار یاریی بکەیت؟

لەسەرەتای ئامادەکاریەکان بەو پلانە دەستمان پێکردووە و وای دەبینم لەسەری بەردەوام دەبین، ڕاهێنەران بەپێی توانا و ئیمکانیەتی یاریزانەکانیان پلان و تاکتیک دادەرێژن، لەڕاستیشدا پلان و تاکتیک لەچاو ڕوحیەتی جەنگاوەری و کۆڵنەدان گرنگیەکی ئەوتۆی نییە.

ڕات چۆنە دەربارەی ستیفن زهانگی سەرۆکی یانە؟

خاوەندارێتی یانەکەمان پێیان وابووە وەبەرهێنان لەیانەی ئینتەرمیلان باشترین ڕێگەیە و دەیانەوێت بۆچون و بیرۆکەکانیان لەپێناو گەڕانەوەدا جێبەجێ بکەن، نەک لەسەر ئاستی ئەوروپا، بەڵکو لەسەر ئاستی جیهان، کاتێک زهانگی سەرۆک لەنزیک خۆمەوە دەبینم، دەبینم گەنجێک بە ورەی پۆڵاین و خەونی گەورەوە دەیەوێت ئینتەر بگەڕێنێتەوە سەر ڕێڕەوی سەرکەوتنەکان.

بۆ وەرزی نوێ، چوار لە یانە گەورەکانی خولی ئیتاڵیا ڕاهێنەریان گۆڕیوە، چۆن لێکدانەوە بۆ ئەم بابەتە دەکەیت؟

هاتنی ڕاهێنەری نوێ واتا جێبەجێکردنی فەلسەفە و بیرۆکەی نوێ، بە پەرۆشەوە چاوەڕوانی ئەو ڕاهێنەرە نوێیانە دەکەم بۆ ئەوەی بزانم چییان پێیە بۆ یانەکانیان، گرنگترین ئەرکی ئەو ڕاهێنەرانە بریتیە لە دۆزینەوەی ڕێگەیەک بۆ گەیاندنی بۆچونەکانیان بە یاریزانان و پاشان جێبەجێکردنیان بەشێوەی پلان بۆداڕێژراو، لەبەرئەوەیە پێموایە وەرزی داهاتوو چێژبەخش دەبێت.

 

“ئێمە لێرە کارمان ئەوەیە یاریدەدەری یاریزانه‌ ئیتاڵیه‌کان بین بۆ بەدیهێنانی خه‌ونی یاریکردن له‌ پێکهاته‌ی هه‌ڵبژارده‌ی ئیتاڵیا”

 

لە ئەرکی ڕاهێنانی هەڵبژاردەی ئیتاڵیا و چێڵسی چ سودێکت وەرگرت؟

دوو تاقیکردنەوەی ناوازە بوون لە ژیانمدا، بونم بەڕاهێنەری هەڵبژاردەی ئیتاڵیا باشترین و گرنگترین جوڵەبوو کردم، چونکە لەو پۆستەدا هەست بە بابەتگەلێک دەکەیت کە لەهیچ پێگە و شوێنێکی تر هەستی پێناکرێت، هەروەها تاقیکاری چێڵسی لەڕووی ئەزمونەوە باشتری کردم، ئێستا هەست دەکەم لە پێشوو باشترم.

ڕات چییە دەربارەی ئەو یاریزانە ئیتاڵیانەی لەپێکهاتەکەدا یاریی دەکەن؟

ئەوەی ڕاستی بێت ئێمە لە ئینتەرمیلان خاوەنی چەند یاریزانێکی ئیتاڵی بەتواناین کە دەکرێت سودی گەورەمان پێبگەیەنن، پێشموایە شایستەی ئەوەن لەپێکهاتەی هەڵبژاردەی ئیتاڵیا بەشداریان پێبکرێت، ئێمە لێرە کارمان ئەوەیە یاریدەدەریان بین بۆ بەدیهێنانی ئەو خەونە.

بەردەوام بە لە خوێندنەوە

کوردستان