ئێمە لە تۆرە کۆمەڵایەتیەکان

وتار

كاتێك ئاشتی دەروونیمان تێك دەچێت

*مافپەروەر ڕەنج باراوی

خودای گەورە هەر لە سەرەتاوە كە مرۆڤی درووستكردوە ئەقڵی پێداوە، ئێمە دەبێت ئەوە بزانین كە نەوەی ئادەم و حەواین، ئەوان توانیان لەگەڵ شێوە ژیان و گووزەرانیان بگونجێن كە بە لاشەی ڕووتەوە یەكتریان دەبینی و شەرمیان لەیەكتر نەدەكرد و لە خۆشیەكانی ژیان بەشداربوون. كاتێك كەوتنە هەڵەوە ئاشتی دەروونییان تێكچوو، پێیان وابوو هەموو دونیا تێكچووە، بەڵام لە ڕاستیدا ئاشتی دەروونی ئەوان تێكچو بوو، چونكە سەرپێچی فەرمانی خودای گەورەیان كرد.
كاریگەری هەڵەكەیان زۆر بوو هەر ئەوەش بوو كە ئادەم ووتی :حەوا ئەو سێوەی لە دار كردەوە پێی دام منیش خواردم، ئا لێرەوە ئەو گوونجان و هاوژینی و پێكەوە ژیانە كەوتە مەترسیەوە، بێجگە لەوەش لەو نازو نیعمەتە بێ بەش بوون كەوتنە سەر زەوی كە دەبێت ئیتر بە ئارەقەی ناوچەوان نان پەیدا بكەن و خۆیان گوزەرانی خۆیان دابین و باشتر بكەن بەمەش ئەو دۆخەیان لێ شێوا كە لە ناو خۆشی باخاتی سروشتی پڕجوانیدا بوون ئەمەش بە هۆی هەڵەشەییەوە بوو، كە پاش ئەوە درووست بوون دەركران لە بەهەشت بۆ ئەوەی لەسەر زەوی كار بكەن و كەوتنە ناڕەحەتیەوە و ئاشتی دەروونیان تێكچوو بە هۆی ئەو سزایەی وەریانگرت، چونكە خۆیان بوونە هۆكاری وەرگرتنی سزاكەیان .
خودای گەورە سزای كەس نادات و پێی خۆش نیە بەندەكای دژوار بژین لە ژیاندا، بەڵام كاتێك لە بەهەشتێكدا نەتوانن بژین ئەوە دەبێت سزاكەی بچێژن هەر لێرەوە وەك میراتگر، تێكچوونی ئاشتی دەروونیمان بۆ ماوەتەوە، خوێنەری بەڕێز كاتێك بەشەڕ دێیت لەگەڵ (هاوژین، ئەندامانی خێزان، هاوڕێ‌، هاوكار، بەڕێوەبەرەكەت …هتد)، دەروونت دەشڵەژێت و ناتوانی خۆت پێ كۆنتڕۆڵ بكرێت، بە درێژایی ئەو ڕۆژە بێجگە لەوەی دەروونت شڵە ژاوە ویژدانیشت ئاسوودە نیە، چونكە دڵنیام لەڕێی كرداو پەرچەكردارەوە بەشداربوویت لە توندوتیژی، جا بە قسە بێت یان بە كردار یان بە جەنگی دەروونی بێت بۆیە هەر دوو لایەنی شەڕەكە كە بێ بەش نین لە هەڵە و تاوان، شەو كە خەوتیت خەون بە دیۆ و درنجەوە دەبینی یانیش بێ خەو و بێ تاقەت و ماندوو دەبێت، خەو لە چاوانتدا نامێنێ‌، بەیانیەكەشی زۆر بە بێگاری و بێزاریەوە لەسەر جێی هەڵدەستیت و لە ئەنجامی ناڕەحەتی دەروونیت، شەڕت لێ دەبێتەوە چونكە ئازار و ناسۆریت تێداماوە، هەربۆیە سەرت لێ دەشێوێ‌ بەدوای مۆبایلەكەتدا دەگەڕێیت و كەچی بەدەستی خۆتەوەیە یان كە ڕووخسارت دەشۆیت لەپڕدا سابوونەكە لەدەستت دەخزێ و جۆین دەدەیت بەو كارگەیەی درووستیشی كردووە، كاتێك كراسەكەت لەبەر دەكەیت قۆپچەكانی سەر و خوار دادەخەیت، كە گوێت لە زەنگی مۆبایلەكەت دەبێت، ناتەوێ وەڵامی بدەیتەوە و بەو بەیانیە نەرم و نیانیت پێ نانوێنرێت ئەمەش لە ئەنجامی تێكچوون و شڵەژانی ئاشتی ناوەوەیە كە ئاشتی دەروونیە بۆ یە هەركاتێك مرۆڤ كەوتە ئەو دژواریەوە لەگەڵ خودی خۆی و بەرانبەری، تەنانەت ڕێڕەوی مامەڵەی بەلای چەوتدا دەشكێتەوە و كاتێك كەسێك دەبینی لە حاڵەتی ئامادە باشیدایە بەر هەڵستی بكات ئەگەر قسەیەك یان شتێكی ئەو كەسەی بە دڵ نەبوو ئەمەش لە ئەنجامی ئەوەوە سەرچاوەی گرتووە كە هێشتا ڕق و كینە لەسینەیدا وەك گڕكان هەڵدەچێت، پێی وایە بەرانبەرەكەی مامەڵەی گۆڕیوە لەگەڵیدا بەڵام لە ڕاستیدا ئاشتی دەروونی كەسەكە خۆی تێكچووە و واهەست دەكات كە شتەكانی دەورو بەریشی لە دژی ئەون، بۆیە هەركاتێك كێشەت زۆر بوو و ئاستەنگەكانی ژیانت بۆ درووستبوو واچاكە پشكنینێكی دەروونی خۆت بكەیت لە ڕێی پێداچوونەوە و هەڵسەنگاندنت بۆ كەسایەتی خۆت پێش ئەوەی كە بڕیاری بەرەنگار بوونەوە بدەیت، پێویستە مرۆڤ ئەو پرسیارە لە خۆی بكات تاكەی من لەو تەنگەژە و شڵەژانی دەروونیەدا بژیم لەكۆمەڵگادا؟، كێشەكان چین؟ بۆچی بۆم كۆنتڕۆڵ ناكرێت؟.
مرۆڤ كاتێك چاویلكەی ڕەش لە چاو دەكات یان قاوەیی یان شین یان زەرد پێی وایە كە هەموو ڕەنگەكان وان گۆڕاون، بەڵام لە ڕاستیدا گۆڕانكاری لە بینینەكەدا بەقەد ئەندازەی بینینی لە چاویلەكەكەیەوە گۆڕاوە .
بۆیە دەبێت تا بتوانین بە هێز بین لە پەسەندكردنی ڕەنگەكانی ژیان، مرۆڤ هەمیشە داوا لە خودا دەكات (بێ كێشە بێت لە هێمنیدا بژی، منداڵی پێبدا، دەوڵەمەندی بكات….هتد) دەبێت لە بری ئەو نزایانە داوا لە خودا بكەین تواناو ووزەمان پێ ببەخشێت كە بتوانین كۆنتڕۆڵی نەبوونی ئەو پێداویستیانە بكەین، بە دەروونێكی ئارام و بێ كێشەوە، ئەم ئاشتیە زۆر پڕ شكۆیە كە هەتبێت چونكە ڕووبەڕووی گەورەترین نەهامەتیە سرووشتیەكان دەبێتەوە، كاتێك مرۆڤ تووشی كێشە دەبێتەوە نابێت ڕابكات لێی و لاواز بێت لەبەردەمیدا، بگرە دەبێت بتوانێ هەڵ بكات لەگەڵ كێشەكانی ژیانیدا و لەوەش گرنگتر بتوانێت زاڵ بێت بەسەریدا بەمەش ئاشتی دەروونی دەچەسپێت لە دەروونیدا، چیتر لە دڵە ڕاوكێ و كێشمە كێشی ژیاندا لە بازنەیەكی داخراودا ناخولێتەوە.
هەر یەكێك لە ئێمە لە ژیاندا دووچاری دوو كێشەی سەرەكی دەبێتەوە یەكەم لەگەڵ كێشەكانی خودی خۆماندا دووهەم لەگەڵ ئەو كێشانەی كە لە دەوروبەروە سەرچاوە دەگرێت بۆمان و دووچاری گرفت دەبینەوە بۆیە ئەگەر بمانەوێت یان چاوەڕوان بین كێشەكانمان كۆتایی بێت و ئاشتی دەستەبەر بكەین ئەوا تا دەمرین سەر دەنێینەوە بەو ئاواتەوە.
*باڵیۆزی ئاشتی

وتار

ترەمپ واز لە دیوارەكە دەهێنێت

لوقمان غەفور

دواوتاری سەرۆك ترەمپ كە دوانیوەڕۆی 19ی جێنیوەری پێشكەشی كرد پێماندەڵێت، سەرۆك ترەمپ كە بڕیاردەرێكی خێرا و پەشیمانبووەكی درەنگ وەختە، ئەمریكییەكان ئیدیۆمێكیان هەیە و دەڵێن “non starter” ئەمە لەئەمریكا بەكەسێك دەوترێت كە لە پێشبڕكێیەكدا شكست بهێنێت.

لەدوای وتارەكەی سەرۆك ترەمپ دیموكراتەكان بە سەرۆك ترەمپ دەڵێن: ترەمپ “non starts”، دیموكراتەكان ئەمەیان پێراستە، بەڵام لەخوێندنەوەی واقیعیدا وانییە، لە هەموو كێبڕكێیەكدا هەموو دەستكەوتەكان بەقازانجی لایەك كۆتایی نایەت، سەرۆك ترەمپ دوو شتی كرد، توانی بەدەنگدەرەكانی بڵێت رێدەگرم لە كۆچی نایاسایی بۆ ئەمریكا و ئەوە دیموكراتەكانە دەرگایان كردۆتەوە، ئەو بەڵێنەی كە دابووشی بە دەنگدەرانی هێناویەتەدی، چونكە ئەگەر نەتوانێت دیوارەكەش دروست بكات توانیویەتی هەموو بەرنامەكانی كۆچ بە یاسایی و نایاساییەوە بەكاوەخۆ راگرێت، ئێ ئەوەش یەكێك لە بەڵێنەكانی كەمپینەكەی بووە، چونكە سەرۆك ترەمپ لەوتارەكەیدا وێرای ئەوەی ئاماژەی دایەوە بەوەی لەسنووری باشور “قەیرانی مرۆیی” دەگوزەرێت، لەو سنوورە منداڵەكان “ئیستغلال” دەكرێن لەلایەن باندە هەڵخەلەتێنەرەكانەوە و ژنان “دەستدرێژی”یان دەكرێتەسەر بەناوی كۆچەوە و “كۆچی نایاسایی و داواكردنی پەنابەریی” تێكەڵ بووە، نەشیشاردەوە و وتی:”من لەكاتی بوون بەسەرۆكدا بەڵێنی چارەسەركردنی ئەو قەیرانەم پێداون.”

ترەمپ وەڵامدانەوەیەكی میهرەبانانەی دەوێت دەربارەی ئەو قەیرانەی لەسنووری باشور هەیە و دەڵێت: “ئومێد دەكەم دیموكراتەكان بە “پرۆژە یاسایەك” بۆچاككردنی ئەو قەیرانە “پاڵپشتێكی جەسوور”یان هەبێت و دەشڵێت: “رێگەنادەم ئەوە رووبدات و بوترێت دیوارەكان نائەخلاقییە، بەڵكو لەواقیعدا پێچەوانەی ناخلاقییە”.

هەروەها ئەم بانگەوازەی ترەمپ ئەوەی لێدەخوێنرێتەوە كە توانی لە سەقفێكی بەرزی داواكارییەوە بێتە سەر ئەوەی دیموكراتەكان هەر هیچ نەبێت قایل دەبن بە چاككردنی یاساكانی پەنابەری و ئەو لێشاوەی ساڵانی ڕابردوو بۆ ئەمریكا كۆتایی پێدێنێت بەتایبەتی لەئەمریكای لاتینەوە و ئەو هەزاران منداڵەی دەهێنرێنە ئەمریكا.

مێتش ماكۆنێل سەرۆكی زۆرینە لەئەنجومەنی پیران دوابەدوای ئەم داوایە وتی: “ئەنجومەنی پیران دادەنیشێت بۆ گفتۆگۆی ئەم بانگەوازە”.

دیموكراتەكان پێیانوانییە ئەو داوایانەی ترەمپ لە ئەنجومەنی نوێنەران بڕوات و دەنگ بهێنێت، هەر بۆیە نانسی پێلۆسی دوابەدوای وتارەكە وتی:”بەداخەوە، ئەو پێشنیارانەی كە كردوونی پێشتر وتراون و بەتەواوی رەتكراونەتەوە، ئەو پێشنیارانە چارەسەری هەمیشەییان تێدا نەبوو كە زۆریان وڵاتەكەمان پێویستی پێیەتی.”

ماوەی دوو مانگی رابردوو سەرۆك ترەمپ لەشەرێكی سەختدا بوو ئەو توانیویەتی قەناعەت بەبەشێكی زۆری كۆمەڵگەی ئەمریكی بكات كە پەنابەری نایاسایی ترسێكی گەورەیە لەئەمریكا، لەتواناشیدایە سنووری باشور بەتەواوی دابخات، هەموو ئەو یاسایانەی كە ئەمریكای پێ باركراوە پەكیان بخات هەروەك لەم دوو ساڵەدا پەكیخستوون، بەڵام ترەمپ خۆی گەشبینیەكیشی پێوە بوو بەوەی كە كۆشكی سپی دەتوانێت ئەو “ئاستەنگییە بشكێنێت” لەچەند رۆژی رابردوودا و كۆتایی بە شەتداونی حكومەت بهێنرێت.

شەتداونی حكومەت رۆژی سێشەممە دەچێتە قۆناغێكی نوێ-ەوە، دیموكرات و كۆمارییەكانیش لە خراپی دۆخی شەتداون تێگەیشتوون و دەشێت فشاری هەواڵگری ئەمریكا-ش یان لەسەر بێت.

بەردەوام بە لە خوێندنەوە

وتار

پۆست و ئیمتیازات، یان خەمی خەڵك؟

ئومێد بابان

زياتر 110 ڕۆژ بەسەر هەڵبژاردنی پەرلەمانی كوردستاندا تێدەپەڕێت، بەڵام بە هۆی ناكۆکیی لایەنە سیاسییەكانەوە لەسەر پۆست و ئیمتیازات، تا ئێستا حكومەت پێكنەهاتووە و سەرۆكایەتیی پەرلەمانیش هەڵنەبژێردراوە و دەستبەكارنەبووە.

پارتی دیموكراتی كوردستان، كە براوەی یەكەمی هەڵبژاردنەكانە، شاندێكی دانوستانكاری پێكهێناوە و تا ئێستا چەند گەڕێكی گفتوگۆ و دانوستانی لەگەڵ لایەنە سیاسییەكانی خاوەن كورسیی پەرلەمانی كوردستاندا بەڕێوە بردوون و تا ڕادەیەكیش لێكنزیكبوونەوە سەبارەت بە هەیكەلی نوێی حكومەت لە نێوان لایەنەكاندا هەیە، هێشتا نەگەیشتوونەتە ڕێككەوتنی كۆتایی.

لە هەموو دنیادا باوە، كە هەڵبژاردن بەڕێوە دەچێت، دوای ئاشكراكردنی ئەنجامە فەرمییەكان، حزبی زۆرینە بۆ پێكهێنانی حكوومەت ڕادەسپێردرێت و بە گەنگەشە و لێكتێگەیشتن و رێككەوتن، كابینەی نوێی حكوومەت پێكدەهێنرێت، بێگومان ئەوەش پێویستی بە كات هەیە و شتێكی ئاساییشە، بەڵام كاتێك 110 ڕۆژ بەسەر هەڵبژاردنی پەرلەمانی كوردستاندا تێدەپەڕێت، دەبێ بپرسین، كێ زیانمەندی سەرەكیی دواكەوتنی پێكهێنانی حكوومەتە؟

لە سۆنگەی باوەڕبوون بە یەكێك لە پایە سەرەكییەكانی دیموكراسی، كە ئازادیی هەڵبژاردنە، ئەو مافە بە هاونیشتمانیانی هەرێم دراوە دەنگ بەو لایەنە بدەن كە باوەڕیان وایە لە كۆی كایە جیاوازەكانی ژیاندا دەتوانێ زۆرترین خزمەت بە كۆمەڵگا بكات، بەڵام بیرمان نەچێت كە هاووڵاتیان هەم ئەركیان لە ئەستۆیە و هەم خاوەنی مافیشن.

ئەركی هاونیشتمانیان ئەوەیە كە ئازادانە دەنگ بدەن و خاوەنی بڕیار بن لە هەڵبژاردندا بەوەی كە دەنگ بە كام حزب و لایەنی سیاسی دەدەن، مافی خۆیشیانە چاوەڕوانییان لەو حزبانە هەبێت كە دەنگیان پێداون، تا لە رێگەی پۆستە حكومییەكانەوە، زیاترین خزمەتیان لە تێكڕای بوارە جوداكانی ژیاندا بكەن.

بۆیە، پێویستە هەرچی زووترە لایەنە سیاسییەكان هەوڵی جیددی بدەن بۆ رێككەوتن سەبارەت بە پێكهێنانی كابینەی نۆیەمی حكومەتی هەرێمی كوردستان و دەستبەكاربوونی پەرلەمان، چونكە دەبێ بیریان بهێنرێتەوە، كە هەموویان بە دەنگی خەڵك و بە پێی قەبارەی خۆیان، كورسیی پەرلەمانییان مسۆگەر كردووە و دەبێ ڕێز لە ئیرادەی خەڵك بگرن.

ئەوەی كە تا ئێستا دەبینرێت و گومانیش هەڵناگرێت، تەنیا هاووڵاتیان زەرەرمەندی پلە یەكن لە دواكەوتنی پێكهێنانی حكوومەتدا، چونكە حكومەتی كاربەڕێكەر تواناكانی سنووردارن و پڕۆژە خزمەتگوزاری و ئەوانەی كە پەیوەندیی ڕاستەوخۆیان بە ژیانی خەڵكەوە هەیە، تا ئاستێك پەكیان كەوتووە.

هەمووانیش دەزانن، خەمی خەڵك، دابینكردنی بژێوی، ئاو، كارەبا، سووتەمەنی، هەلی كار، (دامەزراندن بەپێی بەرنامە لە كەرتی گشتی و تایبەتدا)، دەستپێكردنەوەی پڕۆژە ژیانییەكان و خزمەتكردنیان لە سەرجەم كەرتە جیاوازەكاندا، لە سەرووی هەموو خەمەكانەوەن، كە بە دواكەوتنی پێكهێنانی حكومەت، خەمەكان قووڵتر دەبنەوە و هەرچی درەنگتر بێت و دەستوبرد لە دەستبەكاربوونی پەرلەمان و حكومەتدا نەكرێت، زیاتریش دەبن، بۆیە پێویستە هەموو حزبەكان، ئەوانەی بڕیاریان داوە بەشداری لە حكوومەتدا بكەن، لە پێناو هەڵگرتنی باری سەرشان و خەمەكانی خەڵكدا، سازش بۆ یەكدی بكەن و لە هەندێك پۆست و ئیمتیازات و حەقی خۆیان خۆش بن، تا هاونیشتمانیانیش هەست نەكەن تەنیا بۆ كاتی دەنگدان بەكار دەهێندرێن و دواتر كەس خۆی ناكاتە ساحێب و خەمێكی بچووكیشیان لە كۆڵ نانێت.

بەردەوام بە لە خوێندنەوە

وتار

كاریزمایی سەرۆك بارزانی لە گۆڕینی هاوكێشەكانی هێز لە ناوچەكەدا

محەمەد عەلی

زۆرینەی سیاسییەكانی كوردستان و ناوچەكە، لە ۱٦ی ئۆكتۆبەردا چاوەڕوانی كۆتاییهاتنی كیانی هەرێم بوون و هەندێكی تریان وەك بەدیل خۆیان دەناساند بۆ دەسەڵاتی ئێستای هەرێم، بەڵام ئەنجامی ئەم هەموو پیلانگێڕییە، مانەوەی هەرێم و سەركەوتنی پارتی و بارزانی بوو لە كۆتا هەڵبژاردنی كوردستان و عێراقدا.

 

سەرەتا پیلانداڕێژەرانی ڕووداوەكان لە بەغداوە دەستیان پێكرد و رێك كەوتن بە هۆی هێزەوە كۆتایی بە قەوارەی هەرێمی كوردستان بهێنن، بەڵام كۆتا سەردانی سەرۆك بارزانی بۆ بەغدا و راخستنی فەرشی سوور و ناوهێنانی بە سەرۆكی هەرێم لەلایەن عادل عەبدولمەهدی سەرۆكوەزیرانی عێراق، لە كاتێكدا هیچ پۆستێكی فەرمیی نییە، هاوكاتە لەگەڵ ئەو لێكتێگەیشتنەی لە پرسی بودجەی عێراق بۆ ساڵی ۲٠۱۹ لە نێوان هەرێم و بەغدا لە ئارادایە، هەموو ئەمانەش ئاماژەی ڕوونن بۆ ئەوەی كە تا ئێستاش لە بەغدا سەرۆك بارزانی وەك تاكە نوێنەری كورد مامەڵەی لەگەڵدا دەكرێت.

 

چارەنووسی عەبادی و تیلرسۆن و برێت ماكگۆرگ لە هەموو شتێك زیاتر شاهیدن، لەسەر ئەو راستییەی ئیتر هاوكێشەكان لەمە بەدوا گۆڕانكاریی زۆریان بەسەردا هاتووە و ئەم ترافیكە سیاسییەی هەرێمی كوردستان و عێراق بەخۆیەوە دەبینێ، لە كاتێكدایە هەمووان بە بێ دیداری سەرۆك بارزانی، عێراق جێناهێڵن، لێرەوە دەتوانین بڵێین لە داهاتوویەكی نزیكدا چاوەڕێی گۆڕانكاریی زیاتر دەكرێ لە بەرژەوەندیی كورددا.

 

لە كاتێكدا بەریتانییەكان پیلانداڕێژەری سەرەكیی روداوەكان بوون، ئێستا بە دەستبەتاڵی دەرچوون و نەوتەكەی كەركووك بۆ ئێران دەڕوات و ئەمەریكییەكان بە هێزەوە گەڕاونەتەوە ناوچە كوردستانییەكان، سەردانی بەردەوامی شاندە بەریتانییەكانیش بۆ هەرێم، بە جۆرێكە دەتوانین بڵێین لەوە گەیشتوون بۆ بەدەستهێنانەوەی پێگەیان لە ناوچەكەدا، تەنها چارەسەر گەڕانەوە بۆ لای بارزانییە.

 

ناكرێ رۆڵی نێگەتیڤانەی ئەمەریكییەكان نادیدە بگیرێت لە رووداوەكانی ۱٦ی ئۆكتۆبەردا، بەڵام دەكرێ سەردانی هەردوو وەزیری وزە و دەرەوەی ئەمەریكا لە ماوەی یەك مانگدا بۆ هەرێمی كوردستان، بە راستكردنەوەی هەڵەكانی پێشوو هەژمار بكرێت و لە هەمان كاتدا گرینگیی پێگەی هەرێمی كوردستان دەردەخات لە ڕووی سیاسی و ئابوورییەوە لە داهاتوودا.

 

سەردانی وەزیری دەرەوەی فەڕەنسا بۆ كوردستان، لە پاش بڕیاری سەرۆكی ئەمەریكا دێت بە كشانەوەی هێزەكانی لە سووریا و بڵاوەپێكردنی هێزەكانی لە عێراق، بۆیە گەر سەیری كاتی ئەنجامدانی بكەین، مەبەستی سەرەكیی سەردانەكەمان بۆ روون دەبێتەوە، كە ئەو دۆستە هەمیشەییەی كورد، هەوڵ دەدات ڕۆڵێكی بەهێزتر بگێڕێت لە ناوچەكەدا، باشترین سەركردەش یارمەتیدەر بێ بۆ ئەو مەبەستە، سەرۆك بارزانییە.

 

وەك ئاشكرایە، ئێران لایەنی جێبەجێكار بوو لە رووی سەربازی و پێشەنگ لە گەمارۆدانی هەرێم، بەڵام لە ئێستادا هاوكێشەكان تەواو پێچەوانەن، هێزە سەربازییە نزیكەكانی ئەو وڵاتە لە پاشەكشەدان و لە رووی ئابووریشەوە لە بارودۆخێكی زۆر خراپدایە، بۆیە كۆڕبەندی ئابووری لە هەرێم  ئەنجام دەدات و وەزیری دەرەوەشی سەردانی هەرێمی كوردستان دەكات، ئەم هەنگاوە ئەرێنیانەی ئێران بەرامبەر بە هەرێم، دەرخەری ئەو راستییەیە، كە بە حیكمەت و كاریزمایی سەرۆك بارزانی، لە ماوەیەی یەك ساڵدا توانراوە ئەم هەموو هاوكێشانە لە بەرژەوەندیی كوردستاندا گۆڕانكارییان بەسەردا بێت.

بەردەوام بە لە خوێندنەوە
کام لەم وەزارەتانەی کابینەی ٨ لە ئاست خزمەتکردن بە هاولاتیان جێدەستی دیار بووە؟

کوردستان

دوایین